कोल्हापूर, दि. १५ (जिमाका) : महिला सक्षमीकरणासाठी मुलींना दर्जेदार शिक्षण देणे आवश्यक आहे. यासाठी मुलींना आवश्यक त्या सर्व शैक्षणिक सोयी- सुविधा उपलब्ध करुन देवून दर्जेदार शिक्षण आणि महिलासक्षमीकरण यावर राज्य शासनाच्या वतीने भर देण्यात येत आहे, असे प्रतिपादन उच्च व तंत्र शिक्षण मंत्री चंद्रकांत पाटील यांनी केले.

जिल्हा परिषदेच्या शाळांमधील ग्रामीण भागातील गरजू विद्यार्थिनींना आरबीएल बँकेच्या वतीनेसामाजिक उत्तरदायित्व निधी (सीएसआर) अंतर्गत (उमीद १००० अंतर्गत) १०१ सायकली व शालेय वस्तूंच्या किटचे वाटप राज्याचे उच्च व तंत्रशिक्षण मंत्री चंद्रकांत पाटील यांच्या हस्ते करण्यात आले. यावेळी त्यांनी लाभार्थी विद्यार्थिनींशी संवाद साधला.

कार्यक्रमाला जिल्हा परिषदेचे मुख्य कार्यकारी अधिकारी संजयसिंह चव्हाण, अतिरिक्त मुख्य कार्यकारी अधिकारी अजयकुमार माने, उप मुख्य कार्यकारी अधिकारी, आरबीएलचे मार्केटिंग व सर्विस प्रमुख अभिजीत सोमवंशी शासकीय सेवा विभाग प्रमुख पारुल सरिन, प्रकाश गुप्ता, दुर्गादास रेगे, सागर कुलकर्णी तसेच जिल्हा परिषदेचे अधिकारी, कर्मचारी, लाभार्थी विद्यार्थी, पालक उपस्थित होते.

आरबीएल बँकेच्या वतीने विद्यार्थिनींना सायकल वाटप केल्यामुळे ग्रामीण भागात दूरवरुन शाळेत चालत जाणाऱ्या विद्यार्थिनींची निश्चितच सोय होईल. हा उपक्रम कौतुकास्पद असल्याचे सांगून मंत्री श्री. पाटील म्हणाले की, जिल्हा परिषद, महानगरपालिकेच्या शाळांतील शिक्षणाचा दर्जा आणखी सुधारणे आवश्यक आहे. राज्य शासनाच्या वतीने मुलगी जन्मल्यानंतर आर्थिक ठेव, ७५ वर्षावरील ज्येष्ठांना एसटी बस मधून मोफत प्रवास, महिलांना एसटी बसमध्ये निम्म्या भाड्यामध्ये प्रवास, उज्ज्वला गॅस योजना आदी विविध योजनांच्या माध्यमातून महिला व बालक, ज्येष्ठ नागरिक, मागासवर्गीय तसेच मराठा समाजातील तरुण तरुणींसह विविध घटकांचा विकास साधला जात आहे. तथापि, बँकांसह अन्य विविध प्रकारच्या संस्थांनी सामाजिक कार्यासाठी तसेच समाजाच्या गरजा पूर्ण करण्यासाठी पुढे यावे, असे आवाहन त्यांनी केले.

जिल्हा परिषदेचे मुख्य कार्यकारी अधिकारी संजयसिंह चव्हाण म्हणाले की, शिक्षण ही मुलींच्या उज्ज्वल भविष्याची गुरुकिल्ली आहे. राजर्षी शाहू महाराजांच्या विचारांच्या प्रेरणेने जिल्ह्यातील मुलींच्या शिक्षणाला चालना देण्यात येत आहे. ग्रामीण भागातील दूरवरुन शाळेत चालत जाणाऱ्या मुलींची सायकल मुळे सोय होईल. विद्यार्थिनींना शैक्षणिक सोयी सुविधा उपलब्ध करुन देवून मुलींची स्वप्ने पूर्ण होण्यासाठी प्रयत्न केले जात आहेत.

