नाशिक, दि. १ – स्वच्छता अभियान ही प्रत्येकाची जबाबदारी असून यात नागरिकांचा स्वयंस्फूर्तीने सहभाग महत्त्वाचा आहे. ‘आशेवाडी’ हे गाव स्वच्छतेचा आदर्शवत अग्रदूत असून या गावातील स्वच्छतेचे अनुकरण इतर गावांनीही करावे. असे प्रतिपादन केंद्रीय आरोग्य व कुटुंब कल्याण राज्यमंत्री डॉ. भारती पवार यांनी केले.

आज दिंडोरी तालुक्यातील रामशेज किल्ला, आशेवाडी येथे आयोजित ‘स्वच्छता हिच सेवा’ कार्यक्रमात केंद्रीय मंत्री डॉ. भारती पवार बोलत होत्या. यावेळी जिल्हाधिकारी जलज शर्मा, जिल्हा परिषदेचे उप मुख्य कार्यकारी अधिकारी दिपक पाटील, दिंडोरीचे तहसिलदार पंकज पवार,  गटविकास अधिकारी नम्रता जगताप, बाल विकास प्रकल्प अधिकारी विलास कवळे, आशेवाडीचे सरपंच साहेबराव माळेकर, उपसरपंच सौ. लताबाई कापसे, माजी जि.प सदस्या मनिषा बोडके, दिंडोरी कृषि उत्पन्न बाजार समितीचे संचालक शाम बोडके यांच्यासह ग्रामपंचायत सदस्य, विविध गावचे लोकप्रतिनिधी, विविध संस्थांचे पदाधिकारी, आशेवाडी प्राथमिक विद्यालयाचे विद्यार्थी, गावकरी मोठ्या संख्येने उपस्थित होते.

केंद्रीय मंत्री डॉ.भारती पवार यावेळी म्हणाल्या, प्रधानमंत्री नरेंद्र मोदी यांच्या संकल्पनेतून आज स्वच्छता हिच सेवा अभियान देशभरात राबविले जात आहे. त्याचाच एक भाग म्हणून एक तास स्वच्छतेसाठी या जिल्हास्तरीय उपक्रमाची सुरवात आज रामशेज किल्ला आशेवाडी येथून  ग्रामस्थ व विद्यार्थ्यांसमवेत करण्यात आली. आरोग्यदायी जीवन आणि गावाचा विकास साधायचा असेल तर त्याचे मूळ स्वच्छता आहे. आपल्या घरासोबतच आपला परिसर व आपले गाव स्वच्छ राहिल यादृष्टीने नागरिकांनी स्वयंस्फूर्तीने पुढे येवून इतरांनाही प्रेरणा मिळेल असे काम केले पाहिजे. आपली संस्कृतीही आपल्याला स्वच्छतेची शिकवण देते. आज आशेवाडी गावातील स्वच्छता हि कौतुकास्पद आहे परंतु गावकऱ्यांनी भविष्यातही हे सातत्य सदैव ठेवणे गरजेचे आहे. यासाठी गावातून स्वच्छतेसाठी फेरीचे आयोजन करून जनजागृती झाली पाहिजे. आशेवाडी गावाला रामशेज किल्ल्याचा ऐतिहासिक वारसा आहे.

हा वारसा पर्यटन स्थळ म्हणून विकसित करण्याच्या दृष्टीने वनविभागाशी चर्चा करून सकारात्मक प्रयत्न केला जाईल. परंतु यात सर्वांचा सहभाग व प्रयत्न आवश्यक आहे. असेही राज्यमंत्री डॉ. पवार यांनी यावेळी सांगितले.

राज्यमंत्री डॉ. भारती पवार पुढे म्हणाल्या, स्वच्छतेचा अर्थ केवळ परिसर स्वच्छता हा नाही तर यात आपण आपले चांगले विचार, उत्तम आरोग्य, आपली दिनचर्येतील सूसुत्रता आणने हे अभिप्रेत आहे. कार्यालयात काम करतांनाही आपण योग्य नियोजन केले तर कामे अपूर्ण न राहता वेळेत पूर्ण होतील. उत्तम आरोग्य ही दिर्घ आयुष्याची गुरूकिल्ली असून प्रत्येकाने आपल्या दिनचर्येत योगाभ्यास व  व्यायाम यांचा समावेश करणे गरजेचे आहे. असेही राज्यमंत्री डॉ. भारती पवार यांनी सांगून आशेवाडीच्या गावकऱ्यांचे कौतुक करून शुभेच्छा दिल्या.

