अमरावती, दि. 04 : महानुभाव पंथाची काशी म्हणून रिध्दपूर सर्वदूर प्रसिध्द आहे. तसेच जगातील पहिले मराठी भाषा विद्यापीठ या ठिकाणी स्थापित होत आहे. या पार्श्वभूमीवर येथे कायदा व सुव्यवस्थेच्या दृष्टीकोनातून पोलीस चौकी स्थापित होवून त्याचे लोकार्पण आज होत आहे, ही अतिशय आनंदाची व अभिनंदनाची बाब आहे. रिध्दपूरच्या सर्वांगिण विकासासाठी नागरिकांच्या मागण्यांना प्राधान्य देत सीएसआर फंड व अन्य योजनांतून निधी उपलब्ध करुन दिला जाईल, अशी ग्वाही राज्याचे उच्च व तंत्रशिक्षण, वस्त्रोद्योग, संसदीय कार्यमंत्री तथा अमरावती जिल्ह्याचे पालकमंत्री चंद्रकांत (दादा) पाटील यांनी दिली.

जिल्हाधिकारी कार्यालयाच्या महसूल भवन येथे शिरखेड पोलीस स्टेशन अंतर्गत येत असलेल्या रिध्दपूर येथे उभारण्यात आलेल्या पोलीस चौकीचा पालकमंत्र्यांच्या हस्ते ऑनलाईन पध्दतीने लोकार्पण करण्यात आले. त्याप्रसंगी ते बोलत होते. विशेष पोलीस महानिरीक्षक रामनाथ पोकळे, जिल्हाधिकारी सौरभ कटियार, पोलीस आयुक्त नवीनचंद्र रेड्डी, अमरावती ग्रामीणचे पोलीस अधिक्षक विशाल आनंद, अपर पोलीस अधिक्षक पंकज कुमावत, महापालिका आयुक्त सचिन कलंत्री, जिल्हा परिषदेच्या मुख्य कार्यकारी अधिकारी संजिता मोहपात्रा, निवासी उपजिल्हाधिकारी अनिल भटकर यांच्यासह अन्य विभागप्रमुख आदी यावेळी उपस्थित होते.

  पालकमंत्री श्री. पाटील म्हणाले की, महानुभाव पंथाची काशी म्हणून ओळख असणाऱ्या रिध्दपूर हे मराठी वाड्मयाची सुध्दा काशी आहे. या पावन भूमीत मराठीतील लिळाचरित्र आद्यग्रंथ लिहीला गेला आहे. मराठी भाषेचा उगम याठिकाणी झाला असून जगातील पहिले मराठी भाषेचे विद्यापीठ येथे निर्माण होत आहे. जगभरातील संशोधक व अनुयायी मराठी भाषेच्या संशोधनासाठी याठिकाणी भेट देतील. या पार्श्वभूमीवर कायदा व सुव्यवस्थेच्या दृष्टीने पोलीस चौकी स्थापन करणे हा शासनाचा मानस होता. त्यानुसार आज याठिकाणी भाड्याच्या ईमारतीत पोलीस चौकी स्थापित होऊन त्याचे लोकार्पण आज होत आहे, त्याबद्दल जिल्हा प्रशासनाचे पालकमंत्र्यांनी अभिनंदन केले.

ते पुढे म्हणाले की, यापुढेही रिध्दपूरच्या सर्वांगिण विकासासाठी नागरिकांच्या मागणीनुसार आवश्यक सोयी-सुविधांच्या निर्मितीसाठी शासनाकडून निधी पुरविण्यात येईल. अद्ययावत पोलीस स्टेशन हे लोकांच्या संरक्षण व सुविधेची हमी असते. त्यानुषंगाने पोलीस चौकीच्या निर्मितीमुळे कायदा व सुव्यवस्थेच्या दृष्टीने येथील नागरिकांना आवश्यक सुविधा उपलब्ध झाली आहे. रिध्दपूर येथे आवश्यक असलेल्या पायाभूत सुविधांबाबत मागणीचा प्रस्ताव जिल्हा प्रशासनाने शासनास सादर करावा, त्यानुषंगाने निधी उपलब्ध करुन दिला जाईल, असेही पालकमंत्री श्री. पाटील यांनी यावेळी सांगितले.

