‘वाय’ चित्रपट ठरला सर्वोत्कृष्ट

दीपक डोब्रियाल आणि मृण्मयी देशपांडे ठरले सर्वोत्कृष्ट अभिनेता – अभिनेत्री

संजय पाटील यांचे ‘आभाळसंग मातीचं नांदन’ ठरले उत्कृष्ट गीत

मुंबई, दि. २३:   सांस्कृतिक कार्यक्रमांची मेजवानी, कलाकारांचे बहारदार नृत्य, कार्यक्रमांच्या प्रारंभीच सादर झालेली गणेश वंदना आणि शिवराज्याभिषेक ३५० व्या वर्षपूर्तीच्या पार्श्वभूमीवर सादर झालेल्या कार्यक्रमांनी ५७ व्या राज्य मराठी चित्रपट पुरस्कार सोहळ्यात चांगलीच रंगत भरली. यावेळी दादासाहेब फाळके सर्वोत्कृष्ट चित्रपटाचा मान ‘वाय’ या चित्रपटाने मिळविला. या चित्रपटाचे दिग्दर्शक अजित वाडीकर यांना भालजी पेंढारकर सर्वोत्कृष्ट दिग्दर्शक म्हणून गौरविण्यात आले.  ‘बाबा’ चित्रपटातील भूमिकेसाठी दीपक डोब्रियाल यास उत्कृष्ट अभिनेता तर ‘मिस यू मिस्टर’ मधील भूमिकेसाठी मृण्मयी देशपांडे हिला उत्कृष्ट अभिनेत्री पुरस्कार मिळाला. मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या उपस्थितीत या पुरस्कारांचे वितरण झाले.

वरळी येथील डोम, एन.एस.सी.आय येथे गुरुवारी रात्री राज्य मराठी चित्रपट पुरस्कार सोहळा रंगला. मुख्यमंत्री श्री. शिंदे, उपमुख्यमंत्री श्री. फडणवीस यांच्यासह सांस्कृतिक कार्य मंत्री सुधीर मुनगंटीवार, शालेय शिक्षण मंत्री दीपक केसरकर, आमदार ॲड. मनीषा कायंदे, मुख्यमंत्र्यांचे प्रधान सचिव तथा सांस्कृतिक कार्य विभागाचे प्रधान सचिव विकास खारगे, सांस्कृतिक कार्य संचालक बिभीषण चवरे, किरण शांताराम, जब्बार पटेल, सचिन पिळगावकर, महेश कोठारे, महेश मांजरेकर आदींसह चित्र नाट्य सृष्टीतील अनेक नामवंत उपस्थित होते.

याच पुरस्कार सोहळ्यात महाराष्ट्र शासनाकडून दिला जाणारा राज्याचा सर्वोच्च नागरी सन्मान असणारा ‘महाराष्ट्र भूषण’ पुरस्कार ज्येष्ठ अभिनेते अशोक सराफ यांना तर मानाचा ‘गानसम्राज्ञी लता मंगेशकर पुरस्कार’ ज्येष्ठ पार्श्वगायक सुरेश वाडकर यांना मुख्यमंत्री एकनाथ शिंदे यांच्या हस्ते प्रदान करण्यात आला. तसेच, मराठी व हिंदी चित्रपटसृष्टीसाठी आपल्या कलेच्या माध्यमातून अनेक वर्ष योगदान देत रसिकांची व कलासृष्टीची सेवा करणाऱ्या ज्येष्ठ कलावंतांना दिला जाणारा ‘राज कपूर जीवनगौरव आणि विशेष योगदान पुरस्कार’, ‘चित्रपती व्ही. शांताराम जीवनगौरव आणि विशेष योगदान पुरस्कार’ही यावेळी प्रदान करण्यात आले.

राज्य चित्रपट पुरस्कार सोहळ्यातील विविध वर्गातील पुरस्कार विजेते :

दादासाहेब फाळके सर्वोत्कृष्ट चित्रपट क्र.१ –

वाय (अजित वाडीकर), भालजी पेंढारकर सर्वोत्कृष्ट दिग्दर्शक क्र.१ – वाय ( अजित वाडीकर). बाबूराव पेंटर उत्कृष्ट चित्रपट क्र.2 – मिस यु मिस्टर (श्रीम. दिपा त्रेसी). राजा परांजपे उत्कृष्ट दिग्दर्शक क्र. 2 -मिस यु मिस्टर (समीर जोशी). मा. विनायक उत्कृष्ट चित्रपट क्र.3 –  स्माईल प्लिज (श्रीम. निशा सुजन /श्रीम, सानिका गांधी). राजा ठाकूर उत्कृष्ट दिग्दर्शक क्र.3- स्माईल प्लिज ( विक्रम फडणीस).

