सातारा, दि.10 :  सातारा येथील श्री छत्रपती शिवाजी महाराज संग्रहालयाला माहिती तंत्रज्ञान, सांस्कृतिक कार्यमंत्री अॅड.आशिष शेलार यांनी आज भेट देऊन संग्रहालयातील शिवकालीन वस्तूंची पाहणी करुन माहिती घेतली.

या भेटीप्रसंगी सार्वजनिक बांधकाम मंत्री श्रीमंत छत्रपती शिवेंद्रसिंहराजे भोसले, माजी आमदार दिलीप येळगावकर, संग्रहालयाचे सहायक अभिरक्षक प्रविण शिंदे, धैर्यशील कदम यांच्यासह विविध संस्थांचे पदाधिकारी उपस्थित होते.

छत्रपती शिवाजी महाराज यांच्या पदस्पर्शाने पावन झालेल्या सातारा जिल्ह्यात मी पहिल्यांदाच येत आहे.  श्री छत्रपती शिवाजी महाराज संग्रहालयात प्रदर्शनासाठी ठेवण्यात आलेल्या वाघनखांचे दर्शन घेतले.  यातून मला प्रेरणा मिळाली असल्याचे  सांस्कृतिक कार्यमंत्री अॅड.आशिष शेलार यांनी यावेळी सांगितले.

राज्यातील गडकिल्ल्यांना पूर्व परिस्थितीत आणण्याचा आराखडा तयार करण्यात आला आहे.   त्या आराखड्यानुसार काम सुरु असून गडकिल्ले सुरक्षित व त्यांना वैभव प्राप्त होण्याच्या दृष्टीने काम सुरु आहे.  रायगड किल्ल्यासाठी प्राधिकरणाची स्थापना करण्यात आली असून स्वयंसेवी संस्था, सामाजिक संस्था व समाजातील दानशूर व्यक्तींची मदत घेऊन शिवकालीन किल्यांचे संवर्धन करणार असल्याचेही त्यांनी सांगितले.

पुणे, दि. १०: आगामी विश्व मराठी संमेलना च्या अनुषंगाने साहित्यिकांच्या सूचना जाणून घेण्यासाठी मराठी भाषा मंत्री उदय सामंत यांनी त्यांच्याशी संवाद साधला. विश्व मराठी संमेलनात मराठी भाषेच्या सर्व घटकांना समाविष्ट करण्यात येईल, अशी ग्वाही श्री. सामंत यांनी यावेळी दिली.

फर्ग्युसन महाविद्यालय येथे आयोजित या संवादास महाराष्ट्र राज्य साहित्य आणि संस्कृती मंडळाचे अध्यक्ष डॉ. सदानंद मोरे, महाराष्ट्र राज्य मराठी विश्वकोश निर्मिती मंडळाचे अध्यक्ष डॉ. रवींद्र शोभणे, राज्य मराठी विकास संस्थेच्या नियामक मंडळाचे सदस्य डॉ. गणेश चंदनशिवे, मराठी भाषा विभागाचे सहसचिव नामदेव भोसले, राज्य मराठी विकास संस्थेचे संचालक तथा विश्वकोश निर्मिती मंडळाचे प्रभारी सचिव डॉ. शामकांत देवडे, भाषा संचालक विजया डोणीकर, महाराष्ट्र राज्य साहित्य आणि संस्कृती मंडळाच्या सचिव मीनाक्षी पाटील आदी उपस्थित होते.

मराठीला अभिजात भाषेचा दर्जा मिळाल्यानंतरचे पहिले विश्व मराठी संमेलन पुणे येथे होत आहे, असे सांगून मंत्री उदय सामंत म्हणाले, मुंबई, त्यानंतर वाशी आणि आता पुणे येथे हे संमेलन होत आहे. ३१ जानेवारी, १ आणि २ फेब्रुवारी २०२५ असे तीन दिवस फर्ग्युसन महाविद्यालय येथे या संमेलनाचे आयोजन करण्यात आले आहे.

