नागपुर, दि.५: भारत निवडणूक आयोगाने शिक्षक मतदार संघाचा द्विवार्षिक निवडणूक कार्यक्रम जाहिर केला आहे. नागपूर शिक्षक मतदार संघात निवडणुकीसंदर्भात मतदाराला कोणत्याही प्रकारच्या तक्रारी असल्‍यास यासाठी  विभागीय आयुक्त कार्यालयामध्ये २४ तास कार्यरत नियंत्रण कक्षाची स्थापना करण्यात आली आहे.

नागपूर विभाग मतदारसंघात निवडणूक संदर्भात मतदाराला कोणत्याही प्रकारची तक्रार असल्यास किंवा मत मिळविण्यासाठी रोख रक्कम किंवा वस्तु देणे, कोणत्याही प्रकारच्या धमक्या, मताधिकाराच्या मुक्त वापरात बळजबरी करणे, निवडणूक फायद्यासाठी राज्य यंत्रणेचा गैरवापर हात असल्यास  नियंत्रण कक्षाचा 0712-2542518 किवा dycommgadngp@gmail.com यावर संपर्क साधावा किंवा विभागीय आयुक्त कार्यालय नागपूर येथे प्रत्यक्ष हजर राहुन तक्रार दाखल करावी. अशी माहिती सहायक निवडणूक निर्णय अधिकारी प्रदीप कुलकर्णी यांनी प्रसिध्दी पत्रकाद्वारे दिली आहे.

000

मुंबई, दि. 5 : माहिती व जनसंपर्क महासंचालनालय निर्मित ‘दिलखुलास’ या कार्यक्रमात क्रीडा व युवक सेवा आयुक्त सुहास दिवसे यांची मुलाखत प्रसारित होणार आहे. ही मुलाखत राज्यातील आकाशवाणीच्या 22 केंद्रावरून तसेच ‘न्यूजऑन एआयआर’ या ॲपवरून शुक्रवार दिनांक 6 व शनिवार दिनांक 7 जानेवारी 2022 रोजी सकाळी 7.25 ते 7.40 यावेळेत  प्रसारित होणार आहे.

महाराष्ट्र राज्य ऑलिम्पिक क्रीडा स्पर्धा सध्या सुरु आहेत. या स्पर्धेमुळे क्रीडा विश्वात चैतन्याचे वातावरण आहे. या संपूर्ण पार्श्वभूमीवर क्रीडा व युवक सेवा आयुक्त सुहास दिवसे यांनी दिलखुलास कार्यक्रमातून विस्तृत माहिती दिली आहे. राज्य शासनाच्या क्रीडा विभागाचे स्पर्धेसाठी योगदान, स्पर्धेची तयारी, विविध खेळांचा समावेश, उपलब्ध सुविधा अशा विविध विषयांची उपयुक्त माहिती श्री. दिवसे यांनी ‘दिलखुलास’ कार्यक्रमातून दिली आहे. सहायक संचालक सागरकुमार कांबळे यांनी ही मुलाखत घेतली आहे.

००००

सातारा दि. ५: केंद्रीय गृह राज्यमंत्री अजय मिश्रा यांनी फलटण तालुक्यातील कोळकी ग्रामपंचायत येथील रास्त भाव धान्य दुकानास भेट देऊन पाहणी केली. या वेळी श्री. मिश्रा यांनी अंत्योदय योजनेतून धान्य मिळणाऱ्या लाभार्थ्यांशी संवाद साधला.

या वेळी खासदार रणजितसिंह नाईक निंबाळकर, आमदार सर्वश्री रणजितसिंह मोहिते पाटील, राम सातपुते, माजी मंत्री बाळा भेगडे, प्रशांत परिचारक, प्रांताधिकारी शिवाजीराव जगताप, तहसीलदार समीर यादव यांच्यासह रास्त भाव दुकानदार श्री. नांदले, अंत्योदय योजनेचे लाभार्थी व ग्रामस्थ उपस्थित होते.

रास्त भाव दुकानात मिळत असलेले धान्य, ई पॉस मशीन, शिधापत्रिका, धान्य नोंदवही याची पहाणी श्री. मिश्रा यांनी केली. तसेच लाभार्थींना नियमित व चांगले धान्य मिळत असल्याबद्दल समाधान व्यक्त केले. लाभार्थींना धान्य मिळण्यात काही अडचणी आहेत का? या विषयी विचारणा करून चांगल्या पद्धतीने लाभ दिला जात असल्याबद्दल ही समाधान व्यक्त केले.

