जळगाव, दि. २ (जिमाका वृत्तसेवा) :- विद्यार्थी व युवकांनी आपल्या आवडीचे क्षेत्र निवडून त्या क्षेत्राचे कौशल्य प्राप्त करुन आपला विकास साधावा. असे आवाहन राज्याचे पाणीपुरवठा व स्वच्छतामंत्री तथा जिल्ह्याचे पालकमंत्री गुलाबराव पाटील यांनी केले.

          शासन आपल्या दारी अभियानातंर्गत कौशल्य विकास, रोजगार, उद्योजकता व नाविन्यता विभागमार्फत शासकिय औद्योगिक प्रशिक्षण संस्था, धरणगांव यांच्या विद्यमाने श्री मंगल कार्यालय अॅण्ड लॉन्स, धरणगाव येथे इयत्ता दहावी, बारावी पास विद्यार्थी व बेरोजगार युवकांना रोजगार व स्वंयरोजगाराची संधी उपलब्ध होणेसाठी छत्रपती शाहु महाराज युवाशक्ती करीअर शिबीराचे आयोजन करण्यात आले होते. या शिबिराचे उद्घाटन पालकमंत्री ना. गुलाबराव पाटील यांचे हस्ते संपन्न झाले, यावेळी ते बोलत होते. याप्रसंगी कौशल्य विकास विभागाचे सहाय्यक आयुक्त वि. ना. मुकणे, प्रभारी तहसीलदार लक्ष्मण सातपुते, उप जिल्हा व्यवसाय शिक्षण व प्रशिक्षण अधिकारी बी. एम. डोळस, शासकीय औद्योगिक प्रशिक्षण संस्था, धरणगावचे प्राचार्य नवनित चव्हाण, प्रा. नवनित पाटील, ॲड जुबेर शेख, ॲङ व्ही. एस. भोलाणे, श्रीमती शुभांगी पाटील आदि उपस्थित होते.

          पालकमंत्री पुढे म्हणाले की, राज्य शासन युवक व विद्यार्थ्यांचे कौशल्य विकसित करण्यासाठी विविध अभ्यासक्रम उपलब्ध करुन देत आहेत. विद्यार्थ्यांनी आतापासूनच आपल्या आवडीचे क्षेत्र निवडून कौशल्य प्राप्त केले पाहिजेत. कोणत्याही क्षेत्रात जिद्द आणि चिकाटी ठेवून काम केल्यास यश निश्चित मिळते असे सांगून या शिबिरांच्या माध्यमातून मिळणाऱ्या मार्गदर्शनामुळे युवकांना उद्योजक बनण्याची संधी आहे. युवकांनी नोकरीच्या मागे न लागता नोकरी देणारे उद्योजक बनण्यासाठी प्रयत्न करावे. छत्रपती शाहु महाराज युवाशक्ती करीअर शिबीराच्या माध्यमातून शालेय व महाविद्यालयीन विद्यार्थ्यांना दिशा देण्याचे काम होत असल्याने त्यांनी समाधान व्यक्त केले.

          या शिबीरात श्री. मुकणे यांनी कौशल्य विकास, प्रा. नवनित पाटील यांनी करीअर मार्गदर्शन, ॲड शेख यांनी उद्योजकता विकास, ॲड भोलाणे यांनी विविध विषयावर उपस्थितांना विस्तृत मार्गदर्शन केले. सुरुवातीस कौशल्य विकास विभागामार्फत लावलेल्या प्रदर्शनाची पाहणी पालकमंत्री श्री. पाटील यांनी केली. कार्यक्रमाची सुरुवात दीपप्रज्वलनाने झाली. शिबिरास तालुक्यातील युवक, विद्यार्थी, पालक, औद्योगिक प्रशिक्षण संस्थेचे कर्मचारी मोठया संख्येने उपस्थित होते. कार्यक्रम यशस्वी करण्यासाठी औद्योगिक प्रशिक्षण संस्थेच्या कर्मचाऱ्यांनी विशेष परिश्रम घेतले.