अनंत माने ग्रामीण प्रश्न हाताळणारा चित्रपट-  (ताजमाल) नियाज मुजावर.

दादा कोंडके ग्रामीण प्रश्न हाताळणारा चित्रपट – ताजमाल ( कुलभूषण मंगळे).

दत्ता धर्माधिकारी सामाजिक प्रश्न हाताळणारा दिग्दर्शक -समीर विद्वांस (आनंदी गोपाळ).

व्ही. शांताराम सामाजिक प्रश्न हाताळणारा चित्रपट- आनंदी गोपाळ (मंगेश कुलकर्णी).

प्रथम पदार्पण चित्रपट निर्मिती –  विशबेरी ऑनलाईन सर्विसेस प्रा.लि (झॉलिवूड).

प्रथम पदार्पण चित्रपट दिग्दर्शक – अच्युत नारायण (वेगळी वाट).

उत्कृष्ट अभिनेता कै. शाहू मोडक पारितोषिक  व श्री शिवाजी गणेशन पुरस्कार -दीपक डोब्रियाल (बाबा).

उत्कृष्ट अभिनेत्री (कै.स्मिता पाटील पारितोषिक) – मृण्मयी देशपांडे (मिस यू मिस्टर).

उत्कृष्ट प्रथम पदार्पण अभिनेता – कै.काशिनाथ घाणेकर पारितोषिक -अजित खोब्रागडे (झॉलिवूड).

उत्कृष्ट प्रथम पदार्पण अभिनेत्री कै. रंजना देशमुख पारितोषिक – अंकिता लांडे (गर्ल्स).

उत्कृष्ट विनोदी अभिनेता कै. दामूअण्णा मालवणकर पारितोषिक -पार्थ भालेराव (बस्ता).

सहाय्यक अभिनेता – कै. चिंतामणराव कोल्हटकर पारितोषिक –  रोहित फाळके (पांघरुण).

सहाय्यक अभिनेत्री – कै. शांता हुबळीकर व कै. हंसा वाडकर पारितोषिक – नंदिता पाटकर (बाबा).

उत्कृष्ट नृत्य दिग्दर्शक – राज्याभिषेक गीत सुभाष नकाशे (हिरकणी).

उत्कृष्ट पार्श्वगायिका- मधुरा कुंभार (गीत- आभाळसंग मातीचं नांदन ,मिस यू मिस्टर).

उत्कृष्ट पार्श्वगायक – सोनू निगम ( गीत- येशील तू, हिरकणी).

उत्कृष्ट पार्श्वसंगीत- प्रफुल्ल – स्वप्निल (स्माइल प्लिज).

उत्कृष्ट संगीत -कै. अरुण पौडवाल पारितोषिक  – अमितराज (हिरकणी).

उत्कृष्ट गीते – कै.ग. दि. माडगूळकर पारितोषिक –  संजय कृष्णाजी पाटील (गीत- आभाळसंग मातीचं नांदन, हिरकणी).

उत्कृष्ट संवाद- कै.आचार्य अत्रे पारितोषिक

इरावती कणिक (आनंदी गोपाळ).

उत्कृष्ट पटकथा-  विक्रम फडणीस,इरावती कर्णिक (स्माईल प्लिज),

सर्वोत्कृष्ट कथा – कै. मधुसूदन कालेलकर पारितोषिक -पांघरुण.

याशिवाय, तांत्रिक गट आणि उत्कृष्ट बालकलाकार पुरस्कारही यावेळी देण्यात आले. यामध्ये, उत्कृष्ट कला दिग्दर्शन-(कै. साहेबमामा ऊर्फ फत्तेलाल पारितोषिक ) – सुनील निगवेकर, निलेश वाघ (आनंदी गोपाळ).

उत्कृष्ट छायालेखन ( कै. पांडुरंग नाईक पारितोषिक) – करण बी. रावत (पांघरुण)

उत्कृष्ट संकलन- आशिष म्हात्रे, श्रीमती अपूर्वा मोतीवाले (बस्ता).

उत्कृष्ट ध्वनीमुद्रण – अनुप देव (माईघाट),

उत्कृष्ट ध्वनिसंयोजन – मंदार कमलापूरकर (त्रिज्या),

उत्कृष्ट वेशभूषा- विक्रम फडणीस (स्माईल प्लिज),

उत्कृष्ट रंगभूषा – श्रीमती. सानिका गाडगीळ (फत्तेशिकस्त)

उत्कृष्ट बालकलाकार (कै. गजानन जहागिरदार पुरस्कार)  – आर्यन मेघजी (बाबा).

