मुंबई दि. १३ :  लोकसभा सार्वत्रिक निवडणुकीत यावेळी 85 वर्षांपेक्षा जास्त वय असणारे मतदार आणि दिव्यांग मतदारांना गृहमतदानाचा पर्याय देण्यात आला होता. मुंबई उपनगर जिल्ह्यातील 26- मुंबई उत्तर लोकसभा मतदार संघातील 153- दहिसर विधानसभा मतदारसंघात आज गृहमतदान पार पडले. आयुष्याची शंभरी पार केलेल्या 104 वर्ष वयाच्या श्रीमती लक्ष्मी राजपूत या आजीबाईंनी दहिसर पश्चिम येथे आज गृहमतदानाचा हक्क बजावला. अत्यंत जबाबदारीने या आजीबाईंनी त्यांचे कर्तव्य पार पाडून इतर मतदारांकरिता आदर्श निर्माण केला आहे. गृहमतदान प्रक्रियेमुळे ज्येष्ठ नागरिक आणि दिव्यांग मतदारांसाठी मतदान पूर्णतः अडचणमुक्त आणि सुरळीत झाले आहे. 153- दहिसर विधानसभा मतदारसंघात गृह मतदानाकरिता एकूण 68 नोंदणीकृत पात्र मतदार आहेत. यापैकी एकूण ६५ नोंदणीकृत पात्र मतदारांनी आज त्यांचा मतदानाचा हक्क बजावला.

लोकसभेच्या सार्वत्रिक निवडणुकीसाठी मुंबई उपनगर जिल्ह्यात समाविष्ट 26- मुंबई उत्तर मतदारसंघात समाविष्ट विधानसभेच्या 153-दहिसर मतदारसंघात गृहमतदानासाठी 85 वर्षांवरील मतदार आणि दिव्यांग मतदारांनी नोंदणी केली होती. त्यातील आज जे मतदार मतदान करू शकले नाहीत, ते 16 मे 2024 रोजी मतदान करू शकणार आहेत.

लोकसभेच्या सार्वत्रिक निवडणुकीत सर्वसमावेशकतेला चालना देण्याच्या उद्देशाने भारत निवडणूक आयोगाच्या महत्वपूर्ण उपक्रमानुसार, १५३ दहिसर विधानसभा मतदारसंघामध्ये ८५ वर्षे आणि त्याहून अधिक वयाच्या ज्येष्ठ नागरिकांसाठी  व दिव्यांगांसाठी घरगुती मतदान यशस्वीरित्या पार पडले. या उपक्रमाच्या माध्यमातून प्रत्येक पात्र मतदाराला गतिशीलतेच्या समस्या किंवा वयाबाबतच्या आव्हानांमुळे निर्माण होणाऱ्या अडथळ्यांना पार करून त्यांच्या लोकशाही अधिकाराचा वापर करता येईल हे निश्चित करण्याचा हा प्रयत्न आहे.

लोकसंख्येच्या महत्त्वपूर्ण भागासाठी निवडणुकीतील सहभाग अधिक सुलभ, सर्वसमावेशक आणि न्याय बनणार आहे. जिल्हा निवडणूक प्रशासन, 26- मुंबई उत्तर लोकसभा मतदारसंघाचे निवडणूक निर्णय अधिकारी पंकज देवरे यांच्या मार्गदर्शनाखाली सहायक निवडणूक निर्णय अधिकारी प्रशांत सूर्यवंशी, सहायक मतदार नोंदणी अधिकारी अतुल सावे, दहिसरचे नायब तहसीलदार बालाजी फोले यांनी ही गृहमतदान प्रक्रिया पार पाडण्यासाठी नियोजन केले.

मतदार आणि कुटुंबियांची भेट घेऊन त्यांच्या सोयीप्रमाणे आणि वेळेप्रमाणे प्रशासनाने नियोजन करुन ही गृहमतदान प्रक्रिया पार पाडली. क्षेत्रीय अधिकारी दिनेश सावंत, मतदान अधिकारी सुभाष डुबे, सहायक मतदान अधिकारी आनंद कोळेकर यांच्यासह गिरीश खानविलकर आणि केतन गुजर यांनी प्रत्यक्षपणे संबंधित मतदारांच्या घरी जाऊन ही मतदान प्रक्रिया यशस्वीपणे पार पाडली.

