मुंबई, दि. ७ : जागतिकस्तरावर नव्या आर्थिक आणि राजकीय परिस्थितीत भारत-रशिया संबंधांना अतिशय महत्त्व आहे. विकास, तंत्रज्ञान, बाजारपेठ, सेवा, उद्योग, ऊर्जा, बांधकाम, वाहतूक, सांस्कृतिक आणि पर्यटन अशा अनेक क्षेत्रात सेंट पीटर्सबर्ग इंटरनॅशनल इकॉनॉमिक फोरम – २०२४ च्या माध्यमातून उद्योग-व्यापाराच्या विपुल संधी निर्माण होतील. महाराष्ट्र हे भारतातील औद्योगिक दृष्टीने अग्रगण्य राज्य असल्याने या व्यापारसंधी उभय देशांना लाभदायक ठरतील, यात मुंबईचे स्थान आणखी महत्त्वपूर्ण राहील, असे मत विधानसभा अध्यक्ष ॲड. राहुल नार्वेकर यांनी सांगितले. ते रशियाचे राष्ट्राध्यक्ष ब्लादिमीर पुतीन यांच्या संकल्पनेनुसार येथे आयोजित सेंट पिटर्सबर्ग इंटरनॅशनल इकॉनॉमिक फोरम – २०२४ मध्ये ‘रशिया – भारत’ या विषयावरील चर्चासत्रात बोलत होते. याप्रसंगी अन्य मान्यवर आंतरराष्ट्रीय वक्त्यांबरोबरच भारताचे रशियातील राजदूत विनयकुमार उपस्थित होते.

भारत-रशिया मैत्री संबंध हे काल कसोटीवर सिद्ध झालेले आणि परस्पर विश्वास, सहकार्य, सामंजस्य हा मुख्य आधार असलेले असे आहेत. रशियाचे राष्ट्राध्यक्ष माननीय श्री. पुतिन आणि देशाचे प्रधानमंत्री नरेंद्र मोदी यांच्यातील परस्पर स्नेहसंबंध हे नेहमीच जागतिक शांतता आणि विकास यांना प्राधान्य देणारे ठरले आहेत. या फोरममुळे जागतिकस्तरावर सशक्त यंत्रणा उभी राहिली आहे ज्यातील सत्रात मला निमंत्रित करण्यात आले हा माझा बहुमान समजतो, असे यावेळी विधानसभा अध्यक्ष ॲड. श्री.नार्वेकर म्हणाले.

रशियन नवउद्यमींना भारतातील सतत विस्तारणाऱ्या व्यापार आणि उद्योग क्षेत्राचे आकर्षण आहे. त्याचप्रमाणे भारतातील उद्योजकांना देखील रशियातील उद्योग विस्ताराच्या संधी खुणावत आहेत. या फोरमच्या माध्यमातून दोन्हीकडील उद्योजकांना त्यासाठी उचित मार्गदर्शनाचा लाभ मिळावा. उभयपक्षी व्यापार हा २०२५ पर्यत आणखी पुढचे उद्दिष्ट गाठेल, असे संकेत दिसत आहेत, असेही विधानसभा अध्यक्ष ॲड. नार्वेकर यांनी यावेळी सांगितले.