या दिमाखदार सोहळ्याचे सुत्रसंचलन अभिनेता अमेय वाघ आणि अभिनेत्री वैदेही परशुरामी यांनी केले.

०००

दीपक चव्हाण/वि.सं.अ

मुंबई, दि. 23 : महाराष्ट्र आरोग्य विज्ञान विद्यापीठाचा 23 वा वार्षिक दीक्षान्त समारोह राज्यपाल तथा विद्यापीठाचे कुलपती रमेश बैस यांच्या दूरस्थ उपस्थितीत संपन्न झाला.

यावेळी राज्यपालांच्या हस्ते डिजिटल माध्यमातून विद्यापीठाच्या ‘ई – प्रबोधिनी : लर्निंग मॅनेजमेंट सिस्टीम’चे उद्घाटन करण्यात आले, तसेच ‘ब्लूप्रिंट ऑफ बॅचलर ऑफ डेंटल सर्जरी’ या क्रमिक पुस्तकाचे प्रकाशन करण्यात आले.

यावेळी आरोग्य क्षेत्रातील उल्लेखनीय योगदानाबद्दल डॉ ख्रिस्तोफर डिसुझा यांना डी. लिट. ही मानद पदवी प्रदान करण्यात आली.

नाशिक येथील विद्यापीठ परिसरात झालेल्या दीक्षान्त सोहळ्याला विद्यापीठाचे प्रकुलपती तथा वैद्यकीय शिक्षण मंत्री हसन मुश्रीफ, केएलई अकादमी ऑफ हायर एजुकेशन अँड रिसर्च  बेळगाव डॉ. नितीन गंगणे, वैद्यकीय शिक्षण विभागाचे प्रधान सचिव दिनेश वाघमारे, विद्यापीठाच्या कुलगुरु ले. जन. (नि.) डॉ. माधुरी कानिटकर, प्रकुलगुरु डॉ. मिलिंद निकुम्ब, कुलसचिव डॉ. राजेंद्र बंगाल, विविध विद्याशाखांचे अधिष्ठाता, प्राधिकरणाचे सदस्य, अध्यापक व स्नातक उपस्थित होते.

दीक्षान्त सोहळ्यात १०३०२ स्नातकांना पदवी प्रदान करण्यात आली. एकूण २६ उमेदवारांना पीएचडी तर १११ गुणवंत स्नातकांना सुवर्ण पदके व प्रमाणपत्र प्रदान करण्यात आली.

0000

Governor presides over 23rd Convocation of

MUHS / Dr Christopher D Souza awarded D.Litt.

Maharashtra Governor and Chancellor of universities Ramesh Bais presided over the 23rd Annual Convocation ceremony of Maharashtra University of Health Sciences (MUHS) through online mode.

The Governor launched ‘E- Prabodhini:  Learning Management System’ through online mode. Dr Christopher D’Souza was awarded D Litt. for his outstanding contribution in the field of health care.

The Governor released the textbook ‘Blueprint of Bachelor of Dental Surgery (BDS)’ on this occasion. Pro Chancellor of MUHS and Minister of Medical Education Hasan Mushrif, Principal Secretary Medical Education Dinesh Waghmare, Vice Chancellor of KLE Academy of Higher Education and Research Belgaum Dr. Nitin Gangane, Vice Chancellor of MUHS Lt. Gen. (Rtd.) Dr. Madhuri Kanitkar, Pro Vice Chancellor Dr. Milind Nikumb, were present at the Convocation Ceremony held in the University premises at Nashik.

Degrees were awarded to 10302 graduates during the convocation ceremony. A total of 26 candidates were awarded PhD while 111 meritorious graduates were awarded gold medals and certificates.

मुंबई, दि. 23 :-  महाराष्ट्राचे राज्यपाल रमेश बैस यांनी राज्याचे माजी मुख्यमंत्री तसेच लोकसभेचे माजी अध्यक्ष मनोहर जोशी यांच्या निधनाबद्दल तीव्र दुःख व्यक्त केले आहे. प्रिन्सिपल मनोहर जोशी हे महाराष्ट्र राज्याच्या राजकारणातील एक धुरंधर व्यक्तिमत्व होते.

