नाशिक, 15 जानेवारी, 2024 (जिमाका वृत्तसेवा) :- ऑलिम्पिकमध्ये वैयक्तिक स्पर्धेत देशाला पहिले पदक मिळवून देणारे कुस्तीपट्टू खाशाबा जाधव यांचा जन्मदिन (15 जानेवारी) हा दरवर्षी राज्याचा क्रीडा दिन म्हणून साजरा करण्यात येणार आहे. आज राष्ट्रीय युवा महोत्सवात राज्यातील पहिला क्रीडा दिन साजरा करण्यात येत असून यादिनानिमित्त राज्यात विविध क्रीडा स्पर्धांचे आयोजन करण्यात आले आहे.

27 व्या राष्ट्रीय युवा महोत्सवानिमित्त युवाग्राम,  हनुमान नगर येथील सुविचार कक्षातील कार्यक्रमात आजचे प्रमुख अतिथी अभिनेता राहुल बोस यांच्या मार्गदर्शन आयोजित करण्यात आले होते. याप्रसंगी विभागीय आयुक्त राधाकृष्ण गमे, क्रीडा आयुक्त डॉ. सुहास दिवसे, नाशिक जिल्हा क्रीडा अधिकारी सुनंदा पाटील आदि  उपस्थित होते.

या खेळांडूचा करण्यात आला सत्कार
यावेळी अर्जुन पुरस्कार विजेती धावपटू कविता राऊत, टेबल टेनिसपटू नरेंद्र छाजेड, हँडबॉलपटू साहेबराव पाटील, तलवारबाजी पटू अशोक दुधारे, अजिंक्य दुधारे, अस्मिता दुधारे, राजू शिंदे, व्हॉलीबॉल पटू आनंद खरे, अविनाश खैरनार, रोइंगपटू अंबादास तांबे, वैशाली तांबे, दत्तू भोकनाळ, कुस्तीपटू गोरख बलकवडे, पॅरा एशियन सुवर्णपदक प्राप्त खेळाडू दिलीप गावित, योग अभ्यासात गिनिज बुक वर्ल्ड रेकॉर्ड मध्ये नोंद झालेल्या प्रज्ञा पाटील आदी पुरस्कारप्राप्त खेळाडूंचा सन्मान चिन्ह देऊन सत्कार करण्यात आला.

000

मुंबई, दि. १५ : ‘मुंबई फेस्टीवल २०२४’ चे २० ते २८ जानेवारी २०२४ दरम्यान आयोजन केले आहे या फेस्ट‍िवलचे जपानच्या संसदेतील सदस्यांना पर्यटनमंत्री गिरीश महाजन यांनी निमंत्रण दिले.

चर्चगेट येथील ॲब्मेसिडर हॉटेल येथे वाकायामा प्रीफेक्चर संसदेचे स्पीकर हमागुची तैशी यांच्यासह सदस्यांनी भेट दिली. त्यावेळी पर्यटनमंत्री श्री. महाजन बोलत होते. यावेळी पर्यटन संचालक डॉ. बी. एन. पाटील, वाकायामा प्रीफेक्चर संसदेचे स्पीकर हमागुची तैशी, भारत जपान मैत्रीसंघाचे अध्यक्ष निजीमा ताकेशी, भारत जपान मैत्री प्रोत्साहन गटाचे संसदेतील उपाध्यक्ष फुजीयामा मासाकी, भारत जपान मैत्री प्रोत्साहन गटाचे प्रचार समितीचे उपाध्यक्ष हिरोइको युवात, सरचिटणीस तेसुया कवाबटा, कार्यकारी संचालक ताकेती सातो, संसद सदस्य होरी तास्तुओ, सदस्य अकीझुकी फुमीनारी, तोकीशा सुझुकी, मिसू टाकूया, आंतरराष्ट्रीय व्यवहार विभागाचे संचालक यामाशिता योशोओ, सचिव तिटाझुमे ताकाहिरो यावेळी उपस्थित होते.