००००

सातारा दि. 7 (जिमाका):  पाटण तालुक्यातील आंबेघर खालचे, आंबेघर वरचे, ढोकावळे, मिरगाव, हुंबरळी, शिद्रुकवाडी, जितकरवाडी, (जिंती), काहीर, या अतिवृष्टीमुळे भूस्खलन बाधित गावांच्या पुनर्वसनास शासनाने मान्यता दिली आहे. या गावांच्या कायमस्वरुपी पुनर्वसनाअंतर्गत बाधित कुटुबांना द्यावयाची प्रस्तावित असलेली 558 घरकुले व इतर सुविधांच्या कामांसाठी निधी उपलब्ध करुन देण्यात आला असून ही कामे गतीने आणि दर्जेदारपूर्ण करा, असे निर्देश राज्य उत्पादन शुल्क मंत्री आणि पालकमंत्री शंभुराज देसाई यांनी दिले.
पाटण तालुक्यातील दरडग्रस्त व भूस्खलनग्रस्त गावांच्या पुनर्वसन, बांधकाम व पायाभूत सुविधांच्या कामांबाबत आढावा घेण्यासाठी पालकमंत्री शंभुराज देसाई यांनी जिल्हाधिकारी कार्यालयात आढावा बैठक घेतली. यावेळी जिल्हाधिकारी जितेंद्र डुडी, जिल्हा परिषदेच्या मुख्य कार्यकारी अधिकारी याशनी नागराजन, पोलीस अधिक्षक समीर शेख, अप्पर पोलीस अधिक्षक आँचल दलाल, सार्वजनिक बांधकाम विभागाचे अधिक्षक अभियंता संतोष रोकडे, निवासी उपजिल्हाधिकारी नागेश पाटील, प्रातांधिकारी सुनील गाडे, यांच्यासह विविध यंत्रणांचे प्रमुख उपस्थित होते.
भूस्खलनबाधित गावांमधील कुंटुबांचे गोकूळ तर्फ पाटण, काहीर, शिद्रुकवाडी (धावडे), चाफेर, देशमुखवाडी, मोडकवाडी याठिकाणी घरकुले बांधून देवून पुनर्वसन करण्यात येणार आहे. 199 कोटी 57 लाख खर्चून पुनर्वसनाचे काम करण्यात येणार आहे. घरे बांधून देणे व तेथील ले ऑउट विकासकामे मुंबई महानगर प्रदेश विकास प्राधिकरण यांनी करावी असा निर्णय झालेला आहे. पुनर्वसीत ठिकाणांमध्ये प्राथिमक शाळा, अंगणवाडी, ग्रामपंचायत भवन, समाजमंदिर, सार्वजनिक स्वच्छता गृहे, खेळाचे मैदान, कंम्पाऊंड भिंत, प्रवेश कमान, पथदिवे, पाणीपुरवठा सुविधा, वैयक्तिक एकल विद्युत जोडणी, रेनवॉटर हारवेस्टिंग, सोलार सिस्टीम, इमारतींकरीता आतील व बाहेरील विद्युतीकरण, पुनर्वसन गावांमध्ये 9 मीटर व 12 मीटर रुंदीचे डांबरी रस्ते, रस्त्यालगत दुतर्फा सिमेंट काँक्रीटच्या गटारी, जनावरांकरीता पिण्याच्या पाण्‍याची सुविध अशा सर्व सुविधा पुरविण्यात येणार आहेत. या सर्व सुविधा व घरकुलांची कामे अत्यंत दर्जेदार करावीत आणि  वेळेत पूर्ण करावीत, असे निर्देश पालकमंत्री शंभुराज देसाई यांनी यंत्रणांना दिले आहेत.
बाधित कुंटुबांना देण्यात येणारी घरकुले 590 चौ. फूट बांधीव क्षेत्रफळाची सिमेंट काँक्रेटची दर्जेदार व आकर्षक असणार असून यामध्ये तळमजल्याला हॉल किचन आणि स्वच्छता गृह, पहिल्या मजल्यावर बेडरूम आणि स्वच्छता गृह अशी ती होणार आहेत. प्रत्येक घरकूल 15 लाख 40 हजार रुपये खर्चाचे होणार आहे. सदरची घरकुले अतिशय आकर्षक व दर्जेदार आणि भक्कम होणार असून त्याची संबंधित कुंटुबांना संकल्‍पना स्पष्ट व्हावी, यासाठी प्रत्येक कामाच्या साईटवर या घरकुलांची संकल्पना चित्रे फ्लेक्स स्वरूपात लावण्यात यावी, असे निर्देशही पालकमंत्री शंभुराज देसाई यांनी दिले.
00000000