कुशल संघटक, उत्कृष्ट संसदपटू, अभ्यासू विरोधी पक्षनेते, उत्कृष्ट लोकसभा अध्यक्ष असा सार्थ लौकिक असलेल्या मनोहर जोशी यांनी प्रत्येक पदावर काम करताना आपला वेगळा असा ठसा उमटवला. कौशल्य शिक्षणाचे महत्त्व फार पूर्वीच ओळखून त्यांनी कोहिनूर संस्थेच्या माध्यमातून हजारो तरुण तरुणींना तंत्र व कौशल्य शिक्षण देण्याची व्यवस्था केली. उत्कृष्ट वक्ते, मितभाषी, शिस्तप्रिय व राजकारणातील अजातशत्रू असे त्यांचे व्यक्तिमत्व होते. त्यांच्या निधनामुळे महाराष्ट्राच्या राजकारणातील एका तत्त्वनिष्ठ नेत्याला आपण गमावले आहे. जोशी हे लोकसभा अध्यक्ष असताना आपला त्यांच्याशी घनिष्ठ परिचय झाला व तो कायम राहिला. त्यांच्या स्मृतींना भावपूर्ण श्रद्धांजली अर्पण करतो, असे राल्यपाल श्री.बैस यांनी आपल्या शोकसंदेशात म्हटले आहे.

0000

Maha Governor Bais condoles the demise of Manohar Joshi

Mumbai, Feb 23- Maharashtra Governor Ramesh Bais has expressed grief over the demise of former Chief Minister of Maharashtra and former Lok Sabha Speaker Manohar Joshi. In a condolence message, Governor Bais wrote;

“Shri Manohar Joshi was one of the most respected political leaders in Maharashtra.  A skilled organizer, outstanding parliamentarian, excellent orator, fiery opposition leader and respected Lok Sabha Speaker, Shri Joshi left his indelible mark while discharging every role. Realizing the importance of skill education long ago, he created centres for imparting technical and skill education which helped thousands of young women and men to secure jobs. Joshi Ji was a soft-spoken and erudite parliamentarian who was respected by politicians cutting across the political spectrum. In his demise, Maharashtra has lost a man of high principles and values.  I had the good fortune of knowing Shri Joshi intimately when he was the Speaker of the Lok Sabha. My heartfelt condolences to his family.”

मुंबई, दि. 23 :- थोर समाजसुधारक संत गाडगेबाबा यांच्या जयंतीनिमित्त, मंत्रालयात सामान्य प्रशासन विभागाच्या उपसचिव रोशनी कदम पाटील यांनी त्यांच्या प्रतिमेला पुष्पहार अर्पण करुन अभिवादन केले.

यावेळी सामान्य प्रशासन विभागाचे अवर सचिव रवींद्र पेटकर, सहायक कक्ष अधिकारी राजेंद्र बच्छाव, विजय शिंदे यांच्यासह मंत्रालयातील अधिकारी, कर्मचाऱ्यांनीही संत गाडगेबाबा यांच्या प्रतिमेला पुष्प अर्पण करून अभिवादन केले.

0000

धोंडीराम अर्जुन/स.सं

मुंबई, दि. 23 : महाराष्ट्राचे माजी मुख्यमंत्री, लोकसभेचे माजी अध्यक्ष मनोहर जोशी यांच्या निधनाचे वृत्त अतिशय दु:खद आहे. त्यांचे सामाजिक आणि राजकीय कार्य महाराष्ट्र कायम स्मरणात ठेवेल, अशा शब्दांत उपमुख्यमंत्री देवेंद्र फडणवीस यांनी श्रद्धांजली वाहिली आहे.

उपमुख्यमंत्री श्री. फडणवीस आपल्या संदेशात म्हणतात, मनोहर जोशी सर आणि माझा वैयक्तिक ऋणानुबंध होता. नगरसेवक ते महापौर, आमदार ते मुख्यमंत्री आणि खासदार ते लोकसभा अध्यक्ष असे सर्व टप्पे त्यांनी आपल्या राजकीय जीवनात पूर्ण केले. विधानसभा आणि विधानपरिषद, लोकसभा आणि राज्यसभा अशा चारही सभागृहात प्रतिनिधीत्व करण्याचा मान त्यांनी मिळविला. अतिशय शिस्तबद्ध, संयमी आणि अभ्यासू नेता म्हणून त्यांची ओळख होती. वैयक्तिक जीवन असो की राजकीय जीवन वेळेची शिस्त त्यांनी कधी सोडली नाही. महाराष्ट्राच्या राजकीय-सामाजिक, शैक्षणिक क्षेत्रात त्यांचे योगदान  कायमच स्मरणात राहिल. त्यांना भावपूर्ण श्रद्धांजली अर्पण करतो. त्यांच्या कुटुंबीयांच्या दु:खात मी सहभागी आहे.