०००

दीपक चव्हाण/विसंअ/

मुंबई दि. १३ : लोकसभेच्या सार्वत्रिक निवडणुकीसाठी मुंबई उपनगर जिल्ह्यात समाविष्ट 27- मुंबई उत्तर-पश्चिम मतदारसंघात प्रत्येक मतदारापर्यंत मतदार चिठ्ठी पोहोचविण्यासाठी अभियान राबविण्यात येत आहे. 19 मे 2024 पूर्वी सर्व मतदारांपर्यंत मतदार चिठ्ठी पोहोचविण्यात येईल, अशी माहिती निवडणूक निर्णय अधिकारी वंदना सुर्यवंशी यांनी दिली.

लोकसभेच्या निवडणुकीसाठी मुंबई उपनगर जिल्ह्यात चार मतदारसंघांचा समावेश आहे. त्यासाठी 20 मे 2024 रोजी सकाळी सात ते सायंकाळी सहा या कालावधीत मतदान होणार आहे. 27- मुंबई उत्तर- पश्चिम मतदारसंघात विधानसभेचे 158- जोगेश्वरी पूर्व, 159- दिंडोशी, 163- गोरेगाव, 164- वर्सोवा, 165- अंधेरी पश्चिम, 166- अंधेरी पूर्व विधानसभा मतदारसंघ समाविष्ट आहेत. मुंबई उपनगर जिल्ह्यातील अधिकाधिक मतदारांनी आपल्या मतदानाचा हक्क बजवावा म्हणून जिल्हाधिकारी तथा जिल्हा निवडणूक अधिकारी राजेंद्र क्षीरसागर यांच्या मार्गदर्शनाखाली विविध उपक्रम राबविण्यात येत आहेत. या उपक्रमाचा एक भाग म्हणून ‘स्वीप’ समितीच्या माध्यमातून जनजागृतीचे उपक्रम राबविण्यात येत आहेत. याबरोबरच प्रत्येक मतदाराला त्याचे मतदार यादीतील भाग, अनुक्रमांक, मतदान केंद्राचे नाव आणि ठिकाण याविषयीची माहिती व्हावी म्हणून मतदान केंद्रस्तरीय अधिकाऱ्यांच्या (BLO) माध्यमातून प्रत्येक मतदारापर्यंत मतदार चिठ्ठी (Voter Slips) पोहोचविण्यात येत आहेत.

विधानसभेच्या जोगेश्वरी पूर्व मतदारसंघात 1 लाख 8 हजार 201, दिंडोशी मतदारसंघात 1 लाख 93 हजार 796, गोरेगाव मतदारसंघात 1 लाख 24 हजार 277, अंधेरी पश्चिम मतदारसंघात 1 लाख 37 हजार 227 त्याबरोबरच अंधेरी पूर्व, वर्सोवा मतदारसंघात जवळपास प्रत्येक मतदारांपर्यंत मतदार चिठ्ठी पोहोचविण्याचा प्रयत्न सुरू आहे. तसेच मतदानापूर्वी प्रत्येक मतदारापर्यंत मतदार चिठ्ठी पोहोचलेली असेल. तसेच मतदानाच्या दिवशी बीएलओ मतदारांच्या सहकार्यासाठी मतदान केंद्रांजवळ थांबतील. ते तेथे मतदारांना मार्गदर्शन करतील, असेही श्रीमती सुर्यवंशी यांनी सांगितले आहे.

०००

दीपक चव्हाण/विसंअ/

मुंबई, दि. १३ : मुंबई शहर जिल्ह्यातील ३०-मुंबई दक्षिण मध्य व ३१-मुंबई दक्षिण लोकसभा मतदारसंघात निवडणूक कामकाजासाठी कार्यरत भारत निवडणूक आयोगाने अधिसूचित केलेले अत्यावश्यक सेवेतील कर्मचारी (पोलीस व इतर) यांच्यासाठी १४ मे ते १६ मे, २०२४ या तीन दिवसांच्या कालावधीत टपाली मतपत्रिकेद्वारे मतदान करण्याची सुविधा संबंधित निवडणूक निर्णय अधिकारी यांनी उपलब्ध करून दिली आहे.

