पुणे, दि. १०: दौंड येथील स्वतंत्र उपविभागीय अधिकारी (प्रांत) कार्यालयाचे उद्घाटन महसूलमंत्री राधाकृष्ण विखे-पाटील यांच्या हस्ते झाले. दौंड तालुक्यातील मागण्यांवर विचार करून तालुक्याच्या विकासासाठी सहकार्य करण्यात येईल, असे प्रतिपादन त्यांनी उद्घाटनानंतर झालेल्या  शेतकरी मेळाव्यात केले.

प्रांत कार्यालय उद्घाटन, तालुका क्रीडा संकुलातील जॉगिंग ट्रॅकचे लोकार्पण, निरीक्षक राज्य उत्पादन शुल्क कार्यालयाच्या नवीन बांधण्यात येणाऱ्या इमारतीचे भूमिपूजन, दौंड – गोपाळवाडी रस्त्याचे भूमिपूजन मंत्री श्री. विखे पाटील यांच्या हस्ते झाले.

यावेळी खासदार रणजितसिंह नाईक निंबाळकर, आमदार ॲड. राहुल कुल, जयकुमार गोरे, अपर जिल्हाधिकारी अजय मोरे, उपविभागीय अधिकारी मिनाज मुल्ला, तहसीलदार  अरुण शेलार, माजी जिल्हा परिषद अध्यक्ष प्रदीप कंद, माजी नगराध्यक्ष प्रेमसुख कटारिया आदी उपस्थित होते.

श्री. विखे पाटील पुढे म्हणाले, प्रधानमंत्री नरेंद्र मोदी यांच्या नेतृत्त्वात देशाची अर्थव्यवस्था वेगाने विकास करत आहे. सर्वसामान्यांसाठी अनेक योजना राबविल्या जात असून त्याबाबत सुरू असलेल्या ‘विकसित भारत संकल्प यात्रे’ला आवर्जून भेट देऊन नागरिकांनी योजनांची माहिती घ्यावी असे आवाहनही त्यांनी केले.

ॲड. कुल यांच्या पाठपुराव्यामुळे दौंड प्रांताधिकारी कार्यालय शासनाने मंजूर केले. भविष्यातही तालुक्याच्या मागण्यांवर कार्यवाही केली जाईल. तालुका क्रीडा संकुलामुळे खेळाडू मुलांचा फायदा होणार असून येथील मुलांनी ऑलिम्पिक स्तरापर्यंत यश मिळवावे. क्रीडा संकुल प्रकल्प उत्कृष्ट प्रकारे पूर्ण करावा, असेही महसूल मंत्री म्हणाले.

आमदार ॲड. कुल म्हणाले, स्वतंत्र प्रांत कार्यालय सुरू झाल्यामुळे तालुक्यातील नागरिकांना इतरत्र जाण्याचा त्रास, खर्च, वेळ वाचणार आहे. तालुक्यात विविध विकासकामे सुरू आहेत. तालुका क्रीडा संकुलाचेही उत्कृष्ट काम केले जाईल. जिल्हा न्यायालयाला जावे लागायचे आता वरिष्ठ स्तर दिवाणी न्यायालय मंजूर झाल्यामुळे नागरिकांना फायदा होणार आहे. अष्टविनायक मार्ग, रेल्वेमुळे दौंडचे दळणवळण गतिमान झाले आहे, असेही ते म्हणाले.

यावेळी खासदार श्री. नाईक निंबाळकर, आमदार श्री. गोरे यांनीही मनोगत व्यक्त केले.

प्रांत कार्यालय तालुका प्रशासकीय इमारतीत सुरू करण्यात आले आहे. तालुका क्रीडा संकुलाचा एकूण प्रस्ताव ८ कोटी ५० लाख रुपयांचा असून त्यासाठी पहिल्या टप्प्यात ३ कोटी रुपये निधी शासनाने उपलब्ध करून दिला आहेत.

कार्यक्रमात विविध शासकीय योजना, सेवांचा लाभ मंजूर झालेल्या लाभार्थ्यांना लाभ प्रमाणपत्र, दाखले, लाभाचे धनादेश आदी प्रदान करण्यात आले.

