कोल्हापूर, दि. 17 (जिमाका): जिल्हयात एकूण 31 लाख 58 हजार 513 मतदार आहेत. त्यापैकी पुरूष 16 लाख 8 हजार 858, स्त्री 15 लाख 49 हजार 483 व तृथीयपंथी 172 आहेत. 18 ते 19 वयोगटातील एकूण मतदारांची संख्या 39 हजार 633 असून सैनिकी मतदारांची संख्या 8 हजार 923 आहे. तसेच दिव्यांग मतदारांची संख्या 25 हजार 911 आहे. 85 व त्यापेक्षा जास्त वयोगटातील मतदार संख्या 40 हजार 053 आहे. यावेळी जिल्हयातील मतदानाची टक्केवारी वाढविण्यासाठी आवश्यक तयारी अंतिम टप्प्यात असल्याचे जिल्हाधिकारी अमोल येडगे यांनी सांगितले. निवडणूक आचार संहिता लागू झाल्यानंतर त्यांनी निवडणूक प्रक्रियेच्या अनुषंगाने माध्यमांना माहिती दिली. ते म्हणाले, नवीन मतदार नोंदणी करण्याची शेवटची तारीख नामनिर्देशनपत्रे सादर करण्याच्या अंतिम दिनाकांच्या 10 दिवस अगोदर  म्हणजेच दिनांक  09 एप्रिल, 2024  पर्यंत आहे. प्रचारा दरम्यान निवडणूक उमेदवारांना तसेच राजकीय पक्षांना ध्वनीक्षेपकाचा वापर करण्याकरीता  परवानगी देण्याची कार्यवाही करण्यात येणार आहे.  या ध्वनीक्षेपकाचा वापर सकाळी 6.00 ते रात्री 10.00 वा.पर्यंतच करावयाचा आहे. मतदानाची  वेळ सकाळी  7.00 ते सायं. 6.00 याप्रमाणे असणार आहे.

मतदान प्रक्रियेत जिल्हयात पुरेसे मनुष्यबळ उपलब्धअसून 18 नोडल अधिकारी, 444 क्षेत्रीय अधिकारी,  3 हजार 359 मतदान केंद्रस्तरीय अधिकारी व मतदान पथकातील आवश्यक मनुष्यबळ 20 टक्के राखीवसह       16 हजार 166 आहे. आज रोजी जिल्हयात निवडणूकीसाठी एकुण 18 हजार 567 अधिकारी व कर्मचारी मनुष्यबळ उपलब्ध आहे. तसेच बॅलेट युनिट 7 हजार 114, कंट्रोल युनिट 5 हजार 48 व व्हीव्हीपॅट 4 हजार 906 उपलब्ध आहेत. मतदारांसाठी वोटर हेल्पलाईन मोबाईल ॲप, उमेदवारांची माहिती घेण्यासाठी केवायसी ॲप, मतदान टक्केवारी व मतदानाचा निकाल पाहण्यासाठी वोटर टर्न आऊट ॲप, दिव्यांगांसाठी व्हाइस फीचर्स असलेले सक्षम ॲप, आचारसंहितेचा भंग किंवा तक्रार नोंदविण्यासाठी सी व्हीजील ॲप, उमेदवारांसाठी अर्ज दाखल करणे, विविध परवानगी घेणेसाठी सुविधा ॲप आहे याबद्दल जिल्हाधिकारी यांनी माहिती दिली.

या वेळीपासून सुरू करण्यात आलेली होम वोटींगच्या सुविधेमधे मतदान केंद्रांवर  85 वर्ष व त्यापेक्षा अधिक वय असणाऱ्या  व दिव्यांग मतदाराकरीता वेगळी अशी स्वतंत्र व्यवस्था करणेत येणार आहे. तसेच गर्भवती स्त्रिया याचा सुध्दा त्यामध्ये समावेश आहे. त्यांना सामान्य मतदारांच्या रांगेमध्ये उभे राहण्याची आवश्यकता भासणार नाही.  त्यांना मतदानाकरीता प्राधान्य देणेत येईल. तसेच आवश्यकतेनुसार त्यांना मदतनीस  पुरविण्याची कार्यवाही करण्यात येईल.