आशेवाडी मनात रमणार गाव

आशेवाडी गाव निसर्गरम्य असून मनात रमणार गाव आहे. अशा शब्दात जिल्हाधिकारी जलज शर्मा यांनी आशेवाडी गावाचे कौतुक केले. ते पुढे म्हणाले, आज स्वच्छता हीच सेवा या अभियानाची सुरवात रामशेज किल्ला आशेवाडी येथून झाली. या गावाला प्रथमच भेट दिली असून येथील ऐतिहासिक वारसा व निसर्गरम्य वातावरण मनाला भावून गेले. प्रत्येक घरात स्वच्छता ठेवली तर निश्चितच गावही स्वच्छ होईल यात शंका नाही परंतु गोळा केलेल्या कचऱ्याची विल्हेवाटही योग्य पद्धतीने लावणे तितकेच गरजेचे आहे. गावाच्या विकासासाठी गावकऱ्यांनी केलेल्या मागण्या पूर्ण करण्याच्या दृष्टीने शासनस्तवर प्रयत्न केले जातील असे बोलून जिल्हाधिकारी जलज शर्मा यांनी गावकऱ्यांना अश्वासित केले.

कार्यक्रमाच्या सुरवातीला राष्ट्रपिता महात्मा गांधी व संत गाडेगाबाबा यांच्या प्रतिमेचे पूजन करण्यात आले. तसेच मान्यवरांच्या हस्ते दीपप्रज्वलन करण्यात आले. आशेवाडी प्राथमिक विद्यालयातील विद्यार्थ्यांनींनी स्वागतगीत सादर केले. कार्यक्रमाचे प्रास्ताविक जिल्हा परिषदेचे उपमुख्य कार्यकारी अधिकारी दिपक पाटील यांनी केले. यावेळी माजी जिप सदस्या मनिषा बोडके, सरपंच साहेबराव माळेकर यांनी गावक-यांच्यावतीने मनोगत व्यक्त केले.

स्वच्छता हिच सेवा अभियानाचा प्रारंभ राजशेज किल्ल्याच्या प्रवेशद्वारापासून करण्यात आली. यावेळी केंद्रीय आरोग्य राज्यमंत्री डॉ पवार यांच्या हस्ते वृक्षारोपण करण्यात आले तसेच किल्ल्याच्या पायथ्याशी स्वच्छता करण्यात आली या मोहिमेत शासकीय अधिकारी, आशेवाडी प्राथमिक विद्यालयातील विद्याथी तसेच गावकरी यांनी सहभाग घेतला. यावेळी ‘स्वच्छ भारत निरोगी भारत’, ‘स्वच्छ भारत, सुंदर भारत’अशा घोषणाही देण्यात आल्या.

कार्यक्रमाचे सुत्रसंचलन सुभाष पाटील सर यांनी तर उपस्थितांचे आभार बाल विकास प्रकल्प अधिकारी विलास कवळे यांनी मानले.

पुणे, दि. १: स्वच्छता हीच सेवा या अभियानांतर्गत स्वच्छतेसाठी ‘एक तारीख एक तास’ या उपक्रमात पुणे महानगरपालिकेच्यावतीने आयोजित वॉकेथॉनमध्ये सहभागी होऊन पालकमंत्री चंद्रकांतदादा पाटील यांनी हाती झाडू घेत श्रमदान केले. स्वच्छता ही लोकचळवळ झाली असून स्वच्छतेबाबतची आपल्या देशाविषयीची प्रतिमा बदलत आहे, असे प्रतिपादन मंत्री श्री. पाटील यांनी केले.

यावेळी पुणे महानगर पालिकेचे आयुक्त विक्रम कुमार, अतिरिक्त आयुक्त डॉ. कुणाल खेमनार, विकास ढाकणे, घनकचरा व्यवस्थापन उपायुक्त संदीप कदम यांच्यासह महानगरपालिकेचे विविध विभागप्रमुख उपस्थित होते.

