मुंबई, दि.१३ : राज्यातील लोकसभा निवडणुकीच्या चौथ्या टप्प्यातील ११ मतदारसंघात आज सकाळपासून मतदानाला सूरुवात झाली असून दुपारी १ वाजेपर्यंत सरासरी ३०.८५ टक्के मतदान झाले आहे.

चौथ्या टप्प्यातील एकूण ११ लोकसभा मतदारसंघनिहाय टक्केवारी पुढीलप्रमाणे

नंदुरबार – ३७.३३ टक्के
जळगाव- ३१.७० टक्के
रावेर – ३२.०२ टक्के
जालना – ३४.४२ टक्के
औरंगाबाद – ३२.३७ टक्के
मावळ -२७.१४ टक्के
पुणे – २६.४८ टक्के
शिरूर- २६.६२ टक्के
अहमदनगर- २९.४५ टक्के
शिर्डी -३०.४९ टक्के
बीड – ३३.६५ टक्के

मुंबई, दि.१३ : राज्यातील लोकसभा निवडणुकीच्या चौथ्या टप्प्यातील मतदान आज सकाळी ७ वाजतापासून सूरु झाले आहे. चौथ्या टप्प्यातील एकूण ११ मतदारसंघात सकाळी ११ वाजेपर्यंत सरासरी १७.५१ टक्के मतदान झाले आहे.

चौथ्या टप्प्यातील एकूण ११ लोकसभा मतदारसंघनिहाय टक्केवारी पुढीलप्रमाणे

नंदुरबार – २२.१२ टक्के
जळगाव- १६.८९ टक्के
रावेर – १९.०३ टक्के
जालना – २१.३५ टक्के
औरंगाबाद – १९.५३ टक्के
मावळ -१४.८७ टक्के
पुणे – १६.१६ टक्के
शिरूर- १४.५१ टक्के
अहमदनगर- १४.७४ टक्के
शिर्डी -१८.९१ टक्के
बीड – १६.६२ टक्के

 मुंबई, दि.१३ : राज्यातील लोकसभा निवडणुकीसाठी चौथ्या टप्प्यात आज दि.१३ मे २०२४ रोजी सकाळी ७.००वा.पासून मतदान सुरु झाले आहे. चौथ्या टप्प्यातील एकूण ११ मतदारसंघात सकाळी ९ वाजेपर्यंत सरासरी ६.४५ टक्के मतदान झाले आहे.

 एकूण ११ लोकसभा मतदारसंघनिहाय मतदानाची टक्केवारी पुढीलप्रमाणे…

नंदुरबार  – ८.४३ टक्के

जळगाव  – ६.१४ टक्के

रावेर    – ७.१४ टक्के

जालना   – ६.८८ टक्के

औरंगाबाद  -७.५२ टक्के

मावळ  – ५.३८ टक्के

पुणे  – ६.६१ टक्के

शिरूर – ४.९७ टक्के

अहमदनगर -५.१३ टक्के

शिर्डी  – ६.८३  टक्के

बीड  – ६.७२ टक्के

0000

संध्या गरवारे/ वि.सं.अ

मालेगाव, दि. १२ (उमाका) : धुळे लोकसभा मतदारसंघासाठी येत्या 20 मे, 2024 रोजी मतदान होणार आहे. भारत निवडणूक आयोगाच्या निर्देशानुसार या निवडणूकीत 85 वर्षावरील ज्येष्ठ नागरीक, दिव्यांग मतदार व कोव्हीड-19 रुग्ण मतदार यांना टपाली मतदान पथकामार्फत टपाली मतपत्रिकेद्वारे मतदानाची सुविधा उपलब्ध करुन देण्यात आली आहे. त्यानुसार 02-धुळे लोकसभा मतदार संघातंर्गत 115-मालेगाव बाह्य मतदारसंघात आज गृह मतदानाच्या पहिल्या दिवशी एकूण 21 मतदारांनी घरुन आपला मतदानाचा हक्क बजावला. अशी माहिती 115-मालेगाव बाहय विधानसभा मतदारसंघाच्या सहाय्यक निवडणूक निर्णय अधिकारी पल्लवी निर्मळ यांनी दिली आहे.