मंत्री श्री. सामंत यांनी पुढे माहिती दिली, या साहित्य संमेलनात मराठीसाठी मोठे योगदान दिलेले एक ज्येष्ठ साहित्यिक त्याचबरोबर एक नवीन लेखकाचा देखील सन्मान करण्यात येणार आहे. त्याशिवाय मराठीला अभिजात दर्जा मिळण्यासाठी हातभार लावलेल्या सर्व समित्यांचा, त्यातील साहित्यिकांचाही सन्मान करण्यात येणार आहे.

श्री. सामंत पुढे म्हणाले, या संमेलनात बाल साहित्यापासून, महिला, युवक, बुजूर्गांपर्यंत अशा सर्वांनाच समाविष्ट करण्याचा प्रयत्न आहे. तसेच मराठीसाठी योगदान दिलेले परंतु, काही कारणामुळे ते पुढे येऊ शकले नाहीत अशांनाही या संमेलनात आणण्याचा प्रयत्न सुरू आहे. विश्वातील मराठी भाषिकांनीही या संमेलनात त्यांच्या इच्छेने आणि शासनाच्या प्रयत्नाने समाविष्ट व्हावे, यासाठी प्रयत्न सुरू असल्याचे ते म्हणाले.

संतसाहित्य, अभंगवाणी, लोककला, महिला साहित्य, बालसाहित्य, मराठीतील आधुनिक प्रवाह, ऐतिहासिक आणि सांस्कृतिक गीतांवर आधारित गीते, भावगीते आणि आधुनिक गीते अशा विविध टप्प्यातील सांस्कृतिक कार्यक्रम आदींवर भर देण्यात येणार आहे. फर्ग्युसन महाविद्यालयातील भव्य प्रेक्षागृहात युवा पिढीसह विविध नाविन्यपूर्ण संकल्पनांवर कार्यक्रम आयोजित करता येतील. वाचन संस्कृतीला चालना द्यावी यासाठी पुस्तकांच्या 100 स्टॉलचे नियोजन करण्यात आले असून त्याहून अधिक स्टॉल लावण्याच्यादृष्टीने प्रयत्न करण्यात येतील, असेही ते म्हणाले.

अभिजात भाषेचा दर्जा मिळाल्यानंतर मराठीच्या विकासासाठी केंद्र शासनाकडून अधिकाधिक निधी मिळावा यासाठी प्रस्ताव गतीने पाठविण्यात येणार आहे. याशिवाय अभिजात भाषेत समाविष्ट झालेली प्राकृत ही भाषादेखील मराठीचे मूळ असल्यामुळे त्यातील वाटादेखील मिळण्यासाठी प्रयत्न करण्यात येईल, असेही श्री. सामंत यावेळी म्हणाले.

मराठी भाषा विभागाने ‘लायब्ररी ऑन व्हील्स’ ही संकल्पना विभागस्तरावर सुरू करण्याचा निर्णय घेतला असून त्यानंतर पुढे ती जिल्हास्तरावर कशी राबविता येईल यादृष्टीनेही प्रयत्न करण्यात येतील. उद्योग आणि मराठीला एकत्र आणण्याचा प्रयत्न सुरू असून उद्योगांनी त्यांच्या सामाजिक दायित्व निधीतून (सीएसआर) ग्रंथालयांना जिल्हाधिकारी यांच्या माध्यमातून निधी द्यावा यासाठी प्रयत्न सुरू ओहत. ग्रंथालयांच्या विकासासाठी त्यांच्या स्थापनेच्या कालावधीनुसार वर्गीकरण करुन त्यांना पुस्तके, फर्निचर, साधनसामुग्रीच्या विकासासाठी निधी मिळेल यासाठी प्रयत्न करण्यात येतील, अशीही माहिती श्री. सामंत यांनी दिली.