राजकीय जाहिरातीच्या प्रसारण पूर्व प्रमाणिकरण करण्यासाठी राजकीय पक्ष माध्यम प्रमाणिकरण व सनियंत्रण समितीकडे संपर्क करावा. त्या अनुषंगाने निवडणूक आयोगाने दिलेल्या सूचनांचे काटेकोरपणे पालन करावे. पेड न्युज असल्यास तशी माहिती सादर करावी अशी माहिती त्यांनी यावेळी दिली.

मतदारांवर कोणत्याही प्रकारचा दबाव टाकला जाणार नाही.  त्यांना कोणत्याही प्रकारची प्रलोभने दाखविली जाणार नाहीत. तसे केल्यास तक्रारी दाखल कराव्यात. आदर्श आचार संहितेचे उल्लंघन झाल्याचे संबंधात कोणत्याही तक्रारी असल्यास निवडणूक आयोगाने तयार केलेल्या cVIGIL ॲप मध्ये तक्रार नोंदवावी. त्या तक्रारींवर  पुढील 100 मिनिटांमध्ये निवडणूक विभागाकडून, निवडणूक आदर्श आचरसंहिते अंतर्गत नियुक्त अधिकारी, कर्मचारी यांचेकडून चौकशी व अहवाल नोंदवून निकाली काढणेची कार्यवाही करणेत येणार असल्याबाबत स्पष्ट करण्यात आले आहे.  याव्यतिरिक्त  Complaint Redressal Mechanism चा भाग म्हणून जिल्हाधिकारी कार्यालयात अहोरात्र  24 X 7 कंट्रोल रूम कार्यान्वित करणेत आलेली असून, टोल फ्री क्रमाक 1950 आहे. याठिकाणी तक्रार प्राप्त झालेनंतर त्याची रितसर नोंद घेवून, पडताळणीअंती निराकरणासाठी तक्रार संबंधित विधानसभा मतदारसंघाकडे वर्ग करणेत येवून त्यांचेकडून निर्गतीचा अहवाल सत्वर प्राप्त करुन घेतला जाणार आहे. तसेच तक्रारदारांना त्याबाबत अवगत करणेत येईल.  याव्यतिरिक्त मा. भारत निवडणूक आयोगाने तयार cVIGIL केलेल्या ॲप मध्ये तक्रारी नोंदविण्यात येणार आहेत.

उमेदवारांनी त्यांच्या प्रचारासाठी तसेच विविध रॅली बैठकांसाठी अर्ज करुन परवानगी घेणे आवश्यक आहे. त्यासाठी शिवाजी सभागृह, जिल्हाधिकारी कार्यालय येथे एक खिडकी योजना कार्यान्वित करणेत आलेली आहे. कोल्हापूर जिल्हा कार्यक्षेत्रात फ्लाइंग स्क्वॉड टीम्स FST –  85 पथक, स्टॅटिक सर्व्हिलन्स टीम्स SST – 112 पथके  ( 39 ठिकाणी ), व्हिडिओ पाळत ठेवणारी टीम VST – 44   पथके, व्हिडिओ दर्शक टीम VVT – 21  पथके नेमण्यात आली आहेत. कोल्हापूर जिल्ह्याच्या लगतच्या इतर जिल्ह्यातून तसेच गोवा व कर्नाटक राज्यातून दारुची अवैध वाहतूक होण्याची शक्यता विचारात घेवून पोलीस विभाग  व राज्य उत्पादन शुल्क विभागाचे स्तरावर नाकेबंदी करण्यात येवून आवश्यक ती  खबरदारी घेण्यात येणार आहे. यासंबंधात दोन्ही विभागांकडून  तात्काळ कार्यवाही  सुरु केली जाणार आहे.  यासंबंधाने कोणाला गोपनीय माहिती द्यावयाची असल्यास अशी माहिती पोलीस विभाग, राज्य उत्पादन शुल्क विभाग किंवा जिल्हाधिकारी कार्यालयातील 1950 वर माहिती देणेत यावी, त्याचे नाव व क्रमांक गोपनीय ठेवण्यात येवून कारवाई करण्यात येईल.