यावेळी पालकमंत्री श्री. पाटील म्हणाले, प्रधानमंत्री नरेंद्र मोदी हे अनेक विषयांमध्ये सर्वसामान्य नागरिकांना जोडून घेत त्याची लोकचळवळ निर्माण करण्यात यशस्वी झाले आहेत. गेल्या साडेनऊ वर्षांत सर्वसामान्यांना स्वच्छता मोहिमेशी जोडत आपल्या देशाची स्वच्छतेबाबतची प्रतिमा बदलली आहे.

आज शहरात साडेतीनशेपेक्षा जास्त ठिकाणी स्वच्छतेसाठी उपक्रम राबविण्यात आला. यात दीड लाखाहून अधिक लोक सहभागी झाले आहेत हे या अभियानाचे यश आहे. सर्व विद्यापीठे, महाविद्यालये, शाळा, विविध संस्था, कारखाने, स्वयंसेवी संस्था यात सहभागी झाले असून लोकसहभागाचे मोठे यश अभियानाला लाभले आहे. यातूनच स्वच्छतेची सवय निर्माण होण्यास मदत होते, असेही ते म्हणाले.

‘स्वच्छता हीच सेवा’ उपक्रमाअंतर्गत पुणे महापालिकेच्या वतीने आयोजित वॉकेथॉनमध्ये महापालिका परिसर, शनिवार वाडा, भिडे पूल आदी ठिकाणी पालकमंत्री यांनी सर्वांसोबत सहभागी होत स्वच्छता केली. यावेळी त्यांनी उपस्थितांना स्वच्छताविषयक शपथ दिली तसेच स्वच्छता कर्मचाऱ्यांशीही संवाद साधला.

नाशिक, दिनांक: 30 सप्टेंबर, 2023 (जिमाका वृत्तसेवा) : येवला शहरातील मुक्तीभुमी येथे १३ ऑक्टोबर रोजी होणारा मुक्तीभूमी दिन कार्यक्रम त्याचप्रमाणे श्री. क्षेत्र कोटमगाव, निमगाव वाकडा व लोणजाई माता यात्रोत्सवाच्या अनुषंगाने सर्व यंत्रणांनी समन्वयाने कामे वेळेत पूर्ण करावीत. असे निर्देश अन्न, नागरी पुरवठा व ग्राहक संरक्षण मंत्री छगन भुजबळ यांनी उपस्थित अधिकाऱ्यांना दिले.

आज येवला येथील संपर्क कार्यालयात आयोजित 13 ऑक्टोबर २०२३ रोजी होणारा मुक्तिदिन कार्यक्रम, श्री. क्षेत्र कोटमगाव, निमगाव वाकडा व लोणजाई माता, सुभाषनगर येथील यात्रोत्सवासाठी उपाययोजना व विविध विकास कामांच्या आढावा बैठकीत मंत्री भुजबळ बोलत होते. या बैठकीस येवला उपविभागीय अधिकारी बााबासाहेब गाढवे, निफाड चे उपविभागीय पोलीस अधिकारी निलेश पालवे, येवला तहसिलदार आबा महाजन, निफाड तहसिलदार शरद घोरपडे, उपविभागीय अभियंता अभिजित शेलार यांच्यासह संबंधित विभागाचे अधिकारी उपस्थित होते.

मंत्री छगन भुजबळ यावेळी म्हणाले, १३ ऑक्टोबर रोजी मुक्तीभूमी येथे मुक्तीभूमी दिनाचा भव्य कार्यक्रमाचे आयोजन केले आहे. या कार्यक्रमास मोठ्या संख्येने अनुयायी येणार आहेत. त्यामुळे  अनुयायांच्या गर्दीचे योग्य नियोजन करण्यात यावे. या कार्यक्रमासाठी बार्टीच्या अधिकाऱ्यांनी पोलीस यंत्रणांशी समन्वय साधून मुक्तीभूमी येथील बाहेरील बॅराकेटिंग व मुक्तीभूमीच्या आतील सर्व व्यवस्था चोख ठेवावी. कार्यक्रमाच्या दिवशी मुक्तीभूमीच्या परिसरात लावले जाणारे स्टॉल्स हे शिस्तबद्ध रितीने लावले गेले पाहिजे. पोलीस यंत्रणेने लाऊड स्पीकरची परवानगी देतांना कालबद्ध नियोजन करूनच परवानगी द्यावी जणेकरून एकाच वेळी लाऊड स्पीकरच्या आवाजाचा गोंधळ होणार नाही याबाबत योग्य दक्षता घ्यावी. बाहेरील परिसराची संपूर्ण साफसफाई, येणाऱ्या लोकांसाठी पिण्याचे स्वच्छ पाणी व पुरेशा प्रमाणात फिरते स्वच्छतागृह, कार्यक्रम पार पडल्यानंतर स्वच्छतेला नगरपालिका अधिका-यांनी प्राधान्य द्यावे. वैद्यकीय अधीक्षक व तालुका आरोग्य अधिकारी यांनी सुसज्ज वैद्यकीय पथक पूर्णवेळ उपलब्ध ठेवावे. उपअभियंता महावितरण येवला यांनी या काळात विद्युत पुरवठा खंडीत होणार नाही याची दक्षता घ्यावी. या ठिकाणी येणाऱ्या वाहनांसाठी पार्किंगची