यावेळी सार्वजनिक बांधकाम विभागाचे अधीक्षक अभियंता बाप्पा बहिर, राज्य उत्पादन शुल्क विभागाचे पुणे विभागीय उप आयुक्त विजय चिंचाळकर, अधीक्षक चरणसिंग राजपूत, दौंड कार्यालयाचे निरीक्षक विजय रोकडे, जिल्हा क्रीडा अधिकारी महादेव कसगावडे, तालुका क्रीडा अधिकारी महेश चावले, तालुका क्रीडा संघटना अध्यक्ष जालिंदर आवारी आदींसह नागरिक उपस्थित होते.

0000

विभागीय, जिल्हा आणि तालुका क्रीडा संकुलाच्या निधीमध्ये केली भरीव वाढ

लातूर दि.10 ( जिमाका ) राज्यात खेळ संस्कृती वाढविण्यासाठी महाराष्ट्र शासनाच्या क्रीडा विभागाने आशियायी स्पर्धेतील विजेत्या सुवर्ण पदक विजेत्याला 1 कोटी, रौप्य पदक विजेत्याला 75 लाख आणि कांस्य पदक विजेत्या खेळाडूला 50 लाख रुपये देण्याचा निर्णय झाला असून आता आशियायी खेळात सहभागी होणाऱ्या खेळाडूंनाही 10 लाख रुपये देण्याचा निर्णय क्रीडा विभागाने घेतल्याची माहिती राज्याचे क्रीडा व युवक कल्याण मंत्री संजय बनसोडे यांनी दिली.

उदगीर शहरातील जिल्हा परिषद शाळेच्या मैदानावर( तालुका क्रीडा संकुल )क्रीडा व युवक सेवा संचालनालय, महाराष्ट्र राज्य, पुणे अंतर्गत जिल्हा क्रीडा परिषद, जिल्हा क्रीडा अधिकारी कार्यालय, लातूर यांच्या संयुक्त विद्यमाने आयोजित राज्यस्तरीय शालेय डॉजबॉल स्पर्धेच्या उदघाटन प्रसंगी ते बोलत होते. यावेळी राज्य डॉजबॉल असोसिएशनचे महासचिव डॉ. हनुमंत लुंगे, जिल्हा अध्यक्ष ओमप्रकाश साकोळकर, उदगीर उपविभागीय अधिकारी सुशांत शिंदे, तहसीलदार रामेश्वर गोरे, जिल्हा क्रीडा अधिकारी जगन्नाथ लकडे, यांच्यासह विविध स्पर्धा असोसिएशनचे पदाधिकारी, आठ प्रादेशिक विभागाचे खेळाडू, प्रशिक्षक यांच्यासह क्रीडा प्रेमी मोठ्या संख्येनी उपस्थित होते.

राज्याचा क्रीडामंत्री होऊन चार महिने झाले आहेत, या काळात आपण मुख्यमंत्री, उपमुख्यमंत्री यांच्या सहकार्याने अनेक महत्वाचे निर्णय घेतले असल्याचे सांगून त्यात विभागीय क्रीडा संकुलासाठी 75 कोटी रुपये, जिल्हा क्रीडा संकुलासाठी 50 कोटी रुपये, तालुका स्तरावरील क्रीडा संकुलासाठी 10 कोटी तर ग्रामपंचायत स्तरावर पूर्वी 7 लाख होते ते आता 14 लाख रुपये केल्याची माहिती क्रीडा मंत्री संजय बनसोडे यांनी यावेळी सांगितले.

