ठाणे, दि. २० (जिमाका) – ठाणे जिल्ह्यातील २३ भिंवडी, २४ कल्याण, २५ ठाणे लोकसभा मतदारसंघातील एकूण १८ विधानसभा मतदारसंघाच्या विविध मतदान केंद्रांवर २० मे २०२४ रोजी सकाळी ७ ते सायंकाळी ६ वाजेपर्यंत मतदान होणार आहे. मतदारांना आपले राष्ट्रीय कर्तव्य पार पाडताना कोणतीही असुविधा होऊ नये, यासाठी जिल्हा प्रशासन व निवडणूक प्रशासनाने प्रत्येक मतदान केंद्रांवर विविध सुविधा उपलब्ध करून दिल्या आहेत. या सुविधांचा लाभ घेऊन नागरिकांनी मोठ्या प्रमाणात मतदान करावे, असे आवाहन जिल्हाधिकारी तथा जिल्हा निवडणूक अधिकारी अशोक शिनगारे व उपजिल्हा निवडणूक अधिकारी अर्चना कदम यांनी केले आहे.

जिल्ह्यातील तीनही मतदारसंघात मिळून 6604 मतदान केंद्रे आहेत. दिव्यांग, ज्येष्ठ नागरिकांना सोईचे व्हावे, यासाठी सर्वच मतदान केंद्रे तळमजल्यावर आणली आहेत. तसेच ज्येष्ठ नागरिक व दिव्यांगासाठी रॅम्प, पिण्याच्या पाण्याची सुविधा, स्वच्छतागृह, फर्निचर व्यवस्था, पुरेशी प्रकाश व्यवस्था, दिशादर्शक फलक, मतदान केंद्रावर सावली, पाळणाघर, मार्गदर्शक फलक, मतदान सहाय्यता केंद्र, प्रथमोपचार पेटी, रांगेचे व्यवस्थापन आदी व्यवस्था जिल्हाधिकारी तथा जिल्हा निवडणुक अधिकारी अशोक शिनगारे यांच्या मार्गदर्शनाखाली निवडणूक विभागाकडून करण्यात आली आहे.

मतदान केंद्र असलेल्या ठिकाणी १:१२ उतार असलेला रॅम्प उभारण्यात आले आहे, जेणेकरुन जेष्ठ नागरिक व दिव्यांग मतदारांना मतदान करणे सोयीचे होईल. मतदान केंद्रावर नळाचे शुध्द पाणी उपलब्ध होण्यासाठी पिण्याच्या पाण्याची सुविधेची व्यवस्था करण्यात आली आहे. मतदानाच्या दिवशी प्रत्येक मतदान केंद्रावर किमान 100 लिटर थंड पिण्याचे पाणी व पाणी पिण्यास पर्यावरण पूरक ग्लास ठेवण्यात येणार असून यासाठी एका स्वयंसेवकाची नेमणूक केली आहे.

मतदान केंद्रावर महिला मतदार व पुरुष मतदार यांच्यासाठी स्वतंत्र, पक्के, स्वच्छ व पुरेशा  पाण्याची सोय असलेले स्वच्छतागृह उपलब्ध असणार आहेत. जेथे पक्क्या स्वरुपाचे स्वच्छतागृह उपलब्ध नसेल तेथे मोबाईल टॉयलेट व्हॅन संबंधित महानगरपालिका / नगरपालिका /नगरपरिषद यांच्याकडून उपलब्ध करुन घेण्याचे नियोजन करण्यात आले आहे. स्वच्छतागृहाची स्वच्छता ठेवण्यासाठी मतदानाच्या दिवशी स्वच्छता कर्मचारी याठिकाणी उपस्थित असणार आहेत.

उमेदवार प्रतिनिधींसाठी त्याचबरोबर निवडणुकीचे कामकाज करणाऱ्या कर्मचारी वर्गासाठी पुरेशा प्रमाणात टेबल, खुर्च्या व रांगेतील उभा असणाऱ्या मतदारांना बसण्यासाठी मतदान केंद्रावर पुरेसे खुर्च्या / बाक उपलब्ध करून देण्याची व्यवस्था सर्व ठिकाणी करण्यात आली आहे. मतदान केंद्रावर पुरेशी प्रकाश व्यवस्था व पंखे उपलब्ध केले जाणार आहे तसेच मतदान केंद्रावरील वीज कनेक्शन सुरु असल्याबाबत खात्री करण्यात आली आहे.

मतदारांना मतदान केंद्र सापडावे, यासाठी किमान 4 दिशादर्शक फलक लावण्यात आले आहेत. हे दिशादर्शक फलक संबंधित मतदान केंद्रात नोंदणी असलेल्या मतदार राहत असलेल्या ठिकाणी प्रमुख चौकात लावण्यात आले आहेत. मतदान केंद्रावर मतदान केंद्राच्या ठिकाणाचा ले आऊट व सुविधा जसे स्वच्छतागृह, पिण्याचे पाणी, मतदान सहाय्यता केंद्र असे फलक लावण्यात आले आहेत.

मतदान केंद्रावर रांगेतील उभ्या मतदारांना ऊन लागू नये यासाठी मंडप उभारण्यात आले आहेत. मतदान केंद्राच्या ठिकाणी पाळणाघर असावे या उद्देशाने मतदान केंद्रावर मुलांची काळजी घेण्यासाठी प्रशिक्षित कर्मचारी व स्वयंसेवक यांची नेमणूक करण्यात आली आहे.

मतदारांच्या माहितीसाठी मतदार सहाय्यता केंद्र

प्रत्येक मतदान केंद्रावर मतदारांचा यादीतील नाव, भाग क्रमांक, अनुक्रमांक तसेच कोणते मतदान केंद्र आहे हे कळावे यासाठी बीएलओ व त्याची टिम मतदान केंद्रावर उपस्थित राहणार आहेत. मतदार सहाय्यता केंद्रातही पुरेशा प्रमाणात सुविधा देण्यात आल्या आहेत.

मतदान केंद्रावर पुरेश्या औषध साठ्यासह आरोग्य कर्मचारी उपस्थित राहणार आहेत. सध्या उष्णतेची लाट असल्याने पुरेसे ओआरएस (ORS) व ग्लुकोज (Glucose) पावडर याठिकाणी उपलब्ध असणार आहे. तसेच हिट स्ट्रोक (Heat stroke) टाळण्यासाठी काय करावे, याचे माहितीपत्रक सर्व निवडणूक विषयक कर्मचारी यांना देण्यात येणार आहे. सेक्टर ऑफिसर सोबतही एक आरोग्य कर्मचारी, प्रथमोपचार पेटी (Medical Kit) सह उपलब्ध ठेवण्यात येणार आहे. त्याचप्रमाणे तालुक्यात प्रत्येक एक तासांनी प्रत्येक मतदार केंद्रावर पोहचेल, अश्या पध्दतीने एक वैद्यकीय कर्मचारी उपलब्ध ठेवण्यात येणार आहे.

मतदारांना सोबत डोक्यावर ओला रुमाल, कपडा आणण्यासाठी व शक्यतो लहान मुलांना सोबत घेऊन येऊ नये, असे आवाहन जिल्हा प्रशासनामार्फत करण्यात येत आहे.

ठाणे,दि. १९ (जिमाका) :  ठाणे जिल्ह्यात होणाऱ्या लोकसभा सार्वत्रिक निवडणूकीच्या मतदानासाठी 25- ठाणे लोकसभा मतदारसंघाची मतदान प्रक्रिया सुरळीत व शांततेत पार पाडण्यासाठी संपूर्ण यंत्रणा सज्ज झाली आहे. जास्तीत जास्त  नागरिकांनी मतदान करावे असे  आवाहन जिल्हा प्रशासनातर्फे करण्यात आले आहे. 25 ठाणे लोकसभा मतदारसंघात सखी, दिव्यांग आणि युवा ही नाविन्यपूर्ण मतदान केंद्रे तयार करण्यात आली आहेत

सखी मतदान केंद्रे : 145 मीरा भाईंदर विधानसभा मतदारसंघातील मतदान केंद्र क्र. 436 (रॉयल कॉलेज), 146 ओवळा माजिवडा विधानसभा मतदारसंघातील मतदान केंद्र क्र. 439 (श्रीमती सुलोचनादेवी सिंघानिया हायस्कूल, पोखरण रोड नं. 2 तळमजला), 147 कोपरी पाचपाखाडी विधानसभा मतदारसंघातील मतदान केंद्र क्र. 199 (नेपच्यून एलिमेंट आयटी पार्क, ओपन स्पेस पार्टीशन 1 रोड नं. 22 वागळे इस्टेट, ठाणे), 148 ठाणे विधानसभा मतदारसंघातील मतदान केंद्र क्र. 265 (एनकेटी महाविद्यालय, खारकर आळी, तळमजला सभागृह ठाणे), 150 ऐरोली विधानसभा मतदारसंघातील मतदान केंद्र क्र. 152 (सरस्वती हायस्कूल, तळमजला, सेक्टर 5, ऐरोली), 151 बेलापूर विधानसभा मतदारसंघातील मतदान केंद्र क्र. 124 (सेव्हनडे ॲडव्हेटेन्ज हायर सेकंडरी स्कूल,सेक्टर 8 सानपाडा) येथे सखी मतदान केंद्रे असणार आहेत.