जिल्हा माहिती कार्यालयाकडून तयार करण्यात आलेल्या लोकसभा निवडणूक ई-पूर्वपीठिकाचे प्रकाशनही यावेळी जिल्हाधिकारी अमोल येडगे यांच्या हस्ते करण्यात आले.

000000

जिल्हास्तरीय शासकीय विभाग प्रमुखांची आदर्श आचारसंहिता बाबत आढावा बैठक संपन्न

सोलापूर, दि.17 (जिमाका):- भारत निवडणूक आयोगाने लोकसभा सार्वत्रिक निवडणूक 2024 चा निवडणूक कार्यक्रम जाहीर झालेला आहे. जिल्ह्यातील सोलापूर व माढा लोकसभा मतदारसंघासाठी 12 एप्रिल रोजी अधिसूचना निघणार असून 19 एप्रिल पर्यंत उमेदवारी अर्ज दाखल करण्याची शेवटची तारीख आहे. तर 7 मे रोजी मतदान पार पडणार असून 4 जून रोजी मतमोजणी होणार आहे. निर्भय , निष्पक्ष वातावरणात निवडणूक प्रक्रिया यशस्वीपणे पार पाडण्यासाठी सर्व शासकीय यंत्रणांनी परस्परात योग्य समन्वय ठेवावा व आदर्श आचारसंहितेचे काटेकोरपणे पालन करावे, असे आवाहन जिल्हाधिकारी कुमार आशीर्वाद यांनी केले.

यावेळी अपर जिल्हाधिकारी मोनिका सिंग, निवासी उपजिल्हाधिकारी मनीषा कुंभार, उपजिल्हा निवडणूक अधिकारी गणेश निऱ्हाळी, अतिरिक्त पोलीस अधीक्षक प्रीतम यावलकर, पोलीस उपायुक्त दिपाली काळे, अजित बोराडे, अतिरिक्त आयुक्त संदिप कारंजे, अधिक्षक अभियंता सा.बां. विभागाचे संजय माळी, सहकार विभागाचे जिल्हा उपनिबंधक किरण गायकवाड, जिल्हा परिषद च्या मुख्य वित्त व लेखा अधिकारी मीनाक्षी वाकडे, जिल्हा कोषागार अधिकारी मोमीन, उपप्रादेशिक परिवहन अधिकारी अर्चना गायकवाड, राज्य उत्पादन शुल्क अधीक्षक नितीन धार्मिक, समाजकल्याणचे सहायक आयुक्त नागनाथ चौगुले, जिल्हा अधीक्षक भुमिअभिलेख दादासाहेब घोडके यांच्यासह विविध विभागांचे विभाग प्रमुख यावेळी उपस्थित होते.

जिल्हाधिकारी आशीर्वाद पुढे म्हणाले की आदर्श आचारसंहिता लागू झाल्याने कोणत्याही विभाग प्रमुखांनी नवीन काम सुरू करू नये, नवीन कामाचे कार्यारंभ आदेश वितरित करू नये, जे काम सुरू आहे ते काम पूर्ण करून घ्यावे. तसेच सर्व विभाग प्रमुखांनी त्यांच्याकडील सर्व कामांची व कामांची सद्यस्थितीची माहिती तात्काळ प्रशासनाला सादर करावी. अधिकारी कर्मचाऱ्यांनी कोणत्याही राजकीय पक्ष्यांच्या नेते तसेच मंत्री महोदय यांच्या बैठकीस उपस्थित राहू नये. तसेच त्यांची खाजगीत भेट घेऊ नये, असे आढळून आल्यास संबंधिताविरोध कारवाई करण्यात येईल असेही त्यांनी सुचित केले.