यावेळी विविध साहित्यिकांनी साहित्य संमेलनात संत साहित्य, लोककला, स्त्रीसाहित्य, कृत्रिम बुद्धीमत्ता आणि मराठी भाषेची सांगड, मराठी पुस्तकांचा परदेशी भाषांमध्ये अनुवाद, मुद्रित शोधन, समाजमाध्यमांवर दर्जेदार मराठी लेखन, मराठीतून दर्जेदार रील्स बनविणे आदींच्या अनुषंगाने चर्चासत्रे ठेवणे आदींबाबत सूचना मांडल्या. त्याबाबत सकारात्मक राहून संमेलनात समाविष्ट करण्याच्यादृष्टीने प्रयत्न करण्यात येतील, असेही मंत्री श्री. सामंत म्हणाले.

बैठकीनंतर मंत्री श्री. सामंत यांनी विश्व मराठी संमेलन होणाऱ्या जागेची पाहणी करुन विविध सूचना केल्या.

बैठकीस योगी निरंजन नाथ, महाराष्ट्र साहित्य परिषदेचे कार्याध्यक्ष प्रा. मिलिंद जोशी, ज्येष्ठ साहित्यिक डॉ. लक्ष्मीकांत देशमुख, डॉ. माधवी वैद्य आदींसह विविध साहित्यिक, फर्ग्युसन महाविद्यालयाच्या मराठी भाषा विभागाच्या प्रमुख प्रा. रुपाली शिंदे यांच्यासह विविध महाविद्यालयांच्या मराठी भाषा विभागांचे प्रमुख उपस्थित होते.

पुणे, दि. १०: महसूलमंत्री चंद्रशेखर बावनकुळे यांनी  विभागीय आयुक्त कार्यालय, विधानभवन येथील झुंबर हॉलमध्ये दुपारी २ ते ४ या वेळेत नागरिकांशी संवाद साधून त्यांच्या समस्या जाणून घेतल्या.

यावेळी विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डुडी, महसूल कर्मचारी संघटना, ग्राम महसूल अधिकारी संघटना, कोतवाल संघटनेचे पदाधिकारी तसेच नागरिक उपस्थित होते.

यावेळी नुकसान भरपाईच्या रकमा, ग्रामपंचायत निधी, शासकीय जमिनी भोगवटा वर्ग १ करणे, आधार कार्ड, जळीत प्रकरणी नुकसान भरपाई अदा करणे, अहिल्यानगर येथे कापूस खरेदी- विक्री केंद्र सुरु करणे, अल्पसंख्याक आयोगाची नियुक्ती करणे, पानशेत पूरग्रस्तांचे पुनर्वसन, गुहागर रत्नागिरी लाईट हाऊस टुरिझम आदी विषयांवर नागरिकांकडून तसेच महसूल कर्मचारी संघटने कडून महसूल विभागाचा आकृतीबंध अद्ययावत करणेबाबत निवेदन सादर करण्यात आले. प्राप्त झालेल्या निवेदनावर मंत्री महोदयांनी शेरे लिहून संबंधित विभागाकडे तात्काळ हस्तांतरित करण्यात आली.

यावेळी नागरिकांना भेटण्याची प्रक्रिया सुलभ होण्यासाठी टोकन पद्धती राबविण्यात आली. शेतकऱ्यांसाठी घेण्यात आलेल्या आकारीपड जमिनींच्या निर्णयाबद्दल अभिनंदन करुन शासनाचे आभार यावेळी नागरिकांकडून मानण्यात आले.

यावेळी विदर्भ, मराठवाडा तसेच पुणे जिल्हा व परिसरातील नागरिक उपस्थित होते.

सोलापूर, दि.१० (जिमाका):-सोलापूर हा बहुविध, बहुभाषिक असा महत्वपूर्ण जिल्हा आहे. येथील कापड उद्योग क्षेत्र खूप मोठे असून पुण्यश्लोक अहिल्यादेवी होळकर विद्यापीठाने पुढील काळात कापड उद्योग क्षेत्राला सहाय्यभूत ठरणारे अभ्यासक्रम विकसित करावेत, असे आवाहन राज्यपाल तथा कुलपती सी. पी. राधाकृष्णन यांनी केले.