व्यवस्था तहसीलदार, शहर पोलीस व नगरपालिका यांनी संयुक्तरित्या करण्यात यावी. तसेच पोलीस बंदोबस्त चोख ठेवण्याच्या सूचना मंत्री छगन भुजबळ यांनी यावेळी दिल्या.

मंत्री छगन भुजबळ पुढे म्हणाले, श्री. क्षेत्र कोटमगाव यात्रोत्सवाच्या अनुषंगाने औरंगाबाद रोडपासून मंदिरापर्यंत अतिक्रमण असल्यास ते गटविकास अधिकारी, ग्रामपंचायत व मंदिर ट्रस्ट यांनी संयुक्तरित्या काढावे तसेच आवश्यक तेथे बॅराकेटिंग करावे. महावितरण अधिकाऱ्यांनी यात्रा काळात सर्व विद्युत पोल, विद्युत जोडण्या, फ्युज बॉक्सची तपासणी करून सुस्थितीत ठेवावे, तसेच पूर्णवेळ विद्युत पुरवठा करण्यात यावा. यात्रेच्या ठिकाणी पार्किंगसाठी पुरेशी जागा उपलब्ध होण्यासाठी तहसीलदार, गटविकास अधिकारी, शहर पोलीस, ग्रामपंचायत व मंदिर ट्रस्टने संयुक्तरित्या कार्यवाही करावी. औरंगाबाद महामार्गावर होणारी पार्किंग व वाहतुकीचे नियोजन हे शहर पोलीस, उपअभियंता राष्ट्रीय महामार्ग व उप प्रादेशिक परिवहन विभाग यांनी संयुक्तरित्या करावे. यात्रा ठिकाणी दुकाने व स्टॉलसाठी परवानगी देतांना ग्रामपंचायतीने सुयोग्य नियोजन करावे. वैद्यकीय अधीक्षक व तालुका आरोग्य अधिकारी यांनी संपूर्ण यात्रा कालावधीत सुसज्ज वैद्यकीय पथक पूर्णवेळ उपलब्ध ठेवावे. संपूर्ण यात्रा कालावधीत परिसराची स्वच्छता ठेवावी. आरोग्याच्या दृष्टीने वेळोवेळी निर्जंतूक फवारणी करण्यात यावी. याप्रमाणेच निमगाव वाकडा व लोणजाई माता यात्रोत्सवासाठी नियोजन आणि उपाययोजना करण्याचे निर्देश मंत्री छगन भुजबळ यांनी यावेळी बैठकीत दिले.

मंत्री छगन भुजबळ आढावा घेतांना म्हणाले, विशेष सामाजिक सहाय्य योजनेंतर्गत शिबिरांचे आयोजन करण्यात यावे. शिबीरात लाभार्थ्यांना रेशन कार्ड अद्ययावतीकरण मोहीम राबविणे. ई श्रम कार्ड, आयुष्यमान भारत कार्ड, आभा कार्ड, पी एम विश्वकर्मा योजना नोंदणी करणे. उत्पन्न् दाखले, अधिवास प्रमाणपत्र, जातीचे प्रमाणपत्र इत्यादी बाबींचे लाभ देण्यात यावेत. राजापूर व ४० गाव पाणी पुरवठा योजनेसाठी  सार्वजनिक बांधकाम विभागाकडून पाईपलाईन साठी आवश्यक परवानगी देण्यात यावी तसेच  महाराष्ट्र जीवन प्राधिकरणाने राजापूर व ४० गाव पाणी पुरवठा योजना व धुळगाव साठवण तलाव योजनेसाठी प्रलंबित असलेला प्रस्ताव  ऑनलाईन सादर करावा. तसेच वनपरिक्षेत्र अधिकारी येवला (प्रादेशिक) यांनी वन जमीन हस्तांतरण प्रस्ताव उचित कार्यवाहीसाठी वरिष्ठ कार्यालयाकडे पाठविण्याच्या सूचना यावेळी दिल्या.