भारत निवडणूक आयोगाने लोकसभा मतदार संघ निवडणूकीत प्रथमच 85 वर्षावरील ज्येष्ठ नागरीक, दिव्यांग मतदार व कोव्हीड-19 रुग्ण मतदार यांना टपाली मतदान पथकामार्फत टपाली मतपत्रिकेद्वारे मतदानाची सुविधा उपलब्ध करुन देण्यात आली आहे. त्यानुसार 115-मालेगाव बाहय विधानसभा मतदार संघात पंधरा (15) 85 वर्षावरील ज्येष्ठ नागरीक तर सहा (6) दिव्यांग असे एकूण 21 मतदारांनी घरुन मतदानासाठी नोंदणी केली आहे. त्यानुसार धुळे लोकसभा मतदार संघाचे निवडणूक निर्णय अधिकारी अभिनव गोयल यांच्या मार्गदर्शनाखाली 115-मालेगाव बाह्य विधानसभा मतदार संघात आज (12 मे) रोजी गृहभेटीद्वारे टपाली मतदान करण्याचा दिवस निश्चित करण्यात आला होता. त्याअनुषंगाने सहाय्यक निवडणूक निर्णय अधिकारी पल्लवी निर्मळ यांनी संपूर्ण मतदार संघासाठी 2 टीमची नियुक्ती केली होती. प्रत्येक टीममध्ये चार अधिकारी, कर्मचारी यांचा समावेश असून या टीमने मतदारांच्या घरी जाऊन त्यांचे मतदान नोंदवून घेतले आहेत.

धुळे लोकसभा मतदार संघात गृह मतदानासाठी 432 ज्येष्ठ नागरीक, दिव्यांग मतदारांनी नोंदणी केली आहे. त्यापैकी विधानसभा मतदार संघनिहाय पहिल्या फेरीत आजपर्यंत झालेले गृह मतदान धुळे शहर (49), धुळे ग्रामीण (86), शिंदखेडा (105), बागलाण (98) मालेगाव मध्य (24), मालेगाव बाह्य (21) असे एकूण 383 मतदान नोंदविण्यात आले आहे. उर्वरित मतदारांचे गृह मतदार दुसऱ्या फेरीत घेण्यात येणार आहे.

०००

धुळे, दि. १२ (जिमाका) : धुळे जिल्ह्यातील साक्री व शिरपूर हे विधानसभा मतदार संघ लोकसभा निवडणूकीकरीता 01-नंदुरबार लोकसभा मतदार संघात येतात. या मतदार संघासाठी आज दि.13 मे रोजी मतदान प्रक्रिया पार पडणार आहे. त्या पार्श्वभूमीवर या दोन्ही विधानसभा मतदार संघात मतदान साहित्य, ईव्हीएम मशीन चे वाटप रविवार दि. 12 रोजी करण्यात आले. दुपार नंतर मतदान कर्मचारी ईव्हीएम मशीन व साहित्यासह मतदान केंद्राकडे रवाना झाले. आज सोमवार दि. 13 रोजी सकाळी 7 वाजेपासून जिल्ह्यातील दोन्ही विधानसभा मतदार संघात मतदान प्रक्रियेला सुरुवात होणार आहे. अशी माहिती जिल्हाधिकारी तथा जिल्हा निवडणूक निर्णय अधिकारी अभिनव गोयल यांनी दिली आहे.

साक्री व शिरपूर विधानसभा मतदारसंघात 703 मतदान केंद्र

 धुळे जिल्ह्यातील साक्री विधानसभा मतदारसंघात 370 तर शिरपूर विधानसभा मतदारसंघात 333 असे दोन्ही मिळून 703 मतदार केंद्र आहेत. दोन्ही मतदार संघात प्रत्येकी एक मतदान केंद्र क्रिटीकल आहे. त्याठिकाणी आवश्यक बंदोबस्त लावण्यात आला आहे. तसेच साक्री विधानसभा मतदार संघात 6 तर शिरपूर विधानसभा मतदार संघात 10 मतदान केंद्र शॅडो मतदान केंद्र आहेत. याठिकाणी वॉकीटॉकीची सुविधा उपलब्ध करुन देण्यात आली आहे.

