नाशिक दि. 16 : जगातील सर्वाधिक युवकांची संख्या भारतात असल्याने प्रधानमंत्री नरेंद्र मोदी यांच्या स्वप्नातील विकसित भारत घडविण्यासाठी तरुणांनी समर्पित भावनेने काम करावे, असे आवाहन नाशिक जिल्ह्याचे पालकमंत्री तथा सार्वजनिक बांधकाम मंत्री दादाजी भुसे यांनी केले. दरम्यान, या युवा महोत्सवात यजमान महाराष्ट्राच्या संघाला सर्वसाधारण विजेतेपद मिळाले, तर हरियाणा आणि केरळने अनुक्रमे द्वितीय व तृतीय क्रमांक पटकावला.
नाशिक येथे केंद्रीय युवक कल्याण आणि क्रीडा मंत्रालय आणि राज्य शासनातर्फे सुरू असलेल्या २७ व्या क्रीडा महोत्सवाचा आज सकाळी महायुवाग्राम, हनुमाननगर येथे समारोप झाला. त्यावेळी पालकमंत्री श्री. भुसे अध्यक्षस्थानावरून बोलत होते. यावेळी क्रीडा व युवक कल्याण मंत्री संजय बनसोडे, केंद्रीय युवक कल्याण विभागाच्या संचालक वनिता सूद, क्रीडा व युवक सेवा संचालनालयाचे आयुक्त डॉ. सुहास दिवसे, विभागीय आयुक्त राधाकृष्ण गमे उपस्थित होते. प्रारंभी युवा गीत आणि महाराष्ट्र राज्य गीत सादर करण्यात आले.
पालकमंत्री श्री. भुसे म्हणाले, जिल्हा प्रशासनाने अत्यंत कमी कालावधीत राष्ट्रीय युवा महोत्सवाचे नियोजन केले. त्यासाठी अधिकारी व कर्मचारी कौतुकास पात्र आहेत. मुख्यमंत्री एकनाथ शिंदे, उपमुख्यमंत्री देवेंद्र फडणवीस व अजित पवार तसेच ग्रामविकास मंत्री गिरीष महाजन यांनीही वेळोवेळी महोत्सवाच्या नियोजनाचा आढावा घेऊन मार्गदर्शन केले. त्यामुळे युवकांच्या या कुंभमेळ्याचे यशस्वीपणे संयोजन करता आले. या महोत्सवाच्या पाच दिवसांत नाशिककरांनी युवकांना भरभरून प्रोत्साहन दिले. त्यामुळे
यजमान महाराष्ट्रासह नाशिककरांच्या आदरातिथ्याचा नावलौकिक देशाच्या कानाकोपऱ्यात पोहोचेल.
क्रीडा व युवक कल्याण मंत्री श्री. बनसोडे म्हणाले, नाशिक जिल्हा प्रशासनाने अत्यंत परिश्रम घेत अवघ्या 20 दिवसांत या महोत्सवाची तयारी पूर्ण केली. त्याची दखल प्रधानमंत्री नरेंद्र मोदी यांनी घेतली. त्यांनीही या महोत्सवाच्या नियोजनाचे कौतुक केले. यानिमित्त राज्य शासनाने ‘महा एक्स्पो’चे आयोजन केले होते. या महोत्सवाच्या माध्यमातून देशातील युवक – युवतींमध्ये विचार, संस्कृतीचे आदान- प्रदान होऊन देशाची अखंडता आणि राष्ट्रवादाला चालना मिळेल, असेही त्यांनी सांगितले.
केंद्रीय युवक कल्याण विभागाच्या संचालक श्रीमती सूद म्हणाल्या, राष्ट्रीय युवा महोत्सव हा विविध रंगांनी भरलेला होता. या महोत्सवात सहभागी युवक – युवतींनी महोत्सवाचा आनंद, अनुभव घेतला. त्यामुळे नवी उमेद आणि उत्साह घेऊन सहभागी युवक- युवती घरी जातील.
श्री. दिवसे म्हणाले की, गेल्या पाच दिवसांपासून हा महोत्सव सुरू होता. या महोत्सवात देशातील 31 राज्यातील साडे सातहजारांवर युवक – युवती सहभागी झाले होते. याशिवाय रोज किमान ५० हजार नागरिक महोत्सवास भेट देत होते. पाच दिवसांत तीन लाख नागरिकांनी भोजनाचा आस्वाद घेतला. बाहेरून आलेल्या युवकांची 120 हॉटेल्समध्ये राहण्याची व्यवस्था करण्यात आली होती. कमी कालावधीत यशस्वीपणे संयोजन केल्याचे त्यांनी सांगितले.
यावेळी युवा महोत्सवात झालेल्या विविध कला, क्रीडा व वकृत्व स्पर्धेतील विजेत्यांचा मान्यवरांच्या हस्ते सत्कार करण्यात आला. क्रीडा विभागाचे सह संचालक सुधीर मोरे यांनी आभार मानले. कार्यक्रमाचा समारोप राष्ट्रगीताने करण्यात आला.
सहकार्याबद्दल सत्कार
नाशिक येथे आयोजित राष्ट्रीय युवा महोत्सवाच्या यशस्वी संयोजनात सहकार्य केल्याबद्दल श्री. क्षेमकल्याणी यांच्यासह उद्धव निमसे, मराठा विद्या प्रसारक मंडळाचे ॲड. नितीन ठाकरे, सुरेश केला यांचा यावेळी मान्यवरांच्या हस्ते सत्कार करण्यात आला.
या कार्यक्रमात जिल्हाधिकारी जलज शर्मा यांच्यासह पोलीस, मनपा, जि.प, क्रीडा विभागाचे राज्यभरातील अधिकारी तसेच नागरीक मोठ्या संख्येने उपस्थित होते.