दिव्यांग मतदान केंद्रे-  145 मीराभाईंदर विधानसभा मतदारसंघातील मतदान केंद्र क्र. 191 (बिशॉप इंटरनॅशनल स्कूल), 146 ओवळा माजिवडा विधानसभा मतदारसंघातील मतदान केंद्र क्र. 326 (टीएमसी जिद्द शाळा, तळमजला वसंतविहार, ठाणे ) 147 कोपरी पाचपाखाडी विधानसभा मतदारसंघातील मतदान केंद्र क्र. 306 (विठ्ठल रुक्मिणी सेवा संघ, कमल तलावासमोर, पार्टीशन नं 2 गांधी नगर रोड, गांधीनगर ठाणे ), 148 ठाणे विधानसभा मतदारसंघातील मतदान केंद्र क्र. 283 (सरस्वती एज्युकेशन सोसायटी हायस्कूल, तळमजला, पाचपाखाडी), 150 ऐरोली विधानसभा मतदारसंघातील मतदान केंद्र क्र. 141 (दत्ता मेघे वर्ल्ड ॲकॅडमी ग्राऊंड फ्लोअर, ऐरोली सेक्टर 16), 151 बेलापूर विधानसभा मतदारसंघातील मतदान केंद्र क्र. 205 (स्किल ॲण्ड ॲबॅलीटी बॉईज स्कूल, सेकटर 11 प्लॉट नं. 9 नेरुल नवी मुंबई) येथे ती असणार आहेत.

युवा मतदान केंद्रे  – 145 मीराभाईंदर विधानसभा मतदारसंघातील मतदान केंद्र क्र. 196 (भाईंदर सेकंडरी स्कूल, तळमजला रुम नं 1), 146 ओवळा माजिवडा विधानसभा मतदारसंघातील मतदान केंद्र क्र. 332 (शिवाई विद्यालय, शिवाई नगर, ठाणे) 147 कोपरी पाचपाखाडी विधानसभा मतदारसंघातील मतदान केंद्र क्र. 170 (ठाणे मॅन्युफॅक्चर असोसिएशन, जे.के. ऑडीटोरीयम हॉल, वागळे इस्टेट ठाणे), 148 ठाणे विधानसभा मतदारसंघातील मतदान केंद्र क्र. 353 (विद्याप्रसारक मंडळ कॉमर्स ॲन्ड आर्टस कॉलेज, बि नं 3, बांदोडकर कॉलेज ऑफ कॉमर्स, ठाणे ), 150 ऐरोली विधानसभा मतदारसंघातील मतदान केंद्र क्र. 169 (जमनाबाई जनार्दन माधवी नवी मुंबई महापालिका शाळा क्र 48 तळमजला, सेक्टर 7 दिवा गांव ऐरोली), 151 बेलापूर विधानसभा मतदारसंघातील मतदान केंद्र क्र. 28 (कर्मवीर भाऊराव पाटील महाविद्यालय, वाशी) येथे तयार करण्यातआली आहेत.

000

ठाणे, दि. १९ (जिमाका)   ठाणे जिल्ह्यातील 23 भिवंडी, 24 कल्याण व 25 ठाणे या लोकसभा मतदारसंघात एकूण सुमारे 66 लाख 78 हजार 476 मतदारांना येत्या 20 मे 2024 रोजी मतदानाचा हक्क बजावता येणार आहे. मतदानासाठी जिल्ह्यात तीनही लोकसभा मतदारसंघ मिळून एकूण 6604 मतदान केंद्रे उभारण्यात आली आहेत. आज या मतदान केंद्रामध्ये साहित्य पोचविण्याचे काम करण्यात येत आहे. नागरिकांनीही मतदार यादीत नाव तपासून आपल्या मतदान केंद्रावर जाऊन मतदान करावे, असे आवाहन जिल्हाधिकारी तथा जिल्हा निवडणूक अधिकारी अशोक शिनगारे यांनी केले आहे.

ठाणे जिल्ह्यात 23 भिवंडी, 24 कल्याण व 25 ठाणे लोकसभा मतदारसंघ आहेत. या मतदारसंघातील मतदानासाठी सर्व यंत्रणा सज्ज झाली आहे.

ठाणे जिल्ह्यातील लोकसभा मतदारसंघनिहाय व विधानसभा मतदारसंघनिहाय मतदारांची संख्या पुढील प्रमाणे –

• 23-भिवंडी लोकसभा मतदारसंघ – एकूण मतदार – 2087604 (पुरुष मतदार-1129714, महिला मतदार-957191, तृतीय पंथी मतदार-339, सेवा मतदार-360).

विधानसभा मतदारसंघ निहाय मतदारांची संख्या

• 134-भिवंडी ग्रामीण विधानसभा मतदारसंघ

एकूण मतदार – 324046 (पुरुष मतदार-168329, महिला मतदार-155638, तृतीय पंथी मतदार-11, सेवा मतदार-68).

• 135-शहापूर विधानसभा मतदारसंघ

एकूण मतदार – 279176 (पुरुष मतदार-143402, महिला मतदार-135735, तृतीय पंथी मतदार- 0, सेवा मतदार-39).

• 136-भिवंडी पश्चिम विधानसभा मतदारसंघ

एकूण मतदार – 304975 (पुरुष मतदार-176499, महिला मतदार-128338, तृतीय पंथी मतदार- 122, सेवा मतदार-16)

• 137-भिवंडी पूर्व विधानसभा मतदारसंघ

एकूण मतदार – 336124 (पुरुष मतदार-198044, महिला मतदार-137887, तृतीय पंथी मतदार- 179, सेवा मतदार-14)

• 138-कल्याण पश्चिम विधानसभा मतदारसंघ

एकूण मतदार – 400278 (पुरुष मतदार-212612, महिला मतदार-187514, तृतीय पंथी मतदार- 12, सेवा मतदार-140).

• 139-मुरबाड विधानसभा मतदारसंघ

एकूण मतदार – 443005 (पुरुष मतदार-230828, महिला मतदार-212079, तृतीय पंथी मतदार- 15, सेवा मतदार-83).

24-कल्याण लोकसभा मतदारसंघ

एकूण मतदार – 2082800 (पुरुष मतदार-1117414, महिला मतदार-964021, तृतीय पंथी मतदार-786, सेवा मतदार-579).

विधानसभा मतदारसंघ निहाय मतदारांची संख्या

• 140 – अंबरनाथ विधानसभा मतदारसंघ

एकूण मतदार – 353661 (पुरुष मतदार-189844, महिला मतदार-163654, तृतीय पंथी मतदार- 56, सेवा मतदार-107).

• 141-उल्हासनगर विधानसभा मतदारसंघ

एकूण मतदार – 257477 (पुरुष मतदार-139848, महिला मतदार-117422, तृतीय पंथी मतदार- 97, सेवा मतदार-110).

• 142-कल्याण पूर्व विधानसभा मतदारसंघ

एकूण मतदार – 299518 (पुरुष मतदार-159289, महिला मतदार-139684, तृतीय पंथी मतदार- 407, सेवा मतदार-138).

• 143-डोंबीवली विधानसभा मतदारसंघ

एकूण मतदार – 275172 (पुरुष मतदार-143196, महिला मतदार-131914, तृतीय पंथी मतदार- 0, सेवा मतदार-62).

• 144-कल्याण ग्रामीण विधानसभा मतदारसंघ

एकूण मतदार – 453221 (पुरुष मतदार-248124, महिला मतदार-204902, तृतीय पंथी मतदार- 123, सेवा मतदार-72)

• 149-मुंब्रा कळवा विधानसभा मतदारसंघ

एकूण मतदार – 443751 (पुरुष मतदार-237113, महिला मतदार-206445, तृतीय पंथी मतदार- 103, सेवा मतदार-90).

25 – ठाणे लोकसभा मतदारसंघ

एकूण मतदार – 2508072 (पुरुष मतदार-1348163, महिला मतदार-1159002, तृतीय पंथी मतदार-207, सेवा मतदार-700).

विधानसभा मतदारसंघ निहाय मतदारांची संख्या

• 145- मीरा भाईंदर विधानसभा मतदारसंघ

एकूण मतदार  – 457391 (पुरुष मतदार-242966, महिला मतदार-214389, तृतीय पंथी मतदार- 4, सेवा मतदार-32)

• 146-ओवळा माजीवाडा विधानसभा मतदारसंघ

एकूण मतदार – 509346  (पुरुष मतदार-273272, महिला मतदार-235928, तृतीय पंथी मतदार- 27, सेवा मतदार-119).