पर्यटन मंत्री श्री. महाजन म्हणाले की, राज्याला खूप मोठा ऐतिहासिक आणि सांस्कृतिक वारसा लाभला आहे. राज्यात मोठ्या प्रमाणात पर्यटन स्थळे देखील आहेत. राज्यातील गड किल्ले इतिहासाचे साक्ष देतात, जागतिक पर्यटकांना महाराष्ट्र माहिती व्हावा यासाठी नक्की राज्याला भेट द्यावी, असे मंत्री श्री. महाजन यांनी सांगितले. मुंबईची ही ओळख पर्यटकांना करून देण्यासाठी, दुबई शॉपिंग फेस्ट‍िवलच्या धर्तीवर ‘मुंबई फेस्टिव्हल २०२४’ चे आयोजन केले जात आहे. या फेस्ट‍िवलच्या माध्यमातून मुंबईच्या संस्कृतीची माहिती पर्यटकांपर्यंत पोहोचवण्यासाठी एक व्यासपीठ मिळणार आहे. या महोत्सवात महाएक्सपो, पर्यटन परिषद, शॉपिंग फेस्ट, काळा घोडा फेस्टीवल, बीच फेस्ट, योगा, फुटबॉल, व्हॉलीबॉल, बीच क्लीन अप, मेरेथॉन, संगीत महोत्सव, क्रिकेट, साहसी क्रीडांचा देखील समावेश असल्याची माहिती जपान मधील सदस्यांना यावेळी दिली. या महोत्सवाच्या माध्यमातून राज्यात परदेशी पर्यटक यावेत त्याचप्रमाणे परदेशातही आपल्या पर्यटकांना जाताना सोयीसुविधा मिळाव्यात यासाठी प्रयत्न करण्यात येणार असल्याचे मंत्री श्री. महाजन यांनी सांगितले.

००००

संध्या गरवारे/विसंअ/

मुंबई, दि. 15 : राज्यात होत असलेल्या मृत्यूंमध्ये सर्वात जास्त मृत्यू रस्ता अपघातांमध्ये होत आहेत.  रस्ता अपघात टाळण्यासाठी रस्ता सुरक्षा ही काळाची गरज आहे. राज्य शासन 15 जानेवारी ते 14 फेब्रुवारी या एक महिन्यासाठी रस्ता सुरक्षा अभियान राबवित आहे. या अभियानाचा रस्ता सुरक्षा, वाहतुकीचे नियम याबाबत जनजागृती करून अपघात कमी करण्याचा उद्देश आहे. रस्ता सुरक्षा मोहिमेत जनसहभाग वाढवून या मोहिमेला लोकचळवळीचे स्वरूप आणावे, असे आवाहन सार्वजनिक बांधकाम (सार्वजनिक उपक्रम) मंत्री दादाजी भुसे यांनी केले.

रस्ता सुरक्षा अभियानाचे उद्घाटन सह्याद्री अतिथीगृह येथे झाले. या कार्यक्रमाच्या उद्घाटनावेळी मार्गदर्शन करताना मंत्री श्री. भुसे बोलत होते. कार्यक्रमाला व्यासपीठावर शालेय शिक्षण मंत्री तथा मुंबई शहरचे पालकमंत्री दीपक केसरकर, परीवहन विभागाचे प्रधान सचिव पराग जैन – नैनुटीया, अतिरिक्त महासंचालक (वाहतूक) सुखविंदर सिंग, सहपोलीस आयुक्त (वाहतूक) प्रविण पडवळ, परिवहन आयुक्त विवेक भीमनवार, वेस्टर्न इंडिया ऑटोमोबाईल असोसिएशनचे नितीन डोसा उपस्थित होते.

रस्ता सुरक्षा हा विषय शालेय अभ्यासक्रमात असणे गरजेचे असल्याचे सांगत मंत्री श्री. भुसे म्हणाले की, रस्ता सुरक्षेचे संस्कार लहान वयातच बिंबविण्यासाठी शालेय अभ्यासक्रमात या विषयाचा समावेश करण्याचा विचार आता करावा लागेल. राज्यात होत असलेल्या अपघातांमध्ये 60 टक्के अपघात हे दुचाकीचे असतात. दुचाकी अपघात कमी करण्यासाठी हेल्मेट वापरण्याविषयी जनजागृती करण्यात यावी. अपघातांचे प्रमाण शून्यावर आणण्यासाठी वेगवेगळ्या उपाययोजना करण्यात येत आहे. अपघातग्रस्ताला उपचार देण्यासाठी नागरिक पुढे येत नव्हते. मात्र आता चित्र बदलत आहे. अनेक नागरिक पुढे येवून ‘गोल्डन अवर’ मध्ये उपचार देवून अपघातग्रस्तांचे प्राण वाचवित आहेत. रस्ता सुरक्षेबाबत उपाय योजना करण्यासाठी मुख्यमंत्री एकनाथ शिंदे यांच्या सुचनेनुसार निधीची उपलब्धता होत आहे.