तसेच, निवडणूक कर्तव्यावर असलेल्या कर्मचाऱ्यांसाठी १७ मे ते १९ मे, २०२४ या कालावधीत अतिरिक्त सुविधा केंद्रावर टपाली मतपत्रिकेद्वारे मतदानाची सुविधा उपलब्ध करून देण्यात आली आहे.

३०-मुंबई दक्षिण मध्य लोकसभा मतदारसंघ

३०-मुंबई दक्षिण मध्य लोकसभा मतदारसंघाच्या अधिनस्त येणाऱ्या अत्यावश्यक सेवेतील ज्यामध्ये पोलीस व इतर कर्मचाऱ्यांचा समावेश आहे, अशा मतदारांना १४, १५ व १६ मे, २०२४ रोजी मतदानासाठी चेंबूर एज्युकेशन सोसायटी, प्राथमिक व पूर्व प्राथमिक शाळा, संगणक कक्षाशेजारी, रूम नंबर १ व‌ २, आर. सी. मार्ग, मातोश्री रमाबाई आंबेडकर प्रसूतीगृह, चेंबूर नाका, मुंबई येथे दोन टपाली मतदान केंद्रांवर मतदानाची सुविधा उपलब्ध असणार आहे. तसेच ३०-मुंबई दक्षिण मध्य लोकसभा मतदारसंघातील निवडणूक कर्तव्यावर असलेले कर्मचारी यांच्यासाठी टपाली मतपत्रिकेद्वारे मतदानाची सुविधा निवडणूक निर्णय अधिकारी स्तरीय मतदान सुविधा केंद्र याच ठिकाणी १७, १८ व १९ मे, २०२४ रोजी सकाळी नऊ ते सायंकाळी पाच वाजेपर्यंत उपलब्ध करून देण्यात आली आहे.

३१- मुंबई दक्षिण लोकसभा मतदारसंघ

३१-मुंबई दक्षिण लोकसभा मतदारसंघांमध्ये अत्यावश्यक सेवेतील कर्मचारी (पोलीस व इतर) यांच्यासाठी अधीक्षक, राज्य उत्पादन शुल्क, दुसरा मजला, जुने जकात घर, शहीद भगतसिंग मार्ग, फोर्ट, मुंबई यांच्या कार्यालयात टपाली मतदान केंद्र उभारण्यात आले आहे. हे मतदान केंद्र १४ मे, ते १६ मे, २०२४ या तीन दिवसांच्या कालावधीत सकाळी नऊ ते सायंकाळी पाच वाजेपर्यंत कार्यरत राहणार आहे.

३१-मुंबई दक्षिण लोकसभा मतदारसंघात निवडणूक कामकाजासाठी कार्यरत अधिकारी-कर्मचारी यांना १७ मे, ते १९ मे, २०२४ या कालावधीत अधीक्षक, राज्य उत्पादन शुल्क, दुसरा मजला, जुने जकात घर, शहीद भगतसिंग मार्ग, फोर्ट, मुंबई यांच्या कार्यालयात उभारण्यात येणाऱ्या अतिरिक्त सुविधा केंद्रात टपाली मतपत्रिकेद्वारे मतदान करता येणार आहे. या संपूर्ण टपाली मतदान प्रक्रियेचे छायाचित्रण केले जाणार आहे.

भारत निवडणूक आयोगाने अधिसूचित केलेल्या अत्यावश्यक सेवेतील कर्मचारी (पोलीस व इतर) निवडणूक कर्तव्यावर असलेले कर्मचारी यांच्यासाठी टपाली मतदान करण्याची सुविधा उपलब्ध असणार आहे. टपाली मतदानाद्वारे मतदानाचा हक्क बजावण्यासाठी संबंधित निवडणूक निर्णय अधिकारी यांच्या कार्यालयास संबंधित कर्मचारी यांचा नमुना १२-ड अर्ज प्राप्त होणे आवश्यक होते.