उदगीर मध्ये रुजवायची आहे खेळ संस्कृती

उदगीर, जळकोट भागात खेळ संस्कृती रुजविण्यासाठी मोठे क्रीडा संकुल उभी करण्याचा आपला प्रयत्न असणार आहे. त्या प्रयत्नाचा एक भाग म्हणून उदगीर शहरातील जिल्हा परिषदेच्या पटांगणावर ( तालुका क्रीडा संकुल ) 9 कोटी रुपये एवढ्या निधीतून मिनी स्टेडियम उभं करत आहोत. येत्या काळात अनेक राज्यस्तरीय खेळाचे आयोजन उदगीर मध्ये केले जाणार आहे. अधिकाधिक शाळा, महाविद्यालयातील युवक, युवतीनीं खेळात प्राविण्य मिळवावे. खेळात करियर करून या भागाचे क्रीडा नैपुण्य वाढवावे असे आवाहन करून क्रीडा व युवक कल्याण मंत्री संजय बनसोडे यांनी राज्याच्या कानाकोपऱ्यातून आलेल्या खेळाडुंचे, प्रशिक्षकांचे उदगीर नगरीत स्वागत केले.

या राज्यस्तरीय स्पर्धेकरीता महाराष्ट्रातील मुंबई,  पुणे, नाशिक, नागपूर, अमरावती, छत्रपती संभाजी नगर, कोल्हापूर, लातूर अशा एकुण ८ विभागातून १७/१९ वर्षाआतील मुले १६० व मुली १६० असे एकुण ३२०, खेळाडू आणि ३२ क्रीडा मार्गदर्शक / संघ व्यवस्थापक सहभागी झाले आहेत. तसेच राष्ट्रीय संघाच्या निवड चाचणी करीता प्रत्येक विभागामधून ५ खेळाडू निवड चाचणी करीता असे एकूण ५१२ खेळाडू सहभागी झाले आहेत.

या स्पर्धेच्या उदघाटन कार्यक्रमाच्या प्रास्ताविक जिल्हा क्रीडा अधिकारी जनन्नाथ लकडे यांनी केले. राज्य डॉसबॉल असोसिएशनचे महासचिव प्राचार्य हनुमंत लुंगे यांनीही आपले मनोगत व्यक्त केले.

सांस्कृतिक कार्यक्रमाने झाले स्पर्धेचे उदघाटन

डॉसबॉल स्पर्धेचे उदघाटन लेझिमच्या तालावर    वंदन करून झाले. अत्यंत आकर्षक डॉसबॉल नृत्यही युवक युवतींने केले. त्याचबरोबर सर्व प्रकारचे खेळ, धाडसी खेळ याचे प्रात्यक्षिक नृत्यातून सादर केले. हा सोहळा अत्यंत स्पर्धेचा उत्साह वाढविणारा ठरला.

००००००

नागपूर, दि.10 : महाराष्ट्र राज्य महिला आयोगाने राज्यभरातील विद्यार्थिनींना सायबर सुरक्षित करण्यासाठी ‘मिशन ई सुरक्षा’ उपक्रम हाती घेतला असून नागपुरातील वनामती सभागृहात गुरुवार (दि 14) रोजी दुपारी 2 वाजता होणाऱ्या कार्यक्रमास उपमुख्यमंत्री देवेंद्र फडणवीस, उपमुख्यमंत्री अजित पवार, महिला व बाल विकास मंत्री अदिती तटकरे, खासदार सुनील तटकरे प्रमुख पाहुणे म्हणून उपस्थित राहणार आहेत. विविध महाविद्यालयातील ५०० विद्यार्थी सहभागी होणार असून मेटाचे तज्ञ त्यांना मार्गदर्शन करणार आहेत.

सध्या इंटरनेट हे दुधारी अस्त्र झाले आहे. त्याचे अनेक फायदे असताना, काही चुकीच्या प्रवृत्तींमुळे मोठ्या प्रमाणावर मुली, महिलांना सायबर माध्यमातून आर्थिक फसवणूक, छळ, ट्रोलिंग, सेक्सटॉर्शन याला सामोरे जावे लागत आहे. विद्यार्थ्यांनी सोशल मिडियाच्या माध्यमातून होणारे गैरप्रकार टाळण्याकरिता तसेच भविष्यात सायबर सुरक्षित होण्याकरिता याचे आयोजन करण्यात आले आहे. मुलींनी सायबर सुरक्षित होण्याकरिता घ्यावयाची काळजी, कायद्यातील तरतूदी, यंत्रणांची मदत याबाबत  मार्गदर्शन करणार आहेत.