रिध्दपूर येथे पोलीस चौकी उभारण्यासंबंधी मागणी व त्यानुषंगाने पोलीस विभागाकडून करण्यात आलेली कार्यवाही याबाबत पोलीस अधिक्षक विशाल आनंद यांनी प्रास्ताविकातून माहिती यावेळी दिली.

000

बारामती, दि. ४: आगामी काळात उद्योगजगताला असणाऱ्या कुशल मनुष्यबळाची गरज लक्षात घेता विद्यार्थ्यांनी पारंपरिक शिक्षणाऐवजी कौशल्य शिक्षण घ्यावे, याकरीता आवश्यक त्या सर्व पायाभूत सुविधा निर्माण करण्यास शासन कटिबद्ध असल्याचे प्रतिपादन उपमुख्यमंत्री तथा जिल्ह्याचे पालकमंत्री अजित पवार यांनी केले.

माळेगाव येथील शासकीय औद्योगिक प्रशिक्षण संस्थेतील डिजिटल सी. एन. सी. सिम्युलेशन लॅबच्या लोकार्पण प्रसंगी ते बोलत होते. यावेळी सहसंचालक रमाकांत भावसार, प्राचार्य  अवधूत जाधवर, भारत फोर्जच्या पुणे प्रमुख डॉ. लीना देशपांडे, बारामतीचे प्रमुख संजय अग्रवाल, सिम्युशॉफ्ट टेक्नॉलॉजीचे मुख्य कार्यकारी अधिकारी सुनील चौरे आदी उपस्थित होते.

श्री.पवार म्हणाले, राज्य शासनाच्या कौशल्य विकास व उद्योजकता विभागाच्यावतीने  कौशल्य प्रशिक्षण देण्यात येत आहे. जागतिक पातळीवर कुशल मनुष्यबळाची मोठ्या प्रमाणात मागणी असल्याने आगामी काळात युवकांना परदेशात नोकरी करण्याची संधी उपलब्ध करुन देण्याकरीता प्रयत्न करण्यात येत आहे. या वर्षी रोजगार निर्मितीकरीता विविध करार करण्यात आले आहेत.

समाजातील सर्व घटकांना शिक्षण व प्रशिक्षणाचे महत्व समजून सांगण्याची आपली जबाबदारी असून या संधीपासून एकही विद्यार्थी वंचित राहू नये. प्रत्येकाला दर्जेदार प्रकारचे ज्ञान मिळाले पाहिजे, अशी राज्य शासनाची भूमिका आहे. या शासकीय औद्योगिक प्रशिक्षण संस्थेच्या माध्यमातून कौशल्यधिष्ठित मनुष्यबळ निर्माण करण्यात येत आहे.त्यामुळे विद्यार्थ्यांनी व्यवस्थितरित्या प्रशिक्षण पूर्ण करावे.या कार्यशाळेत नवनवीन गोष्टी शिकत राहा,  शिकतांना होणाऱ्या चुका दुरुस्त करुन पुढे जा, प्रचंड मेहनत करा, जीवनातील आवाहने पेलण्यास तयार राहा आणि जीवनात यशस्वी व्हा, असे श्री.पवार म्हणाले.

उद्योगांनी सामाजिक कार्यात सहभाग घ्यावा

भारत फोर्जने जिल्ह्यात यापूर्वी खेड शासकीय औद्योगिक प्रशिक्षण संस्थेला मदत केली असून आता माळेगाव येथील शासकीय औद्योगिक प्रशिक्षण संस्था डिजिटल सी. एन. सी. सिम्युलेशन लॅबच्या स्वरूपात मदत केली आहे. या लॅबमुळे  अतिशय अत्याधुनिक मशीनवर काम करणारे प्रशिक्षित मनुष्यबळ उद्योग क्षेत्राला मिळणार आहे. मशीनवर काम करण्याची भीती कमी होऊन त्यांचा आत्मविश्वास वाढण्यास मदत होईल. याचा विद्यार्थ्यांना त्यांच्या भविष्यातील प्रगतीच्या वाटचालीत निश्चित लाभ होईल.

भारत फोर्ज कंपनीने देशात रोजगार निर्मिती करुन नागरिकांना रोजगार उपलब्ध करुन दिले. ही संस्था उद्योगबरोबरच सामाजिक क्षेत्रातही फार मोठ्या प्रमाणात काम करीत आहेत, याचा मराठी माणसाला अभिमान आहे. भारत फोर्जप्रमाणे इतरही उद्योगांनी सामाजिक कार्यात पुढाकार घ्यावा, असे आवाहन श्री. पवार यांनी केले.