आरबीएल बँकेच्या वतीने अभिजित सोमवंशी म्हणाले की, सीएसआर उपक्रमाअंर्तगत उपेक्षित समुदायांना मदत करण्यासाठी बँकेच्या वतीने प्रयत्न करण्यात येत आहेत. भारतातील विविध शहरांमध्ये १००० हून अधिक सायकली आणि स्कूल किट्स वाटप केल्याचे त्यांनी सांगितले. सायकलमुळे शाळेत जाण्याची सोय झाल्याबद्दल उपस्थित विद्यार्थिनींनी समाधान व्यक्त केले.

०००

मुंबई, दि. १५ : केंद्र व राज्य शासन, विविध आस्थापना व त्यांचे अंगिकृत उद्योग, व्यवसाय, महामंडळे, महापालिका, तसेच खासगी क्षेत्रातील आस्थापनांनी त्यांच्याकडील मनुष्यबळाचे तिमाही विवरणपत्र येत्या ३० एप्रिलपर्यंत सादर करावे, असे आवाहन मुंबई शहर जिल्हा कौशल्य विकास, रोजगार व उद्योजकता मार्गदर्शन केंद्रामार्फत करण्यात आले आहे.

दर तिमाहीअखेर (मार्च, जून, सप्टेंबर, डिसेंबर) विवरण सादर करणे बंधनकारक आहे. पंचवीस किंवा अधिक लोक काम करतात अशा सर्व आस्थापना, उद्योग, व्यापार कारखाने यांना सेवायोजन कार्यालये यांनी रिक्तपदे अधिसूचित करण्याची सक्ती करणारा कायदा १९५९ व अंतर्गत नियमावली १९६० नुसार मनुष्यबळाचे त्रैमासिक विवरणपत्र ईआर-१ प्रत्येक तिमाही संपल्यानंतर ३० दिवसांच्या आत सादर करणे बंधनकारक आहे. तसेच ज्या उद्योजकांनी महास्वयंम वेबपोर्टलवर नोंदणी केलेली नाही त्या उद्योजकांनी ऑनलाईन नोंदणी करून घ्यावी. हे विवरणपत्र (ER-I) हे ऑनलाईन पध्दतीने https://rojgar.mahaswaym.gov.in  या वेबपोर्टलवर सादर करण्याची सुविधा उपलब्ध आहे. या सुविधेचा वापर करुन ३० एप्रिल २०२३ पर्यंत विवरणपत्र (ईआर-१) सादर करावे, असे आवाहन श्री. रविंद्र प्र. सुरवसे, सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, मुंबई शहर यांनी केले आहे.

मुंबई शहर जिल्हा अंतर्गत येणारे सर्व नियोक्ते / आस्थापना यांनी https://rojgar.mahaswaym.gov.in  या वेबपोर्टलवर तिमाही विवरणपत्र ईआर १ सादर करण्याची दक्षता घ्यावी. या वेबसाइटच्या एम्प्लॉयर (List a Job ) या टॅबवर क्लिक करुन एम्प्लॉयर लॉगइनमध्ये युजर आयडी व पासवर्ड वापरून लॉगइन करावे आणि ईआर रिपोर्टमध्ये ईआर -१ या ऑप्शनवर क्लिक करुन तिमाही विवरणपत्र ऑनलाईन सादर करणे आवश्यक आहे. अधिक माहिती / मार्गदर्शन अथवा तांत्रिक अडचण असल्यास mumbaicity.employment@gmail.com  या ईमेलवर संपर्क करावा. ३१ मार्च २०२३ च्या तिमाही अखेर वेतनपटावर असलेल्या सर्व मनुष्यबळाच्या माहितीचे विवरणपत्र ईआर १ हे ३० एप्रिल २०२३ पर्यंत महास्वयम वेबसाईटवर ऑनलाईन सादर करणे बंधनकारक आहे. हे विवरणपत्र ऑफलाईन स्विकारले जाणार नाही, असे सहायक आयुक्त यांनी सुचित केले आहे.