जिल्हा स्तरावर जिल्हा रस्ता सुरक्षा समिती कार्यरत आहे. त्यांच्या स्तरावर जिल्हा नियोजनमधून अपघात प्रवण स्थळे दुरूस्त करणे, जनजागृती आदींसाठी निधीची उपलब्धता करून देण्यात येत आहे. परिवहन महामंडळाप्रमाणे चालकांमध्ये जनजागृती करण्यात यावी. त्यासाठी मोहिम राबवावी.  रस्ता सुरक्षा मोहिमेच्या पुढील वर्षीच्या कार्यक्रमात अपघातांचे प्रमाण यावर्षीच्या तुलनेत निश्चितच कमी होण्याची अपेक्षाही मंत्री श्री. भुसे यांनी व्यक्त केली.

रस्ते वाहतूक नियमांचे पालन करावे – दीपक केसरकर

रस्ते वाहतूक नियमांचे पालन करीत शिस्तबद्ध वाहने चालविल्यास अपघातांचे प्रमाण कमी होईल. अपघाताचे ठिकाण निश्चित करून त्या ठिकाणी जनजागृतीसाठी विशेष मोहिम राबवावी. रस्ता सुरक्षा ही अत्यंत महत्वाची आहे. वाहतुकीचे नियम पाळणे ही सामूहिक जबाबदारी आहे. नागरिकांमध्ये जनजागृती करून अपघाताचे प्रमाण कमी होण्याचे उद्दिष्ट ठेवून काम करावे, असे प्रतिपादन शालेय शिक्षण मंत्री दीपक केसरकर यांनी केले.

परिवहन विभागामार्फत राज्य रस्ता सुरक्षा अभियानाला आजपासून सुरुवात झाली आहे. विविध नाविन्यपूर्ण उपक्रमाच्या माध्यमातून नागरिकांमध्ये वाहतूक नियमांबाबत जनजागृती करावी. स्पीड गनचा वापर करून अतिवेगावर नियंत्रण आणावे, त्यामुळे निश्चितच अपघात कमी होतील. चालकांनी कटाक्षाने वाहतूक नियम पाळावेत.  नागरिकांना  शिस्त लागणे व अपघाताचे प्रमाण कमी होणे उद्दिष्ट असून दंडाची वसुली करणे  हे शासनाचे उद्दिष्ट नाही, असेही मंत्री श्री. केसरकर यांनी सांगितले.

परिवहन आयुक्त विवेक भीमनवार म्हणाले,  परिवहन विभाग 37 सेवा फेसलेस पद्धतीने देत असून या सेवांचा आतापर्यंत 68 लाख 61 हजार नागरिकांनी लाभ घेतला आहे. मोटार वाहन निरीक्षक व सहायक मोटार वाहन निरीक्षक यांच्या बदल्या ऑनलाईन पद्धतीने करण्यात आल्या आहेत. अपघात कमी करण्यासाठी विभाग अधिक प्रभावीपणे उपाययोजनांची अंमलबजावणी करीत आहे.

यावेळी मागील वर्षाच्या तुलनेत अपघातामध्ये लक्षणीय घट होण्यासाठी विशेष प्रयत्न केलेल्या मुंबई शहर आणि उपनगर, चंद्रपूर व नवी मुंबई येथील परिवहन विभागातील अधिकाऱ्यांचा रस्ता सुरक्षेबाबत अनुक्रमे प्रथम, द्वितीय व तृतीय पुरस्कार देवून सत्कार करण्यात आला.   तसेच अपघातग्रस्तांना मदत करणाऱ्या जीवनदूतांचा सन्मानही यावेळी करण्यात आला. यामध्ये खोपोली जि. रायगड येथील गुरूनाथ रामचंद्र साठीलकर व विजय सुरेश भोसले, खालापूर जि. रायगड येथील मो. हनिफ कर्जीकर, वर्धा येथील वायरलेस विभागातील हवालदार शशिकांत गजबे, मोटार वाहन निरीक्षक कराड येथील  श्रीमती प्रसन्ना पवार यांचा समावेश आहे. मुंबई ते पुणे रस्त्यावर अपघातांचे प्रमाण मागील वर्षाच्या तुनलेत 32 टक्के अपघात कमी केल्याबद्दल उप परिवहन आयुक्त भरत कळसकर, पनवेलचे प्रादेशिक परिवहन अधिकारी अनिल पाटील, पिंपरी चिंचवड प्रादेशिक परिवहन अधिकारी अतुल आदे यांचा गौरव करण्यात आला आहे. यासोबतच सहा. परिवहन आयुक्त जितेंद्र पाटील, परिवहन उप आयुक्त (प्रशासन) संजय मैत्रेवार, परिवहन उप आयुक्त (संगणक) संदेश चव्हाण यांचा विशेष कामगिरीसाठी गौरव करण्यात आला.