निवडणूक लढविणारे उमेदवार व त्यांचे अधिकृत प्रतिनिधी हे टपाली मतदान केंद्रास भेट देऊ शकतात. तसेच त्यांनी आपले मतदान प्रतिनिधी या ठिकाणी उपस्थित ठेवण्याचे आवाहन संबंधित निवडणूक निर्णय अधिकारी यांनी केले आहे.

०००

शैलजा पाटील/विसंअ/

मुंबई, दि. १३ : लोकसभा निवडणुकीसाठी मुंबई शहर जिल्हा निवडणूक प्रशासनाने दिव्यांग व वयोवृद्ध मतदारांना मतदानाच्या दिवशी मतदान केंद्रावर जाण्याकरिता सुविधा उपलब्ध करून दिली आहे. ही सुविधा मिळविण्यासाठी आवश्यक असलेली मागणी सक्षम ॲपवर नोंदवावी, असे आवाहन मुंबई शहर जिल्हाधिकारी तथा जिल्हा निवडणूक अधिकारी संजय यादव यांनी केले आहे.

ॲपवर नोंदणी केलेल्या दिव्यांग व वयोवृद्ध मतदारांना संबधित सुविधा पुरविणाऱ्या शासकीय व स्थान निश्चिती यंत्रणेला दिव्यांग व वयोवृध्द मतदारांच्या मागणीनुसार आवश्यक मदत म्हणजेच गरजेनुसार वाहतूक व्यवस्था, व्हीलचेअर, सहाय्यक पोहोचविण्याची व्यवस्था केली जाणार आहे, असे श्री. यादव यांनी सांगितले. मतदानाच्या दिवसापर्यंत सक्षम ॲपवर दिव्यांग व वयोवृद्ध मतदारांना मागणी नोंदविता येणार आहे. सक्षम मोबाईल ॲपवर नोंदणी न करू शकलेल्या काही दिव्यांग व वयोवृद्ध मतदारांच्या घरी प्रत्यक्ष भेट देऊन त्यांची मागणी नोंदविण्यात येत असल्याचे श्री. यादव यांनी सांगितले.

मुंबई शहर जिल्ह्यातील मुंबई दक्षिण व मुंबई दक्षिण मध्य या दोन्ही लोकसभा मतदारसंघात २० मे, २०२४ रोजी सकाळी ७ ते सायंकाळी ६ वाजेपर्यंत मतदान होणार आहे. या पार्श्वभूमीवर मतदानासाठी प्रशासकीय यंत्रणेची जोरदार तयारी सुरू आहे.

दिव्यांग व ज्येष्ठांना ‘सक्षम’चे सहाय्य

दिव्यांग आणि वयोवृध्द मतदारांना (८५ वर्ष व त्यापेक्षा अधिक) मतदान करण्यासाठी सहाय्यभूत ठरेल, असे सक्षम मोबाईल ॲप भारत निवडणूक आयोगाने तयार केले आहे. मुंबई शहर जिल्ह्यात एकूण १० विधानसभा मतदारसंघ आहेत. त्यातील धारावी, सायन-कोळीवाडा, वडाळा, माहिम हे विधानसभा मतदारसंघ मुंबई दक्षिण मध्य लोकसभा मतदारसंघास जोडलेले आहेत. तर मुंबई दक्षिण लोकसभा मतदारसंघास वरळी, शिवडी, भायखळा, मलबार हिल, मुंबादेवी, कुलाबा हे विधानसभा मतदारसंघ जोडलेले आहेत.