आदर्श आचारसंहिता काळात काय करावे आणि काय करू नये याबाबत भारत निवडणूक आयोगाने सुस्पष्ट निर्देश दिलेले आहेत. या निर्देशांप्रमाणे सर्व शासकीय विभागांनी कार्यवाही करणे आवश्यक आहे. सार्वत्रिक निवडणुकीचा कार्यक्रम घोषित झाल्यापासून 24 तास, 48 तास आणि 72 तासांमध्ये आवश्यक कार्यवाहीची पूर्तता करून त्याबाबतचा अहवाल जिल्हास्तरीय आदर्श आचारसंहिता कक्षाकडे पाठवावा. यामध्ये कोणत्याही प्रकारचा हलगर्जीपणा होता कामा नये. निवडणूक विषयक कामकाज हे प्राधान्याने आणि अचूकपणे होईल, याची दक्षता घ्यावी. तसेच या काळात सर्व शासकीय विभाग प्रमुखांनी आपल्यावर सोपविलेली जबाबदारी समन्वयाने आणि काळजीपूर्वक पार पाडावी, अशा सूचना जिल्हाधिकारी तथा जिल्हा निवडणूक अधिकारी आशीर्वाद यांनी दिल्या. आचारसंहिता कालावधी टंचाईच्या अनुषंगाने करण्यात येणाऱ्या उपाययोजना राबविण्याबाबत कोणतीही अडचण नाही असेही त्यांनी स्पष्ट केले.

निवासी उपजिल्हाधिकारी मनीषा कुंभार यांनी आचारसंहिता लागू झाल्यानंतर सर्व संबंधित विभाग प्रमुखांनी घ्यावयाच्या दक्षतेबाबत सविस्तर मार्गदर्शन केले. तसेच आचारसंहितेच्या अनुषंगाने आचारसंहिता कक्षाकडे दैनंदिन पाठवण्यात येणाऱ्या विविध अहवालाची माहिती त्यांनी दिली. तसेच शासकीय वाहनाचा निवडणूक कामात वापर होणार नाही याबाबत सर्व संबंधित विभागाने काळजी घ्यावी. सोलापूर शहर नगरपालिका व ग्रामीण भागातील विविध शासकीय मैदाने राजकीय पक्षांना प्रचारासाठी वापरण्यास देण्याबाबत संबंधित विभागाने तात्काळ यादी एक खिडकी योजना राबवणाऱ्या भूमी अभिलेख कार्यालयाकडे पाठवावी. सार्वजनिक बांधकाम विभागाने शासकीय विश्रामगृहे राजकीय वापरासाठी उपलब्ध करून देऊ नये, अशी माहिती त्यांनी दिली.

****

छत्रपती संभाजीनगर, दि.१७(जिमाका):- भारत निवडणूक आयोगाने लोकसभा निवडणूकीसाठी कार्यक्रम जाहीर केला असून  त्यानुसार चवथ्या टप्प्यात छत्रपती संभाजीनगर जिल्ह्यात निवडणूक होणार आहे. निवडणूक आयोगाच्या निर्देशांनुसार निवडणुका निर्भय व निष्पक्ष वातावरणात पार पाडण्यासाठी जिल्हा प्रशासन सज्ज आहे, अशा शब्दात जिल्हाधिकारी तथा जिल्हा निवडणूक अधिकारी दिलीप स्वामी यांनी आज पत्रकार परिषदेत विश्वास व्यक्त केला.

निवडणूका जाहीर होताच जिल्हा प्रशासनाच्या वतीने पत्रकार परिषदेचे आयोजन करण्यात आले. प्रशासनामार्फत करण्यात आलेल्या निवडणूक सज्जतेची माहिती देण्यात आली. पत्रकार परिषदेस जिल्हा परिषदेचे मुख्य कार्यकारी अधिकारी विकास मीना, पोलीस आयुक्त मनोज लोहिया, पोलीस अधीक्षक मनिष कलवानिया, अपर जिल्हाधिकारी डॉ. अरविंद लोखंडे, निवासी उपजिल्हाधिकारी विनोद खिरोलकर, उपजिल्हा निवडणूक अधिकारी देवेंद्र कटके, उपजिल्हाधिकारी प्रभोदय मुळे  तसेच अन्य अधिकारी कर्मचारी उपस्थित होते.