कार्यक्रमादरम्यान रस्ता सुरक्षा पुस्तिका आणि वेस्टन इंडिया ऑटोमोबाईल असोसिएशनच्या रस्ता सुरक्षा वार्षिक दिनदर्शिकेचे मान्यवरांच्या हस्ते विमोचन करण्यात आले. उपस्थितांना रस्ता सुरक्षेबाबत प्रतिज्ञाही देण्यात आली. कार्यक्रमाचे सूत्रसंचलन मृण्मयी भजक यांनी, तर आभार प्रदर्शन अप्पर परिवहन आयुक्त जितेंद्र पाटील यांनी केले. कार्यक्रमाला परिवहन विभागाचे अधिकारी, कर्मचारी उपस्थित होते.

इंटरसेप्टर वाहनांचा हिरवी झेंडी दाखवून शुभारंभ

रस्ता सुरक्षेच्यादृष्टीने महत्वाचे वाहन असलेल्या इंटरसेप्टर वाहनांना शालेय शिक्षण मंत्री दीपक केसरकर यांच्या हस्ते हिरवी झेंडी दाखविण्यात आली. यावेळी प्रधान सचिव पराग जैन – नैनुटीया उपस्थित होते. विभागाला 187 इंटरसेप्टर वाहने उपलब्ध करून देण्यात आली आहे. यावेळी प्रतिनिधीक स्वरूपात 5 वाहनांना ताफ्यात दाखल करून घेण्यात आले.

००००

निलेश तायडे/विसंअ/

नाशिक, दि. 15 जानेवारी, 2024 (जिमाका वृत्तसेवा) : प्रधानमंत्री नरेंद्र मोदी यांनी आज कावनई येथील रहिवासी व पिंप्री सदो येथील एकलव्य विद्यालयातील नववीतील विद्यार्थिनी कु. भारती रण व तिचे शिक्षक भाऊसाहेब रण यांच्याशी संवाद साधत त्यांच्या शैक्षणिक प्रगतीची माहिती घेतली. निमित्त होते प्रधानमंत्री जनजाती आदिवासी न्याय अभियान अर्थात पी. एम. जनमन अंतर्गत योजनांच्या लाभार्थ्यांशी प्रधानमंत्री श्री. मोदी यांनी दूरदृश्य संवाद प्रणालीद्वारे साधलेल्या संवादाचे. विद्यार्थ्यांशी संवाद साधताना प्रधानमंत्री श्री. मोदी यांनी अधिकाधिक विद्यार्थ्यांनी एकलव्य विद्यालयांचा लाभ घेऊन एकलव्य विद्यालयांच्या माध्यमातून त्यांची स्वप्ने पूर्ण करावीत, असे आवाहनही त्यांनी केले.

यावेळी केंद्रीय आरोग्य, कुटुंब कल्याण तथा जनजातीय राज्यमंत्री डॉ. भारती पवार, आदिवासी विकास मंत्री डॉ. विजयकुमार गावित, विधानसभा उपाध्यक्ष नरहरी झिरवाळ, खासदार हेमंत गोडसे, आमदार हिरामण खोसकर, आदिवासी विकास विभागाच्या आयुक्त नयना गुंडे, आदिवासी सहकारी विकास महामंडळाच्या व्यवस्थापकीय संचालिका लीना बनसोड, जिल्हाधिकारी जलज शर्मा,  जिल्हा परिषदेच्या मुख्य कार्यकारी अधिकारी आशिमा मित्तल, आदिवासी विकास विभागाचे अपर आयुक्त तुषार माळी, संदीप गोलाईत, नाशिक प्रकल्प अधिकारी जतिन रहमान, प्रांताधिकारी रवींद्र ठाकरे, गट विकास अधिकारी सोनी नाखाडे यांच्यासह कावनईचे ग्रामस्थ उपस्थित होते.