• 147-कोपरी पाचपाखाडी विधानसभा मतदारसंघ

एकूण मतदार – 328185 (पुरुष मतदार-175561, महिला मतदार-152472, तृतीय पंथी मतदार- 21, सेवा मतदार-131)

• 148-ठाणे विधानसभा मतदारसंघ

एकूण मतदार – 357684 (पुरुष मतदार-185857, महिला मतदार-171681, तृतीय पंथी मतदार- 7, सेवा मतदार-139).

• 150-ऐरोली विधानसभा मतदारसंघ

एकूण मतदार – 457611 (पुरुष मतदार-257611, महिला मतदार-199715, तृतीय पंथी मतदार- 130, सेवा मतदार-155).

• 151- बेलापूर विधानसभा मतदारसंघ

एकूण मतदार – 397855 (पुरुष मतदार-212896, महिला मतदार-184817, तृतीय पंथी मतदार- 18, सेवा मतदार-124).

००००००

धुळे, दि. १९ (जिमाका) :  निवडणूकीचा उत्सव अर्थात 18 वी लोकसभा सार्वत्रिक निवडणूक 2024 ची मतदान प्रकिया सात टप्प्यात पार पडत आहे. राज्यातील पाचव्या टप्प्यात 02-धुळे लोकसभा मतदार संघासाठी आज सोमवार, 20 मे, 2024 रोजी सकाळी 7 ते सायंकाळी 6 वाजेपर्यंत मतदान होणार आहे. सार्वत्रिक निवडणूक प्रक्रियेसाठी पोलीस बंदोबस्त व राखीव कर्मचाऱ्यांसह एकूण 17 हजार 341 मतदान कर्मचारी तैनात करण्यात आले आहेत. प्रत्येक विधानसभा क्षेत्राच्या मुख्यालयापासून रविवार सकाळी मतदान साहित्य घेवून अधिकारी, कर्मचारी त्यांना नेमून दिलेल्या मतदान केंद्रावर पोहोचले आले. आज सोमवार, दि. 20 रोजी सकाळी 7 वाजेपासून सहा विधानसभा मतदार संघात मतदान प्रक्रियेला सुरुवात होणार आहे. अशी माहिती जिल्हाधिकारी तथा जिल्हा निवडणूक निर्णय अधिकारी अभिनव गोयल यांनी आज पत्रकार परिषदेत दिली आहे.यावेळी उप जिल्हा निवडणूक अधिकारी गंगाराम तळपाडे, जिल्हा माहिती अधिकारी विलास बोडके यांचेसह विविध माध्यमांचे प्रतिनिधी उपस्थित होते.

02-धुळे लोकसभा मतदार संघात 18 व्या लोकसभेच्या सार्वत्रिक मतदानासाठी पाचव्या टप्प्यातील निवडणूक प्रकिया पार पडणार आहे. जिल्ह्यात धुळे मतदार संघात 1 हजार 969 मतदान केंद्रांवर संबधीत विधानसभा क्षेत्रनिहाय इव्हिएम, बॅलेट मशीन, व्हिव्हीपॅट, बॅटरी युनिट, मतदान कक्ष बॉक्स आदी मतदान साहित्यासह नेमून दिलेल्या एसटी बस, स्कूल बस वा अन्य नियोजित वाहनाने नियुक्त केलेल्या मतदान केंद्रांवर कर्मचारी पोहोचले आहे.

धुळे लोकसभा मतदारसंघात 1969 मतदान केंद्र

धुळे लोकसभा मतदारसंघात 1 हजार 948 मुळ मतदान केंद्र तर 21 सहाय्यकारी मतदान केंद्र असे एकूण 1 हजार 969 मतदान केंद्र आहेत. त्यात धुळे ग्रामीण 375, धुळे शहर 280, सहाय्यकारी मतदान केंद्र 8, शिंदखेडा 338, मालेगाव मध्य 343 सहाय्यकारी मतदान केंद्र 2, मालेगाव बाहृय 337, सहाय्यकारी मतदान केंद्र 6, तर बागलाण विधानसभा मतदार संघात 288 मतदान केंद्र सहाय्यकारी मतदान केंद्र 5 आहेत. या सर्व मतदान केंद्रांवर निवडणूकीसाठी नियुक्त अधिकारी, कर्मचाऱ्यांना मतदान साहित्य वितरीत करण्यात आले. 986 मतदान केंन्द्रावर वेबकॉस्टिंगची व्यवस्था करण्यात आली आहे. तसेच 13 मतदान केंद्र शॅडो मतदान केंद्र आहेत.  याठिकाणी वॉकीटॉकीची सुविधा उपलब्ध करुन देण्यात आली आहे. मतदानाच्या दिवशी 153 झोनल अधिकाऱ्यांची नियुक्ती केली असून 17 अतिरिक्त अधिकारी राखीव ठेवण्यात आले आहे.

सहा मतदारसंघात 20 लक्ष 22 हजार 61 मतदार

धुळे लोकसभा मतदार संघात एकूण 20 लक्ष 22 हजार 61 मतदार आहेत. त्यात धुळे ग्रामीण  विधानसभा मतदार संघात 2 लाख 3 हजार 939 पुरुष मतदार तर 1 लाख 89 हजार 558 महिला मतदार व 1 तृतीयपंथी तसेच 1067 सैनिक मतदार आहेत. तर धुळे शहर विधानसभा मतदार संघात 1 लाख 79 हजार 568 पुरुष मतदार तर 1 लाख 64 हजार 226 महिला मतदार व 27 तृतीयपंथी तसेच 332 सैनिक मतदार आहेत. शिंदखेडा विधानसभा मतदार संघात 1 लाख 69 हजार 648 पुरुष मतदार तर 1 लाख 62 हजार 196 महिला मतदार व 1 तृतीयपंथी तसेच 530 सैनिक मतदार आहेत. मालेगांव मध्य विधानसभा मतदारसंघात 1 लाख 57 हजार 512 पुरुष मतदार तर 1 लाख 44 हजार 871 महिला मतदार तर 8 तृतीयपंथी तसेच 75  सैनिक मतदार आहेत. मालेगांव बाहृय विधानसभा मतदारसंघात 1 लाख 89 हजार 468 पुरुष मतदार तर 1 लाख 71 हजार 339 महिला मतदार व 8 तृतीयपंथी तसेच 689 सैनिक मतदार आहेत. तर बागलाण विधानसभा मतदारसंघात 1 लाख 51 हजार 793 पुरुष मतदार तर 1 लाख 37 हजार 896 महिला मतदार व 2 तृतीयपंथी तसेच 521 सैनिक मतदार आहेत. सहाही विधानसभा मतदारसंघात 12 हजार 76 दिव्यांग मतदार असून या मतदार संघातील सर्व मतदान केंद्रांवर दिव्यांगांसाठी रॅम्पची व्यवस्था उपलब्ध आहे. तसेच मदतीसाठी  1 हजार 48 स्वंयसेवकाची नियुक्ती केली आहे.

मतदारांसाठी मतदान केंद्रांवर आरोग्य व अत्यावश्यक सुविधा

निवडणूक मतदानासाठी प्रशासन सर्वतोपरी सिद्ध झाले आहे. मतदार संघात तापमानाची परिस्थिती लक्षात घेता प्रत्येक मतदान केंद्रावर ज्येष्ठ, गर्भार महिला, लहान बालकांच्या माता असलेल्या महिला मतदारांसाठी व लहान मुलांसाठी पाळणाघर आदी व्यवस्था असून अंगणवाडी, बालवाडी सेविका, मदतनीस तैनात केलेल्या आहेत. तसेच अन्य मतदारांसाठी उन्हाचा त्रास होउ नये म्हणून सावलीसाठी मंडप, पिण्याचे पाणी, आरोग्य सुविधा, आपत्कालीन प्रसंगी रूग्णवाहिका आदी व्यवस्था उपलब्ध करून देण्यात आली आहे.

धुळे लोकसभा मतदारसंघामधून 18 उमेदवार निवडणूक रिंगणात

धुळे लोकसभा मतदार संघात 18 उमेदवार निवडणूक लढवित आहेत. त्यामुळे प्रत्येक मतदान केंद्रावर दोन इव्हीएम चा वापर केला जाणार आहे.