हेल्पलाईन व व्हिडीओ कॉल सुविधा

मुंबई शहर जिल्हाधिकारी कार्यालयातील निवडणूक विभागाकडून १९५० हा हेल्पलाईन क्रमांक उपलब्ध करण्यात आला असून ०२२-२४१८३१४४ / ७०३९२९७१९७ हे दूरध्वनी व भ्रमणध्वनी क्रमांक संपर्कासाठी उपलब्ध करुन देण्यात आलेले आहेत. या भ्रमणध्वनी क्रमांकावर कर्णबधीर मतदारांसाठी सांकेतिक भाषेत संवाद साधण्यासाठी व्हिडिओ कॉल सुविधाही उपलब्ध करण्यात आलेली आहे, अशी माहिती सामाजिक न्याय विभागातील दिव्यांग मतदार सुविधेसाठीचे नोडल अधिकारी सुनिता मते यांनी दिली.

मतदान केंद्रांवरही सुविधा

भारत निवडणूक आयोग यांच्या निर्देशानुसार मुंबई शहर जिल्ह्यातील मतदान केंद्रांवरही दिव्यांगांना मतदान करणे सुलभ व्हावे, यासाठी विशेष व्यवस्था केली जात आहे. वयोवृद्ध व दिव्यांग मतदारांसाठी स्वतंत्र रांगा, रांगांमध्ये बसण्यासाठी खुर्च्यांची व्यवस्था आवश्यकतेनुसार व्हिलचेअर, सहाय्यक स्वयंसेवक विद्यार्थी यांचा समावेश असणार आहे.

मेडिकल किट, माहितीचे फलक, कर्णबधिरांसाठी सांकेतिक भाषेत संवाद साधणारे स्वयंसेवक, दृश्य  माहिती, ब्रेललिपीतील सूचना आदी सुविधा देण्यात येणार आहेत. अंध मतदारांना ब्रेललिपीतील मतदार स्लिपचे वाटप करण्यात आले आहे.  तसेच सर्व मतदान केंद्रावर अंध मतदारांकरीता ब्रेल लिपीतील डमी मतदानपत्रिका उपलब्ध करुन देण्यात येणार आहे. दिव्यांग मतदार/वृद्ध मतदार व त्यांच्या सहाय्यकास मतदान केंद्रावर ने-आण करण्याकरिता व्हिलचेअर फ्रेंडली वाहन उपलब्ध करुन देण्यात येणार आहे.

०००

शैलजा पाटील/विसंअ/

मुंबई, दि. १३ : लोकसभेच्या सार्वत्रिक निवडणुकीसाठी २८ – मुंबई उत्तर पूर्व लोकसभा मतदारसंघात २० मे २०२४ रोजी मतदानाची प्रक्रिया पार पडणार आहे. या मतदारसंघात आतापर्यंत २३०९ मतदारांनी टपाली पद्धतीने मतदान केले आहे. तसेच, ज्येष्ठ ३३ तर दिव्यांग २ मतदारांनी असे एकूण ३५ मतदारांनी गृहमतदान केले असल्याची माहिती, निवडणूक निर्णय अधिकारी डॉ. दादाराव दातकर यांनी दिली.

२८- मुंबई उत्तर पूर्व लोकसभा मतदारसंघातील ज्येष्ठ आणि दिव्यांग मतदारांसाठी गृहमतदान घेण्यात आले. १९० पैकी ३३ ज्येष्ठ नागरिक आणि दोन दिव्यांग अशा ३५ मतदारांनी मतदान केले आहे, तर, २८ – मुंबई उत्तर पूर्व लोकसभा मतदारसंघात २३०९ मतदारांनी टपाली पद्धतीने मतदान केले आहे. धुळे मतदारसंघासाठी २२ मतदारांनी टपाल पद्धतीने मतदान केले. दिंडोरीसाठी १० मतदारांनी, नाशिकसाठी ३१, पालघरसाठी ३९, भिवंडीसाठी २४२, कल्याणसाठी २३७, ठाणेसाठी २१०, मुंबई उत्तरसाठी – ७३, मुंबई उत्तर पश्चिमसाठी – ७५, मुंबई उत्तर पूर्वसाठी – ८१६, मुंबई उत्तर मध्यसाठी – १५२, मुंबई दक्षिण मध्यसाठी – ३०६, मुंबई दक्षिणसाठी ९६ असे एकूण २३०९ मतदारांनी मतदान केले आहे.