पुण्यश्लोक अहिल्यादेवी होळकर विद्यापीठाच्या २० व्या दीक्षांत समारंभात राज्यपाल श्री. राधाकृष्णन विद्यार्थ्यांना मार्गदर्शन करत होते. यावेळी पद्मभूषण प्रा. ज्येष्ठराज जोशी, कुलगुरू प्रकाश महानवर, प्र. कुलगुरू लक्ष्मीकांत दामा, कुलसचिव योगिनी घारे, जिल्हाधिकारी कुमार आशीर्वाद, परीक्षा मंडळाचे सचिव श्रीकांत अंधारे यांच्यासह अन्य मान्यवर व विद्यार्थी मोठ्या संख्येने उपस्थित होते.

राज्यपाल श्री. राधाकृष्णन पुढे म्हणाले की, सोलापूर हे कापड उद्योगाचे महत्त्वपूर्ण केंद्र आहे. तसेच येथे दळणवळणाचे सर्व साधने उपलब्ध आहेत. लवकरच हवाई वाहतुकीने हे सोलापूर जोडले जात आहे, त्यामुळे कापड उद्योगाला चालना मिळेल या प्रकारचे अभ्यासक्रम विद्यापीठाने निर्माण करून  संशोधनासाठी विद्यार्थ्यांना प्रोत्साहित केले पाहिजे. यामध्ये फॅशन डिझायनिंग, बी टेक, बीएससी टेक्स्टाईल,  केमिकल आदी अभ्यासक्रमाच्या समावेश करावा. तसेच विद्यापीठाने येथील बाजारपेठ समजून घेऊन व्यापारी उद्योजक यांच्या समन्वयातून बाजारपेठेच्या मागणीप्रमाणे अभ्यासक्रम निर्माण करावेत असे त्यांनी सांगितले.

केंद्रशासनाने सन २०४७ पर्यंत भारत एक विकसन विकसित राष्ट्र होईल असे उद्दिष्ट समोर ठेवले असून जगातील तिसऱ्या क्रमांकाची अर्थव्यवस्था होईल हेही उद्दिष्ट ठेवले आहे. हे उद्दिष्ट चांगल्या शिक्षण पद्धतीच्या माध्यमातून साध्य होणार आहे. विद्यार्थ्यांनी समर्पण भाव ठेवून शिक्षण घेऊन संशोधनात्मक वृत्ती जागृत ठेवली पाहिजे. भारतातील शास्त्रज्ञही जागतिक स्तरावरील शास्त्रज्ञाच्या बरोबरीचे आहेत याचे उदाहरण म्हणजे कोविड वरील पहिली लस भारतीय शास्त्रज्ञाने निर्माण केली तसेच भारताची चंद्राच्या दक्षिण ध्रुवावरील चांद्रयान मोहीम ही भारतीय शास्त्रज्ञाचे महत्त्व अधोरेखित करते. तसेच मानवी विकासाचा निर्देशांक ही शिक्षणाच्या माध्यमातून ठरणार आहे. शिक्षण हे जीवनभर घेत राहिले पाहिजे त्यासाठी विद्यार्थ्यांनी सकारात्मक दृष्टिकोन ठेवून कठोर शिस्तीचे पालन करावे व नकारात्मक गोष्टीकडे दुर्लक्ष करावे, असे आवाहन राज्यपाल राधाकृष्णन यांनी केले.