24 आदर्श, सखी महिला, युवा, दिव्यांग मतदान केंद्राची निर्मिती

या निवडणूकीत मतदार संघातील विधानसभा क्षेत्रनिहाय प्रत्येकी एक आदर्श, सखी महिला, युवा, दिव्यांग मतदान केंद्र याप्रमाणे संपूर्ण लोकसभा मतदार संघात 24 मतदान केंद्र तयार करण्यात आले आहे. याठिकाणी मतदान केंद्रानुसार, महिला, युवा व दिव्यांग अधिकारी, कर्मचारी यांची नियुक्ती करण्यात आली आहे. धुळे शहरात मतदान केंद्र क्रमांक 121 गरुड प्राथमिक शाळा पारोळा रोड, धुळे दक्षिणेकडील इमारत पश्चिमेकडील खोली क्रमांक दोन येथे आदर्श मतदान केंद्र, मतदान केंद्र क्रमांक 51 उन्नती शाळा देवपूर धुळे पुर्वेकडील खोली क्र 3 येथे महिला संचलित मतदान केंद्र, मतदान केंद्र क्रमांक 9  एकविरा विद्यालय देवपूर,धुळे उत्तरेकडील इमारत पश्चिमेकडून खोली क्रमांक2 येथे युवा संचलित मतदान केंद्र, मतदान केंद्र क्रमांक 70 महाराणा प्रताप शाळा देवपूर धुळे दक्षिणेकडील इमारत खेाली क्रमांक 1 येथे दिव्यांग संचलित मतदान केंद्र स्थापित केले आहे.

मतदान केंद्रांवर मोबाईलला बंदी

 मतदानाच्या दिवशी मतदान केंद्रावर मोबाईल फोन, स्मार्ट वॉच, कार्डलेस फोन, वायरलेस सेटसह इलेक्ट्रॉनिक्स वस्तू वापरास, बाळगण्यास निर्बंध आहेत. मतदान करण्यासाठी येणाऱ्या मतदारांना मतदान केंद्राच्या 100 मीटर परिसरात मोबाईल वापरता येणार नाही. त्यामुळे समूहाने मतदानासाठी जाणाऱ्या मतदारांना मोबाईल मतदान केंद्राच्या बाहेरच ठेऊन जावे लागणार आहे. किंवा एकमेकांजवळ सांभाळायला द्यावे लागणार आहे.

सर्व सोयींनी परिपूर्ण असणार मतदान केंद्र

   धुळे लोकसभा मतदार संघातील सहाही विधानसभा मतदार संघात उभारण्यात आलेल्या 1969 मतदान केंद्रांवर मतदान करण्यासाठी येणाऱ्या मतदारांना कोणत्याही अडचणींचा सामना करावा लागू नये, यासाठी मतदान केंद्रावर परिपूर्ण सोयी करण्यात आल्या आहेत. त्यात पिण्याचे पाणी, उन्हापासून बचाव करण्यासाठी मंडप किंवा शेड, मतदार सहाय्य्यता केंद्र, उन्हाळयातील वाढते तापमान लक्षात घेऊन प्रथमोपचार पेट्या, आणि प्रत्येक मतदान केंद्रासाठी ओआरएसचे पाकिटे तसेच आरोग्याशी संबंधित अडचणीसाठी आरोग्य केंद्र, अंगणवाडी व बालसंगोपन केंद्र, व्हीलचेअर या सह सर्व प्रकारच्या पूरक सोयी सुविधा उपलब्ध करून देण्यात आल्या आहेत.

पोलीस प्रशासनाकडून कडेकोट सुरक्षा व्यवस्था

सोमवारी 20 मे रोजी लोकसभा निवडणूकीसाठी मतदान होत आहे. त्यानुषंगाने जिल्ह्यात मतदान प्रक्रिया सुव्यवस्थितरित्या व शांततेत पार पडावी, यासाठी जिल्हा पोलीस अधीक्षक श्रीकांत धिवरे यांच्या मार्गदर्शनाखाली पोलीस प्रशासनाकडून देखील पुर्ण तयारी करण्यात आली आहे. यात प्रत्येक ईव्हीएम मशीन सोबत एक पोलीस आणि होमगार्ड तैनात आहेत. तसेच मतदान केंद्राच्या बाहेर 100 मिटर अंतरावर देखील पोलीस बंदोबस्त तैनात करण्यात आला. याशिवाय बाहेरील कर्नाटक तसेच केरळ राज्यातून अतिरिक्त पोलीस कुमक बंदोबस्तासह मुंबई लोहमार्ग पोलीस बलासह अन्य जिल्ह्यातून देखील पोलीस व होमगार्डस पथक दाखल झाले आहेत. सर्व विधानसभा मतदार संघात पोलीस दलाचा रुटमार्च करण्यात आला आहे. क्रीटीकल व गर्दीच्या मतदान केंद्र परिसरात अतिरिक्त पोलीस बंदोबस्त तैनात करण्यात आला आहे.

गृहभेटीद्वारे जनजागृती व मतदार चिठ्ठीचे वाटप

या निवडणूकीत मतदानाचा टक्क वाढावा, याकरीता जिल्हा परिषदेचे मुख्य कार्यकारी अधिकारी तथा स्वीपचे जिल्हा नोडल अधिकारी विशान नरवाडे यांच्या मार्गदर्शनाखाली आयोगाच्या सुचनांनुसार जिल्ह्यातील ग्रामीण भागात तर धुळे महापालिकेच्या आयुक्त अमिता दगडे-पाटील यांच्या मार्गदर्शनाखाली शहरी भागात अधिकारी, कर्मचारी यांनी गृहभेटीद्वारे नागरीकांमध्ये मतदानाबाबत जनजागृती केली असून या मतदार संघात बीएलओ मार्फत 19 लाख 18 हजार 831 मतदारांना मतदार चिठ्ठीचे वाटप करण्यात आले असून 4 लाख 80 हजार 877 घरांना वोटर गाईडचे वाटप करण्यात आले आहे.

मतदानाच्या दिवशी देखरेखीसाठी वॉर रुमची व्यवस्था

धुळे लोकसभा मतदार संघातील मतदान प्रक्रियेवर नजर ठेवण्यासाठी जिल्हाधिकारी कार्यालयात वॉर रुमची स्थापना करण्यात आली आहे. याठिकाणी मतदानाच्या दिवसाचे अहवाल, ईव्हीएमबाबतचे अहवाल, कंट्रोल रुम, मिडीया कंट्रोल रुम, मतदार समस्या निवारण कक्ष (1950 टोल फ्री), आचारसंहिता कक्ष, वेब कास्टिंग, जीपीएस मॉनिटरिंग कंट्रोल रुम, सायबर सेल, तक्रार हाताळण्याची व्यवस्था (सी व्हीजील कक्ष) आदि तैनात ठेवण्यात आले आहे. याद्वारे संपूर्ण मतदार संघातील घडामोडींवर नजर ठेवण्यात येणार आहे.

1853 गृह मतदान, अत्यावश्यक सेवा व इटीपीबीएमएस मतदारांनी केले मतदान

निवडणूक आयोगाने या निवडणूकीपासून प्रथमच 85 वर्षावरील ज्येष्ठ व दिव्यांग मतदारांना गृह मतदानाची सुविधा उपलब्ध करुन दिली आहे. त्यानुसार मतदार संघात 390 गृह मतदार, 1275 अत्यावश्यक सेवेतील मतदार तर 188 इटीपीबीएमएस असे एकूण 1853 मतदारांना आतापर्यंत मतदान केले आहे.

नागरिकांनी निर्भयपणे मतदानाला यावे

02-धुळे लोकसभा मतदार संघात आज दि. 20 मे रोजी मतदान प्रक्रिया पार पडत आहे. जिल्ह्यातील नागरिकांनी कोणत्याही अमिषाला बळी न पडता निर्भयपणे मतदानासाठी घराबाहेर पडावे. प्रशासनातर्फे मतदान केंद्रावर सर्व प्रकारच्या सोयी उपलब्ध करून देण्यात आल्या आहेत. त्या सोबतच जिल्ह्यात निर्भयपणे मतदान प्रक्रिया पार पडावी यासाठी प्रशासनाने सर्व प्रकारची दक्षता घेतली आहे. मतदारांनी लोकशाहीच्या या सर्वात मोठ्या उत्सवात सहभागी होऊन आपला हक्क बजवावा व मतदान प्रक्रियेत सहभागी व्हावे, असे आवाहन जिल्हा निवडणूक अधिकारी तथा जिल्हाधिकारी अभिनव गोयल यांनी केले आहे.

०००

धुळे, दि. १९ (जिमाका ) : लोकसभा सार्वत्रिक निवडणुकीच्या पार्श्वभूमीवर भारत निवडणूक आयोगाने नियुक्त केलेले केंद्रीय निवडणूक निरीक्षक (सामान्य) पूर्ण चंद्र किशन, निवडणूक पोलिस निरीक्षक किशन सहाय्य, निवडणूक खर्च निरीक्षक व्यंकटेश जाधव यांनी आज जिल्हाधिकारी कार्यालयातील विशेष नियत्रंण कक्षाला भेट देवून कामकाजाबाबत आढावा घेतला.