०००

मुंबई, दि. १३ : लोकसभा सार्वत्रिक निवडणूक 2024 साठी भारत निवडणूक आयोगाने दिलेल्या सूचनेनुसार केंद्रीय निवडणूक निरीक्षक (खर्च)  सुनील यादव (आयआरएस) हे तीन वेळेस 28 – मुंबई उत्तर पूर्व लोकसभा मतदार संघातील उमेदवारांच्या खर्चाच्या नोंदींची तपासणी करणार आहेत. मतदारसंघातील उमेदवारांच्या खर्च नोंदवहीची प्रथम तपासणी 9 मे 2024 रोजी करण्यात आली. या तपासणीत नॅशनल पीपल्स पार्टीचे संजय बंडू पाटील आणि अपक्ष उमेदवार संजय निवृत्ती पाटील हे उपस्थित राहिले नाहीत. तसेच त्यांना सूचना देऊनही ते दुसऱ्या वेळेस उपस्थित न राहिल्यामुळे त्यांच्याविरुद्ध भारतीय दंड संहिता 1860 च्या कलम 171 (आय) मधील तरतुदीनुसार या दोन्ही उमेदवारांविरुद्ध फौजदारी गुन्हा दाखल केला असल्याची माहिती निवडणूक निर्णय अधिकारी डॉ. दादाराव दातकर यांनी दिली आहे.

28 – मुंबई उत्तर पूर्व लोकसभा मतदारसंघासाठी केंद्रीय निवडणूक निरीक्षक (खर्च) म्हणून सुनील यादव (आयआरएस) यांची नियुक्ती केली आहे.  केंद्रीय निवडणूक निरीक्षक (खर्च) श्री. यादव  यांनी दि. ९ मे, २०२४ रोजी उमेदवारांच्या निवडणूक खर्च नोंदवह्यांची प्रथम तपासणी केली. त्यावेळी २८ मुंबई उत्तर पूर्व लोकसभा मतदार संघाचे उमेदवार किंवा त्यांचे निवडणूक खर्च प्रतिनिधी यांनी निवडणूक खर्च लेखा तपासणीस खर्च नोंदवहीसह उपस्थित राहणे अपेक्षित होते.

तथापि, सदर तपासणीस नॅशनल पीपल्स पार्टीचे  संजय बंडू पाटील  आणि  संजय निवृत्ती पाटील, अपक्ष हे उमेदवार उपस्थित राहिले नाहीत. तसेच त्यांच्या प्रतिनिधीनेही निवडणूक खर्च नोंदवही तपासणीसाठी सादर केली नाही.

तपासणीसाठी उपस्थित राहण्यास सर्व उमेदवारांना लेखी कळविण्यात आले होते. मात्र हे दोन उमेदवार  9 मे रोजी उपस्थित न राहिल्याने,  दि. ११ मे, २०२४ रोजी दुपारी १२ वाजेपर्यंत पुनश्च उपस्थित राहण्याची एक संधी देण्यात आली होती. तथापि, नॅशनल पीपल्स पार्टीचे संजय बंडू पाटील,  आणि अपक्ष उमेदवार संजय निवृत्ती पाटील यांनी  स्वतः किंवा आपल्या खर्च प्रतिनिधीमार्फत निवडणूक खर्च नोंदवही तपासणीसाठी सादर केली नाही.

लोकप्रतिनिधीत्व अधिनियम, १९५१ मधील कलम ७७ (१) अन्वये निवडणूक लढविणाऱ्या प्रत्येक उमेदवाराने स्वतः किंवा त्याच्या खर्च प्रतिनिधीने, निवडणुकीसाठी नामनिर्देशन पत्र दाखल केल्याच्या दिनांकापासून ते निकाल जाहीर झाल्याचा दिनांक हे दोन्ही दिवस धरून, होणाऱ्या कालावधीच्या दरम्यान उमेदवाराने किंवा त्याच्या खर्च प्रतिनिधीने स्वतः केलेल्या किंवा त्यांनी प्राधिकृत केल्यानुसार झालेल्या निवडणूक खर्चाचा स्वतंत्र व अचूक लेखा विहित नमुन्यात ठेवणे बंधनकारक आहे.