सातारा दि. 7 (जिमाका):  महिलांना सुरक्षित वातावरण प्रदान करण्यासाठी शासन कटिबद्ध आहे. त्यादृष्टीने सातारा जिल्हा पोलीस प्रशासनाचा भरोसा- सातारा जिल्हा महिला सुरक्षा प्रकल्प अत्यंत महत्त्वपूर्ण असून हा प्रकल्प राज्यासाठी निश्चितपणे दिशादर्शक व आदर्शवत ठरेल, असा विश्वास राज्य उत्पादन शुल्क मंत्री आणि पालकमंत्री शंभुराज देसाई यांनी व्यक्त केला. यावेळी त्यांनी या प्रकल्पासाठी आवश्यक निधी उपलब्ध करुन देण्याची ग्वाही दिली.
महिला सुरक्षिततेच्या दृष्टीकोनातून पोलीस विभाग राबवित असलेल्या उपाययोजनांचा आढावा पालकमंत्री शंभुराज देसाई यांनी जिल्हाधिकारी कार्यालयात झालेल्या बैठकीत घेतला. यावेळी जिल्हाधिकारी जितेंद्र डुडी, जिल्हा परिषदेच्या मुख्य कार्यकारी अधिकारी याशनी नागराजन, पोलीस अधिक्षक समीर शेख, अप्पर पोलीस अधिक्षक आँचल दलाल, सार्वजनिक बांधकाम विभागाचे अधिक्षक अभियंता संतोष रोकडे, निवासी उपजिल्हाधिकारी नागेश पाटील, महिला व बाल विकास अधिकारी विजय तावरे, यांच्यासह विविध यंत्रणांचे प्रमुख उपस्थित होते.
सातारा जिल्ह्यातील मागील पाच वर्षातील महिलांबाबत घडणा-या गुन्ह्याचा तपशील पाहता यामध्ये बलात्कार 248, पोक्सो अंतर्गत गुन्हे 964, कौटुंबिक हिंसाचार 869, लैगिंक अत्याचाराचे 1 हजार 399 गुन्हे दाखल आहेत, त्या अनुषंगाने जिल्हा पोलीस दलाकडून महिलांच्या सुरक्षितेतकरीता सातारा जिल्हा महिला सुरक्षा प्रकल्प राबविण्यात येत आहे. यामध्ये भरोसा केंद्राची उभारणी करुन पोक्सो, बलात्कार, कौटुंबिक हिंसाचार, लैगिंक अत्याचार यामधील पिडीतांना सहाय्य व मदत करण्याचे उद्दिष्ट ठेवले आहे. आपत्कालीन परिस्थितीत पिडीतांना वेळेवर मदत देणे, पोलीस, वैद्यकीय, कायदेशीर मदत तसेच समुपदेशन हे एकाच छताखाली देण्याच्या दृष्टीने भरोसा केंद्र अत्यंत महत्वपूर्ण ठरणार आहे. या केद्रांसाठी आवश्यक असणाऱ्या मनुष्यबळाला प्रक्षिक्षण द्यायला सुरूवात करा असे सांगून पिडीतांशी संवेदनशिलपणे वागणे, त्यांना अपमानास्पद, निष्ठुरपणे वागणूक यंत्रणेकडून मिळणार नाही याची दक्षता घेणे यासाठी महिला पोलीस कर्मचाऱ्यांचे यासंबंधी प्रशिक्षण घ्यावे, असे निर्देशही पालकमंत्री शंभुराज देसाई यांनी सांगितले.
सातारा जिल्हा महिला सुरक्षा प्रकल्पांतर्गत करण्यात येत असणाऱ्या अन्य उपाययोजनांमध्ये पोलीस पेट्रोलिंगमध्ये गुलाबी स्कुटी पथकाचा समावेश, वाहतूकीच्या शेवटच्या माईलमोडमध्ये क्यूआर कोड आधारित लाईव्ह लोकेशन ट्रॅकिंग, राज्य परिवहन बसेसमध्ये आणि सार्वजनिक वाहतुकीमध्ये सीसीटीव्ही आणि डॅशकॅम चा वापर, महिलांना प्रशिक्षण देवून पिंक ईव्ही वाहनांचा वापर वाढविणे, महिलांसाठी 181 हा हेल्पलाईन क्रमांकही उपलब्ध करुन देणे आदी उपाययोजना करण्यात येणार असल्याचे पोलीस अधिक्षक समीर शेख आणि अप्पर पोलीस अधिक्षक आँचल दलाल यांनी यावेळी सांगितले.
भरोसा केंद्र- महिलांना सुरक्षित वातावरण उपलब्ध व्हावे यासाठी जिल्ह्यात पोलीस विभागातर्फे करण्यात येत असणाऱ्या उपाययोजनांमध्ये भरोसा केंद्राची उभारणी हा अत्यंत महत्त्वपूर्ण प्रकल्प आहे. याद्वारे पिडीत महिलांना सुरक्षित वातावरण देणे आणि निपक्षपातीपणे न्याय मिळवून देण्यासाठी मदत करणे, वेळेवर आपत्कालीन मदत देणे, यादृष्टीने हे भरोसा केंद्र महत्त्वाचे ठरणार आहे. सातारा जिल्हा महिला सुरक्षा प्रकल्प या उपक्रमांतर्गत मानसिक आरोग्य सेवा समुपदेशन, वैद्यकीय तपासणी, भरपाई संदर्भात कार्यवाही, दंडाधिकाऱ्यांकडून जबाब नोंदविणे, कायदेशीर मदत, तात्पुरता निवारा, अशा आपत्कालीन सेवा तात्काळ उपलब्ध करुन देण्यात येणार आहेत. तसेच कल्याणकारी सेवांमध्ये स्वसरंक्षण वर्ग, पिडींतासाठी सामान्य जीवन पुनर्निमीतीसाठी मार्गदर्शन, किशोरवयीन गर्भधारणेबद्दल जागरुकता, व्यसनमुक्ती प्रशिक्षण आणि कौशल्य अभ्यासक्रम, लैगिंक शिक्षण, यासारख्या कल्याणकारी सेवाही प्रस्तावित करण्यात आल्या आहेत.
00000