या पत्रकार परिषदेत जिल्हाधिकारी स्वामी यांनी निवडणूकीविषयक सर्व माहिती दिली.

निवडणूक कार्यक्रमः

निवडणूक आयोगाने घोषित केल्यानुसार जिल्ह्यात चवथ्या टप्प्यात निवडणूक होत आहे.

निवडणूक कार्यक्रम याप्रमाणे- 

१.      अधिसूचना जारी करणे- गुरुवार दि.१८ एप्रिल,

२.      नामनिर्देशन पत्र सादर करण्याचा अंतिम दिनांक  गुरुवार दि.२५ एप्रिल,

३.      नामनिर्देशन पत्रांची छाननी शुक्रवार दि.२६ एप्रिल,

४.    उमेदवारी अर्ज माघारी घेण्याचा दिनांक सोमवार दि.२९ एप्रिल,

५.     मतदानाचा दिनांक सोमवार दि.१३ मे,

६.      मतमोजणीचा दिनांक मंगळवार दि.४ जून,

७.     निवडणूक प्रक्रिया पूर्ण करण्याचा दिनांक गुरुवार दि.६ जून.

मतदार संघ व मतदान केंद्रांची रचनाः-

जिल्ह्यात १८ जालना आणि १९ औरंगाबाद अशा दोन लोकसभा मतदार संघांचा समावेश आहे.  त्यात जिल्ह्यातील सिल्लोड, फुलंब्री व पैठण हे विधानसभा मतदारसंघ क्षेत्र जालना लोकसभा मतदार संघास जोडलेले असून औरंगाबाद मध्य, औरंगाबाद पूर्व, औरंगाबाद पश्चिम, गंगापूर, वैजापूर आणि कन्नड हे विधानसभा मतदार संघ क्षेत्र औरंगाबाद लोकसभा मतदार संघास जोडलेले आहेत.  त्यात जालना लोकसभा मतदार संघाशी जोडलेल्या क्षेत्रासाठी १०४५ तर औरंगाबाद लोकसभा मतदार संघाशी जोडलेल्या क्षेत्रासाठी २०४० असे एकूण ३०८५ मतदान केंद्रांवर मतदार आपला मतदानाचा हक्क बजावतील.

२०११ च्या जनगणनेनुसार जिल्ह्याची लोकसंख्या ३७ लक्ष १ हजार २८२ इतकी असून  सन २०२४ ची अनुमानित लोकसंख्या ४५ लक्ष ८९ हजार ३२२ इतकी आहे.

या लोकसभा मतदार संघासाठी  जालना लोकसभा मतदार संघासाठी ९ लाख ९७ हजार ५२३ तर औरंगाबाद लोकसभा मतदार संघासाठी  २० लाख ३५ हजार ०२३ असे एकूण ३० लाख ३२ हजार ५४६ मतदार आपला मतदानाचा हक्क बजावतील,असे जिल्हाधिकारी स्वामी यांनी सांगितले.

वयोगटानुसार मतदारः-

वयवर्षे १८ ते १९ या वयोगटातील म्हणजेच नवमतदारांची संख्या ही ४१४६५, २० ते २९ वर्षे वयोगटातील-६२३४९१, ३०-३९ वयोगटातील -७५५६११, ४०-४९ वयोगटातील-६३३०५८, ५०-५९ वयोगटातील-४६८००७, ६०-६९ वयोगटातील२७५००१, ७०-७९ वयोगटातील-१५१४७४ तर ८० व त्यापेक्षा अधिक वयोगटातील -८४४३९ असे एकूण ३० लाख ३२ हजार ५४६ मतदार आहेत.