मुंबई, दि. २३:- विकासाचा ध्यास घेतलेले शांत, संयमी नेतृत्व म्हणून आमदार राजेंद्र पाटणी सदैव स्मरणात राहतील. त्यांचे अकाली निधन दुःखद असल्याची भावना व्यक्त करुन मुख्यमंत्री एकनाथ शिंदे यांनी आमदार पाटणी यांना श्रद्धांजली अर्पण केली आहे.

‘आमदार पाटणी लढवय्ये होते. पण आजाराने त्यांच्यावर मात केली. समाजकारण आणि राजकारणातील त्यांची धडाडी सर्वपरिचित आहे. विधानपरिषद, विधानसभा सदस्य म्हणून काम करताना त्यांनी वाशिम जिल्हा आणि कारंजा मतदारसंघाच्या विकासाचा ध्यास घेतला होता. त्यांच्या अकाली निधनाने पाटणी कुटुंबीय आणि कार्यकर्त्यांवर आघात झालेला आहे. त्यांना यातून सावरण्याचे बळ मिळावे’, अशी ईश्वरचरणी प्रार्थना करून मुख्यमंत्र्यांनी शोकसंदेशात आमदार राजेंद्र पाटणी यांना भावपूर्ण श्रद्धांजली अर्पण केली आहे.

यवतमाळ, दि.२२ (जिमाका) : महाराष्ट्र ईमारत व ईतर बांधकाम कल्याणकारी मंडळाच्यावतीने नोंदणीकृत बांधकाम कामगारांसाठी विविध प्रकारच्या योजना राबविण्यात येतात. त्याअंतर्गत राज्यभर गृहोपयोगी साहित्याचे वाटप करण्यात येत आहे. जिल्ह्यात ८६ हजार कामगारांना या साहित्याचा संप वाटप करणार असल्याचे पालकमंत्री संजय राठोड यांनी सांगितले.

नेर येथे साहित्य वाटपाचा जिल्हास्तरीय शुभारंभ पालकमंत्र्यांहस्ते झाला. त्यावेळी ते बोलत होते. यावेळी सरकारी कामगार अधिकारी राहुल काळे, नेर कृषी उत्पन्न बाजार समितीचे सभापती मनोज नाल्हे, पराग पिंगळे, सुभाष भोयर, नामदेवराव खोब्रागडे आदी उपस्थित होते.

जिल्ह्यात १ लाख ४१ हजार नोंदणीकृत बांधकाम कामगार आहे. त्यापैकी ८६ हजार कामगारांची नोंदणी जिवीत असल्याने त्यांना संचाचे वाटप केले जात आहे. उर्वरीत कामगारांनी आपल्या नोंदणीचे नुतनीकरण केल्यास अशा कामगारांसह नवीन नोंदणी केलेल्या कामगारांना देखील गृहोपयोगी साहित्य संचाचा लाभ देऊ, असे पालकमंत्री पुढे बोलतांना म्हणाले.

वर्षात ९० दिवस कामगार म्हणून काम केल्यास त्यांची कामगार म्हणून नोंदणी करण्याचा निर्णय घेण्यात आला आहे. अशा कामगारांनी त्यांच्यासाठी असलेल्या योजनांचा लाभ घेण्यासाठी नोंदणी करुन घ्यावे व योजनांचा लाभ घ्यावा, असे आवाहन पालकमंत्री श्री.राठोड यांनी केले. जिल्ह्यात जास्तीत जास्त कामगारांना योजनांचा लाभ कसा देता येईल यासाठी मी व्यक्तीशः प्रयत्न करत आहे. त्यामुळेच आजच्या साहित्य संच वाटप कार्यक्रमाचे आयोजन करण्यात आले आहे. यामुळे तालुकास्तरावरच कामगारांना संच उपलब्ध झाले असल्याचे पालकमंत्री म्हणाले.

जिल्हास्तरीय शुभारंभाला नेर तालुक्यातील २ हजार १४६ नोंदणीकृत बांधकाम कामगारांना पालकमंत्र्यांच्याहस्ते संचाचे वाटप करण्यात आले. या संचात १७ प्रकारच्या एकून ३० गृहोपयोगी साहित्याचा समावेश आहे. टप्प्याटप्प्याने जिल्ह्यातील सर्वच तालुका ठिकाणी साहित्य संच वाटपाचे कार्यक्रम घेतले जाणार असल्याचे पालकमंत्र्यांनी सांगितले.

यावेळी पराग पिंगळे यांनी देखील मनोगत व्यक्त केले. कार्यक्रमाचे प्रास्ताविक सरकारी कामगार अधिकारी राहुल काळे यांनी केले. कार्यक्रमास नेर तालुक्यातील नोंदणीकृत बांधकाम कामगार मोठ्या संख्येने उपस्थित होते.