000

मुंबई, दि. 5 : मराठी भाषा ही जगातील सर्वाधिक मौल्यवान भाषा आहे. सर्वांच्या हृदयापर्यंत पोहोचणारी ही संस्कारांची भाषा जनाजनाच्या मनामनात पोहोचविण्यासाठी हे विश्व मराठी संमेलन अतिशय महत्त्वपूर्ण असल्याचे प्रतिपादन सांस्कृतिक कार्य मंत्री सुधीर मुनगंटीवार यांनी केले.

मुंबई येथील नॅशनल स्पोर्टस् क्लब ऑफ इंडिया, वरळी येथे आयोजित ‘मराठी तितुका मेळवावा’ या पहिल्या विश्व मराठी संमेलनात आयोजित परिसंवादात ते बोलत होते. यावेळी व्यासपीठावर लोकमत मुंबईचे संपादक अतुल कुलकर्णी, झी 24 तास या वृत्त वाहिनीचे संपादक निलेश खरे, साम टीव्ही मराठीचे प्रसन्न जोशी, महाराष्ट्र टाइम्स ऑनलाईनचे संपादक अभिजित कांबळे, निवेदक अजित चव्हाण उपस्थित होते.

यावेळी बोलतांना मंत्री श्री मुनगंटीवार म्हणाले, मी महाराष्ट्रीय असल्याचा मला अभिमान आहे. मराठी भाषेने जन्माला घातलेली विरासत ही जगातील दहा प्रमुख विरासतींपैकी एक आहे. विश्व मराठी संमेलन हे मराठी भाषा सर्वदूर पोहोचविण्याचे प्रभावी माध्यम आहे. यनिमित्ताने मराठी भाषेचे महत्त्व अधोरेखित होईल, असेही त्यांनी सांगितले.

विश्व मराठी संमेलन आयोजनासाठी मराठी भाषा मंत्री दीपक केसरकर आणि त्यांच्या संपूर्ण टीमचे उत्कृष्ट आयोजनासाठी विशेष कौतुक श्री. मुनगंटीवार यांनी यावेळी केले.

या कार्यक्रमास मराठी भाषा विभागाच्या सचिव मनीषा म्हैसकर यांच्यासह विविध देशातील मराठी मंडळाचे प्रतिनिधी उपस्थित होते.

मराठी भाषा विभाग, सांस्कृतिक कार्य विभाग आणि उद्योग विभाग यांच्या सहकार्याने आयोजित विश्व मराठी संमेलनाचा उद्या समारोप होणार आहे.

००००

मनीषा पिंगळे/विसंअ/

मुंबई, दि. 5 :- राज्यातील उच्च व तंत्र शिक्षण अधिकाधिक विद्यार्थ्यांपर्यंत पोहोचावे यासाठी तांत्रिक विषयांचे मराठीकरण करण्यात येत आहे, अशी माहिती उच्च व तंत्रशिक्षण मंत्री चंद्रकांत पाटील यांनी दिली. वरळी येथे आयोजित मराठी विश्व संमेलनात शुभेच्छा देतांना ते बोलत होते.

विश्व मराठी संमेलनाच्या भारदस्त आयोजनासाठी मराठी भाषा विभागाचे अभिनंदन करून मंत्री श्री. पाटील म्हणाले, राज्य शासन मराठी भाषेच्या संवर्धनासाठी प्रभावी पाऊल उचलत आहे. शासकीय कामकाज मराठीतूनच व्हावे, असे निर्देश राज्य शासनाने दिले आहेत. त्याचप्रमाणे संशोधनासारखा विषय मातृभाषेतून शिकविण्यावर भर देण्यात येत आहे. तसेच विधी विषयक कामकाज मराठीतून व्हावे यासाठी कायदेविषयक शिक्षण मराठी भाषेतून देण्यात येणार आहे.

मराठी भाषेचा वापर वाढावा यासाठी तंत्रज्ञानाची मदत घेण्यात येत आहे. आयआयटी मुंबईने यासाठी एक सॉफ्टवेअर तयार करून दिले आहे. या माध्यमातून इंग्रजी मधील पुस्तकं पूर्णतः मराठीतून वाचता येणार आहेत. तसेच कोणत्याही भाषेतून मराठी विषय शिकविला गेला तरी त्याचा अभ्यास मराठीतून करता येणार असल्याचेही त्यांनी यावेळी सांगितले.

मराठी भाषेला अधिक समृद्ध करण्यासाठी पर्यायी सोपे शब्द शोधून त्यांना दैनंदिन वापरात प्रस्थापित करण्याची आवश्यकता श्री. पाटील यांनी यावेळी व्यक्त केली.

००००

मनीषा पिंगळे/विसंअ/

नागपुर, दि. ५: राष्ट्रसंत तुकडोजी महाराज नागपूर विद्यापीठ येथील १०८ व्या भारतीय विज्ञान काँग्रेस कार्यक्रमात ‘आरोग्यसेवा आणि उद्योगातील नैसर्गिक उत्पादने: शाश्वत विकासातील दृष्टिकोन’, या विषयावर रसायनशास्त्र विभागामध्ये चर्चा करण्यात आली.