डॉ. देशपांडे यांनी भारत फोर्जच्या कंपनीच्या कामकाजाविषयी माहिती दिली. श्री. चौरे यांनी डिजिटल सी. एन. सी. सिम्युलेशन लॅबची माहिती दिली.

अमरावती, दि. 04 (जिमाका): जिल्हा नियोजन समितीअंतर्गत जिल्हा वार्षिक योजना सन 2024-25 मध्ये 79 कोटींची (20 टक्के) वाढ करुन सर्वसाधारण योजनेत 474 कोटी निधी, अनुसूचित जाती उपयोजना 102 कोटी व आदिवासी उपयोजनासाठी  103 कोटी 59 लाख असे एकूण 679 कोटी 59 लाख निधी मंजूर आहे. तरी सर्व शासकीय यंत्रणांनी 31 ऑगस्ट 2024 पर्यंत निविदा प्रक्रिया राबवून विकास कामांचे कार्यारंभ आदेश दिले गेले पाहिजेत, असे निर्देश उच्च व तंत्र शिक्षण, वस्त्रोद्योग मंत्री तथा पालकमंत्री चंद्रकांत (दादा) पाटील यांनी आज येथे दिले.

जिल्हा नियोजन समितीची आढावा बैठक पालकमंत्री चंद्रकांत (दादा) पाटील यांच्या अध्यक्षतेखाली नियोजन भवन येथे घेण्यात आली, त्यावेळी ते बोलत होते. खासदार बळवंत वानखडे, दिव्यांग मंत्रालयाचे अध्यक्ष तथा आमदार ओमप्रकाश उर्फ बच्चू कडू, आमदार सुलभा खोडके, आमदार रवी राणा, आमदार यशोमती ठाकूर, आमदार प्रताप अडसड, आमदार देवेंद्र भुयार यांच्यासह जिल्हाधिकारी सौरभ कटियार, पोलीस आयुक्त नवीनचंद्र रेड्डी, महापालिका आयुक्त सचिन कलंत्री, जिल्हा परिषदेच्या मुख्य कार्यकारी अधिकारी संजिता मोहपात्रा, सहायक जिल्हाधिकारी पि. मिनू, पोलीस अधीक्षक विशाल आनंद, निवासी उपजिल्हाधिकारी अनिल भटकर, जिल्हा नियोजन अधिकारी अभिजीत मस्के तसेच विविध विभागांचे प्रमुख यावेळी उपस्थित होते.

पालकमंत्री श्री. पाटील पुढे म्हणाले की,  जिल्हा वार्षिक योजनांचे नियोजन करताना शाश्वत विकासाचे ध्येय, जिल्ह्याचे व्हिजन, पायाभूत सुविधांमध्ये भर देण्यावर प्राधान्य देण्यात येणार आहे. तसेच विहित कालावधीमध्ये गुणवत्तापूर्ण व दर्जेदार कामे पूर्ण करण्यासाठी सर्व कार्यान्वयीन यंत्रणांनी समन्वयाने कामे करावी. जिल्ह्यातील सर्व लोकप्रतिनिधी व नियोजन समिती सदस्यांनी मंजूर निधी अंतर्गत विविध विकासात्मक कामाचे प्रस्ताव दिनांक 10 ऑगस्ट 2024 पर्यंत प्रशासकीय यंत्रणांकडे सादर करावेत. महाराष्ट्र विधानसभा आचारसंहिता आगामी काही दिवसात लागण्याची शक्यता आहे. त्याअनुषंगाने सर्व शासकीय यंत्रणांनी मंजूर केलेल्या कामांची निविदा प्रक्रिया पूर्ण करून 31 ऑगस्ट 2024 पर्यंत त्या कामांचे कार्यारंभ आदेश .देण्याची कार्यवाही तातडीने करावी, अशा सूचना त्यांनी दिल्या.