मायबोली निवासी कर्णबधीर विद्यालय आंगणगाव येथे ग्रीन जीमचे  उद्घाटन संपन्न

मायबोली निवासी कर्णबधीर विद्यालय आंगणगाव येथे जिल्हा क्रीडा निधी अंतर्गत ग्रीन जीम चे उद्घाटन मंत्री छगन भुजबळ यांच्या हस्ते संपन्न झाले  यावेळी येवला उपविभागीय अधिकारी  बााबासाहेब गाढवे प्रा. अर्जून कोकाटे, शिक्षक उपस्थित होते.

येवला तालुक्यातील रायते येथे सभामंडपाचे झाले लोकर्पण

येवला तालुक्यातील रायते येथे स्थानिक विकास निधीतून (रू १५ लक्ष) साकारलेल्या सभामंडपाचे लोकार्पण यावेळी मंत्री छगन भुजबळ यांच्या हस्ते संपन्न झाले. यावेळी येवला

उपविभागीय अधिकारी बाबासाहेब गाढवे, सरपंच भूषण गोठी यांच्यासह ग्रामस्थ उपस्थित होते.

0000000

मुंबई, दि. 30:  छत्रपती शिवाजी महाराज यांचे युद्धकालीन शस्त्र असलेली वाघनखे ब्रिटनच्या विक्टोरिया अँड अलबर्ट म्युझियम मधून भारतात परत आणण्याबाबत सामंजस्य करारावर स्वाक्षरी करण्यासाठी  वन, सांस्कृतिक कार्य आणि मत्स्यव्यवसाय मंत्री सुधीर मुनगंटीवार रविवारी दिनांक 1 ऑक्टोबर रोजी रात्री लंडनकडे रवाना होणार आहेत. मुख्यमंत्र्यांचे तसेच सांस्कृतिक कार्य विभागाचे प्रधान सचिव विकास खारगे, पूरातत्व विभागाचे संचालक तेजस गर्गे, विशेष कार्यकारी अधिकारी अमोल जाधव हे मंत्री श्री. मुनगंटीवार यांच्या सोबत असतील.

एक ऑक्टोबर रोजी मध्यरात्री ब्रिटिश एअरवेजच्या विमानाने लंडनकडे रवाना होण्यापूर्वी मंत्री श्री. मुनगंटीवार मुंबईच्या छत्रपती शिवाजी महाराज आंतरराष्ट्रीय विमानतळावर पोहोचतील आणि छत्रपती शिवाजी महाराज यांच्या पुतळ्यास पुष्पहार अर्पण करून अभिवादन करतील. यावेळी विविध संघटना, मंडळे, संस्था यांचे कार्यकर्ते, पदाधिकारी उपस्थित राहणार आहेत.

छत्रपती शिवाजी महाराज यांच्या राज्याभिषेकाचे  ३५० वे वर्ष प्रारंभ होताच ही वाघनखे भारतात परत आणण्याचा संकल्प सांस्कृतिक कार्य मंत्री. श्री मुनगंटीवार यांनी केला होता. यासाठी महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या नेतृत्वात केंद्र शासन तसेच आंतराष्ट्रीय पातळीवर श्री. मुनगंटीवार यांनी सातत्याने पाठपुरावा केला. दिनांक १५ एप्रिल २०२३ रोजी मुंबई येथे ब्रिटनचे पश्चिम भारत उप उच्चायुक्त अँलेन गँमेल यांच्यासह ब्रिटनच्या राजकीय व द्विपक्षीय संबंध उपप्रमुख श्रीमती इमोगेन स्टोन यांच्यासोबत बैठक घेवून महाराष्ट्र शासनाने व्हिक्टोरिया अँड अल्बर्ट संग्रहालयाशी पत्रव्यवहार सुरू केला होता.