दोन्ही मतदारसंघात 6 लक्ष 90 हजार 773 मतदार

धुळे जिल्ह्यातील साक्री व शिरपूर या दोन्ही विधानसभा मतदार संघात एकूण 6 लक्ष 90 हजार 773 मतदार आहेत. त्यात साक्री विधानसभा मतदार संघात 1 लाख 83 हजार 833 पुरुष मतदार तर 1 लाख 73 हजार 146 महिला मतदार व 6 तृतीयपंथी तसेच 341 सर्व्हिस व्होटर आहेत. तर शिरपूर विधानसभा मतदार संघात 1 लाख 70 हजार 267 पुरुष मतदार तर 1 लाख 63 हजार 512 महिला मतदार व 9 तृतीयपंथी तसेच 233 सर्व्हिस व्होटर मतदार आहेत. साक्री तालुक्यात 1 हजार 952 दिव्यांग मतदार असून शिरपूर तालुक्यात 2 हजार 166 दिव्यांग मतदार आहेत. या मतदार संघातील सर्व मतदान केंद्रांवर दिव्यांगांसाठी रॅम्पची व्यवस्था उपलब्ध आहे.

मतदान केंद्रांवर मोबाईलला बंदी

साक्री आणि शिरपूर या दोन्ही मतदार संघात मतदानाच्या दिवशी मतदान केंद्रावर मोबाईल फोन, स्मार्ट वॉच, कार्डलेस फोन, वायरलेस सेटसह इलेक्ट्रॉनिक्स वस्तू वापरास, बाळगण्यास निर्बंध आहेत. मतदान करण्यासाठी येणाऱ्या मतदारांना मतदान केंद्राच्या 100 मीटर परिसरात मोबाईल वापरता येणार नाही. त्यामुळे समूहाने मतदानासाठी जाणाऱ्या मतदारांना मोबाईल मतदान केंद्राच्या बाहेरच ठेऊन जावे लागणार आहे. किंवा एकमेकांजवळ सांभाळायला द्यावे लागणार आहे.

सर्व सोयींनी परिपूर्ण असणार मतदान केंद्र

जिल्ह्यातील या दोन्ही विधानसभा मतदार संघात उभारण्यात आलेल्या 703 मतदान केंद्रांवर मतदान करण्यासाठी येणाऱ्या मतदारांना कोणत्याही अडचणींचा सामना करावा लागू नये, यासाठी मतदान केंद्रावर परिपूर्ण सोयी करण्यात आल्या आहेत. त्यात पिण्याचे पाणी, उन्हापासून बचाव करण्यासाठी मंडप किंवा शेड, मतदार सहाय्य्यता केंद्र, उन्हाळयातील वाढते तापमान लक्षात घेऊन प्रथमोपचार पेट्या, आणि प्रत्येक मतदान केंद्रासाठी ओआरएसचे पाकिटे तसेच आरोग्याशी संबंधित अडचणीसाठी आरोग्य केंद्र, अंगणवाडी व बालसंगोपन केंद्र, व्हीलचेअर या सह सर्व प्रकारच्या पूरक सोयी सुविधा उपलब्ध करून देण्यात आल्या आहेत.

नागरिकांनी निर्भयपणे मतदानाला यावे

01-नंदूरबार लोकसभा मतदार संघातील साक्री व शिरपूर विधानसभा मतदार संघात आज दि. 13 मे रोजी मतदान प्रक्रिया पार पडत आहे. जिल्ह्यातील नागरिकांनी कोणत्याही अमिषाला बळी न पडता निर्भयपणे मतदानासाठी घराबाहेर पडावे. प्रशासनातर्फे मतदान केंद्रावर सर्व प्रकारच्या सोयी उपलब्ध करून देण्यात आल्या आहेत. त्या सोबतच जिल्ह्यात निर्भयपणे मतदान प्रक्रिया पार पडावी यासाठी प्रशासनाने सर्व प्रकारची दक्षता घेतली आहे. मतदारांनी लोकशाहीच्या या सर्वात मोठ्या उत्सवात सहभागी होऊन आपला हक्क बजवावा व मतदान प्रक्रियेत सहभागी व्हावे, असे आवाहन जिल्हा निवडणूक अधिकारी तथा जिल्हाधिकारी अभिनव गोयल यांनी केले आहे.

०००

धुळे, दि. १२ (जिमाका) : भारत निवडणूक आयोगाच्या निर्देशानुसार मतदान प्रक्रियेमध्ये 85 वर्षांवरील ज्येष्ठ नागरिक, दिव्यांग मतदारांना मतदान केंद्रावर सहज सुलभतेने ये-जा करता येण्यासाठी व्हीलचेअरची सुविधा उपलब्ध करुन देण्याचे निर्देश आहेत. त्यानुसार धुळे जिल्ह्यासाठी 100 व्हिलचेअर उपलब्ध झाल्याची माहिती जिल्हाधिकारी तथा जिल्हा निवडणूक अधिकारी अभिनव गोयल यांनी दिली आहे.