अमरावती, दि. 2 : मेळघाटात कुपोषण निर्मलूनाबरोबरच सर्वांगीण विकासाच्या दृष्टीने शिक्षण, कृषी, आरोग्य, पाणीपुरवठा, उद्योगव्यवसाय, पायाभूत सुविधा आदीसंबंधी योजनांची प्रभावी अंमलबजावणी व्हावी. अधिका-यांनी नियमितपणे मेळघाटातील नागरिकांशी थेट संवाद साधून त्यांच्या अडचणी जाणून त्या दूर करण्यासाठी सातत्यपूर्ण प्रयत्न करावेत, असे निर्देश विभागीय आयुक्त डॉ. निधी पाण्डेय यांनी आज येथे दिले.

आदिवासी भागातील बालमृत्यू टाळण्यासाठी गाभा समिती व ‘मिशन मेळघाट’ची आढावा बैठक विभागीय आयुक्तांच्या अध्यक्षतेखाली झाली. यावेळी अमरावतीचे जिल्हाधिकारी विजय भाकरे, जि. प. मुख्य कार्यकारी अधिकारी अविश्यांत पंडा, उपायुक्त संजय पवार, राजीव फडके हे विभागीय आयुक्त कार्यालयात, तर सर्व जिल्ह्यांचे जिल्हाधिकारी मुख्य कार्यकारी अधिकारी, जिल्हा शल्यचिकित्सक, जिल्हा आरोग्य अधिकारी, महिला व बालविकास अधिकारी यांच्यासह विविध अधिकारी ऑनलाईन उपस्थित होते.

विभागीय आयुक्त डॉ. पाण्डेय म्हणाल्या की, मेळघाटात कुपोषण निर्मूलनासाठी सर्वंकष प्रयत्न व्हावेत. त्यासाठी आरोग्य सेवेचा दर्जा उंचावतानाच तेथील सर्वांगीण विकासाच्या दृष्टीने सर्व विभागांच्या योजनांची परिणामकारक अंमलबजावणी होणे आवश्यक आहे. त्यासाठी अधिका-यांनी वेळोवेळी नागरिकांपर्यंत पोहोचून त्यांच्या अडचणी जाणून त्या दूर कराव्यात. सर्व विभागांनी परस्पर समन्वय ठेवून योजना राबविणे आवश्यक आहे.

येता पावसाळा लक्षात घेता सर्व यंत्रणा सुसज्ज ठेवण्याचे निर्देश डॉ. पाण्डेय यांनी दिले. त्या म्हणाल्या, पावसाळ्यात संपर्क तुटणा-या गावांमध्ये धान्य व आवश्यक वस्तूंची, तसेच पुरेसा औषधसाठा आदी तजवीज ठेवावी. प्रदूषित पाण्यामुळे साथीचे आजार पसरू नयेत यासाठी जलस्त्रोतांची गुणवत्ता तपासण्याबरोबरच आवश्यक व्यवस्था करावी. जुने रस्ते, पुल व जुन्या इमारतींचे स्ट्रक्चरल ऑडिट करुन घ्यावे. आवश्यक दुरुस्ती करुन घ्यावी व कार्यवाहीचा अहवाल पंधरा दिवसांत द्यावा. नैसर्गिक आपत्ती किंवा पुरामुळे जीवित व वित्तीय हानी होणार नाही याची दक्षता घेण्यात यावी.

शासकीय योजना, सुविधा व सेवांच्या अधिक परिणामकारकतेसाठी विविध विभागांमध्ये समन्वय असणे आवश्यक आहे. त्यादृष्टीने मेळघाटसाठी धारणी येथील उपविभागीय अधिका-यांनी समन्वय अधिकारी म्हणून काम करावे व मेळघाटातील विविध विभागांच्या कामांचा नियमितपणे घ्यावा, असेही निर्देश यावेळी देण्यात आले.