जिल्हा वार्षिक योजना सन 2024-25 अंतर्गत कृषी व संलग्न सेवा क्षेत्र 46.96 कोटी, ग्राम विकास 31.37 कोटी, नागरी क्षेत्राचा विकास 88.84 कोटी, पाटबंधारे व पूर नियंत्रण 17.32  कोटी, ऊर्जा विकास 35 कोटी,  रस्ते विकास 38 कोटी, सामान्य शिक्षण 21.30 कोटी, आरोग्य क्षेत्र 58 कोटी, तीर्थक्षेत्र पर्यटन व गड किल्ले 27.18 कोटी, महिला व बाल विकास 14.19 कोटी, व्यायामशाळा व क्रीडांगण विकास 7.68 कोटी अशा महत्त्वाच्या क्षेत्रासाठी निधीची तरतूद करण्यात आलेली असल्याची माहिती पालकमंत्री श्री. पाटील यांनी दिली. तसेच केंद्र सरकारच्या आकांक्षित तालुका कार्यक्रमास अमरावती जिल्ह्यातील चिखलदारा व धारणी हे दोन आकांक्षित तालुक्याचा समावेश करण्यात आला आहे.  यासाठी दहा कोटीचा निधी ठेवण्यात आलेला आहे. तसेच ज्या यंत्रणांनी अद्याप सन 2023-24 मधील मंजूर कामासाठी आवश्यक दायित्वाच्या निधीची मागणी केली नाही ती मागणी लवकरात लवकर करावी. तसेच प्रशासकीय मान्यतेसाठी आवश्यक कार्यवाही केलेली नाहीत, त्यांनी ती तातडीने पूर्ण करणे गरजेचे असल्याचे त्यांनी निर्देशित केले.

प्रारंभी जिल्हाधिकारी सौरभ कटियार यांनी ‘मुख्यमंत्री माझी लाडकी बहिण’, ‘मुख्यमंत्री युवा कार्य प्रशिक्षण योजना’ व ‘मुख्यमंत्री तीर्थदर्शन योजना’ संदर्भातील सादरीकरण केले. मुख्यमंत्री लाडकी बहिण योजनेतंर्गत जिल्ह्यात 4 लाखापेक्षा जास्त महिलांची नोंदणी झाली असून त्यापैकी 1 लाख 35 हजारापेक्षा जास्त प्रकरणांची पडताळणी झाली असल्याचे त्यांनी सांगितले. यावेळी पडताळणी झालेल्या 10 लाडक्या बहिणींना पालकमंत्र्याच्या हस्ते प्रमाणपत्राचे वाटप करण्यात आले. तसेच मुख्यमंत्री युवा कार्य प्रशिक्षण योजनेतंर्गत जिल्हाधिकारी कार्यालयात प्रशिक्षणार्थी म्हणून निवड झालेल्या 30 प्रशिक्षणार्थींना  पालकमंत्र्याच्या हस्ते नियुक्तीपत्र देण्यात आले. त्यानंतर श्री. कटियार यांनी जिल्हा नियोजन समितीच्या बैठकीतील विविध विषयाची माहिती सादर केली. जिल्हा वार्षिक योजना सन 2023-24 चा माहे मार्च 2024 अखेर सर्वसाधारण योजना 395 कोटी अनुसूचित जाती उपायोजना 102 कोटी आदिवासी क्षेत्राबाहेरील उपयोजना 103.59 कोटी असा एकूण मंजूर निधीच्या 600.59 कोटीच्या अंतर्गत 600.56 कोटी खर्च झाल्याची माहिती देऊन खर्चाची टक्केवारी 99.99% इतके असल्याचे त्यांनी सांगितले.

जिल्हा नियोजनातील कामे करताना सर्व यंत्रणांनी प्रस्ताव सादर करताना कामांची निकड , लोकप्रतिनीधींनी दिलेल्या शिफारशी, सूचना तसेच सामान्य जनतेच्या मागण्यांना महत्त्व देऊन कामांचा प्राधान्यक्रम निश्चित करुन प्रस्ताव सादर करावे. आगामी काळातील आचारसंहिता विचारात घेऊन तातडीने निविदा प्रक्रिया पूर्ण करुन निधी खर्ची पडेल, असे नियोजन करण्याच्या यंत्रणांना सूचना दिल्या. तसेच जिल्ह्यातील सामान्य रुग्णालय, प्राथमिक आरोग्य केंद्र येथे रुग्णांना मुलभूत सुविधा, पावसाळात उद्भवणाऱ्या संसर्गजन्य रोगासाठी स्वतंत्र वार्ड, औषधे व मनुष्यबळासाठी आवश्यक निधी उपलब्ध करुन दिल्या जाईल. यासाठी आवश्यक बाबीचा प्रस्ताव तातडीने सादर करुन निधी उपलब्ध करुन देण्याच्या सूचना संबंधितांना यावेळी देण्यात आले.