यावेळी जिल्हाधिकारी तथा जिल्हा निवडणूक निर्णय अधिकारी अभिनव गोयल, निवासी उपजिल्हाधिकारी नितीन गावंडे, उपजिल्हा निवडणुक अधिकारी गंगाराम तळपाडे, जिल्हा परिषदेचे अतिरिक्त मुख्य कार्यकारी अधिकारी चंद्रकांत पवार, उपजिल्हाधिकारी संजय बागडे, जिल्हा नियोजन अधिकारी ममता हटकर, जिल्हा सूचना विज्ञान अधिकारी महेश खडसे, जिल्हा मृद व जलसंधारण अधिकारी रविंद्र खोंडे, नगरपालिका प्रशासन अधिकारी शिल्पा नाईक, कार्यकारी अभियंता आर. आर. पाटील, आदी उपस्थित होते.

02-धुळे लोकसभा मतदार संघासाठी सोमवार, 20 मे, 2024 रोजी मतदान होणार आहे. या पार्श्वभूमीवर निवडणूक प्रक्रियेत कुठल्याही प्रकारची अडचण येऊ नये यासाठी जिल्हाधिकारी कार्यालयातील सातपुडा सभागृहात नियंत्रण कक्ष स्थापन करण्यात आला आहे. जिल्हाधिकारी कार्यालयातून स्वत: जिल्हाधिकारी अभिनव गोयल हे वेबकास्टिंगच्या माध्यमामातून मतदार संघातील 986 मतदान केंद्रावर बारकाईने लक्ष ठेवणार आहे. मतदान केंद्रावर कुठलीही समस्या, अडचण निर्माण झाल्यास त्यावर तात्काळ कार्यवाहीच्या सूचना नियंत्रण कक्षातून देण्यात येणार आहे.

केंद्रीय निवडणूक निरीक्षक (सामान्य) पूर्ण चंद्र किशन यांनी स्वत: या वेबकास्टिंग यंत्रणेचे सूक्ष्म निरीक्षण केले. त्यांनी मतदान प्रक्रियेची माहिती नियंत्रण कक्षाच्या माध्यमातून घेतली. तसेच सोमवार, 20 मे, 2024 रोजी मतदानाच्या पार्श्वभूमीवर निवडणूक प्रक्रियेत कुठल्याही प्रकारची अडचणी येऊ नये यासाठी कंट्रोल रुम मध्ये नियुक्त पथक प्रमुखांनी सतर्क रहावे, तसेच आयोगास पाठवावयाचे अहवाल वेळेत पाठविण्याची दक्षता घ्यावी. त्याचबरोबर निवडणूक आयोगाच्या निर्देशानुसार विविध अहवाल सहायक निवडणूक निर्णय अधिकारी यांचेकडून संकलीत करुन सादर करण्याच्या सूचना त्यांनी यावेळी दिल्यात. यावेळी त्यांनी जीपीस ट्रॅकिंग प्रणाली तसेच काही मतदान केंद्रांवर सध्या सुरु असलेल्या कामकाजाची वेबकॉस्टिंग प्रणालीद्वारे स्वत: माहिती घेतली.

धुळे लोकसभा मतदार संघातील मतदान प्रक्रियेवर नजर ठेवण्यासाठी स्थापन करण्यात आलेल्या या नियंत्रण कक्षाबाबत जिल्हाधिकारी श्री. गोयल यांनी माहिती दिली. तसेच याठिकाणी मतदानाच्या दिवसाचे अहवाल, ईव्हीएमबाबतचे अहवाल, कंट्रोल रुम, मिडीया कंट्रोल रुम, मतदार समस्या निवारण कक्ष (1950 टोल फ्री), आचारसंहिता कक्ष, वेब कास्टिंग, जीपीएस मॉनिटरिंग कंट्रोल रुम, सायबर सेल, तक्रार हाताळण्याची व्यवस्था (सी व्हीजील कक्ष) आदि तैनात ठेवण्यात आल्याबाबत तीनही निवडणूक निरिक्षकांनी नियंत्रण कक्षाच्या कामकाजाबाबत समाधान व्यक्त करुन जिल्हा प्रशासनाचे कौतुक केले.

पोलीस अधिक्षक कार्यालयातील कंट्रोल रुमलाही भेट

यानंतर केंद्रीय निवडणूक निरिक्षकांनी जिल्हा पोलीस अधिक्षक कार्यालयात असलेल्या कंट्रोल रुमलाही भेट देवून तेथील डायल 112, कंट्रोल रुम, सीसीटीव्ही रुमच्या कामकाजाची पध्दती समजून घेतली. यावेळी लोकसभा निवडणूक भयमुक्त वातावरणात पार पडण्यासाठी पोलीस प्रशासनाने केलेली तयारी, पोलीस बंदोबस्त आदिंची माहिती पोलीस अधीक्षक श्रीकांत धिवरे, अपर पोलीस अधिक्षक किशोर काळे यांनी निरिक्षकांना दिली.  पोलीस दलाने केलेल्या नियोजनाबाबत निरिक्षकांनी समाधान व्यक्त केले.

०००

नाशिक दि. १९ (जिमाका) : भारत निवडणूक आयोगाने दिनांक 16 मार्च 2024 रोजी लोकसभा सार्वत्रिक निवडणूक 2024 करिता जाहीर केलेल्या कार्यक्रमानुसार पाचव्या टप्प्यात नाशिक जिल्ह्यातील 20 दिंडोरी व 21 नाशिक लोकसभा मतदारसंघांसाठी सोमवार, 20 मे रोजी सकाळी 7.00 ते संध्याकाळी 6.00 वाजेपर्यंत मतदान होत आहे. मतदानासाठी जिल्हा प्रशासन सज्ज असून, दोन्ही मतदारसंघातील मतदारांनी जास्तीत जास्त प्रमाणात आपला मतदानाचा अधिकार बजवावा, असे आवाहन जिल्हाधिकारी तथा जिल्हा निवडणूक अधिकारी जलज शर्मा यांनी केले आहे.

20 दिंडोरी लोकसभा मतदार संघात 18 लाख, 53 हजार, 387 तर 21 नाशिक लोकसभा मतदार संघात 20 लाख, 30 हजार, 124 मतदार मतदानाचा अधिकार बजाविणार आहेत. नाशिकमध्ये 1 हजार 910 तर दिंडोरीमध्ये 1 हजार, 922 मतदान केंद्रावर आवश्यक सुविधांची पूर्तता झालेली असून एकूण 110% प्रमाणात 17 हजार 28 कर्मचारी केंद्रावर नियुक्त केले जाणार आहेत. ज्यामध्ये एकूण 5 हजार 82 महिला कर्मचारी आहेत. नाशिक लोकसभा मतदार संघात 955 केंद्रावर तर दिंडोरी लोकसभा मतदार संघात 961 केंद्रावर वेबकास्टींगची पुर्वतयारी पुर्ण झालेली आहे. नाशिक जिल्ह्यामध्ये 2 हजार 317 ठिकाणी व्हीलचेअरची तसेच 622 मतदारांना वाहतुक सुविधा पुरविण्याची पुर्वतयारी करण्यात आलेली आहे.

20 दिंडोरी लोकसभा मतदार संघाकरिता 130 तर 21 नाशिक लोकसभा मतदार संघाकरिता 240 सूक्ष्म निरीक्षक (Micro Observer) यांची नेमणूक करण्यात आली असून सदर नियुक्त करण्यात आलेले सूक्ष्म निरीक्षक हे त्यांचा अहवाल मा. मुख्य निवडणूक निरीक्षक यांच्याकडे सादर करतील.

०००

मुंबई, दि. १९ : लोकसभेच्या सार्वत्रिक निवडणुकीसाठी मुंबई उपनगर जिल्ह्यात सोमवार 20 मे 2024 रोजी सकाळी 7 ते सायंकाळी 6 वाजेपर्यंत मतदानाची प्रक्रिया पार पडणार आहे. त्याअनुषंगाने मुंबई उपनगर जिल्ह्यातील 27-  मुंबई उत्तर पश्चिममधील 6 विधानसभा मतदारसंघात प्रशासकीय यंत्रणा सज्ज झाली असून मतदानाची प्रक्रिया सुरळीतपणे पार पडण्यासाठी 8 हजार 361 कर्मचारी तैनात करण्यात आले आहेत. तसेच या विधानसभा मतदारसंघात महिला, युवा व दिव्यांग विशेष संचलित केंद्रे देखील सज्ज झाली असल्याचे निवडणूक निर्णय अधिकारी वंदना सूर्यवंशी यांनी सांगितले आहे.