मुंबई, दि. 6 : लोकसभेच्या निवडणुकांसाठी भारत निवडणूक आयोगामार्फत देशभरात आदर्श आचारसंहिता लागू करण्यात आली होती. निवडणुकीची प्रक्रिया पूर्ण झाली असून आदर्श आचारसंहिता संपुष्टात आल्याचे भारत निवडणूक आयोगाने कळविले असल्याची माहिती राज्य मुख्य निवडणूक अधिकारी कार्यालयामार्फत देण्यात आली आहे.

राज्यात मुंबई पदवीधर, कोकण विभाग पदवीधर, नाशिक विभाग शिक्षक तसेच मुंबई शिक्षक मतदार संघासाठी निवडणूक जाहीर झाली आहे. या निवडणुकीच्या अनुषंगाने मुंबई, कोकण आणि नाशिक विभागात आदर्श आचारसंहिता लागू राहणार असल्याचेही मुख्य निवडणूक अधिकारी कार्यालयामार्फत स्पष्ट करण्यात आले आहे.

मुंबई, दि. 6 : सध्या इयत्ता 10 वी आणि 12 वी परीक्षांचे निकाल लागले आहेत. या परीक्षांमध्ये कमी गुण मिळालेले अथवा अपयश आलेल्या विद्यार्थ्यांकडून टोकाचे पाऊल उचलले जाण्याची शक्यता नाकारता येत नाही. नैराश्य आलेल्या विद्यार्थ्यांना समुपदेशन करून त्यामधून बाहेर काढणे गरजेचे आहे. त्यासाठी आरोग्य विभागाची टेलिमानस – ‘मनोविकारावरील दूरध्वनीद्वारे सल्ला’ ही सेवा उपलब्ध आहे. टेलिमानस या सेवेकरिता टोल फ्री क्रमांक 14416 (भ्रमणध्वनीसाठी) आणि 18008914416 (लँडलाईनसाठी) उपलब्ध करून देण्यात आले आहेत. तरी या सेवेचा गरजू विद्यार्थी, नागरिकांनी लाभ घ्यावा, असे आवाहन आरोग्य विभागाने केले आहे.