भारत निवडणूक आयोगाने लोकसभा निवडणूकीच्या मतदानासाठी मतदान केंद्रावर आवश्यक मुलभूत सुविधा उपलब्ध करुन देण्याचे निर्देश दिले आहे. त्यानुसार 85 वर्षांवरील ज्येष्ठ नागरीक, दिव्यांग मतदारांना मतदान केंद्रावर व्हीलचेअर उपलब्ध करुन देण्याचे निर्देश आहेत. धुळे जिल्ह्यातील साक्री व शिरपूर हे विधानसभा मतदार संघ लोकसभा निवडणूकीकरीता 01-नंदुरबार लोकसभा मतदार संघात येतात. या मतदार संघासाठी सोमवार, 13 मे, 2024 रोजी मतदान होणार आहे. भारत निवडणूक आयोगाच्या निर्देशानुसार 85 वर्षांवरील ज्येष्ठ नागरीक, दिव्यांग मतदाता यांची ज्या मतदान केंद्रावर संख्या जास्त आहे. त्या मतदान केंद्रावर या व्हीलचेअर उपलब्ध करुन देण्यात येणार आहे. यामुळे ज्येष्ठ व दिव्यांग मतदार मतदान केंद्रावर सहज सुलभतेने ये-जा करु शकणार आहे. याकरीता शिरपूर विधानसभा मतदार संघासाठी 50 तर साक्री विधानसभा मतदार संघासाठी 50 व्हिलचेअर वितरीत करण्यात आल्या आहे. या व्हीलचेअर 20 मे 2024 रोजी होणाऱ्या धुळे लोकसभा मतदारसंघ निवडणूकीतही मागणीनुसार उपलब्ध करुन देण्यात येणार आहेत.

०००

धुळे लोकसभा मतदार संघ निवडणूक

मालेगाव, दि. १२ (उमाका) : धुळे लोकसभा मतदारसंघासाठी येत्या 20 मे, 2024 रोजी मतदान होणार आहे. भारत निवडणूक आयोगाच्या निर्देशानुसार या निवडणूकीत 85 वर्षावरील ज्येष्ठ नागरीक, दिव्यांग मतदार व कोव्हीड-19 रुग्ण मतदार यांना टपाली मतदान पथकामार्फत टपाली मतपत्रिकेद्वारे मतदानाची सुविधा उपलब्ध करुन देण्यात आली आहे. त्यानुसार 02-धुळे लोकसभा मतदार संघातंर्गत 114 मालेगाव मध्य मतदारसंघात गृह मतदानाच्या पहिल्या दिवशी एकूण 24 मतदारांनी घरुन आपला मतदानाचा हक्क बजावला, अशी माहिती 114-मालेगाव मध्य विधानसभा मतदारसंघाचे सहाय्यक निवडणूक निर्णय अधिकारी नितिन सदगीर यांनी दिली आहे.

भारत निवडणूक आयोगाने लोकसभा मतदार संघ निवडणूकीत प्रथमच 85 वर्षावरील ज्येष्ठ नागरीक, दिव्यांग मतदार व कोव्हीड-19 रुग्ण मतदार यांना टपाली मतदान पथकामार्फत टपाली मतपत्रिकेद्वारे मतदानाची सुविधा उपलब्ध करुन देण्यात आली आहे. त्यानुसार 114 मालेगाव मध्य विधानसभा मतदार संघात एकोणीस (19)  85 वर्षावरील ज्येष्ठ नागरीक तर पाच (5) दिव्यांग असे एकूण 24 मतदारांनी घरुन मतदानासाठी नोंदणी केली आहे. त्यानुसार धुळे लोकसभा मतदार संघाचे निवडणूक निर्णय अधिकारी अभिनव गोयल यांच्या मार्गदर्शनाखाली 114 मालेगाव मध्य विधानसभा मतदार संघात आज (11 मे) रोजी गृहभेटीद्वारे टपाली मतदान करण्याचा दिवस निश्चित करण्यात आला होता. त्याअनुषंगाने सहाय्यक निवडणूक निर्णय अधिकारी नितिन सदगीर यांनी संपूर्ण मतदार संघात 4 टीमची नियुक्ती केली होती. प्रत्येक टीममध्ये चार अधिकारी, कर्मचारी यांचा समावेश असून या टीमने मतदारांच्या घरी जाऊन त्यांचे मतदान नोंदवून घेतले आहेत.