अतिवृष्टीमुळे नाल्यांना पूरस्थिती निर्माण होऊन नाल्याकाठी असलेल्या घरांना नुकसान होण्याची शक्यता असते. त्यामुळे नाल्याना संरक्षण भिंत उभारणे आवश्यक असून यासाठी आवश्यक निधीचा प्रस्ताव तयार करावा. तसेच अतिवृष्टीच्या काळात ग्रामीण भागातील वीज पुरवठा सुरळीत राहण्यासाठी महावितरणने विशेष दक्षता बाळगावी. जिल्हा सामान्य रुग्णालय तसेच जिल्हा स्त्री रुग्णालयात उपचारासाठी येणाऱ्या रुग्णांच्या नातेवाईकांची राहण्याची व्यवस्था निर्माण व्हावी, यासाठी आवश्यक जागा निश्चित करुन धर्मशाळेची निर्मितीचा प्रस्ताव सादर करण्याचे निर्देश श्री. पाटील यांनी संबंधितांना दिले.

प्रारंभी जिल्हा नियोजन अधिकारी अभिजित मस्के यांनी सर्व लोकप्रतिनिधी व सर्व समिती सदस्यांचे स्वागत केले. नियोजन समितीच्या बैठकीतील विविध विषयांची माहिती त्यांनी सादर केली.

बारामती, दि.४:  उपमुख्यमंत्री तथा जिल्ह्याचे पालकमंत्री अजित पवार यांच्या हस्ते  प्राथमिक आरोग्य केंद्र, सांगवी येथील कर्मचारी निवासस्थानाकरीता मंजूर करण्यात आलेल्या नवीन इमारतीच्या बांधकामाचे भूमिपूजन करण्यात आले.

यावेळी राष्ट्रीय आरोग्य अभियानाचे पुणे मंडळाचे कार्यकारी अभियंता मंदार कुलकर्णी, जिल्हा आरोग्य अधिकारी डॉ. सचिन देसाई, तहसीलदार गणेश शिंदे, गट विकास अधिकारी अनिल बागल, तालुका आरोग्य अधिकारी डॉ. मनोज खोमणे, पुणे जिल्हा मध्यवर्ती बँकेचे संचालक रणजित तावरे, बारामती सहकारी बँकचे अध्यक्ष सचिन सातव, माजी जिल्हा परिषद सदस्या मीनाक्षी तावरे आदी उपस्थित होते.

श्री. पवार म्हणाले, सांगवी येथील प्राथमिक आरोग्य केंद्राच्या परिसरात नव्याने करण्यात येणाऱ्या निवासस्थान इमारतीचे काम गुणवत्तापूर्ण, दर्जेदार, टिकाऊ पद्धतीचे करावे. त्याकरीता उत्तमप्रतीचे साहित्य वापरावे. या इमारतीमुळे आरोग्य केंद्रातील डॉक्टर आणि इतर कर्मचाऱ्यांच्या निवासाची व्यवस्था होणार असून अप्रत्यक्षपणे येथील रात्री-अपरात्री येणाऱ्या रुग्णांना देखील याचा लाभ होणार आहे. एकूणच सांगवीच्या वैभवात भर पाडणारी  इमारत उभी राहील असे काम करावे, असे  आवाहन त्यांनी केले.

ते पुढे म्हणाले, बारामती तालुक्यात नागरिकांना उत्तम नागरी सुविधा मिळण्याकरीता पुढील ५० वर्षाचा विचार करुन इमारती बांधण्यात येत आहेत. याकरीता निधीही उपलब्ध करुन देण्यात येत आहे.  यापूर्वी देखील बऱ्हाणपूर येथील पोलीस उपमुख्यालय, अतिरिक्त पोलीस अधीक्षक यांचे कार्यालय, बारामती बसस्थानक, पोलीस अधिकारी व कर्मचाऱ्यांचे निवासस्थान अशा प्रशस्त, सुंदर, भव्य, सोईयुक्त, आकर्षक आणि दर्जेदार इमारतीचे बांधकाम पूर्ण करुन लोकार्पण करण्यात आले आहे.