प्रधानमंत्री श्री. मोदी यांनी कु. भारती रण व भाऊसाहेब रण यांना मिळालेल्या शैक्षणिक योजनांच्या लाभाबाबत विचारणा केली. तसेच पी. एम. जनमन अंतर्गत लाभ मिळालेल्या अन्य योजनांबद्दलही माहिती घेतली. त्यांनी सांगितले की, आदिवासी विद्यार्थ्यांच्या शैक्षणिक विकासासाठी एकलव्य विद्यालयांची संख्या वाढवण्यावर भर देण्यात येत आहे. तसेच केंद्र सरकारच्या माध्यमातून आदिवासी बांधवांसाठी सुरू असलेल्या सर्व योजनांचा लाभ घ्यावा, असेही आवाहन त्यांनी केले.

कातकरी समाजातील लाभार्थी गोकुळ देवराम हिलम मनोगत व्यक्त करताना म्हणाले की, प्रधानमंत्री आवास योजनेसह अंत्योदय रेशन कार्ड, वनधन योजनेंतर्गत वनधन केंद्राला मान्यता मिळाली आहे. त्यासाठी त्यांनी शासनाचे आभार मानले.

केंद्रीय राज्यमंत्री डॉ. भारती पवार म्हणाल्या, अतिमागास भागातील आदिवासी बांधवाना शासनाच्या सर्व योजनांचा लाभ मिळण्यासाठी केंद्र व राज्य शासनाच्या वतीने विविध माध्यमातून प्रयत्न केले जात आहेत. त्याचप्रमाणे आदिवासी बांधवांच्या मुलांना उत्तम गुणवत्तेच्या शिक्षणासाठी एकलव्य विद्यालयाच्या माध्यमांतून प्रयत्न होत आहेत. विकसित भारत संकल्प यात्रेतून वंचितांपर्यंत योजना पोहोचविल्या जात आहेत. आदिवासी बांधवांच्या विकासासाठी केंद्र सरकारच्या वतीने मोठ्या प्रमाणात निधी उपलब्ध करुन देण्यात येत आहेत. सिकलसेल आजारावर वेळीच औषधोपचार करून त्याबाबत जनजागृती करण्यात यावी. रामजन्म भूमी पूजनाच्या माध्यमातून मंदिर स्वच्छतेचा संदेश सर्वत्र पोहचवून त्यासाठी सर्वांनी काम करावे, असेही त्यांनी आवाहन केले.

आदिवासी बांधवांच्या विकासासाठी सर्वोतोपरी सहकार्य: डॉ. विजयकुमार गावित

आदिवासी विकास मंत्री डॉ. गावित म्हणाले की, पी. एम. जनमन महा अभियानाच्या माध्यमातून कमी वेळेत आदिवासी बांधवांना योजनांचा लाभ मिळत आहेत. आदिवासी समाजाच्या विकासासाठी शासनामार्फत सर्वोतोपरी सहकार्य करण्यात येईल. तसेच आवास योजनेचा निधी वाढवून देण्यासाठी देखील केंद्र सरकारकडे पाठपुरावा करण्यात येत आहे. घरकुल योजना 100 टक्के राबविण्यासाठी नियोजन करण्यात येत आहे. कातकरी बांधवांचे स्थलांतर थांबवीत त्यांच्या रोजगाराचा प्रश्न सोडविण्यासाठी विविध योजना राबविण्यात येत आहेत, त्याचा त्यांनी लाभ घ्यावा.

विधानसभेचे उपाध्यक्ष श्री. झिरवाळ म्हणाले की, आदिवासी बांधवांसाठी राबविण्यात येणाऱ्या घरकूल योजनेचे उद्दिष्ट वाढवून मिळावे. प्रत्येक गरजूला घरकुलाचा लाभ मिळवून द्यावा, अशी अपेक्षा व्यक्त  केली. यावेळी आमदार हिरामण खोसकर यांनी देखील मनोगत व्यक्त केले.

त्यानंतर केंद्रीय राज्यमंत्री डॉ. पवार, आदिवासी विकास मंत्री डॉ. गावितांसह मान्यवरांच्या हस्ते मोबाईल युनिट व्हॅनला हिरवा झेंडा दाखविण्यात आला. तसेच मान्यवरांनी कपिलधारा मंदिर परिसराची स्वच्छता ही केली.

या लाभार्थ्यांना केले योजनांचे लाभ वाटप…..