०००

नागपूर,  14 : केंद्र शासनाच्या अमृत 2.0 योजनेअंतर्गत शहरातील नाईक व लेंडी तलावाच्या पुनरुज्जीवनाच्या कार्यक्रमाचे भूमीपूजन उपमुख्यमंत्री देवेंद्र फडणवीस यांच्या हस्ते आज झाले. येत्या काळात या दोन्ही तलावांमध्ये स्वच्छ व मुबलक पाणी उपलब्ध होईल व या परिसराच्या विकासात हा एक महत्त्वाचा टप्पा ठरेल, असा विश्वास त्यांनी याप्रसंगी व्यक्त केला.

      केंद्रीय भूपृष्ठ वाहतूक व महामार्ग मंत्री नितिन गडकरी, आमदार सर्वश्री चंद्रशेखर बावनकुळे, प्रवीण दटके, विलास कुंभारे, कृष्णा खोपडे, महानगरपालिका आयुक्त राधाकृष्ण बी, जिल्हाधिकारी डॉ. विपीन इटनकर यावेळी मंचावर उपस्थित होते.

यावेळी संबोधित करतांना उपमुख्यमंत्री म्हणाले, या दोन्ही तलावांच्या पुनरुज्जीवनाच्या भूमीपूजनाचा ऐतिहासिक क्षण आहे. मध्य नागपूर विधानसभा मतदारसंघातील गतवैभव असणाऱ्या या तलावांच्या पुनरुज्जीवनाचे काम विक्रमी वेळेत पूर्ण होईल. या भागातील जनतेचे जीवन सुखकर होईल, असे त्यांनी सांगितले.

प्रधानमंत्री नरेंद्र मोदी यांच्या संकल्पनेतून भारतीय स्वातंत्र्याच्या अमृत महोत्सवानिमित्ताने ‘अमृत सरोवर योजना’ राबविण्यात येत आहे. याअंतर्गत प्रत्येक जिल्ह्यात 75 तलावांचे पुनरुज्जीवन आणि निर्मिती करण्याचे ध्येय आहे. ‘अटल अमृत योजने’च्या माध्यमातून तलावांचे मोठ्या प्रमाणात संवर्धन अभियान हाती घेण्यात आले आहे. नागपुरातही तलावांच्या संवर्धनासाठी काम सुरू आहे. पहिल्या टप्प्यात अंबाझरी, सोनेगाव, सक्करदरा, गांधीसागर तलावांचे कार्य सुरू झाले होते. दुसऱ्या टप्प्यातील संवर्धनाचे काम सुरू झाले आहे. या टप्प्यात नाईक व लेंडी तलावांचे पुनरुज्जीवनाचे काम हाती घेण्यात आले आहे. अमृत योजनेअंतर्गत केंद्राकडे या दोन्ही तलावांच्या संवर्धनाचा प्रस्ताव पाठवण्यात आला. राज्य सरकारनेही यास मंजुरी दिली आणि महानगरपालिकेने हे काम हाती घेतले आहे. आता या दोन्ही तलावांचा कायापालट होणार असून स्वच्छ व शुद्ध पाणी उपलब्ध करून देण्यात येईल. यामुळे या भागातील  जनतेचे जीवन सुखकर होईल, असा विश्वास श्री. फडणवीस यांनी व्यक्त केला.

यावेळी बोलताना श्री. गडकरी यांनी या दोन्ही तलावांच्या पुनरुज्जीवनाची योग्य प्रकारे काळजी घेण्याचे उपस्थितांना आवाहन केले. वस्त्या मोठ्या होत आहेत. त्यामुळे सर्व सुविधा या ठिकाणी देण्याचा आमचा प्रयत्न आहे. मात्र मोठ्या प्रमाणात अतिक्रमण झाल्यामुळे अनेक सुविधा दिल्या जाऊ शकत नाही. नवीन रस्ते तयार होताना काही ठिकाणी काही घरे पाडावी लागतील. त्यांना योग्य प्रकारे मोबदला दिला जाईल. घरापर्यंत ॲम्बुलन्स, अग्निशमन दलाच्या गाड्या, वैद्यकीय सुविधा, पोहोचण्यास मदत होईल. त्यामुळे परिसरातील नागरिकांनी अशा मोठ्या प्रकल्पांना गती देताना प्रशासनाला साथ द्यावी, असे आवाहनही त्यांनी केले.