मतदारांसाठी मतदान केंद्रावर सुविधाः-

जिल्ह्यात ४५ मतदान केंद्र हे मॉडेल मतदान केंद्र म्हणून बनविण्यात येणार आहे.  मतदान केंद्रांवर आयोगाने दिलेल्या निर्देशानुसार सर्व सुविधा देण्यात येणार आहेत. त्यांचीही सज्जता झाली आहे. प्रत्येक मतदान केंद्रावर मतदार सहायता कक्ष, लहान बालकांसाठी पाळणा घर, सावलीची सुविधा, पिण्याचे पाणी, औषधोपचार कक्ष, दिव्यांग व ज्येष्ठ मतदारांसाठी आवश्यकतेनुसार व्हिल चेअर सुविधा, दिशादर्शक फलक इ. सुविधा देण्यात येणार आहात. तसेच मतदान केंद्रस्तरीय मतदार जागरुकता गट बनविण्यात येणार असून जिल्ह्यात असे २८९८ गट बनविण्यात आले असून त्याद्वारे मतदारांमध्ये मतदान करण्याविषयी जनजागृती केली जाणार आहे.

‘स्वीप’द्वारे मतदार जनजागृतीः-

जिल्हाधिकारी दिलीप स्वामी यांनी सांगितले की, जिल्ह्यात मतदानाची टक्केवारी वाढावी यासाठी मतदारांमध्ये जनजागृती केली जाणार आहे. त्यासाठी विविध माध्यमातून मतदारांना मतदानाचे महत्त्व पटवून देणे, त्यांचे मतदार यादीतील नाव सापडणे, त्यांचे मतदान केंद्र नेमके कुठे आहे याबाबतही त्यांच्यासाठी सर्व माहिती देण्यात येणार आहे. मतदान केंद्रावरही मतदार सुविधा केंद्र निर्माण केले जाणार आहेत,असेही जिल्हाधिकारी स्वामी यांनी सांगितले.

आचारसंहिता अंमलबजावणीः-

निवडणूक आयोगाने निवडणूक कार्यक्रम जाहीर करताच आदर्श आचारसंहिता अंमलबजावणी सुरु झाली आहे. त्यादृष्टीने जिल्ह्यात पदाधिकाऱ्यांकडे असलेली शासकीय वाहने जमा करण्यात आले असून शासकीय, सार्वजनिक इमारतींवरील राजकीय पक्षांचे बॅनर्स, होर्डिंग्ज,झेंडे आदी सामुग्री जमा करण्यात येत आहे. त्यासाठी स्थिर सर्व्हेक्षण पथके, फिरते सर्व्हेक्षण पथके, व्हिडिओ सर्व्हेक्षण पथके, व्हिडिओ पाहणी पथके आदी नियुक्त करण्यात आले असून त्यांचे कार्यान्वयन सुरु झाले आहे,असेही जिल्हाधिकारी स्वामी यांनी सांगितले आहे. जिल्हास्तरावर तसेच प्रत्येक सहा. निवडणूक निर्णय अधिकारीस्तरावर १९५० हा टोल फ्री क्रमांकही कार्यान्वयीत करण्यात आला आहे.  तसेच निवडणूक आयोगाच्या विविध ॲप द्वारेही मतदारांना विविध प्रकारची माहिती मिळण्याची सुविधा उपलब्ध करुन देण्यात आली आहे. आचार संहिता लागू होताच जिल्ह्यातील प्रत्येक प्रिंटींग प्रेसला त्यांच्याकडे छापला जाणाऱ्या प्रत्येक कामाची माहिती जिल्हा प्रशासनाला देणे बंधनकारक  असल्याचेही सांगण्यात आले. तसेच कायदा व सुव्यवस्थेच्या दृष्टिने  परवानाधारकांना त्यांचे शस्त्र बाळगण्यास मनाई करण्यात आली आहे. तसेच मालमत्ता विद्रुपीकरण प्रतिबंध अधिनियमाचीही अंमलबजावणी करण्याचे त्यांनी सांगितले.