MSEB नवीन विज कनेक्शन
भाऊसाहेब पांडुरंग रन, कल्पना आनंदा वाघ, नामदेव लक्ष्मण गावित, सुरेश खंडू वाघ, सखाराम देवराम मुकणे, पीएम किसान क्रेडिट कार्ड, ज्ञानेश्वर नामदेव वाघ, मंदाबाई बुधा हिलम, नारायण सोमा वाघ, अलका गंगाराम वाघ, एकनाथ पालू मुकणे

रेशनकार्ड वाटप
विठ्ठल देवराम हिलम, संतोष पांडुरंग रन, विलास नारयण रन, पिंटु पंढरी हिलीम, नारायण दामू रन, द्रौपदा भाऊ कवर, अंकुश किसन रन, प्रकाश पांडुरंग रन

जात प्रमाणपत्र वाटप
देवराम एकनाथ चौरे, रोहिदास भगवंत हिलम, दत्तु पांडु वाघ, विठ्ठल नामदेव हिलम, पद्मा शांताराम हिलम, बाळु भिवा हिलम, मंदाबाई बुधा हिलम, राजाराम बाळु वाघ, अलका शंकर दिवे, वसुंधरा पिंटु मुकणे

आयुष्यमान कार्ड वाटप
मनोहर आनंदा वाघ, सोनाली अंकुश रन, कमल पांडुरंग हिलम, फुलाबाई एकनाथ मुकणे, किसन सोमनाथ, दिवे, सविता विठ्ठल वाघ

पी. एम. सन्मान निधी योजना लाभ
पप्पु नाना पवार, सान्याबाई लक्ष्मण वाघ, किसन सोमा हिलम, हरी सिताराम वाघ, वामन झिपा मुकणे

000

यवतमाळ, दि. १५ : केंद्र सरकारच्या विविध योजनांचा लाभ आदिवासी समाजातील शेवटच्या घटकापर्यंत पोहोचवण्यासाठी प्रधानमंत्री नरेंद्र मोदी यांच्या संकल्पनेतील प्रधानमंत्री जनजाती आदिवासी न्याय (पीएम जनमन) महाअभियान देशभरात राबविण्यात येत आहे. जिल्ह्यातील या महाअभियानाचे उद्घाटन केळापूर तालुक्यातील धारणा येथे प्रधानमंत्र्यांच्या दुरदृष्य उपस्थितीत करण्यात आले.

या महाअभियानाच्या उद्घाटन कार्यक्रमावेळी आमदार प्रा.डॅा.अशोक उईके, आमदार डॉ.संदीप धुर्वे,  जिल्हाधिकारी डॅा.पंकज आशिया, मुख्य कार्यकारी अधिकारी डॅा.मैनाक घोष, सहायक जिल्हाधिकारी तथा प्रकल्प संचालक याशनी नागराजन, प्रकल्प संचालक आत्माराम धाबे यांच्यासह अधिकारी, कर्मचारी व आदिवासी बांधव मोठ्या संख्येने उपस्थित होते. यावेळी मान्यवरांच्या हस्ते प्रधानमंत्री आवास योजनेच्या मंजूर लाभार्थ्यांना लाभ वितरित करण्यात आले.

प्रधानमंत्री नरेंद्र मोदी यांनी संवाद साधतांना या अभियानाची माहिती दिली. तसेच आदिवासी समाजातील संस्कृती, लोककलेचे कौतूक केले. केंद्र सरकारने या अभियानासाठी सुमारे २३ हजार कोटी रुपयांची तरतूद केली आहे. गेल्या दोन महिन्यात देशभरातील अनेक अतिमागास आदिवासी बांधवाना किसान कार्ड, आयुष्मान कार्ड, वनपट्टे आदी लाभ देण्यात आले. आदिवासींना हक्काचे पक्के घर बनविण्यासाठी देशभरात एक लाख लोकांना आज अनुदान वितरित करण्यात आले आहे. त्यांना घरासाठी २.५० लाख रूपये दिले जात आहे. या घरासोबत वीज, पाणी, शौचालय, गॅस या सुविधा मिळणार आहे.

प्रत्येक लाभार्थ्यांपर्यंत सरकार पोहोचेल. एकही आदिवासी बांधव योजनांच्या लाभापासून वंचित राहणार नाही, अशी ग्वाही पंतप्रधान नरेंद्र मोदी यांनी यावेळी संवाद साधताना दिली. यावेळी योजनांच्या माध्यमातून परिवर्तन घडविणाऱ्या लाभार्थ्यांसोबतही त्यांनी संवाद साधला.

आमदार डॉ.संदीप धुर्वे मनोगत व्यक्त करतांना म्हणाले, प्रधानमंत्री जनमन महाअभियानाला मूर्त स्वरुप देण्यासाठी प्रशासनाने काम करावे. प्रत्येक गावात शिबीर आयोजित करुन आदिवासींना योजनांचा लाभ मिळवून द्यावा. हे महाअभियान यशस्वी करावा, असे त्यांनी सांगितले. यावेळी आ.डॅा.अशोक उईके यांनीही हे महाअभियान यशस्वीपणे राबवावे, असे सांगितले.