      येत्याकाळात नागपुरच्या प्रत्येक गल्लीमध्ये सिमेंट रस्ते होतील. एकही साधा रस्ता नागपुरमध्ये राहणार नाही. पुढील सहा महिन्यात नागपुरला 24 तास पाणीपुरवठा पूर्ण शहरभर दिला जाईल. उत्तर नागपूर मध्ये 1 हजार कोटीच्या खर्चातून उड्डाणपूल होत आहे. त्यामुळे गर्दीच्या वस्तीतील वाहतूक कोंडी पासून नागरिकांची सुटका होईल. मात्र यासाठी नागरिकांनी पुढे येऊन सहकार्य करावे, असे आवाहनही त्यांनी केले.

      दोन्ही तलावांमध्ये यापुढे घाण पाणी जाणार नाही. आजुबाजुला अतिक्रमण होणार नाही. कोणाला अतिक्रमण करू देणार नाही यासाठी या वस्तीमधील नागरिकांनीच पुढे यावे, असे आवाहन त्यांनी यावेळी केले.

     तत्पूर्वी, आमदार विकास कुंभारे, आमदार प्रवीण दटके यांनी उपस्थितांना संबोधित केले. या भागातील समस्या, मागण्या याची मांडणी दोन्ही नेत्यांपुढे केली. कार्यक्रमाचे प्रास्ताविक महानगरपालिका आयुक्त राधाकृष्णन बी. यांनी केले. कार्यक्रमाचे संचालन श्वेता शेलगावकर यांनी केले.

            या कार्यक्रमात श्री. फडणवीस आणि श्री. गडकरी यांच्या हस्ते चार लाभार्थ्यांना प्रातिनिधीकरित्या आयुष्मान कार्डचे आभासी पद्धतीने वितरण करण्यात आले.

नागपूर दि. १४ : सामाजिक, सांस्कृतिक, कला, साहित्य, विचार, वारसा या अभ्यासासोबतच आर्थिक व औद्योगिक घडामोडींवर नागपूर कन्व्हेंशन सेंटर एक बौद्धिक संपदा म्हणून तयार होत आहे. त्यामुळे  नागपूरचे डॉ. बाबासाहेब आंबेडकर कन्व्हेंशन सेंटर नागपूर, विदर्भातील अभ्यासकांसाठी मोलाचा ठेवा म्हणून पुढे येईल, असे प्रतिपादन राज्याचे उपमुख्यमंत्री देवेंद्र फडणवीस यांनी आज येथे केले.

            डॉ. बाबासाहेब आंबेडकर आंतरराष्ट्रीय कन्व्हेंशन सेंटरच्या  लोकार्पण सोहळ्यात मुख्य अतिथी म्हणून श्री. फडणवीस बोलत होते. केंद्रीय भूपृष्ठ वाहतूक व महामार्ग मंत्री नितीन गडकरी यांच्या हस्ते या सेंटरचे लोकार्पण झाले. खासदार कृपाल तुमाने, आमदार सर्वश्री डॉ. नितीन राऊत, चंद्रशेखर बावनकुळे, कृष्णा खोपडे, मोहन मते, प्रवीण दटके, नागपूर महानगर प्रदेश विकास प्राधिकरणाचे सभापती मनोज सूर्यवंशी  आणि समाजकल्याण आयुक्त डॉ. प्रमोद नारनवरे आदी मंचावर उपस्थित होते.

            उपमुख्यमंत्री श्री. फडणवीस म्हणाले, डॉ. बाबासाहेब आंबेडकर यांच्या जयंतीदिनी या कन्व्हेंशन सेंटरचे लोकार्पण होत आहे. याचा अत्यंत आनंद आहे. विदर्भ व नागपूरसाठी हे केंद्र अत्यंत उपयोगी ठरेल असा विश्वास व्यक्त करतानाच या  केंद्राच्या उर्वरित कामांसाठी राज्य शासनाच्यावतीने आवश्यक निधी उपलब्ध करून देण्यात येईल असे आश्वस्त केले. या भव्य सेंटरमध्ये प्रवेश करतानाच बाबासाहेबांचे दर्शन व्हावे यासाठी येथे उभारावयाच्या ४० फूट उंचीच्या बाबांसाहेबांच्या पुतळ्यासाठी राज्य शासनाकडून अतिरिक्त ५ कोटींचा निधी लवकरच मंजूर करण्यात येणार असल्याची घोषणा त्यांनी यावेळी केली.