या उपक्रमाबाबत बोलताना रूपाली चाकणकर म्हणाल्या, महाविद्यालयीन मुली सायबर फसवणुकीला बळी पडल्याच्या अनेक तक्रारी माझ्यासमोर राज्यभरातून येत असतात. अशावेळी काय करावे हे मुलींना कळत नाही, कुठे दाद मागावी हे न कळल्याने मुली सहन करत राहतात. अनेकदा आपल्याकडूनच अधिकची माहिती सोशल मीडियात गेल्याने ही फसवणूक होण्याचे प्रकार होत असतात. अशावेळी घ्यावयाची काळजी, चुकीची घटना घडल्यास मदत मिळण्यासाठी असलेल्या यंत्रणा यांची माहिती राज्यातल्या प्रत्येक मुलींपर्यंत पोहोचावी यासाठी आयोगाने मेटाच्या सहकार्याने मिशन ई सुरक्षा उपक्रम हाती घेतला आहे.

00000

नागपूर, दि.१० : तरूणांचा देश म्हणून जगात भारताची ओळख आहे. तरूणांची ऊर्जा देशसेवेसाठी लागण्यासोबतच त्यांच्या हाताला काम देण्याचे काम उपमुख्यमंत्री देवेंद्र फडणवीस यांच्या नेतृत्वाखाली ‘नमो महारोजगार मेळाव्या’तून झाले. शासनाच्या कौशल्य, रोजगार, उद्योजकता व नाविन्यता विभागामार्फत नागपूरात आयोजित या मेळाव्यात हजारो तरूण-तरूणींना रोजगाराच्या संधी उपलब्ध करून देण्यात आल्या आहेत. उद्योग, आस्थापना व विविध क्षेत्रातील संधीमुळे तरूणांच्या भविष्याचे योग्य नियोजनाचे काम या माध्यमातून शासनाने केले आहे. या मेळाव्यात काहींना रोजगार तर काहींना त्यासाठी प्रशिक्षण मिळाले.

नमो महारोजगार मेळाव्याच्या माध्यमातून सुशिक्षित बेरोजगारांच्या हाताला काम देवून त्यांना आत्मसन्मान मिळवून देण्यासाठी शासनाने आयोजित केलेल्या भव्य रोजगार मेळाव्याला तरुणांचा मोठा प्रतिसाद लाभला. येथे तरुणाईला रोजगारासह त्यांच्या क्षेत्रातील नवसंधी आणि भविष्यकालीन रोजगाराच्या व्याप्तीबाबतही  माहिती  मिळाली.

नमो रोजगार मेळावा येथील राष्ट्रसंत तुकडोजी महाराज नागपूर विद्यापीठाच्या परिसरात आयोजित करण्यात आला. राज्य शासनाच्या कौशल्य रोजगार उद्योजकता व नाविन्यता विभागामार्फत तरुणांना ही संधी उपलब्ध करून देण्यात आली. येथे प्रत्येकाच्या हाताला काम देण्यासाठी रोजगार देणारे, रोजगार घेणारे आणि या दोघांचा मेळ करुन देणारे आयोजक असा त्रिवेणी संगम नमो महारोजगाराच्या माध्यमातून निर्माण झाला आहे. हाऊस किपिंगपासून ते आयआयटी सेक्टरपर्यंत विविध क्षेत्रातील रोजगार येथे उमेदवारांना प्राप्त झाला आहे.  मेळावा संपल्यानंतरही प्रत्येक उमेदवाराला रोजगाराची संधी मिळेपर्यंत सहकार्य व मार्गदर्शन करण्यात येणार आहे.