अध्यक्षस्थानी कुरुक्षेत्र विद्यापीठाचे प्रा. एस. पी. सिंह हे होते. तर तिरुअनंतपुरम केरळ येथील डॉ. कौस्तभ कुमार मैती, प्रा. डॉ. नीरा राघव यांनी सहभाग घेतला. औषध वितरण ही मानव किंवा प्राण्यांमध्ये उपचारात्मक प्रभाव प्राप्त करण्यासाठी फार्मास्युटिकल कंपाऊंडचे व्यवस्थापन करण्याची पद्धत किंवा प्रक्रिया आहे. असे स्पष्ट मत त्यांनी या चर्चेत मांडले. रोगाने थेट प्रभावित असलेल्या शरीराच्या विशिष्ट भागात फार्मास्युटिकल उत्पादनाचे व्यवस्थापन करण्यासाठी औषध वितरण नेहमीच डॉक्टरांच्या चिंतेचा विषय आहे. जेणेकरून उपचाराचा प्रभाव जास्तीत जास्त वाढवताना दुष्परिणाम कमी होतील. काही नैसर्गिक पॉलिमरमध्ये असलेल्या रासायनिक भागांच्या मूळ गुणधर्मांचा विचार करून संशोधन गटाने विकसित केलेल्या काही औषध वितरण प्रणालींवर देखील चर्चा करण्यात आली. शिखा गुप्ता यांनी सूत्रसंचालन केले तर डॉ. पायल ठवरे यांनी आभार मानले.

000

नागपूर,दि.५: विज्ञानाच्या सहय्याने शाश्वत विकासाचे ध्येय प्राप्त करण्यात महिलांचे योगदान महत्त्वपूर्ण आहे. महिलांनो आता स्वयंस्फूर्तीने विज्ञानक्षेत्रात भरारी घ्या आणि आकाश कवेत घ्या,असे आवाहन वैज्ञानिक डॉ. निशा मेंदरत्ता यांनी आज महिला विज्ञान काँग्रेसच्या उद्घाटन प्रसंगी केले.

राष्ट्रसंत तुकडोजी महाराज विद्यापीठात सुरु असलेल्या १०८ व्या भारतीय विज्ञान काँग्रेसमध्ये आज महिला विज्ञान काँग्रेसचा उद्घाटन सोहळा पार पडला.वैज्ञानिक डॉ. निशा मेंदरत्ता, पद्मश्री  राहीबाई पोपेरे, भारतीय विज्ञान काँग्रेसच्या अध्यक्ष डॉ. विजयलक्ष्मी सक्सेना, महासचिव डॉ.एस.रामकृष्ण, उद्योजिका कांचन गडकरी,कुलगुर डॉ. सुभाष चौधरी आणि महिला विज्ञान काँग्रेसच्या संयोजक डॉ.कल्पना पांडे आदी मान्यवर यावेळी उपस्थित होते.

डॉ.निशा मेंदिरत्ता म्हणाल्या की, कुटुंब, समाजाबरोबरच देशविकासात महिलांची भूमिका महत्त्वाची आहे. वर्तमानस्थितीत शिक्षणात मुली आपली योग्यता सिद्ध करीत आहेत. महिलांना विज्ञान क्षेत्रात प्रगती करण्यासाठी पोषक वातावरण व दृष्टीकोन तयार होत आहे. विज्ञानक्षेत्रातही महिलांना प्रोत्साहनाची गरज आहे, असे त्यांनी नमूद केले. देशात विज्ञान तंत्रज्ञान क्षेत्राच्या प्रगतीत महिलांचे योगदान १८ टक्के असून हे प्रमाण वाढविणे आवश्यक आहे. महिलांनी स्वयंस्फूर्तीने विज्ञानाकडे वळावे, असे आवाहन त्यांनी केले.

डॉ. विजयलक्ष्मी सक्सेना यांनी सांगितले की, अदिती, अरुंधती, लोपामुद्रा, गार्गी  या विदुषींनी वेदरचनांमध्ये मोलाचे योगदान देत ज्ञान शाखा भक्कम केली. भारतीय महिलांचे हे गत वैभव विज्ञान क्षेत्रातही आणावे लागेल. त्यासाठी महिलांनी स्वत्वाची जाणीव व वैज्ञानिकदृष्टीचा अंगीकार करून या क्षेत्राला पुढे घेवून जाण्यात व पर्यायाने देश विकासात योगदान देण्याचे आवाहन केले.