गेल्या एका महिन्यात जिल्ह्यातील कोलाम आदिवासी भागात सुमारे १६० शिबीरे आयोजित करुन २० हजार नवीन आयुष्मान कार्ड, ५०० नवीन आधार कार्ड वितरित करण्यात आले. १५०० आधार कार्ड अद्ययावत करण्यात आले. जिल्ह्यात जवळजवळ एक लाख कोलाम आदिवासी लोकसंख्या आहे. मागील दोन महिन्यात याचा सर्वे करण्यात आला असून त्यांना विविध योजनांचा लाभ देण्यात येणार असल्याची माहिती प्रकल्प संचालक याशनी नागराजन यांनी दिली.

प्रधानमंत्र्यांनी साधला लाभार्थीसोबत संवाद

प्रधानमंत्री नरेंद्र मोदी यांनी दि.१५ नोव्हेंबर २०२३ रोजी झारखंडच्या खुंटी गावातून जन जातीय गौरव दिनी प्रधानमंत्री जनजाती आदिवासी न्याय महाअभियान (जनमन) सुरु केले आहे. या अभियांनांतर्गत पंतप्रधानांनी देशभरातील आदिवासी बांधव, महिला व विद्यार्थ्यांशी संवाद साधला. महाराष्ट्रातील नाशिक जिल्ह्यातील इगतपूरी येथील विद्यार्थ्यांसोबत त्यांनी दूरदृश्य प्रणालीद्वारे संवाद साधला. यात केळापूर तालूक्यातील धारणा या गावातून आमदार संदीप धुर्वे, आमदार डॅा. अशोक उईके यांच्यासह प्रशासनातील वरिष्ठ अधिकारी, कर्मचारी, आदिवासी बांधव आणि विविध योजनांची लाभार्थी मोठ्यासंख्येने सहभागी झाले होते.

०००

राष्ट्रीय युवा महोत्सव २०२४ 

नाशिक, 15 जानेवारी, 2024 (जिमाका) : संपूर्ण जगामध्ये भारत देशाची ओळख ही ‘युवकांचा देश’ म्हणून आहे. आज आपल्या देशाने सर्वच क्षेत्रात विकासाचे पाऊल पुढे टाकले आहे. विकासाच्या दृष्टीने देशात आमूलाग्र बदल घडून येत प्रधानमंत्री नरेंद्र मोदी यांच्या मार्गदर्शनाखाली आपल्या देशाचा प्रभाव निर्माण झाला आहे. तसेच राष्ट्रनिर्माण आणि देशाला पुढे घेऊन जाण्यात युवकांचे मोलाचे योगदान आहे, असे गौरवोद्गार केंद्रीय क्रीडा व युवक कल्याण राज्यमंत्री निसिथ प्रामाणिक यांनी पुरस्कार सोहळ्या प्रसंगी काढले.

27 व्या ‘राष्ट्रीय युवा महोत्सवात’ केंद्र सरकारच्या युवक कल्याण आणि क्रीडा विभागामार्फत देशसेवा तसेच समाजसेवा क्षेत्रात उत्कृष्ट कार्य करणाऱ्या युवकांना तसेच स्वयंसेवी संस्थांना महायुवाग्राम हनुमाननगर येथे आयोजित करण्यात आलेल्या कार्यक्रमात
केंद्रीय क्रीडा राज्यमंत्री निसिथ प्रामाणिक यांच्या हस्ते ‘राष्ट्रीय युवा पुरस्काराने’ सन्मानित करण्यात आले. यावेळी युवा मंत्रालय संचालिका विनिता सूद, अवर सचिव धर्मेंद्र यादव, क्रीडा आयुक्त डॉ. सुहास धिवसे, नाशिकचे विभागीय आयुक्त राधाकृष्ण गमे, जिल्हा क्रीडा अधिकारी सुनंदा पाटील, अर्जुन पुरस्कार विजेती धावपटू कविता राऊत यांच्यासह क्रीडा क्षेत्रातील खेळाडू उपस्थित होते.