नमो रोजगार मेळाव्यामध्ये सुमारे पन्नास हजार जागांसाठी भरती प्रक्रिया राबविण्यात आली. आतापर्यंत साठ हजाराच्यावर तरुणांनी येथे नोंदणी केली आहे. या मेळाव्यासाठी विदर्भातून तरुण रोजगाराच्या संधीसाठी आले होते. तरूणांना रोजगाराच्या नवीन क्षेत्राबाबत माहिती व्हावी आणि त्यांच्या गरजेनुसार त्यांच्या हाताला काम मिळावे यासाठी स्वतंत्र भव्य तीन डोम या परिसरात स्थापन करण्यात आले होते. ऑनलाइन नोंदणी , बायोडाटा सादर करणे, कॉल लेटर मिळविणे ते भविष्यकाळात  त्यांच्या संबंधित क्षेत्रात कोठे भरती प्रक्रिया राबविली जाणार आहे, याबाबतही युवकांना यावेळी मार्गदर्शन करण्यात आले. यावेळी येथे तरुणांचे जथ्थेच्या जथ्थे डोळ्यात नवीन आशा घेवून फिरत होते. आता आपण आत्मनिर्भर होणार, हा आनंद आणि समाधान प्रत्येकाच्या चेहऱ्यावर दिसत होते. खऱ्या अर्थाने नमो महारोजगार मेळाव्याच्या माध्यमातून ५० हजार बेरोजगार युवकांना शासनाने आपल्या पंखाखाली घेतले आहे.

या मेळाव्यात आपल्या आशा आकांक्षा पूर्ण झालेल्या काजलची प्रतिक्रियाच या मेळाव्याची यशस्वीता सांगून जाते. इयत्ता आठवी पास असलेल्या काजल पुसनाके, या 31 वर्षीय महिलेला येथे हाऊसकीपिंगचे काम मिळाले. आता पैशासाठी कोणासमोर हात पसरावे लागणार नाही, हे समाधान श्रीमती काजल यांच्या चेहऱ्यावर यावेळी जाणवत होते.

रोजगार प्राप्तीतून आत्मनिर्भर होण्याची चाहुल लागण्याचे समाधान काय असते याची प्रचिती आल्याची बोलकी प्रतिक्रिया ज्ञानेश्वरी शहारे या युवतीने दिली आहे. तिच्यासारख्या असंख्य तरुण-तरुणींचा आनंद हेच या महारोजगार मेळाव्याचे यश म्हणावे लागेल. ज्ञानेश्वरी बीएच्या तृतीय वर्षाला शिकत आहे. कला शाखेला रोजगाराच्या संधी कमी असतात, असे बरेचदा बोलल्या जाते. परंतु ज्ञानेश्वरीला नमो रोजगार मेळाव्याच्या माध्यमातून ‘यशस्वी अकॅडमी फोर स्किल’ येथे नोकरी मिळाली आहे. आई घरकाम करते तर वडील हातमजुरीचे काम. ज्ञानेश्वरीसाठी  या रोजगार मेळाव्यात मिळालेले ‘कॉल लेटर’ म्हणजे तिच्या आजवरच्या आयुष्यातील सर्वोच्च आनंदाचा क्षण असल्याचे जाणवले.

00000

मुंबई दि.१० : रेशीम संचालनालयाने जाहिरात क्रमांक ०१/२०२० नुसार दि. १३ मार्च २०२० अन्वये गट-क व गट-ड संवर्गातील अनुसूचित जमाती या प्रवर्गातील वरिष्ठ तांत्रिक सहायक-२ व प्रयोगशाळा परिचर-१ सरळसेवेची पदे भरण्यासाठी पात्र व इच्छुक उमेदवारांकडून ऑफलाईन पद्धतीने अर्ज मागविण्याकरीता दि. १३ मार्च  २०२० रोजी जाहिरात प्रसिध्द करण्यात आली होती.  ही भरती प्रक्रिया कोवीड २०१९ व प्रशासकीय कारणामुळे राबविण्यात आली नाही. रेशीम संचालनालयाच्या आस्थापनेवरील १२४ रिक्त असलेली पदे भरण्याचे प्रस्तावित आहे. या रिक्त पदांमध्ये वरील जाहिराती मधील अनुसूचित जमाती प्रवर्गाची पदे समाविष्ठ असल्याने जाहिरात क्रमांक ०१/२०२० दि. १३ मार्च २०२० अन्वये प्रसिध्द करण्यात आलेली भरती प्रक्रिया रद्द करण्यात येत आहे असे नागपूर येथील रेशीम संचालक गोरक्ष गाडीलकर यांनी परिपत्रकाद्वारे कळविले आहे.