राज्य शासनातर्फे राबविण्यात येणाऱ्या योजनाबद्दल बोलताना उपमुख्यमंत्री श्री. पवार म्हणाले, सन २०२४-२५ चा अतिरिक्त अर्थसंकल्प शेतकरी, कष्टकरी, विद्यार्थी, युवक, महिला, मागासवर्गीय, आदिवासी, अल्पसंख्याक अशा सर्व घटकांना न्याय देण्यासाठी शेती, उद्योग, रोजगार शिक्षण, आरोग्य अशा विविध विषयांसाठी निधीची तरतूद करण्यात आली आहे.  समाजातील सर्व घटकातील नागरिकांना न्याय देण्याकरीता मुख्यमंत्री माझी लाडकी बहीण योजना, मुख्यमंत्री युवा कार्य प्रशिक्षण योजना, मुख्यमंत्री बळीराजा मोफत वीज योजना, पुण्यश्लोक अहिल्यादेवी होळकर महिला स्टार्टअप योजना अशा विविध विविध कल्याणकारी योजना राबविण्यात येत आहेत. आरोग्य व शिक्षण क्षेत्रात काम करणाऱ्या आशा स्वयंसेविका, अंगणवाडी सेविका, गटप्रवर्तकांना सानुग्रह अनुदान देण्याचा निर्णय घेण्यात आला आहे, असे त्यांनी सांगितले.

इमारतीसाठी साडे तीन कोटीचा निधी
सांगवी येथील एकूण १२ निवासस्थानाच्या बांधकामासाठी राष्ट्रीय आरोग्य अभियानअंतर्गत ३ कोटी ६५ लक्ष रुपयांचा निधी मंजूर करण्यात आला आहे. एका निवासस्थानाचे क्षेत्रफळ ७८४ चौरस फुट असून प्रमाणे एकूण १२ निवासस्थानाचे बांधकाम क्षेत्रफळ ९ हजार ४०८ चौरस फुट आहे.

पुणे दि. ४- उपमुख्यमंत्री तथा जिल्ह्याचे पालकमंत्री अजित पवार यांनी पुणे आणि पिंपरी चिंचवड शहरातील पूरपरिस्थितीच्या पार्श्वभूमीवर वरिष्ठ अधिकाऱ्यांशी दूरध्वनीद्वारे संपर्क साधून जिल्ह्यातील आपत्ती व्यवस्थापन यंत्रणा सज्ज ठेवण्याचे आणि नदीकाठच्या सखल भागातील नागरिकांच्या सुरक्षिततेसाठी तातडीने उपाययोजना करण्याचे निर्देश दिले.

श्री.पवार यांनी विभागीय आयुक्त, पुणे आणि पिंपरी चिंचवड महापालिका आयुक्त , जिल्हाधिकारी, पाटबंधारे विभागातील वरिष्ठ अधिकाऱ्यांकडून पूरपरिस्थितीबाबत माहिती घेतली. खडकवासला धरणातील विसर्ग दिवसा वाढवून पाणीसाठा ६५ टक्क्यांवर आणावा, जेणेकरून रात्रीच्यावेळी पाऊस झाल्यास नदीपात्रात अधिक विसर्ग करावा लागणार नाही. महापालिकेने ध्वनिक्षेपक आणि समाज माध्यमाद्वारे नागरिकांना खबरदारी घेण्याच्या सूचना द्याव्यात, त्यांना वेळोवेळी पुरपरिस्थितीची माहिती द्यावी.

नदीकाठच्या सखल भागातील कुटुंबांचे सुरक्षित स्थळी स्थलांतर करून त्यांना आवश्यक सुविधा पुरवाव्यात. आपत्तीच्या परिस्तिथीत प्रशासनाच्या मदत व बचाव यंत्रणेने गतिमान पद्धतीने प्रतिसाद द्यावा. सर्व यंत्रणांनी परस्पर संपर्कात राहून समन्वयाने काम करावे, असे निर्देशही उपमुख्यमंत्री पवार यांनी दिले.

जिल्ह्यातील विविध धरणातील पाणीसाठा, धरणातून होणारा पाण्याचा विसर्ग, पावसाचे प्रमाण, हवामानाचा अंदाज, पूरग्रस्त भागातील नागरिकांचे स्थलांतर याविषयीदेखील श्री.पवार यांनी अधिकाऱ्यांकडून माहिती घेतली.

जिल्हा प्रशासन सतर्क असून सर्व यंत्रणा क्षमतेने मदत आणि बचाव कार्यात कार्यरत आहेत. नागरिकांनी घाबरून न जाता आपत्ती व्यवस्थापनात प्रशासनाला सहकार्य करावे. हवामान विभागाने आजच्या दिवसासाठी अतिमुसळधार पावसाचा इशारा दिला आहे. जिल्ह्यातील खडकवासला, पानशेत, वरसगाव, भाटघर, मुळशी अशा विविध धरणातून मोठ्या प्रमाणात पाण्याचा विसर्ग होत आहे.