यावेळी केंद्रीय राज्यमंत्री निसिथ प्रामाणिक म्हणाले की, स्वामी विवेकानंद यांच्या जयंती दिनानिमित्त देशात दरवर्षी राष्ट्रीय युवा दिन साजरा करण्यात येतो. यानिमित्ताने देशात राष्ट्रीय युवा महोत्सवाचे आयोजन करण्यात येते. यंदाचा राष्ट्रीय युवा महोत्सव साजरा करण्याचा मान महाराष्ट्र राज्याला मिळाला. प्रभू श्रीराम यांच्या पदस्पर्शाने पावन झालेल्या तसेच ज्योर्तिलिंग त्र्यंबकेश्वर महाराजांच्या नाशिकच्या या भूमीत महोत्सवानिमित्ताने मला यायला मिळाले हे मी माझे भाग्य समजतो. प्रधानमंत्री नरेंद्र मोदी यांना युवकांप्रती अतिशय प्रेम आहे. युवा महोत्सवाच्या माध्यमातून युवकांना सन्मानित करण्याची कल्पना देखील त्यांनीच मांडली होती. अनेक कार्यक्रमांच्या माध्यमातून त्यांनी नेहमीच युवकांना प्रेरणा देऊन मार्गदर्शन केले आहे. देशाच्याप्रती सेवाभाव असणाऱ्या आणि समाजसेवेसाठी उल्लेखनीय काम करणाऱ्या 15 युवक आणि दोन संस्थांचा राष्ट्रीय युवा पुरस्काराने सन्मान आज करण्यात येत आहेत. ही अतिशय आनंदाची बाब आहे. देश सेवा आणि सामाजिक क्षेत्रात अमुलाग्र काम करणाऱ्या युवकांचे मी या निमित्ताने आभार मानतो आणि त्यांच्या भावी आयुष्यासाठी शुभेच्छा देतो, असेही राज्यमंत्री श्री.प्रामाणिक म्हटले.

महाराष्ट्रात आयोजित करण्यात आलेल्या या २७ वा राष्ट्रीय युवा महोत्सव देशातील युवकांसाठी प्रेरणेचा स्त्रोत आहे. स्वातंत्र्याच्या या अमृतमहोत्सवात ‘विकसित भारत २०४७’ ही संकल्पना विकसित करण्यासाठी तसेच  ‘सक्षम युवा, समर्थ भारत’  या संकल्पनेतून देशाला पुढे घेऊन जाण्यासाठी आपण सर्वांनी या कार्यक्रमाच्या माध्यमातूमन शपथ घेवूया, असेही यावेळी केंद्रीय राज्यमंत्री निसिथ प्रामाणिक यांनी उपस्थित युवकांना आवाहन केले.

राष्ट्रीय युवा पुरस्काराने या युवकांचा झाला सन्मान (वर्ष-2020-2021)

अधि दैव (१७), गुरुग्राम, हरियाणा
अंकित सिंह (२९), छत्तरपूर, मध्य प्रदेश
बिसाठी भरत (२८), अनंतपुरम, आंध्र प्रदेश
केवल किशोरभाई पावरा (२७) बोटाद, गुजरात
पल्लवी ठाकुर (२६), पठाणकोट, पंजाब
प्रभात फोगाट (२५), झज्जर, हरियाणा
राम बाबू शर्मा (२८), जयपूर, राजस्थान
रोहित कुमार (२९), चंडीगड
साक्षी आनंद (२६), पाटणा, बिहार
सम्राट बसाक (२८), धलाई, त्रिपुरा
सत्यदेव आर्य (३०), बरेली, उत्तर प्रदेश
वैष्णवी श्याम गोतमारे (२६), अकोला, महाराष्ट्र
विधी सुभाष पलसापुरे (२६), लातूर, महाराष्ट्र
विनीशा उमाशंकर (१७), तिरुवन्नामलाई, तमिळनाडु
विवेक परिहार, उधमपूर, जम्मू-कश्मीर

या स्वयंसेवी संस्थांचा राष्ट्रीय युवा पुरस्काराने झाला सन्मान (वर्ष-2020-2021)

शक्ती विकास बहुद्देशीय संस्था, नाशिक, महाराष्ट्र
युनिफाईड रूरल डेव्हलपमेंट ऑर्गेनायझेशन, थौबल, मणिपूर

पुरस्काराचे स्वरुप :-
यावेळी राष्ट्रीय युवा पुरस्कार प्राप्त युवकांना वैयक्तिक पुरस्कारात एक लाख रुपये, सन्मान चिन्ह आणि प्रमाणपत्र देण्यात आले. तसेच युवक संस्था मध्ये तीन लाख रुपये, सन्मान चिन्ह आणि प्रमाणपत्र देण्यात आले.

000