****

पुणे, दि.10: क्रांतिज्योती सावित्रीबाई फुले यांचे  भिडेवाडा येथील राष्ट्रीय स्मारक आधुनिक पद्धतीचे करतानाच या स्मारकाचे दृश्य स्वरूप हे सावित्रीबाईंच्या काळाप्रमाणे असावे, त्यासाठी जुन्या काळाशी सांगड घाला, असे निर्देश अन्न व नागरी पुरवठा मंत्री छगन भुजबळ यांनी दिले. स्मारकासाठी आवश्यक निधी राज्य शासनाच्यावतीने देण्यात येईल, अशी ग्वाहीदेखील त्यांनी दिली.

शासकीय विश्रामगृह येथे राष्ट्रीय स्मारक भिडेवाडा आणि महात्मा फुले व क्रांतिज्योती सावित्रीबाई फुले यांचे स्मारक विस्ताराच्या अनुषंगाने आयोजित आढावा बैठकीत ते बोलत होते. यावेळी पुणे महानगरपालिकेचे अतिरिक्त आयुक्त विकास ढाकणे, नगर रचना विभागाचे संचालक अविनाश पाटील, सहसंचालक राजेंद्र पवार, उपविभागीय अधिकारी अविनाश सूळ, महानगरपालिकेच्या अधीक्षक अभियंता हर्षदा शिंदे, कार्यकारी अभियंता सुनील मोहिते आदी उपस्थित होते.

श्री. भुजबळ म्हणाले, क्रांतिज्योती सावित्रीबाई फुले यांचे भिडेवाडा येथे स्मारक उभारताना ती ‘सावित्रीबाई फुले यांची पहिली मुलींची शाळा’ अशी वाटली पाहिजे. यासाठी स्पर्धात्मक स्वरूपात नामांकित वास्तुविशारदाकडून वेगवेगळे आराखडे तयार करुन घ्यावेत. आराखड्यात शाळेच्या परिसरात सावित्रीबाई फुले यांचा पुतळा, फर्निचर,  क्रीडांगण, दृकश्राव्य साधने, जुन्यापद्धतीचे दर्शनी भाग आदी बाबींचा विचार व्हावा. जागेचा विचार करता शाळेच्या इमारतीत उद्वाहकाची  व्यवस्था करावी.

या परिसरात वाहनतळाची इतरत्र व्यवस्था करण्याच्यादृष्टीने चाचपणी करावी. स्पर्धात्मक युगाचा विचार करता या शाळेतून महिला अधिकारी घडविण्याच्यादृष्टीने शाळेची रचना व आधुनिक अभ्यासक्रमाबाबत महानगरपालिकेने चाचपणी करावी. समितीने आराखडा अंतिम केल्यानंतर स्मारकाचे काम लवकरात लवकर सुरु करावे. स्मारक पूर्ण झाल्यानंतर अनेकांना समाजकार्याची प्रेरणा मिळेल, असे श्री. भुजबळ म्हणाले.

महात्मा फुले व क्रांतिज्योती सावित्रीबाई फुले यांचे स्मारक आणि राष्ट्रीय स्मारक भिडेवाडा यांना जोडणाऱ्या मार्गाचे आरक्षण नगर रचना विभागाने लवकरात लवकर पूर्ण करावे. आरक्षण निश्चितीनंतर पुणे महानगरपालिकेने भूसंपादनाची कार्यवाही सुरु करावी. यासाठी लागणाऱ्या निधीची मागणी राज्य शासनाकडे करावी. नागरिकांच्या मागणीबाबत सकारात्मक विचार करण्यात यावा, असेही श्री. भुजबळ म्हणाले.

यावेळी अतिरिक्त आयुक्त श्री. ढाकणे आणि संचालक श्री. पाटील यांनी कामाच्या अनुषंगाने बैठकीत माहिती दिली.