तरी या दोन्ही उमेदवारांनी लोकप्रतिनिधीत्व अधिनियम, १९५१ मधील कलम ७७ (१) मधील तरतूदीचे उल्लंघन केले आहे. त्यामुळे भारतीय दंड संहिता, १८६० च्या कलम १७१ (आय) मधील तरतुदीनुसार या दोन्ही उमेदवारांविरुद्ध कारवाई करण्यात आली आहे. त्यांच्यावर फौजदारी गुन्हा दाखल केला असल्याचेही निवडणूक निर्णय अधिकारी डॉ. दातकर यांनी कळविले आहे.

०००

श्रद्धा मेश्राम/ससं/

मुंबई, दि.१३ : राज्यातील लोकसभा निवडणुकीच्या चौथ्या टप्प्यातील ११ मतदारसंघात आज सकाळी ७ वाजेपासून मतदानाला सूरुवात झाली असून सायंकाळी ५ वाजेपर्यंत सरासरी सुमारे ५२.४९ टक्के मतदान झाले आहे.

चौथ्या टप्प्यातील एकूण ११ लोकसभा मतदारसंघनिहाय टक्केवारी पुढीलप्रमाणे

➡️ नंदुरबार –  ६०.६० टक्के

➡️ जळगाव –  ५१.९८ टक्के

➡️ रावेर – ५५.३६ टक्के

➡️ जालना – ५८.८५ टक्के

➡️ औरंगाबाद  – ५४.०२  टक्के

➡️ मावळ – ४६.०३ टक्के

➡️ पुणे – ४४.९० टक्के

➡️ शिरूर –  ४३.८९ टक्के

➡️ अहमदनगर-  ५३.२७ टक्के

➡️ शिर्डी – ५२.२७ टक्के

➡️ बीड –  ५८.२१ टक्के

०००

छत्रपती संभाजीनगर, दि.१३(जिमाका): लोकसभा निवडणूक २०२४ साठी मतदार मतदानाच्या हक्कापासून वंचित राहू नये यासाठी जिल्हा प्रशासनाने विविध उपक्रम राबविले. त्यात लक्षणीय आणि अभिनव उपक्रम ठरला तो मतदान केंद्रांवर पाळणाघरे स्थापित करण्याचा. हा उपक्रम अत्यंत उपयुक्त ठरला. अनेक मातांनी आपलं कडेवरचं बाळ पाळणाघरात सांभाळायला देऊन आपले लोकशाहीप्रति कर्तव्य बजावले.

‘जिच्या हाती पाळण्याची दोरी ती जगाते उद्धारी’, ही मातेची महती. आज छत्रपती संभाजीनगर जिल्ह्यातील मातांनी आपली बालके प्रशासनाने उभारलेल्या पाळणाघरात सोपवून आपला मतदानाचा हक्क बजावला, आणि ही मतदार माऊली लोकशाहीची उद्धारकर्ती झाली.

महिला मतदारांचा मतदानाचा टक्का वाढावा यासाठी जिल्हा प्रशासनाने अनेक उपक्रम राबविले. त्यात हा उपक्रम सर्वात उपयुक्त आणि लक्षणीय ठरला. मतदान केंद्रांवर पाळणाघरे स्थापित करण्याबाबत जिल्हाधिकारी दिलीप स्वामी यांनी यंत्रणेला निर्देश दिले. त्यानुसार महिला बालकल्याण विभागामार्फत कार्यवाही करुन अंमलबजावणी करण्यात आली. एखादी माता मतदानासाठी आली असता तितकावेळ तिच्या कडेवरील बाळाचा चांगल्या पद्धतीने सांभाळ होणे अपेक्षित आहे. किंवा मतदार लहान मुलासह मतदानाला आल्यास त्या मतदाराला मतदान करण्यासाठी जितका वेळ लागेल तितका वेळ त्या बाळाला सांभाळण्यासाठी पाळणा घर सुविधा देण्यामागचा विचार होता.