२७ व्या राष्ट्रीय युवा महोत्सवात महाराष्ट्राचे वर्चस्व
महाराष्ट्र संघाने मिळविले सांघिक विजेतेपद
सत्ताविसाव्या राष्ट्रीय युवा महोत्सवात घेण्यात आलेल्या विविध कला प्रकारातील सांघिक विजेतेपद यजमान महाराष्ट्राने पटकावून आपले वर्चस्व सिद्ध केले. हरयाणा आणि केरळ यांनी अनुक्रमे द्वितीय आणि तृतीय क्रमांकाचे पारितोषिक मिळवले. समारोप समारंभात राज्याचे सार्वजनिक बांधकाम मंत्री (सार्वजनिक उपक्रम) तथा नाशिक जिल्ह्याचे पालकमंत्री दादाजी भुसे आणि क्रीडामंत्री संजय बनसोडे यांच्या हस्ते विजेत्यांना पारितोषिके प्रदान करण्यात आली. या महोत्सवात घेण्यात आलेल्या विविध आठ कला प्रकारातील विजेत्यांनाही यावेळी सन्मानित करण्यात आले.
नाशिक येथे दिनांक १२ ते १६ जानेवारी या कालावधीत २७ वा राष्ट्रीय युवा महोत्सव पार पडला. या महोत्सवात लोकनृत्य (समूह आणि वैयक्तिक), लोकगीत (समूह आणि वैयक्तिक), घोषवाक्य अथवा एखाद्या विषयावरील सादरीकरण, कथा लेखन, पोस्टर मेकिंग आणि छायाचित्रण अशा कलाप्रकारात ही स्पर्धा घेण्यात आली.
महाकवी कालिदास कलामंदिर, महायुवा ग्राम, हनुमाननगर, रावसाहेब थोरात सभागृह, महात्मा फुले कलादालन, उदोजी महाराज म्युझियम आदी ठिकाणी या विविध आठ कलाप्रकारातील स्पर्धा पार पडल्या. या स्पर्धेत ३१ राज्यातील युवा स्पर्धकांनी त्यात सहभाग नोंदवला. त्यांच्या सादरीकरणाला नाशिककरांनीही उत्स्फूर्त दाद दिली. मन मोहवणारे लोकसंगीत, लोकनृत्य यांना रसिकांनी भरभरून प्रतिसाद दिला.
महोत्सवाच्या समारोप समारंभात या कलाप्रकारातील विजेत्यांना पालकमंत्री श्री. भुसे आणि क्रीडा मंत्री श्री. बनसोडे तसेच केंद्रीय क्रीडा व युवक कल्याण विभागाच्या संचालक विनिता सुद, विभागीय आयुक्त राधाकृष्ण गमे, क्रीडा आयुक्त सुहास दिवसे या मान्यवरांच्या हस्ते विजेतेपदाचा चषक आणि रोख पारितोषिक देऊन गौरविण्यात आले. प्रथम क्रमांकाच्या विजेत्यांना रोख दीड लाख रुपये, द्वितीय क्रमांकास रुपये एक लाख आणि तृतीय क्रमांक विजेत्यांना ७५ हजार रुपयांचे पारितोषिक देण्यात आले.
विविध कलाप्रकारातील विजेते खालीलप्रमाणे आहेत.
सांघिक विजेतेपद: १. महाराष्ट्र, २. हरयाणा, ३. केरळ
लोक नृत्य (समूह): १. महाराष्ट्र, २. केरळ, ३.पंजाब
लोकनृत्य (वैयक्तिक) : १. सृष्टी भारद्वाज, उत्तराखंड २. सनी कुमार, हरयाणा
३ धनिष्ठा काटकर, महाराष्ट्र
लोकगीत (समूह): १. केरळ, २. पंजाब, ३ राजस्थान
लोकगीत (वैयक्तिक): १. पृथ्वीराज (महाराष्ट्र), २. उमा वर्मा ( मध्य प्रदेश) आणि ३. छायारानी मेलांग ( आसाम).
घोष वाक्य सादरीकरण: १. परिशा मिधा (दिल्ली), २.कार्तिकेय शर्मा (राजस्थान), ३. शिखा (मध्य प्रदेश).
कथालेखन: १. सृष्टी दीक्षित (उत्तर प्रदेश), २. माही जैन (हरयाणा) आणि ३. नव्या एन. (केरळ)
पोस्टर मेकिंग: १. साहीलकुमार (हरयाणा)
२. महक सैनी (चंदीगड) आणि ३. सौराद्युती सरकार( त्रिपुरा).
छायाचित्रण: १. संकल्प नायक (गोवा), २. सिमरन वर्मा (दिल्ली) आणि
३. फुन फुन लुखाम (अरुणाचल प्रदेश).
०००
विकसीत भारताचे स्वप्न साकार करण्यासाठी नवे शैक्षणिक धोरण लागू करण्यात आल्याचे नमूद करून राज्यपाल म्हणाले, नव्या राष्ट्रीय शिक्षण धोरणाच्या माध्यमातून उच्च शिक्षण घेणाऱ्यांचे प्रमाण ५० टक्क्यांपर्यंत वाढविण्याचा प्रयत्न आहे. त्यासाठी मुक्त आणि दूरस्थ शिक्षण महत्वाचे आहे. यादृष्टीने बालाजी विद्यापीठानेदेखील ऑनलाईन अभ्यासक्रमावर भर द्यावा. आपला पदवी अभ्यासक्रम अद्ययावत करण्यासाठी विद्यार्थ्यांना असे अभ्यासक्रम उपयुक्त ठरतील.