विद्यापीठाच्या माध्यमातून विद्यार्थी घडवण्याचे महत्त्वपूर्ण काम केले जाते. विद्यापीठातून नवीन ज्ञान मिळवून ज्ञानाचा प्रसार करण्याचे कामही विद्यार्थ्यामार्फत केले जाते. विद्यार्थ्यांनी नेहमी आनंदी राहिले पाहिजे तसेच सकारात्मक दृष्टिकोन ठेवून संशोधनाच्या कामात स्वतःला ठेवले पाहिजे. विद्यार्थ्यांनी विज्ञान तंत्रज्ञानाचा वापर करून सर्वसामान्यांच्या उत्पन्नात वाढ होईल यासाठी प्रयत्न करावेत. यातूनच राष्ट्राचे उत्पन्न वाढून एक सामर्थ्यशाली राष्ट्र घडण्यास मदत होणार असल्याचे प्रतिपादन पद्मभूषण ज्येष्ठराज जोशी यांनी केले.

कुलगुरू डॉ. प्रकाश महानवर यांनी विद्यापीठाच्या अहवालाचे वाचन केले. यामध्ये विद्यापीठ अंतर्गत विज्ञान शाखा, वाणिज्य शाखा, आंतरविद्या शाखा, मानव विज्ञान शाखा, विज्ञान व तंत्रज्ञान या शाखांचा अभ्यासक्रमाबरोबरच विविध विद्यापीठ स्तरावरील क्रीडा प्रकारांची माहिती दिली. तसेच विद्यापीठाच्या वतीने वारकरी संप्रदाय आंतरराष्ट्रीय संशोधन आणि प्रशिक्षण केंद्राचा प्रस्ताव सादर करण्यात आल्याचे सांगितले. विद्यापीठ कौशल्य शिक्षणावर भर देत असून डॉ. बाबासाहेब आंबेडकर इंटरनॅशनल सेंटर फॉर रिसर्च सोशल जस्टिस अँड एम्पॉवरमेंट यासाठी १५५ कोटीचा प्रस्ताव देण्यात आल्याचेही त्यांनी सांगितले. विद्यापीठाला काही दिवसापूर्वीच शंभर कोटीचा निधी प्राप्त झाल्याचेही त्यांनी सांगून विविध पायाभूत सुविधा निर्मिती बरोबरच शैक्षणिक कार्यात हा निधी वापरला जाणार असल्याचे त्यांनी यावेळी सांगितले. तसेच पुण्यश्लोक अहिल्यादेवी होळकर यांच्या त्रिशताब्दी जयंती वर्षानिमित्त विद्यापीठात आयोजित कार्यक्रमासाठी देशाचे माननीय प्रधानमंत्री महोदय यांना आमंत्रित करण्याची मागणी त्यांनी यावेळी राज्यपाल महोदय यांच्याकडे केली.

यावेळी विद्यापीठ परिसरात पुण्यश्लोक अहिल्यादेवी होळकर यांच्या त्रिशताब्दी वर्षानिमित्त अहिल्यादेवी यांच्या जीवनावरील चित्रांचे प्रदर्शनाचे उद्घाटन राज्यपाल राधाकृष्णन यांनी करून अहिल्यादेवी होळकर यांचा जीवन प्रवास हा आपल्या सर्वांसाठी मार्गदर्शक असल्याचे सांगून सर्व विद्यार्थ्यांचे त्यांनी अभिनंदन केले व त्यांना भावी वाटचालीसाठी शुभेच्छा दिल्या. प्रारंभी राज्यपाल महोदय व अन्य मान्यवर यांचे व्यासपीठावर आगमन दीक्षांत मिरवणूकीतून झाले. त्यानंतर राज्यपाल तथा विद्यापीठाचे कुलपती सी. पी. राधाकृष्णन यांच्या उपस्थितीमध्ये विद्यापीठाच्या विविध ज्ञान शाखेमधील १५हजार २९१ विद्यार्थ्यांना पदवी तर ७१ संशोधक विद्यार्थ्यांना पीएचडी पदवी तर ५७ विद्यार्थ्यांना सुवर्णपदके देऊन सन्मानित करण्यात आले.  हा दीक्षांत समारंभ कार्यक्रम अत्यंत उत्साही वातावरणात संपन्न झाला.