27 मुंबई उत्तर पश्चिम अंतर्गत 158- जोगेश्वरी पूर्व, 159- दिंडोशी, 163- गोरेगाव, 164- वर्सोवा, 165- अंधेरी पश्चिम, 166- अंधेरी अशा एकूण सहा विधानसभा मतदारसंघांचा समावेश असून या सहा मतदारसंघामध्ये 1 हजार 753 मतदान केंद्रांवर मतदान होणार आहे. ही संपूर्ण प्रक्रिया निर्विघ्न पार पडावी यासाठी काटेकोरपणे नियमांची अंमलबजावणी करण्यात येणार आहे. त्यासाठी 240 क्षेत्रीय अधिकाऱ्यांची नेमणूक करण्यात आली असून 7 हजार 361 इतक्या कर्मचाऱ्यांना प्रशिक्षण देण्यात आले आहे. याचबरोबर मतदानाच्या दिवशी 828 वाहने निवडणूक यंत्रणेत दाखल करण्यात आली असून मतदानाच्या दिवशी कोणताही अनुचित प्रकार घडू नये यासाठी ठिकठिकाणी बंदोबस्तासाठी पोलिसही तैनात करण्यात आले आहे.

लोकशाहीच्या या उत्सवात मुंबई उपनगर जिल्ह्यातील प्रत्येक मतदाराला मतदानाचा हक्क बजावता यावा यासाठी जिल्हा प्रशासनामार्फत परिपूर्ण तयारी करण्यात आली आहे. त्यासाठी आज जोगेश्वरी, दिंडोशी, गोरेगाव, वर्सोवा, अंधेरी पूर्व, आणि अंधेरी पश्चिम या मतदारसंघात मतदानाच्या दिवशी लागणाऱ्या सर्व साहित्याचे वाटप करण्यात आले आहे. तसेच 27- मुंबई उत्तर पश्चिम मधील मतदान केंद्र देखील सज्ज करण्यात आली आहे. यावेळी इतर मतदान केंद्रांबरोबर महिला, युवा व दिव्यांग विशेष संचलित केंद्र हे आकर्षणाचा विषय ठरणार आहे. मतदारांना मतदानाचा सुखद अनुभव देण्यासाठी प्रशासनामार्फत योग्य नियोजन करण्यात आले असून 20 मे 2024 रोजी जास्तीत जास्त मतदारांनी आपल्या मतदारसंघातील मतदान केंद्रावर जावून मतदानाचा हक्क बजावा, असे आवाहन देखील निवडणूक निर्णय अधिकारी श्रीमती सूर्यवंशी यांनी केले आहे.

ही आहेत महिला संचलित केंद्र

1) 158 जोगेश्वरी पूर्व- एकूण मतदार- 676 असून मतदान केंद्र क्रमांक -269 कनोसा हायस्कूल, महाकाली गुफा रोड, अंधेरी पूर्व, मुंबई-93 हे केंद्र असणार आहे.

2)159 दिंडोशी- एकूण मतदार-  1405 असून मतदान केंद्र क्रमांक- 226 निवारा स्कूल, तळमजला, रुम न. 7, अर्बन निवारा कौन्सिल कॉलनी, अरुणकुमार वैद्य मार्ग, गोरेगाव पूर्व मुंबई-65

3)163 गोरेगाव- एकूण मतदार- 718 असून मतदान केंद्र क्रमांक- 194 जवाहर हायस्कूल, तळमजला, रुम नंबर 2, महात्मा गांधी रोड, गोरेगाव पश्चिम, मुंबई-104

4)164-  वर्सोवा- एकूण मतदार- 511 असून मतदान केंद्र क्रमांक- 208 चिल्ड्रन्स वेल्फेअर हायस्कूल, रुम नंबर 1, यारी रोड, वर्सोवा व्हीलेज, अंधेरी पश्चिम, मुंबई-61

5)165- अंधेरी पश्चिम- एकूण मतदार- 739 असून मतदान केंद्र क्रमांक- 69 उशा मित्तल इन्टिरुट्यूट ऑफ टेक्नोलॉजी एसएनडीटी वुमन्स युनिव्हर्सिटी

6)166 अंधेरी पूर्व- एकूण मतदार- 1018 असून मतदान केंद्र क्रमांक- 63 प्रायमरी ॲकेडमी स्कूल, तळमजला, स्टील्ट डी, मरोळ रोड, अंधेरी पूर्व, मुंबई-59

युवा संचलित केंद्र

1)158 जोगेश्वरी पूर्व- एकूण मतदार- 1162 असून मतदान केंद्र क्रमांक -79 सेंट झेवियर्स हायस्कूल, पूनमनगर, महाकाली गुफा रोड, अंधेरी पूर्व.

2)159 दिंडोशी- एकूण मतदार- 792 असून मतदान केंद्र क्रमांक – 32 अनुदत्त विद्यालया, इंग्लिश मीडियम स्कूल, तळमजला, रुम नंबर 16, अकुर्ली रोड, क्रांतिनगर, कांदिवली पूर्व, मुंबई- 01

3)163 गोरेगाव- एकूण मतदार- 870 असून मतदान केंद्र क्रमांक- 129 शंकरधाम केळवाणी मंडळ जे. एम. पटेल कॉलेज ऑफ कॉमर्स रुम नंबर 01, महात्मा गांधी रोड, गोरेगाव, मुंबई-04

4)164 वर्सोवा- एकूण मतदार- 1134 असून मतदान केंद्र क्रमांक- 210 चिल्ड्रन्स वेल्फेअर हायस्कूल, रुम नंबर 1, यारी रोड, वर्सोवा व्हीलेज, अंधेरी पश्चिम मुंबई-61

5)165 अंधेरी पश्चिम- एकूण मतदार- 889 असून मतदान केंद्र क्रमांक- 250 जमुनाबाई नर्से स्कूल नॉर्थ साऊथ रोड, नंबर 7 जुहू- विले पार्ले रोड, मुंबई-49

6)166 अंधेरी पूर्व- एकूण मतदार- 673 असून मतदान केंद्र क्रमांक- 163 श्री राम लक्ष्मी विद्यामंदिर तळमजला, रुम नंबर 1, मोगरा व्हीलेज रोड, अंबोली लेव्हल क्रॉसिंग, अंधेरी पूर्व, मुंबई-69

दिव्यांग विशेष संचलित केंद्र

1)158 जोगेश्वरी पूर्व- एकूण मतदार- 787 असून मतदान केंद्र क्रमांक – 78 अस्मिता विद्यालय भांडारकर वाडी, अलियावर जंग मार्ग, जोगेश्वरी पूर्व मुंबई – 60

2)159 दिंडोशी- एकूण मतदार- 715 असून मतदान केंद्र क्रमांक – 209 मुंबई पब्लिक स्कूल दिंडोशी कॉलनी मराठी स्कूल नंबर 1, तळमजला.

3)163 गोरेगाव- एकूण मतदार- 1384 असून मतदान केंद्र क्रमांक- 228 विवेक विद्यालय नॉथ साईड विंग, तळमजला, रुम नंबर 2 सिद्धार्थनगर गोरेगाव, मुंबई-04

4)     164 वर्सोवा- एकूण मतदार- 462 असून मतदान केंद्र क्रमांक- 85 ए.के. हुसेन अलना इंग्लिश मीडिअम स्कूल, लोखंडवाला अंधेरी पश्चिम, तळमजला, मुंबई-53

5)165 अंधेरी पश्चिम- एकूण मतदार- 479 असून मतदान केंद्र क्रमांक- 42 भारती विद्या भवन ए.एच. वाडिया हायस्कूल, जे.पी. रोड, अंधेरी पश्चिम, मुंबई-53

6)166 अंधेरी पूर्व- एकूण मतदार- 1069 असून मतदान केंद्र क्रमांक- 170 श्री राम लक्ष्मी विद्यामंदिर तळमजला, रुम नंबर 1, मोगरा व्हीलेज रोड, अंबोली लेव्हल क्रॉसिंग, अंधेरी पूर्व, मुंबई-69

मी बजावला मतदानाचा हक्क, आपणही बजवावा मतदानाचा हक्क

भारतीय राज्यघटनेने आपल्याला मतदानाचा मौलिक अधिकार दिला आहे. या अधिकारामुळे आपण देशात सक्षम लोकशाही उभारू शकतो. आणि आपल्या देशाची संयुक्त राष्ट्रसंघात एक वेगळी ओळख निर्माण करू शकतो. त्यामुळे देशातील एक जबाबदार नागरिक म्हणून मी मतदानाचा हक्क टपाली सेवेने बजावला आहे. आज तुम्ही देखील आपला मतदानाचा हा हक्क बजवावा, असे आवाहन करते.