नागरिकांनी नदीकाठच्या धोकादायक भागातून सुरक्षित स्थळी किंवा प्रशासनातर्फे तयार करण्यात आलेल्या तात्पुरत्या शिबिरात स्थलांतरित व्हावे. प्रशासन नागरिकांच्या मदतीसाठी आणि सुरक्षेसाठी कार्यरत असून नदीपात्रापासून दूर रहात प्रशासनाला सहकार्य करावे, असे आवाहनही उपमुख्यमंत्री पवार यांनी केले आहे.

वरिष्ठ अधिकाऱ्यांची एकता नगर परिसराला भेट
विभागीय आयुक्त डॉ.चंद्रकांत पुलकुंडवार, पुणे महानगरपालिका आयुक्त डॉ.राजेंद्र भोसले, जिल्हाधिकारी डॉ.सुहास दिवसे यांनी एकता नगर परिसराला भेट दिली. तेथील मदत व बचावकार्य युद्धपातळीवर सुरू असून त्याचा आढावाही अधिकाऱ्यांनी घेतला. अधिकाऱ्यांनी नागरिकांशी संवाद साधून त्यांच्या समस्या जाणून घेतल्या आणि नागरिकांच्या सुरक्षेला सर्वोच्च प्राधान्य देण्याचे निर्देश अधिकाऱ्यांना दिले.

दरम्यान भारतीय लष्कराची एक तुकडी मदतकार्यासाठी दाखल झाली आहे. या तुकडीत १०५ जवान आहेत. आवश्यकता असल्यास आणखी एक तुकडी राखीव म्हणून तयार ठेवण्यात आली आहे.

नागपूर, दि. 3- मानेवाडा चौक, म्हाळगीनगर येथील उड्डाणपुलामुळे नागरिकांना मोठी सुविधा होणार आहे. उड्डाणपुलामुळे रिंगरोड आता अधिक परिपूर्ण होईल. नागरिकांची वाहतूक कोंडीतून सुटका होईल, असे प्रतिपादन उपमुख्यमंत्री देवेंद्र फडणवीस यांनी केले.

उपमुख्यमंत्री देवेंद्र फडणवीस आणि केंद्रीय रस्ते वाहतूक व महामार्ग मंत्री नितीन गडकरी यांच्या हस्ते  म्हाळगीनगर चौक व मानेवाडा चौक उड्डाणपूल बांधकामाच्या भूमिपूजन समारंभाचे उदयनगर चौक, रिंगरोड  येथे आयोजन करण्यात आले. यावेळी उपमुख्यमंत्री श्री. फडणवीस बोलत होते.

गत दहा वर्षात केंद्रीयमंत्री नितीन गडकरी यांनी नागपूर महानगरात चांगले रस्ते, उड्डाणपूल निर्मितीतून जागतिक पातळीवरचा बहुमान नागपूरला दिला. चांगल्या रस्त्यांबरोबरच आरोग्य सुविधांवरही लक्ष देण्यात आले आहे. नागपुरातील सामान्य जनतेच्या आरोग्यासाठी सुमारे ६०० कोटी रुपये निधी आपण दिला आहे. यातून वैद्यकीय महाविद्यालयात अत्याधुनिक सुविधा आपण नव्याने उपलब्ध करून देत असल्याचे उपमुख्यमंत्री म्हणाले.

केंद्रीय मंत्री नितीन गडकरी म्हणाले की, गेल्या अनेक काळापासून या  भागात वाहतुकीची समस्या होती. उड्डाणपुलामुळे वाहतुकीची ही समस्या सुटेल. अनेक वर्षापासून या भागातील नागरिकांची उड्डाणपुलाची मागणी होती. आता उड्डाणपूलाचे भूमिपूजन झाल्यावर लवकरच हा उड्डाणपूल पूर्णत्वास येणार आहे.  या भागातील दळणवळणाची सुविधा या माध्यमातून सुकर होणार असल्याचे केंद्रीय मंत्री श्री. गडकरी यावेळी म्हणाले.

कार्यक्रमाला आमदार मोहन मते यांच्यासह स्थानिक लोकप्रतिनिधी उपस्थित होते.