००००

पुणे,दि.१०:- शेती महामंडळाच्या जमिनीची व संयुक्त शेती क्षेत्राची सद्यस्थिती व अद्ययावत माहिती महामंडळाकडे असावी यासाठी या जमिनीचे जिओ टॅगिंग करण्यात यावे व या कामाला प्राधान्य देण्यात यावे असे निर्देश महसूल मंत्री चंद्रशेखर बावनकुळे यांनी दिले.

महाराष्ट्र राज्य शेती महामंडळाच्या कामकाजाचा आढावा घेण्यासाठी विधान भवन येथे आयोजित बैठकीत महसूल मंत्री चंद्रशेखर बावनकुळे बोलत होते. खासदार डॉ. मेधा कुलकर्णी, आ. योगेश टिळेकर, विभागीय आयुक्त डॉ. चंद्रकांत पुलकुंडवार, जिल्हाधिकारी जितेंद्र डूडी, महाराष्ट्र राज्य शेती महामंडळाचे व्यवस्थापकीय संचालक किशोर तावडे, अतिरिक्त जिल्हाधिकारी रुपाली आवले यावेळी उपस्थित होते.

श्री.बावनकुळे म्हणाले, महाराष्ट्र राज्य शेती महामंडळाच्या विविध जिल्ह्यांमध्ये जमिनी आहेत. या जमिनीची सद्यस्थितीचा आढावा घेता यावा, जमिनीवर झालेले अतिक्रमण याची अचूक माहिती प्रशासनाकडे असणे आवश्यक आहे. यासाठी महामंडळाच्या जमिनींचे जिओ टॅगिंग करणे आवश्यक आहे. त्यासाठी आधुनिक तंत्रज्ञानाच्या मदतीने या जमिनींचे जिओ टॅगिंग करण्यास प्राधान्य द्यावे.

शेती महामंडळाचे कार्यकारी संचालक श्री.तावडे यांनी बैठकीमध्ये महामंडळाच्या जमिनींची माहिती सादर केली. महामंडळाच्या ताब्यात एकूण ८५ हजार ५७३ एकर जमीन  आहे. शेती महामंडळाकडे वर्ग झालेल्या जमिनीमधून आवश्यकतेनुसार विविध सार्वजनिक प्रयोजनांसाठी जमीन देण्याचे अधिकार राज्य शासनास आहेत अशी माहिती त्यांनी दिली.

सातारा दि. 10 (जि.मा.का.) : 10 वी 12 वीच्या परीक्षा संपल्यानंतर महाबळेश्वर-पाचगणी परीसरात तीन दिवसीय भव्य राज्यस्तरीय पर्यटन महोत्सव घेण्यात येईल, त्यासाठी प्रशासनाने सुयोग्य जागा निवडावी, असे निर्देश पर्यटन मंत्री शंभूराज देसाई यांनी दिले.

जिल्हाधिकारी कार्यालयात पाटण तालुक्यातील विधानसभा मतदार संघातील मंजूर, सुरु असलेल्या तसेच प्रस्तावित विविध विकास कामांचा आढावा घेण्यासाठी पर्यटनमंत्री शंभूराज देसाई यांनी बैठक घेतली. यावेळी जिल्हा परिषदेच्या मुख्य कार्यकारी अधिकारी याशनी नागराजन, पोलीस अधीक्षक समीर शेख, उपवनसंरक्षक आदिती भारद्वाज, सार्वजनिक बांधकाम विभागाचे कार्यकारी अभियंता राहुल अहिरे, जलसंपदा विभागाचे अरुण नाईक ,  उपजिल्हाधिकारी महसूल विक्रांत चव्हाण, जिल्हा नियोजन अधिकारी शशिकांत माळी, जिल्हा शल्यचिकित्सक युवराज कर्पे यांच्यासह विविध विभागांचे अधिकारी उपस्थित होते.