या टोल फ्री क्रमांकाच्या माध्यमातून क्लिनिकल सायकॉलॉजीस्ट, सायक्याट्रिक नर्स आणि सायक्याट्रिक सोशल वर्कर समुपदेशनाचे कार्य करीत असून या सेवेसाठी मनोविकृतीतज्ज्ञदेखील नियुक्त आहेत. राज्यात आजपर्यंत 70 हजार व्यक्तींनी समुपदेशनाचा लाभ घेतला आहे. यामध्ये नैराश्य, ताणतणाव, निद्रानाश, दु:खी मन:स्थिती, पौगंडावस्थेतील मानसिक स्थित्यंतरे आदी समस्यांचे निराकारण केले जाते. राज्याच्या टेलिमानस कार्यक्रमाच्या उपयोगीतेमध्ये देशात दुसरा क्रमांक आहे. मोठ्या प्रमाणात गरजू नागरिक या सेवेचा लाभ घेत आहेत, असे आयुक्त, आरोग्य सेवा यांनी कळविले आहे.

मुंबई, दि 5:- 27- मुंबई उत्तर पश्चिम मतदारसंघातील मतमोजणी प्रक्रिया ही संपूर्णपणे भारत निवडणूक आयोगाच्या नियमावलीनुसारच पार पाडण्यात आल्याचे 27- मुंबई उत्तर पश्चिम मतदारसंघाच्या निवडणूक निर्णय अधिकारी वंदना सूर्यवंशी यांनी कळविले आहे.

विहित नियमांनुसार मतमोजणी प्रक्रिया

भारत निवडणूक आयोगाच्या सूचनांननुसार दि 4 जून 2024 रोजी 27- मुंबई उत्तर पश्चिम मतदारसंघात टपाली मतपत्रिकांची मोजणी ही विहित वेळेत म्हणजे सकाळी 8 वाजता सुरु करण्यात आली. ‘ईव्हीएम’ मशीनवरील मतमोजणी साडेआठ वाजता सुरु करण्यात आली फेरीनिहाय मत मोजणीदरम्यान प्रत्येक फेरीत उमेदवारांना मिळालेली मते मतमोजणी टेबलवर फॉर्म क्रमांक 17 C भाग 2 मध्ये भरून त्यावर मतमोजणी प्रतिनिधींची स्वाक्षरी घेण्यात आली. संपूर्ण मतमोजणी प्रक्रियेत कोणत्याही फेरीत मतमोजणी प्रतिनिधींकडून कोणतीही हरकत प्राप्त झाली नाही. नियमाप्रमाणे प्रत्येक फेरीअखेर संबंधित फेरीत तसेच फेरीअखेर सर्व उमेदवारांना मिळालेली मते तसेच त्या फेरीअखेर आघाडीवर असलेल्या उमेदवारांची नावे निवडणूक निर्णय अधिकारी यांचेमार्फत जाहीर करण्यात येत होती. यानुसार 25 व्या फेरीची मतमोजणी जाहीर होत असताना टपाली मतपत्रिकांची मतमोजणी संपली, त्यामुळे पंचविसाव्या फेरीची तसेच पंचविसाव्या फेरी अखेरची मतमोजणी जाहीर झाल्यानंतर टपाली मतपत्रिकांच्या फेरीचा निकाल जाहीर करण्यात आला. ज्यामध्ये उमेदवार अमोल कीर्तीकर यांना 1501 तर उमेदवार रवींद्र वायकर यांना 1550 मते प्राप्त होती. नियमाप्रमाणे टपाली मतपत्रिकांची संख्या ‘ईव्हीएम’ मतमोजणीच्या सर्व फेऱ्यानंतरची ज्यात बेरीज केली जाते. त्यामुळे 26 व्या फेरीतील मतदान यंत्रांची मतमोजणी संपल्यानंतर 26 व्या फेरीतील 26 व्या फेरीअखेर मतदान यंत्रांच्या मतमोजणीमध्ये आघाडीवर असणाऱ्या तीन उमेदवारांची नावे जाहीर करण्यात आली. यात उमेदवार अमोल कीर्तीकर हे 1 मतांनी आघाडीवर होते.