‘फेक न्यूज’वर विशेष लक्ष

जाणीवपूर्वक खोटी, बनावट माहिती, व्हिडीओ, फोटो, मजकुर सोशल मिडियाद्वारे पसरवणे, जनतेमध्ये संभ्रमाचे वातावरण निर्माण करणे, कायदा सुव्यवस्थेला बाधा आणण्याचा प्रयत्न करणे, धार्मिक जातीय तेढ निर्माण करणे याबाबतचे प्रयत्न रोखण्यासाठी व त्यावर कायद्याद्वारे प्रतिबंध करण्यासाठी विशेष कक्ष स्थापन करुन नियंत्रण ठेवण्यात येणार आहे. सोशल मिडीयावरील पोस्ट इ. ची दखल घेऊन संबंधितांवर कारवाई करण्यात येईल असेही जिल्हाधिकारी स्वामी यांनी सांगितले. तसेच व्हॉट्सॲप ग्रुपच्या ॲडमिनने अशा माहितीच्या प्रसाराबाबत खातरजमा केली पाहिजे. त्यातून काही कायदा सुव्यवस्थेचा प्रश्न निर्माण झाल्यास ग्रुप ॲडमिनलाही जबाबदार धरले जाईल असे त्यांनी सांगितले.

माहिती तंत्रज्ञानाचा वापरः-

यंदाच्या लोकसभा निवडणूकीचे वैशिष्ट्य म्हणजे यावेळी माहिती तंत्रज्ञानाचा अधिकाधिक वापर करण्यात येणार असून जवळपास १५ ॲप च्या माध्यमातून प्रत्यक्ष मतदार, उमेदवार, अधिकारी, निरीक्षक अशा सर्व घटकांना या ॲपचा आपले कामकाज जलद व अचूक करणे, मतदारांना सुविधा उपलब्ध होणे, आचारसंहिता भंगाकडे लक्ष ठेवून त्याची दखल घेणे, तक्रारी नोंदविणे, कारवाई करणे अशा विविध बाबी या ॲपमुळे मोबाईलद्वारे सहज करता येणार आहेत,अशीही माहिती यावेळी देण्यात आली.

कायदा सुव्यवस्थेसाठी सज्जता- पोलीस आयुक्त लोहिया

निवडणूक काळात जिल्ह्यात पोलीस आयुक्त हद्दीत कायदा सुव्यवस्था राखण्यासाठी व निर्भयतेचे वातावरण राखण्यासाठी पोलीस दलाची सज्जता असून त्यासाठी मतदान केंद्रनिहाय सुरक्षा व्यवस्थेचा आढावा घेण्यात आला आहे.  जिल्ह्यात अतिरिक्त बंदोबस्तासाठी राज्यराखीव दलाच्या तीन तुकड्या तर केंद्रीय राखीव दलाच्या  दोन तुकड्या प्राप्त होणार आहेत. तसेच संवेदनशील व जोखमीच्या मतदान केंद्रांवर वेब कास्टिंगच्या माध्यमातून लक्ष ठेवण्यात येणार आहे.

आचारसंहिता भंगाची तात्काळ दखल घेणार-विकास मीना

जिल्ह्यात आचारसंहिता भंगाची तात्काळ दखल घेण्याची यंत्रणा सज्ज करण्यात आली असून १९५० टोल फ्रि क्रमांक, ९४ स्थिर सर्व्हेक्षण पथके, तसेच फिरते सर्व्हेक्षण पथके  इ. माध्यमांतून ग्रामिण भागापासून शहरी भागापर्यंत प्रशासनाचे लक्ष आहे.  त्यासाठी नागरीकही सी व्हिजील या ॲपच्या माध्यमातून आचारसंहिता भंगाच्या तक्रारी प्रशासनापर्यंत पोहोचवू शकतात, असे आचारसंहिता कक्षाचे प्रमुख तथा जिल्हा परिषदेचे मुख्य कार्यकारी अधिकारी विकास मीना यांनी सांगितले.

०००००