या दौऱ्यात लंडन येथील टॅव्हिस्टॊक चौक येथे 2 ऑक्टोबरला महात्मा गांधी यांच्या जयंती निमित्त आयोजित कार्यक्रमास मंत्री श्री. मुनगंटीवार उपस्थित रहातील. तेथील विविध भारतीय तथा महाराष्ट्र मंडळाच्या पदाधिकाऱ्यांना भेटून ते चर्चा करणार असून मंगळवारी 3 ऑक्टोबर रोजी व्हिक्टोरिया अँड अलबर्ट म्युझियम येथे भेट देऊन या संग्रहालयाचे संचालक ट्रायस्टम हंट यांच्यासोबत त्यांची बैठक होईल व करारावर स्वाक्षऱ्या होतील. यानंतर लगेच दूरदृश्यप्रणालीद्वारे पत्रकार परिषद होणार असून मंत्री श्री. मुनगंटीवार हे पत्रकारांशी संवाद साधतील.

या दौऱ्यात मंत्री श्री. मुनगंटीवार हे भारतरत्न डॉ. बाबासाहेब आंबेडकर यांच्या लंडन येथील निवासस्थानास भेट देणार असून तेथे महामानवास अभिवादन करणार आहेत.

000

मुंबई, दि.30 : दि.15 सप्टेंबर ते दि.2 ऑक्टोबर 2023 या कालावधीत स्वच्छता पंधरवडा राबविण्यात येत आहे. याचाच एक भाग म्हणून ‘स्वच्छता हीच सेवा’ अभियानाअंतर्गंत ‘कचरामुक्त भारत’ उपक्रमाचे आयोजन करण्यात आले आहे. स्वच्छता पंधरवड्यानिमित्त पाणी पुरवठा व स्वच्छता विभागामार्फत राज्यात विविध उपक्रम राबविण्यात आले आहेत. दि. 1 ऑक्टोबर रोजी सकाळी 10 वाजता ‘1 तारीख, एक तास’  उपक्रम राबविण्यात येत असून प्रत्येक गावात महाश्रमदानाचे आयोजन करण्यात आले आहे. यासाठी ग्रामीण भागात सुमारे 56,786 ठिकाणी नियोजन करण्यात आले असून यामध्ये सर्व नागरिकांनी उत्स्फुर्तपणे सहभागी होण्याचे आवाहन पाणी पुरवठा व स्वच्छता मंत्री गुलाबराव पाटील यांनी केले आहे.

या पंधरवड्यानिमित्त दैनंदिन स्वच्छता विषयावर उपक्रम राबविण्याबाबत जिल्ह्यांनी नियोजन केले आहे. त्या अनुषंगाने राज्यात सद्यस्थितीत 19,461 उपक्रम राबविण्यात आले असून सुमारे 95,84,680 नागरिकांनी सक्रिय सहभाग नोंदवला आहे. त्यामुळे राज्यात स्वच्छतेचे जनआंदोलन उभारले गेले आहे.

राष्ट्रपिता महात्मा गांधी यांच्या जयंतीनिमित्त राज्याच्या प्रशासनाबरोबर ग्रामपंचायती व नागरिकांचा सहभाग मोलाचा आहे. सार्वजनिक ठिकाणे, शासकीय इमारती, धार्मिक स्थळे, रेल्वे स्थानके, बसस्थानके, खुल्या जागा येथे साफसफाई, कचरा संकलन व वर्गीकरण करण्यात येणार आहे.  ग्रामस्थांच्या सहभागाने नदी, समुद्र किनारे, नाले काठावरील व तळ्यातील प्लास्टिक कचरा गोळा करण्याबाबत मोहीम राबविण्यात येणार आहे. सदर स्वच्छता मोहिमेत राज्यातील जिल्हा परिषदेचे मुख्य कार्यकारी अधिकारी, उपमुख्य कार्यकारी अधिकारी,  गटविकास अधिकारी, विस्तार अधिकारी, सरपंच, ग्रामपंचायत सदस्य, ग्रामसेवक यांच्यासह महिला बचतगट सदस्य, शाळा, महाविद्यालयाचे विद्यार्थी, स्वंयसेवी संस्था, युवा ग्रुप, ग्रामस्थ यांनी मोठ्या प्रमाणावर सक्रिय सहभाग नोंदवावा असे आवाहनही श्री. पाटील यांनी केले आहे.

000