निवडणूकीपूर्वी अनेक विकास कामांना मंजूरी देण्यात आलेली आहे. सध्या ही विकास कामे कोणत्या टप्प्यावर आहेत यासंबधीचा आढावा श्री. देसाई यांनी घेतला. यामध्ये पाटण येथील प्रशासकीय इमारत, उपजिल्हा रुग्णालयाची इमारत, लोकेनेते बाळासाहेब देसाई यांचे दौलतनगर येथील शताब्दी स्मारकाच्या टप्पा क्र. 2 मधील नाट्यगृह व मुलामुलींचे वसतिगृह, राज्य उत्पादन शुल्क विभागासाठी प्रशक्षिण संस्था इमारत, नागठाणे येथील राष्ट्रीय महामार्गावरील पूल, पाटण विधानसभा मतदासंघातील विविध पुनर्वसनाची कामे, जलजीवन मिशनमधील कामे, पाणंद रस्ते, पुण्यश्लोक आहिल्यादेवी होळकर स्मारक आदि सर्व कामांचा या बैठकीत आढावा घेण्यात आला.

यावेळी शंभूराज देसाई यांनी  स्मार्ट प्राथमिक आरोग्य केंद्र व मॉडेल स्कूल चा पॅटर्न राबविणारा सातारा जिल्हा राज्यासाठी आर्दशवत ठरला आहे. सातारा जिल्ह्याचे हे दोन्ही उपक्रम राज्यात सर्वत्र राबविण्याचा निर्णय शासनाने घेतला आहे. जिल्ह्यासाठी ही अभिमानाची बाब आहे. या उपक्रमांमध्ये समाविष्ट असणाऱ्या अनेक शाळा, व पीएचसींची कामे येत्या दोन महिन्यात पूर्ण होतील. या उपक्रमांसाठी जिल्हा नियोजन समितीच्या माध्यमातून जवळपास 153 कोटी रुपये देण्यात आले आहे असे सांगून या दोन्ही योजनांमधील कामांचा आढावाही घेण्यात आला.

या बैठकीत नागठाणे येथे नॅशनल हायवेवर काम रखडल्याने वाहतूक कोंडी होऊन जवळपास 10 किमीच्या रांगा लागत आहेत. या ठिकाणी वाहतूक कोंडी होऊ नये यासाठी आवश्यक कार्यवाही करावी.  स्थानिक ग्रामस्थांची दुसऱ्या अंडर पासच्या रस्त्याची मागणी आहे. त्याप्रमाणे वेगळा प्रस्ताव तयार करावा अशा सूचना दिल्या. सध्या सुरु असलेल्या पाणंद रस्त्यांच्या कामांपैकी पाटण विधानसभा मतदारसंघामध्ये जवळपास 185 पाणंद रस्त्यांची कामे रखडलेली आहेत. अनेक रस्त्यांमध्ये शेतकऱ्यांची मान्यता मिळण्याबाबत अडचणी येत आहेत. यावर चर्चा होऊन ज्या रस्त्यांच्या कामांसाठी शेतकऱ्यांच्या मान्यतेची अडचण होत आहेत अशा ठिकाणी तहसिलदार आणि गट विकास अधिकाऱ्यांनी भेटी द्याव्यात व शेतकऱ्यांची संमती मिळावावी. पावसाळयापूर्वी पुनर्वसनाची कामे मार्गी लावावीत. जिल्हा नियोजन समितीच्या माध्यमातून मंजूर झालेली सर्व कामे कोणत्याही परिस्थितीत पूर्ण होतील याची दक्षता यंत्रणांनी घ्यावी, असे निर्देश दिले.

भंडारा, दि.१० : आमदार नाना पटोले यांच्या सुकळी येथील निवासस्थानी मुख्यमंत्री देवेंद्र फडणवीस यांनी आज  सांत्वन पर भेट दिली. नुकतेच श्री.पटोले यांच्या मातोश्री मीराबाई फाल्गुनराव पटोले यांचे वृद्धापकाळाने दुःखद निधन झाले. यावेळी मुख्यमंत्री महोदयांनी त्यांच्या प्रतिमेस पुष्प अर्पण करून श्रद्धांजली वाहिली.