नियमाप्रमाणे 26 व्या फेरीनंतर टपाली मतपत्रिकांची मतमोजणीची संख्या समाविष्ट करून उमेदवारनिहाय मते जाहीर करण्यात आली. ज्यामध्ये उमेदवार श्री.वायकर हे 48 मतांनी आघाडीवर होते.

टपाली मतपत्रिका पुन:र्परीक्षण

भारत निवडणूक आयोगाच्या सूचनांनुसार मतमोजणी अखेर जर आघाडीच्या दोन उमेदवारांना मिळालेल्या मतांमधील फरक बाद टपाली मतपत्रिकांच्या संख्येपेक्षा कमी असेल तर निवडणूक निर्णय अधिकारी यांनी स्वतःहून सर्व उमेदवारांच्या उपस्थितीत बाद टपाली मतपत्रिका पुन:र्परीक्षण करणे बंधनकारक असल्याने व 27- मुंबई उत्तर पश्चिम मतदार संघात बाद टपाली मतपत्रिकांची संख्या 111 इतकी असल्याने या सर्व बाद टपाली मतपत्रिकांचे पुनर्परीक्षण उमेदवारांच्या उपस्थितीत करण्यात आले. या संपूर्ण प्रक्रियेचे व्हिडिओ रेकॉर्डिंगही करण्यात आले. तपासणीअंती टपाली मतपत्रिकांच्या मोजणी संख्येत काहीही फरक पडला नाही.

मुद्देसूद हरकत घेतलेली नव्हती

यानंतर दोन्ही केंद्रीय मतमोजणी निरीक्षकांनी आवश्यक असलेले प्राधिकार दिल्यानंतर निवडणूक निर्णय अधिकारी यांनी निवडणुकीचा निकाल तसेच विजयी उमेदवार 7.53 वा जाहीर केला व श्री. कीर्तीकर यांच्या प्रतिनिधींनी 08.06  वाजता पुनर्मतमोजणीचे लेखी पत्र सादर केले. त्यांनी घेतलेली हरकत ही विहित मुदतीनंतर होती तसेच त्यांनी कोणतीही मुद्देसूद हरकत घेतलेली नव्हती तसेच संपूर्ण मतमोजणी प्रक्रिया तसेच ‘व्हीव्हीपॅट’ मोजणी दरम्यान कोणतीही हरकत घेण्यात आली नव्हती असे 27- मुंबई उत्तर पश्चिमच्या निवडणूक निर्णय अधिकारी यांनी कळविले आहे.

—–000——

सांगली दि 4 (जि.मा.का.) :  लोकसभा सार्वत्रिक निवडणूक-2024 अंतर्गत 44-सांगली लोकसभा मतदारसंघात  अपक्ष उमेदवार  विशाल (दादा) प्रकाशबापू पाटील विजयी झाल्याचे जिल्हाधिकारी तथा 44-सांगली लोकसभा मतदारसंघाचे निवडणूक निर्णय अधिकारी डॉ. राजा दयानिधी यांनी घोषित केले. त्यांना 5 लाख 71 हजार 666 इतकी मते मिळाली. विजयी उमेदवार विशाल पाटील यांना निवडणूक निर्णय अधिकारी डॉ. राजा दयानिधी यांच्या हस्ते निवडीचे प्रमाणपत्र देण्यात आले. 44-सांगली लोकसभा मतदारसंघात उमेदवारांना विधानसभा मतदारसंघनिहाय पडलेली मते पुढीलप्रमाणे.