निरपेक्ष आणि निर्भिड वातावरणात आपल्याला मतदान करण्याचा सुखद अनुभव मिळावा ही बाब विचारात घेऊन प्रत्येक मतदान केंद्रावर पुरेसे मनुष्यबळ आणि यंत्रसामग्रीही उपलब्ध करून देण्याचेही नियोजन करण्यात आले आहे. याचबरोबर मतदारांना मतदानाची सुखद अनुभूती मिळावी यासाठी नाविन्यपूर्ण कल्पनांचा वापर करून मतदान केंद्रांची उभारणीही करण्यात आली आहे. मतदारांना सावलीसाठी व बसण्याची जागा, पिण्याच्या पाण्याची सोय, दिव्यांग आणि ज्येष्ठ मतदारांना विशेष सुविधा उपलब्ध करून देण्यात येणार आहे. मुंबई उपनगर जिल्ह्यातील मतदानाची टक्केवारी वाढविण्यासाठी 27- मुंबई उत्तर पश्चिम कार्यालयात सज्ज असल्याचे निवडणूक निर्णय अधिकारी श्रीमती सूर्यवंशी यांनी सांगितले.

०००

लोकसभा निवडणुकीसाठी सोमवारी सकाळी ७ ते सायं. ६वाजेपर्यंत होणार मतदान

 मुंबई, दि. १९: मुंबई उपनगर जिल्ह्यातील चारही लोकसभा मतदारसंघासाठीची मतदानासाठीची सर्व तयारी पूर्ण झाली असून मतदानासाठीचे साहित्य घेऊन मतदान प्रक्रियेसाठी नियुक्त अधिकारी आणि कर्मचारी मतदान केंद्रांवर पोहोचले आहेत. आता मतदान प्रक्रियेसाठी ही मतदान केंद्रे सज्ज झाली असून सोमवारी  (दिनांक 20 मे) सकाळी 7 वाजता मतदान सुरु होणार आहे. या मतदान केंद्रांना प्रतीक्षा आहे ती मतदानासाठी येणाऱ्या मतदारांची! सर्वच मतदारांनी त्यांचा मतदानाचा हक्क बजावावा, असे आवाहन जिल्हा निवडणूक यंत्रणेने केले आहे. अर्थात, मतदान करण्यासाठी जाताना सोबत मोबाईल घेऊन जाण्यास परवानगी नाही, ही बाब मतदारांना आवर्जून लक्षात ठेवावी लागणार आहे.

मुंबई उपनगर जिल्ह्यात 26- मुंबई उत्तर, 27- मुंबई उत्तर पश्चिम, 28- मुंबई उत्तर पूर्व आणि 29- मुंबई उत्तर मध्य या लोकसभा मतदारसंघांचा समावेश आहे. या मतदारसंघातील 7384 मतदान केंद्रांवर हे मतदान होत आहे. मतदानाची सर्व तयारी पूर्ण झाली असून आज या मतदारसंघांतील 26 विधानसभा क्षेत्रात सहायक निवडणूक निर्णय अधिकारी यांच्या उपस्थितीत मतदान साहित्याचे वाटप मतदान प्रक्रियेसाठी नियुक्त अधिकारी-कर्मचारी यांना करण्यात आले. त्यानंतर संबंधित अधिकारी-कर्मचारी यांना नियुक्त मतदान केंद्रांवर पोहोच कऱण्यात आले. सर्वच मतदान केंद्रांवर मतदारांना पिण्याचे पाणी, सावलीची व्यवस्था कऱण्यात आली आहे. मतदार केंद्रांवर नाव शोधण्यासाठीही याठिकाणी स्वयंसेवक नियुक्त कऱण्यात आले आहेत. सध्या उन्हाळ्याचे दिवस लक्षात घेता मतदारांनी सकाळीच घराबाहेर पडून मतदानाचा हक्क बजावावा, असे आवाहन कऱण्यात आले आहेत.

मतदान केंद्रांपासून 100 मीटर परिसरात मोबाईल आणण्यास बंदी

लोकसभेच्या सार्वत्रिक निवडणुकीसाठी मतदान केंद्रापासून 100 मीटर परिसरात मोबाईल आणण्यास बंदी घालण्यात आली आहे. मतदानाची सर्व प्रक्रिया गोपनीय आहे. मतदान केंद्रावरील गोपनीयतेला सर्वोच्च प्राधान्य देण्यात आले आहे. मतदारांच्या गोपनीयतेसाठी मतदान केंद्रापासून 100 मीटर परिसरात मोबाईल आणण्यास बंदी घालण्यात आली आहे. मतदारांनीही मतदानासाठी येताना मोबाईल आणू नयेत, असेही आवाहन जिल्हा निवडणूक यंत्रणेने केले आहे.

मतदानासाठी मतदान ओळखपत्राशिवाय 12 पुरावे ग्राह्य

मतदारांनी मतदानासाठी जाताना भारत निवडणूक आयोगाने त्यांना दिलेले निवडणूक ओळखपत्र सोबत घेऊन जायचे आहे. ओळखपत्र मिळाले नसेल तर इतर 12 ओळखपत्र ही पुरावा म्हणून ग्राह्य धरणार असल्याचे निवडणूक आयोगाने स्पष्ट केले आहे. यामध्ये, पासपोर्ट, वाहन चालक परवाना, शासन, सार्वजनिक उपक्रम तसेच पब्लिक लिमिटेड कंपन्यांकडून कर्मचाऱ्यांना वितरित छायाचित्र असलेले सेवा ओळखपत्र, बॅंक किंवा टपाल विभागाचे छायाचित्र असलेले पासबुक, पॅन कार्ड, राष्ट्रीय लोकसंख्या नोंदवही स्मार्ट कार्ड, मनरेगा रोजगार ओळखपत्र, कामगार आरोग्य विमा स्मार्ट कार्ड, निवृत्तीवेतन दस्तऐवज, दिव्यांग व्यक्ती ओळखपत्र आणि आधारकार्ड यांचा समावेश आहे.

तब्बल 74 लाखांहून अधिक मतदार बजावणार मतदानाचा हक्क

मुंबई उपनगर जिल्ह्यातील 26 मतदारसंघात एकूण 7384 मतदान केंद्र आहेत. या मतदान केंद्रांवर 40 लाख 02 हजार 749 पुरुष, 34 लाख 44 हजार 819 महिला, तर 815 तृतीयपंथी असे एकूण 74 लाख 48 हजार 383 मतदार आपल्या मतदानाचा हक्क बजावणार आहेत.

यामध्ये 26- मुंबई उत्तर मतदारसंघात विधानसभेचे बोरिवली, दहिसर, मागाठाणे, कांदिवली (पूर्व), चारकोप, मालाड (पश्चिम) या मतदारसंघांचा समावेश आहे. या मतदारसंघात एकूण 1702 मतदान केंद्र आहेत. या मतदान केंद्रांवर 9 लाख 68 हजार 983 पुरुष, 8 लाख 42 हजार 546 महिला, तर 443 तृतीयपंथी असे एकूण 18 लाख 11 हजार 942 मतदार आपल्या मतदानाचा हक्क बजावतील.

27- मुंबई उत्तर पश्चिम या मतदारसंघात विधानसभेचे जोगेश्वरी पूर्व, दिंडोशी, गोरेगाव, वर्सोवा, अंधेरी पश्चिम आणि अंधेरी या मतदारसंघांचा समावेश आहे. या मतदारसंघात  1753 मतदान केंद्र आहेत. या मतदान केंद्रांवर 9 लाख 38 हजार 365 पूरूष मतदार तसेच 7 लाख 96 हजार 663 महिला मतदार तर 60 तृतीयपंथी असे एकुण 17 लाख 35 हजार 088 मतदार आपल्या मतदानाचा हक्क बजावतील.

28- मुंबई उत्तर पुर्व या मतदारसंघात विधानसभेचे मुलुंड, विक्रोळी, भांडुप पश्चिम, घाटकोपर पश्चिम, घाटकोपर पूर्व तसेच मानखुर्द शिवाजीनगर या मतदारसंघांचा समावेश आहे. या मतदारसंघात 1682 मतदान केंद्र आहेत. या मतदान केंद्रांवर 8 लाख 77 हजार 855 पूरूष मतदार तसेच 7 लाख 58 हजार 799 महिला मतदार तर 236 तृतीयपंथी असे एकुण 16 लाख 36 हजार 890 मतदार आपल्या मतदानाचा हक्क बजावतील.

29- मुंबई उत्तर मध्य या मतदारसंघात विधानसभेचे विलेपार्ले, चांदीवली, कुर्ला एससी, कलीना, वांद्रे पूर्व, वांद्रे पश्चिम या मतदारसंघांचा समावेश आहे. या मतदारसंघात 1698 मतदान केंद्र आहेत. या मतदान केंद्रांवर 9 लाख 41 हजार 288 पूरूष मतदार तसेच 8 लाख 2 हजार 775 महिला मतदार तर 65 तृतीयपंथी असे एकुण 17 लाख 44 हजार 128 मतदार आपल्या मतदानाचा हक्क बजावतील.