धुळे लोकसभा मतदारसंघातंर्गत आज 114 मालेगाव मध्य मतदारसंघात एकूण 24 ज्येष्ठ नागरिक, दिव्यांग मतदारांनी गृह मतदान नोंदविले आहेत. तसेच  गृहभेटीद्वारे मतदान केलेल्या ज्येष्ठ नागरीक, दिव्यांग यांनी आज आपला मतदानाचा हक्क बजविल्यानंतर आयोगाने गृह मतदानाची सुविधा उपलब्ध करुन दिल्याबद्दल आयोगाचे आभार मानून देशाची लोकशाही अधिक बळकट करण्यासाठी ज्याप्रमाणे आम्ही मतदान केले त्याचप्रमाणे सर्व मतदारांनी आपला  मतदानाचा हक्क बजवावा, असे आवाहन केले.

०००

धुळे, दि. १२ (जिमाका) : धुळे जिल्ह्यातील साक्री व शिरपूर हे विधानसभा मतदार संघ लोकसभा निवडणूकीकरीता 01-नंदुरबार लोकसभा मतदार संघात येतात. या मतदार संघासाठी सोमवार, 13 मे, 2024 रोजी मतदान होणार आहे. या पार्श्वभूमीवर निवडणूक प्रक्रियेत कुठल्याही प्रकारची अडचणी येऊ नये यासाठी कंट्रोल रुम मध्ये नियुक्त पथक प्रमुखांनी सतर्क रहावे, असे निर्देश जिल्हाधिकारी तथा जिल्हा निवडणूक निर्णय अधिकारी अभिनव गोयल यांनी दिले.

यावेळी निवासी उपजिल्हाधिकारी नितीन गावंडे, उपजिल्हा निवडणूक अधिकारी गंगाराम तळपाडे, उपजिल्हाधिकारी संजय बागडे, नगरपालिका प्रशासन अधिकारी शिल्पा नाईक, जिल्हा नियोजन अधिकारी ममता हटकर, जिल्हा सूचना विज्ञान अधिकारी महेश खडसे, जिल्हा मृद व जलसंधारण अधिकारी रविंद्र खोंडे, लघु पाटबंधारे विभागाचे कार्यकारी अभियंता संदीप पवार, जिल्हा सांख्यिकी अधिकारी संतोष वानखेडे, जिल्हा आपत्ती व्यवस्थापन अधिकारी जितेंद्र सोनवणे, सहायक जिल्हा पुरवठा अधिकारी अर्चना भगत आदी उपस्थित होते.

यावेळी जिल्हाधिकारी श्री.गोयल यांनी जिल्हाधिकारी कार्यालयात स्थापन करण्यात आलेल्या कंट्रोल रुमला भेट दिली. 01-नंदुरबार लोकसभा मतदारसंघात धुळे जिल्ह्यातील साक्री व शिरपूर विधानसभा मतदारसंघात 13 मे रोजी मतदान होणार असल्याने या पार्श्वभूमीवर निवडणूक आयोगाच्या निर्देशानुसार विविध अहवाल सहायक निवडणूक निर्णय अधिकारी यांचेकडून संकलीत करुन निवडणूक निर्णय अधिकारी 01-लोकसभा मतदारसंघ यांच्याकडे विहित वेळत सादर करावेत. साक्री व शिरपूर विधानसभा मतदार संघातील मतदाना संदर्भात मतदानासंबंधी आवश्यक माहिती, पत्रव्यवहार तसेच मतदाना संदर्भातील दर दोन तासांची आकडेवारी गोळा करुन एकत्रित अहवाल Encore प्रणालीमध्ये अद्यावत करण्याच्या सूचना दिल्यात. तसेच मतदान पूर्व, मतदानाचे दिवशी मतदानोत्तर प्रिंट व इलेक्ट्रॉनिक मिडीयावर प्रसारीत होणाऱ्या नकारात्मक बातम्यावर लक्ष ठेवून प्रिंट व इलेक्ट्रॉनिक मिडीयाला वस्तुदर्शक माहिती पुरविण्यात यावी. त्याचप्रमाणे मतदानाच्या दिवशी व्हॉट्सअप, फेसबुक, एक्स आणि इतर सोशल मिडीयावर लक्ष ठेवून सोशल मिडीयावरील आदर्श आचारसंहितेच्या उल्लघंनाची माहिती देण्यात यावी. तसेच कंट्रोलरुम मध्ये आवश्यक कर्मचाऱ्यांची नियुक्ती करुन संपर्क यादी अद्ययावत ठेवून येणा-या तक्रारींचे त्वरीत निराकरण करण्यात यावेत. तसेच मतदान प्रक्रिये दरम्यान कोणताही अनुचित प्रकार घडणार याची दक्षता घेण्यात यावी, अशा सूचना त्यांनी यावेळी सर्व संबंधित यंत्रणेला दिल्या.