प्रत्येक पाळणाघर एका अंगणवाडी ताईंकडे सोपविण्यात आले. या ठिकाणी येणाऱ्या बालकाला तिथं अनेक खेळणी, झोपाळ्यात असलेल्या बालकांसाठी प्रत्यक्ष पाळणे, प्यायचे पाणी, बेबी फुड आदींची सज्जता होती. जिल्ह्यात शहरी भागात १८० तर ग्रामिण भागात  १६५० पाळणाघरे सज्ज होते. ज्या इमारतीत अनेक मतदान केंद्र असतील तेथे त्या इमारतीत एक पाळणा घर याप्रमाणे नियोजन होते. पाळणाघराचा लाभ हा स्तनदा माता, लहान बालके असणाऱ्या मातांना खूप झाला.  त्यांनी आपली बालके पाळणाघरात सोपविली. तेथली खेळणी व आकर्षकता पाहून बालकेही तिथे रमली. बागडली. त्यांच्या किलबिलाटाने पाळणाघर गजबजले. लोकशाहीसाठी आपले मतदानाचे कर्तव्य बजावणाऱ्या मातांना ही एक चांगली सुविधा होती. त्यामुळे महिलांचा मतदानातील सहभाग होतांना दिसत होता.

०००

मुंबई, दि. १३ : लोकसभेच्या सार्वत्रिक निवडणुकीसाठी मुंबई उपनगर जिल्ह्यात 20 मे 2024 रोजी सकाळी 7 ते सायंकाळी 6 या वेळेत मतदान होणार आहे. या मतदानासाठी जिल्ह्यातील चारही लोकसभा मतदारसंघातील 26 विधानसभा मतदारसंघात महिला, युवक आणि दिव्यांग कर्मचारी संचलित प्रत्येकी एक मतदान केंद्र असणार आहे. मतदान केंद्र उभारणीची सर्व तयारी आणि नियोजन पूर्ण करण्यात आले आहे, अशी माहिती जिल्हा निवडणूक यंत्रणेमार्फत देण्यात आली आहे.

मुंबई उपनगर जिल्ह्यात विधानसभेचे एकूण 26 मतदारसंघ आहेत. 26- मुंबई उत्तर, 27- मुंबई उत्तर पश्चिम, 28- मुंबई उत्तर पूर्व, 29- मुंबई उत्तर मध्य या लोकसभा मतदारसंघात समाविष्ट आहेत, तर चेंबूर आणि अणुशक्तीनगर या दोन मतदारसंघांचा समावेश मुंबई शहर जिल्ह्यांतर्गत येणाऱ्या लोकसभा मतदारसंघात आहे. या चारही मतदारसंघात सोमवार 20 मे 2024 रोजी मतदान होणार आहे. या पार्श्वभूमीवर जिल्हाधिकारी तथा जिल्हा निवडणूक अधिकारी राजेंद्र क्षीरसागर यांच्या नेतृत्वाखाली जिल्हा प्रशासनाने जय्यत तयारी पूर्ण केली आहे.

मुंबई उपनगर जिल्ह्यात 7,384 एवढ्या मतदान केंद्रांचा समावेश आहे. या मतदान केंद्रांवर मतदारांना मूलभूत सोयीसुविधा पुरविण्यात येणार आहेत. तसेच विधानसभेच्या प्रत्येक मतदारसंघात प्रत्येकी एका मतदान केंद्रांचे संचलन महिला, तरुण आणि दिव्यांग अधिकारी व कर्मचारी करणार असून त्याचे संपूर्ण नियोजन करण्यात आले आहे. मुंबई उपनगर जिल्ह्यात महिला अधिकारी व कर्मचारी संचलित एकूण 26, तरुण अधिकारी व कर्मचारी संचलित 26, तर दिव्यांग अधिकारी व कर्मचारी (सक्षम केंद्र) संचलित एकूण 26 मतदान केंद्र असतील, असेही जिल्हा प्रशासनातर्फे सांगण्यात आले आहे.

०००