राहीबाई पोपेरे यांनी स्वानुभव कथन करत असंख्य अडचणींवर मात करून महिला आपल्या कार्याचा ठसा उमटवू शकतात असा आशावाद मांडला. दुर्गम भागातील वास्तव्य, शिक्षणासह सोयीसुविधांचा अभाव असतांना २२ वर्षांच्या सातत्यपूर्ण प्रयासातून निर्माण केलेली १५३ वाणांच्या बियाण्यांची बँक हा प्रवास त्यांनी मांडला. घरोघरी बीजमाता राहीबाई निर्माण व्हाव्या आणि गावोगावी बियाण्यांच्या बँक तयार व्हाव्या, असे आवाहन त्यांनी उपस्थित महिलांना केले.

कांचन गडकरी यांनी मातृसत्तेचे व महिलांचे समाजाती महत्त्वाचे स्थान अधोरेखित करत, महिलांनी येणाऱ्या पिढ्यांकडे वैज्ञानिक दृष्टीकोन संक्रमित करण्याचे आवाहन केले. डॉ. कल्पना पांडे यांनी महिला विज्ञान काँग्रेसच्या मंचाहून महिलांमध्ये वैज्ञानिक दृष्टीकोन व शाश्वत विकासातील सहभाग वाढेल, असा आशावाद मांडला. डॉ. एस. रामकृष्ण यांनी स्वागतपर भाषण केले.

000

नागपूर, दि. ५ :- देशाच्या प्रगतीसाठी पूरक संशोधन केल्यास नवसंशोधकांना देशहितासाठी काम करण्याच्या संधी उपलब्ध होतील, असा निष्कर्ष पुनरूत्थानासाठी संशोधन परिषदेच्या बैठकीत काढण्यात आला. १०८ व्या भारतीय विज्ञान काँग्रेस अंतर्गत पुनरूत्थानासाठी संशोधन परिषदेचे आयोजन विद्यापीठ परिसरातील गुरूनानक भवन येथे आज करण्यात आले होते.

‘हेतुपूर्ण व परिणामकारक संशोधन कार्यप्रणाली तसेच भारत केंद्रीत संशोधन’, या विषयावर बोलतांना प्रा. राजेश बिनीवाले म्हणाले की, संशोधनात यशप्राप्तीसाठी उद्देश ठरवून काम करावे. लक्ष केंद्रित करून आवडीने शिकण्याची वृत्ती जोपासण्याचे व आपल्या कामात सातत्य ठेवून हुशारीने त्यांची अंमलात आणावे. संशोधनात अपयश असे काही नसते, एका उद्देशात अपयशी ठरलेले संशोधन दुसऱ्या क्षेत्रात उपयोगी पडले असल्याची उदाहरणे त्यांनी दिले. संशोधकांना मार्गदर्शन करण्यासाठी सुरू करण्यात आलेले ‘तपस’ या पाच दिवसीय अभ्यासक्रमाची माहिती दिली.

‘शाश्वत विकासासाठी भारतीय शिक्षण सुत्रप्रणाली’ या विषयावर वाराणसी येथील संपुर्णानंद संस्कृत विश्वविद्यालयाचे आचार्य ज्ञानेंद्र सापकोटा, भारतीय शिक्षण मंडळाचे महासचिव उमाशंकर पचौरी व आय. आय. एम. बोधगया येथील प्रा. विनीता सहाय यांनी मार्गदर्शन केले.

तिसऱ्या सत्रात ‘संशोधन आणि विकासासाठी उद्योग आणि धोरणाचा दृष्टीकोन’ या विषयावर मर्सिडिज बेंझ बंगळुरू येथील संशोधन अधिकारी अंशुमन अवस्थी, निती आयोगाचे माजी सदस्य डॉ. राजीव कुमार, व व्ही.एन.आय.टी.चे संचालक प्रा. प्रमोद पडोले यांनी मार्गदर्शन केले. तर शेवटच्या सत्रात ‘संशोधन आणि विकासाच्या अंमलबजावणीसाठी कृती’, या विषयावर भारतीय शिक्षा मंडळाचे आयोजन सचिव आचार्य मुकुल कानिटकर यांनी मार्गदर्शन केले.

याप्रसंगी रिसर्च फॉर रिसर्जन फाऊंडेशनचे (आर.एफ.आर.एफ.) महासंचालक प्रा. राजेश बिनीवाले, भारतीय शिक्षा मंडळाचे महासचिव उमाशंकर पचौरी, आय.आय.टी. खरगपूरचे प्रा. डॉ. मकरंद घांगरेकर उपस्थित होते. उपस्थित मान्यवरांनी परिषदेच्या उद्घाटनाची घोषणा केली. परिषदेस विविध राज्यातील संशोधक तसेच आर. एफ. आर. एफ. चे पदाधिकारी व अधिकारी उपस्थित होते.

000