असे आहे कंट्रोल रुम…

लोकसभा निवडणूकीसाठी मतदान होत असलेल्या मतदान केंद्रापैकी 50 टक्के मतदान केंद्राचे वेब कास्टिंग करण्याचे निर्देश भारत निवडणूक आयोगाने दिले आहे. त्यानुसार जिल्हाधिकारी कार्यालयातील सातपुडा सभागृहात कंट्रोल रुम तसेच मिडीया कक्षाची स्थापना करण्यात आली असून वेब कास्टिंगची सुविधाही उपलब्ध करण्यात आली आहे. त्यानुसार साक्री व शिरपूर विधानसभा मतदारसंघातील प्रत्येक मतदान केंद्र, मतदान प्रक्रिया, स्ट्रॉग रुमचे वेब कॉस्टिंग करण्यात येणार आहे. तसेच मतदान यंत्रे वाहतूक करणाऱ्या सर्व वाहनावर जीपीएस मॉनिटरिंग प्रणालीद्वारे लक्ष ठेवण्यात येणार आहे. जेणेकरुन मतदान केंद्रावर कोणताही अनुचित प्रकार उद्भवल्यास त्याची माहिती त्वरीत जिल्हा प्रशासनाला मिळणार आहे.

०००

छत्रपती संभाजीनगर, दि.१२(जिमाका):  लोकसभा निवडणूक २०२४ अंतर्गत १९- औरंगाबाद लोकसभा मतदारसंघात तसेच १८-जालना लोकसभा मतदारसंघात समाविष्ट विधानसभा क्षेत्रनिहाय नियुक्त मतदान पथके आज रवाना झाली.

१९-औरंगाबाद लोकसभा मतदार संघात २०४० तर १८ जालना मतदार संघात १०४५ मतदान केंद्रांवर ही पथके पोहोचतील. सोमवार दि.१३ रोजी सकाळी ७ ते सायंकाळी ६ वा. पर्यंत मतदानाची वेळ आहे. जिल्हा प्रशासन मतदानासाठी सज्ज असून मतदारांनी आपला हक्क बजवावा असे आवाहन जिल्हा निवडणूक अधिकारी तथा जिल्हाधिकारी दिलीप स्वामी यांनी मतदारांना केले आहे.

सकाळी ८ वाजल्यापासून साहित्य वितरणास प्रारंभ

आज सकाळी ८ वाजल्यापासून विधानसभा क्षेत्रनिहाय मतदान पथकांना मतदान साहित्य वाटपास सुरुवात झाली. प्रत्येक ठिकाणी सहा. निवडणूक निर्णय अधिकाऱ्यांच्या नेतृत्वात हे वितरण करण्यात आले. पावसाची शक्यता लक्षात घेता प्लास्टीक बॅग सुद्धा साहित्य आच्छादनासाठी देण्यात येत होती.

१०७ औरंगाबाद (मध्य) विधानसभा क्षेत्राचे साहित्य वाटप शासकीय तंत्रनिकेतन महाविद्यालय परिसरात, १०८ औरंगाबाद (पश्चिम)चे साहित्य वाटप शासकीय अभियांत्रिकी महाविद्यालय आणि १०९ औरंगाबाद (पूर्व)  मतदारसंघातील साहित्य वाटप सेंट फ्रान्सिस हायस्कूल जालना रोड येथे करण्यात आले. त्याचप्रमाणे प्रत्येक विधानसभा क्षेत्रनिहाय साहित्य वितरण संबंधित सहा. निवडणूक निर्णय अधिकारी यांच्या देखरेखीत करण्यात आले.