           बाबासाहेबांनी भारताला राज्यघटना दिली. राज्य घटनेमुळेच देश एक आर्थिक महासत्ता म्हणून नावारुपाला येत आहे. राज्यघटनेमुळे सर्वाँना संधीची समानता निर्माण झाली आहे. शंभर वर्षांपूर्वी ‘प्रॉब्लेम ऑफ रुपिज’, हा ग्रंथ लिहून बाबासाहेबांनी आजच्या काळातील आर्थिक प्रश्नांना हात घातला होता. भारतीय समाजापुढे काळया पैशाचा प्रश्न निर्माण होण्याची संकल्पना त्यांनी मांडली. ऊर्जामंत्री म्हणून त्यांनी दूरदृष्टी दाखवत नॅशनल ग्रीडची संकल्पना मांडली. त्यांनी जलसंपदा क्षेत्रातही उल्लेखनीय कार्य केले. नदी जोड प्रकल्पाची संकल्पना मांडली. प्रधानमंत्री नरेंद्र मोदी या दिशेने कार्य करून देशाला पुढे घेवून जात आहेत.

            बाबासाहेबांनी देशाला दिलेल्या राज्य घटनेतील कर्तव्यांचे पालन करून या मार्गावर सर्वाँनी चालावे असे आवाहनही श्री. फडणवीस यांनी केले.

            यावेळी, बोलताना केंद्रीय रस्ते व दळणवळण मंत्री नितीन गडकरी यांनी उत्तर नागपूरच्या समतोल विकासाची ग्वाही दिली. उत्तर नागपूरमधून एक हजार कोटीचा उड्डाणपूल बनत आहे. यामुळे या क्षेत्राचा कायापालट होईल. उत्तर नागपूरवर अन्याय होणार नाही. या ठिकाणचे कोणतेच प्रकल्प अडणार नाही. विकासात कोणतेच राजकारण अडसर ठरणार नाही. डॉ. बाबासाहेब आंबेडकर कन्व्हेशन सेन्टरचे पावित्र्य राखण्याचे आवाहन त्यांनी केले.बाबासाहेबांच्या विचाराप्रमाणे, व्यक्तिमत्त्वाप्रमाणे अभ्यासाप्रमाणे, या ठिकाणी कार्य व्हावे, अशी अपेक्षा व्यक्त केली.

            हा कार्यक्रम नागपूर महानगर प्रदेश विकास प्राधिकरण आणि सामाजिक न्याय व विशेष सहाय्य विभागाने आयोजित केला होता. उत्तर नागपूर विधानसभा मतदार संघाचे आमदार डॉ. नितीन राऊत यांनी यावेळी उपस्थितांना संबोधित केले. नागपूर महानगर प्रदेश विकास प्राधिकरणाचे सभापती मनोज सूर्यवंशी यांनी प्रास्ताविक केले तर समाज कल्याण आयुक्त डॉ. प्रमोद नारनवरे यांनी आभार मानले.

            या कार्यक्रमात गड्डीगोदाम येथील डॉ बाबासाहेब आंबेडकर शासकीय वसतीगृहाचे आभासी लोकार्पण करण्यात आले.

            मुंबई, दि. १४ : राज्यघटनेचे शिल्पकार भारतरत्न डॉ. बाबासाहेब आंबेडकर यांच्या 132 व्या जयंतीनिमित्त राज्यपाल रमेश बैस यांनी शुक्रवारी (दि. 14) राजभवन येथे डॉ. आंबेडकर यांच्या अर्धाकृती पुतळ्याला पुष्पांजली अर्पण करुन अभिवादन केले.

            यावेळी राज्यपालांचे प्रधान सचिव संतोष कुमार, विशेष सचिव विपीन सक्सेना, सहसचिव श्वेता सिंघल, राज्यपालांचे परिवार प्रबंधक अरुण आनंदकर तसेच राजभवनातील अधिकारी व कर्मचारी उपस्थित होते.