30 मुंबई दक्षिण मध्य या मतदारसंघात अणूशक्ती नगर आणि चेंबूर या मतदारसंघात 549 मतदान केंद्र आहेत. या मतदान केंद्रांवर 2 लाख 76 हजार 258 पूरूष मतदार तसेच 2 लाख 44 हजार 36 महिला मतदार तर 41 तृतीयपंथी असे एकुण 5 लाख 20 हजार 335 मतदार आपल्या मतदानाचा हक्क बजावतील.

०००

मुंबई, दि. १९ : मुंबई शहर जिल्ह्यातील मुंबई दक्षिण व मुंबई दक्षिण मध्य या दोन्ही लोकसभा मतदारसंघात लोकसभा सार्वत्रिक निवडणूक-२०२४ साठी २० मे, २०२४ रोजी सकाळी ०७.०० ते सायंकाळी ०६.०० वा. दरम्यान मतदान होत आहे. मतदानाच्या दिवशी मतदारांना मतदान केंद्रात मोबाईल नेण्यास मनाई असणार आहे, अशी माहिती मुंबई शहर जिल्हाधिकारी तथा जिल्हा निवडणूक अधिकारी संजय यादव यांनी दिली.

श्री. यादव म्हणाले की, मुंबई शहर जिल्ह्यात दोन्ही लोकसभा मतदारसंघात एकूण २५२० मतदान केंद्रे आहेत. मतदान केंद्रांवर मोबाइल घेऊन जाण्यास मनाई असल्याचे स्पष्ट निर्देश भारत निवडणूक आयोगाने दिले आहेत. आयोगाच्या प्रत्येक निर्देशाची अंमलबजावणी करण्यासाठी मुंबई शहर जिल्हा प्रशासन दक्ष आहे.

मतदान प्रक्रियेत बाधा निर्माण करणे, मतदान केंद्रांवरील शांतता भंग करणे तसेच कायदा आणि सुव्यवस्थेचा प्रश्न निर्माण करण्यासाठी मोबाईलचा गैरवापर होण्याची शक्यता आहे. त्यामुळे मतदानाच्या दिवशी मतदान केंद्रांवर मोबाईल घेऊन जाण्यास मतदारांना मज्जाव करण्यात आला आहे. मतदारांना मतदान केंद्रापासून १०० मीटर बाहेर मोबाईल ठेऊन मतदान करण्यासाठी जावे लागेल, असे श्री. यादव यांनी सांगितले.

०००

शैलजा पाटील/विसंअ/

मुंबई, दि. १९ : लोकसभा सार्वत्रिक निवडणूक-२०२४ च्या अनुषंगाने राज्यात तसेच राज्याच्या सीमेलगतच्या निवडणूक होणाऱ्या मतदान क्षेत्रात मतदार असलेले कामगार, अधिकारी, कर्मचारी यांना जरी ते कामानिमित्त निवडणूक होणाऱ्या क्षेत्राबाहेर कार्यरत असले तरीही त्यांना निवडणुकीच्या दिवशी मतदानाचा हक्क बजावण्यासाठी भरपगारी सुट्टी देण्यात यावी, असे निर्देश मुंबई शहराचे जिल्हाधिकारी तथा जिल्हा निवडणूक अधिकारी संजय यादव यांनी दिले आहेत.

मुंबई शहर जिल्ह्यातील मुंबई दक्षिण व मुंबई दक्षिण मध्य या दोन्ही लोकसभा मतदारसंघात दि. २० मे, २०२४ रोजी सकाळी ७ ते सायंकाळी ६ वाजेपर्यंत मतदान होणार आहे. या पार्श्वभूमीवर हे निर्देश देण्यात आले आहेत.

मतदानाच्या दिवशी कार्यरत कर्मचाऱ्यांना भरपगारी सुट्टी देणे महाराष्ट्र शासनाच्या उद्योग, ऊर्जा व कामगार विभागाअंतर्गत येणाऱ्या सर्व आस्थापना कारखाने, दुकाने इत्यादींना बंधनकारक आहे. खाजगी कंपन्यांमधील आस्थापना सर्व दुकाने व इतर आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना तसेच माहिती व तंत्रज्ञान कंपन्या, शॉपिंग सेंटर, मॉल्स, रिटेलर्स यांमधील कार्यरत कर्मचाऱ्यांना भरपगारी सुट्टी लागू असणार आहे. अत्यावश्यक सेवेसाठी कामगार अधिकारी-कर्मचारी इत्यादींना पूर्ण दिवस सुट्टी देणे शक्य नसेल तर मतदान क्षेत्रातील कामगारांना मतदानाचा हक्क बजावण्यासाठी मतदानाच्या दिवशी संस्थेतील अधिकारी- कर्मचारी मतदान करण्यापासून वंचित राहणार नाहीत, याची दक्षता घेऊन मतदानासाठी दोन ते तीन तासांची सवलत देण्यात यावी. याबाबत जिल्हाधिकारी तथा जिल्हा निवडणूक अधिकारी यांची परवानगी घेणे आवश्यक आहे, असे निर्देशही श्री. यादव यांनी दिले आहेत.

मुंबई शहर जिल्हाधिकारी तथा जिल्हा निवडणूक अधिकारी यांनी मतदानाच्या दिवशी भरपगारी सुट्टी देण्याबाबतच्या निर्देशाचे, सूचनांचे उद्योग, ऊर्जा व कामगार विभागांतर्गत येणाऱ्या सर्व आस्थापना, कारखाने, दुकाने यांच्या मालकांनी व व्यवस्थापनाने योग्य ते पालन करण्याचे निर्देश श्री. यादव यांनी दिले आहेत.

मतदानाच्या दिवशी आस्थापना बंद न ठेवता मतदारांना मतदान करणे शक्य न झाल्याबाबत तक्रारी आल्यास संबंधित आस्थापनेवर कारवाई करण्यात येणार आहे. मतदानाच्या दिवशी सर्वसाधारणपणे मतदारांना त्यांच्या मतदानाचा हक्क बजावता यावा यासाठी भरपगारी सुट्टी देण्यात येते. तसेच काही ठिकाणी कामाच्या तासात योग्य ती सवलत देण्यात येते. मात्र, निवडणुकीमध्ये महाराष्ट्र राज्याच्या सीमेलगतच्या जिल्ह्यामध्ये काही मतदार मतदानाचा हक्क बजावण्यापासून वंचित राहू नये, यासाठी हे निर्देश मुंबई शहर जिल्हाधिकारी तथा जिल्हा निवडणूक अधिकारी यांनी दिले आहेत.

आपल्या देशाने लोकशाही पद्धती स्वीकारली असून १८ वर्षावरील नोंदणी झालेल्या सर्व नागरिकांनी प्रत्येक निवडणुकीमध्ये मतदान करणे अपेक्षित आहे. ही बाब लक्षात घेता लोकप्रतिनिधित्व कायदा, १९५१ च्या परिच्छेद १३५ (बी) नुसार मतदानाच्या दिवशी सर्वसाधारणपणे मतदारांना त्यांचा मतदानाचा हक्क बजावता यावा, यासाठी भरपगारी सुट्टी देण्यात येते किंवा काही ठिकाणी कामाच्या तासात योग्य ती सवलत देण्यात येते. मात्र, गेल्या काही निवडणुकांमध्ये असे दिसून आले आहे की, काही संस्था आस्थापना त्यांच्या कामगारांना भरपगारी सुट्टी किंवा

सवलत देत नाहीत, त्यामुळे अनेक मतदारांना त्यांच्या मतदानाचा हक्क बजावण्यापासून वंचित रहावे लागते, जे लोकशाहीसाठी घातक आहे. या पार्श्वभूमीवर मुंबई शहर जिल्हाधिकारी तथा जिल्हा निवडणूक अधिकारी संजय यादव यांनी हे निर्देश निर्गमित केले आहेत.

महाराष्ट्र शासनाच्या उद्योग, ऊर्जा, कामगार व खनिकर्म विभागानेही ०५ एप्रिल, २०२४ रोजी लोकसभा सार्वत्रिक निवडणूक-२०२४ करिता लोकसभा मतदारसंघातील खाजगी कंपन्यांमधील आस्थापना सर्व दुकाने व इतर आस्थापना, निवासी हॉटेल, खाद्यगृहे, अन्य गृहे, नाट्यगृहे, व्यापार, औद्योगिक उपक्रम किंवा इतर आस्थापना तसेच माहिती व तंत्रज्ञान कंपन्या, शॉपिंग सेंटर, मॉल्स, रिटेलर्स यांमधील कार्यरत कर्मचाऱ्यांना मतदानाच्या दिवशी मतदान करण्यासाठी सुट्टी देण्याबाबत परिपत्रक काढले आहे.

०००

शैलजा पाटील/विसंअ/