जिल्हाधिकारी दिलीप स्वामी यांनी भेट देऊन केली पाहणी

जिल्हाधिकारी दिलीप स्वामी यांनी आज सकाळी या ठिकाणी भेट दिली. औरंगाबाद (पश्चिम), औरंगाबाद (मध्य), औरंगाबाद (पूर्व) यांच्या साहित्य वितरण केंद्रास त्यांनी सकाळच्या सत्रात तर अन्य ठिकाणी दुपारच्या सत्रात भेट देऊन कर्मचाऱ्यांची विचारपूस केली व संबंधित मतदान केंद्रावर रवाना होणाऱ्या पथकांना शुभेच्छा दिल्या. सहाय्यक निवडणूक निर्णय अधिकारी व्यंकट राठोड ,श्रीमती अर्चना खेतमाळीस, चेतन गिरासे यांची उपस्थिती होती.

महिला मतदान केंद्र पथकांचा उत्साह

जिल्ह्यात केवळ महिला कर्मचाऱ्यांनी संचलित केलेले १६ मतदान केंद्र तयार केले जाणार आहेत. त्यातील चार जालना लोकसभा अंतर्गत येतात तरऔरंगाबाद लोकसभा अंतर्गत १२ मतदान केंद्र असतील.  या महिला मतदान केंद्राच्या  मतदान पोलिसांसह सर्व कर्मचारी महिला नियुक्त असतील. अशा या महिला मतदान केंद्र पथकांचा विशेष उत्साह दिसून आला. या पथकासही साहित्य वितरण करुन शुभेच्छा देण्यात आल्या.

जिल्ह्यात ३०८५ मतदान केंद्र

जिल्ह्यात ३०८५ मतदान केंद्र असून त्यात जालना लोकसभा मतदार संघाचा भाग असलेले १०४५ मतदान केंद्र हे ६१८ ठिकाणी आहेत. १९- औरंगाबाद मतदार संघात २०४० मतदान केंद्र ९७६ ठिकाणी आहेत.  विधान सभा क्षेत्र निहाय मतदान केंद्र संख्या याप्रमाणे- जालना लोकसभा क्षेत्रातील  १०४-सिल्लोड- ३५६, १०६ फुलंब्री-३५५, ११० पैठण- ३३४. १९- औरंगाबाद लोकसभा क्षेत्रातील १०५ कन्नड- ३५९, १०७ औरंगाबाद( मध्य)-३७४, १०८ औरंगाबाद(पश्चिम)-३७४, १०९ औरंगाबाद (पूर्व)-३०५, १११ गंगापूर- ३४८, ११२ वैजापूर-३३८.

३० लाख ६७ हजार मतदार

जिल्ह्यात ३० लाख ६७ हजार ७०७ मतदार (सर्व्हिस मतदारांसह) आहेत. त्यात जालना मतदार संघात १० लाख ६,४८७ तर औरंगाबाद मतदार संघात २० लाख ६१ हजार २२० मतदार (सर्व्हिस मतदारांसह) आहेत. जिल्ह्याला ६१२० मतदान यंत्रे, २०४० कंट्रोल युनिट, २०४० व्हिव्हिपॅटची आवश्यकता आ हे. ते सर्व उपलब्ध असून  सद्यस्थितीत ७३४१ मतदान यंत्रे, २४४५ कंट्रोल युनिट व २६४९ व्हिव्हिपॅट उपलब्ध आहेत. त्यातील उर्वरित यंत्रे ही राखीव ठेवण्यात आली आहेत. मतदान प्रक्रियेसाठी १७ हजार ७४० मनुष्यबळाची गरज असून २० हजार ५२४  कर्मचारी प्रशिक्षण घेऊन सज्ज आहेत.

या पथकांच्या ने आण करण्यासाठी १२०४ वाहने व ३८८ बसेस वापरात आणण्यात येत आहेत. प्रत्येक मतदान केंद्रावर मेडिकल किट सह मतदान यंत्रे, कंट्रोल युनिट, व्हिव्हिपॅट मशिन सह अन्य आवश्यक साहित्य, मतदान केंद्रावर लावण्यात येणारी सुचना फलके, दिशादर्शक स्टिकर्स, शाई, अन्य स्टेशनरी इ. सर्व साहित्य मतदान चमूला देण्यात आले. हे साहित्य घेऊन सायंकाळपर्यंत पथके रवाना करण्याचे कामकाज सुरु होते.

०००