०००००

मुंबई,दि.10 : कौशल्य, रोजगार, उद्योजकता व नाविन्यता विभागामार्फत ‘महापुरुषांचे कौशल्य विचार’ या पुस्तकाचे प्रकाशन आणि स्वर्गीय दत्ताजी डिडोळकर सन्मान पुरस्कार वितरण सोहळ्याचे नागपूर येथे 12 डिसेंबर रोजी सायंकाळी  5.00 वाजता राजभवन नागपूर येथे  आयोजन केले आहे. राज्यपाल रमेश बैस, मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि उपमुख्यमंत्री अजित पवार यांच्या उपस्थितीत हा कार्यक्रम होणार असल्याची माहिती कौशल्य, रोजगार, उद्योजकता व नाविन्यता मंत्री मंगल प्रभात लोढा यांनी दिली.

मंत्री श्री.लोढा म्हणाले की, महाराष्ट्र हा आपल्या महापुरुषांच्या कर्तृत्वाने, प्रेरणेने आणि विचारान  समृध्द आहे. छत्रपती शिवाजी महाराज, भारतरत्न डॉ.बाबासाहेब आंबेडकर,महात्मा जोतीराव फुले, लोकमान्य बाळ गंगाधर टिळक,स्वातंत्र्यवीर विनायक सावरकर या महापुरुषांच्या कौशल्य विषयक अप्रतिम ध्येय धोरणाची ओळख व महात्म्य आजच्या विशेषत: कौशल्य शिक्षण घेणाऱ्या तरुण पिढीला होणे गरजेचे आहे.या महापुरुषांनी आपल्या काळात समाज जीवनामध्ये कौशल्य विकासाचे तत्त्व यशस्वीपणे अंगिकारले होते.”महापुरुषांचे कौशल्य विचार” या पुस्तकात महापुरुषांच्या कौशल्य विषयक कार्याचा, धोरणाचा व्यवसाय शिक्षण अभ्यासक्रमांमध्ये समावेश केल्यामुळे व्यवसाय शिक्षण अधिक समृद्ध होऊन विद्यार्थ्याचे कौशल्य  वाढण्यासही मदत होणार आहे. आयटीआयच्या सद्यस्थितीतील अभ्यासक्रमाव्यतिरिक्त “महापुरुषांचे कौशल्य विचार” हा विषय विद्यार्थ्यांना शिकविला जाणार आहे. संचालक, व्यवसाय शिक्षण व प्रशिक्षण संचालनालय स्तरावर गठीत समितीने तयार केलेल्या या माहितीपूर्ण पुस्तिकेचे प्रकाशन मान्यवरांच्या हस्ते होणार  आहे असेही मंत्री श्री. लोढा म्हणाले.

मंत्री श्री. लोढा म्हणाले की, बहुआयामी व्यक्तीमत्व स्वर्गीय दत्ताजी डिडोळकर यांच्या नावाने  शैक्षणिक, सामाजिक आणि कौशल्य विकास क्षेत्रात भरीव योगदान देणा-या व्यक्तींना स्वर्गीय दत्ताजी डिडोळकर सन्मान  पुरस्कार देवून गौरव करण्यात येणार आहे.

या कार्यक्रमाला स्थानिक लोकप्रतिनिधी, कौशल्य, रोजगार,उद्योजकता व नाविन्यता विभागाचे अपर मुख्य सचिव आशिष कुमार सिंह,महाराष्ट्र राज्य कौशल्य विकास सोसायटीचे आयुक्त डॉ.रामास्वामी एन, व्यवसाय शिक्षण व प्रशिक्षण संचालनालयाचे संचालक दिगांबर दळवी, कौशल्य विद्यापीठाच्या कुलगुरू अपूर्वा पालकर,कौशल्य विकास,  रोजगार व उद्योजकता आयुक्तालय, नवी मुंबईचे उप आयुक्त दि.दे.पवार यासह आणि अधिकारी उपस्थित राहणार आहेत तरी या कार्यक्रमाला सर्वांनी उपस्थित रहावे असे आवाहन कौशल्य, रोजगार, उद्योजकता व नाविन्यता विभागामार्फत करण्यात आले आहे.

०००००