मेळघाटसाठी समग्र विकास आराखडा तयार करणार

अधिका-यांनी नागरिकांमध्ये स्वत: मिसळून त्यांच्या अडचणी जाणून घ्याव्यात. त्यासाठी मेळघाटातील गावांमध्ये विविध विभागाच्या अधिका-यांनी स्वत: मुक्काम करून नागरिकांचे म्हणणे समजून घ्यावे. तेथील शेती, गावपातळीवरील सुविधा, अडचणी, आवश्यक सुधारणा यांची माहिती घ्यावी. या भेटीत प्राप्त सूचना, मागण्यांबाबत निर्णय घेण्यासाठी सर्व विभागांच्या अधिका-यांची बैठक चिखलदरा येथे लवकरच घेण्यात येईल, असे जिल्हाधिकारी श्री. भाकरे यांनी सांगितले. मेळघाटातील गावांमध्ये भेटी देणा-या अधिका-यांना तेथील आरोग्य, पाणीपुरवठा, रस्ते, शिक्षण आदी आवश्यक सुविधांबाबतचा एक प्रोफार्मा तयार करून देण्यात येईल. त्यानुसार प्राप्त माहितीवर समग्र विकास आराखडा तयार करण्यात येईल, असे श्री. भाकरे यांनी सांगितले.

जिल्हास्तरावर विविध विभागांमध्ये नियुक्त जिल्हास्तरीय अधिका-यांनी दर पंधरवड्यातून एकदा मेळघाटात भेट द्यावी व विभागाच्या योजनांच्या अंमलबजावणीबाबत नागरिकांच्या अपेक्षा जाणून त्यानुसार कार्यवाही करावी, असे आवाहनही करण्यात आले.

राज्य शासनाच्या ‘शासन आपल्या दारी’ अभियानाअंतर्गत बारामती तालुक्यातील कृषि विभाग आणि कृषि तंत्रज्ञान व्यवस्थापन यंत्रणा (आत्मा) पुणे यांच्या प्रयत्नातून मा. बाळासाहेब ठाकरे कृषि व्यवसाय व ग्रामीण परिवर्तन (स्मार्ट) प्रकल्पाअंतर्गत बारामती तालुक्यातील मौजे सांगवी येथील नाथसन शेतकरी उत्पादन कंपनीला १ कोटी १२ लाख ६१  हजार रुपयांचे अनुदानाचा प्रत्यक्ष लाभ मंजूर करण्यात आला आहे.

सांगवी गावात १५ युवा शेतकऱ्यांनी एकत्र येऊन नाथसन फार्मर प्रोड्यूसर कंपनी स्थापन केली. सुरुवातीला पायाभूत सुविधांवर भर देण्यात आला. ‘ना नफा ना तोटा’ या तत्त्वावर औषधे विक्री,  बियाणे विक्री,  खते विक्री असे नियोजन करून शेतकऱ्यांचा उत्पादन खर्च कमी करण्यात कंपनीला यश आले आहे. शेतकऱ्यांला अधिक लाभ मिळावा म्हणून भाजीपाला आणि फळांवर प्रक्रीया करून तयार झालेली अन्न उत्पादने बाजारपेठेत उपलब्ध करण्याचा कंपनीचा प्रयत्न आहे. कंपनीची वार्षिक उलाढाल सुमारे दीड कोटी आहे. त्याचबरोबर कंपनीच्या मालकीचे कृषि सेवा केंद्र आहे.

नाथसन शेतकरी उत्पादन कंपनीने मुल्यसाखळी उप प्रकल्पासाठी प्रक्रिया कारखाना इमारतीस इतर यांत्रिक सुविधांसाठी एकूण २ कोटी ५३  लाख रुपयांच्या खर्चाचा प्रकल्प अहवाल सादर केला होता. कृषि विभागाच्या समितीने शासकीय मापदंडानुसार १ कोटी ८७ लाख ६८ हजार रुपये ग्राह्य धरुन मा. बाळासाहेब ठाकरे कृषि व्यवसाय व ग्रामीण परिवर्तन (स्मार्ट) प्रकल्पाअंतर्गत १  कोटी १२  लाख ६१ हजार रुपये अनुदान मंजूर केले. यामुळे प्रक्रीया उद्योगाच्या दिशेने कंपनीचे प्रयत्न सुरू झाले आहे.

लहान शेतकरी आणि नवउद्योजकांना फायद्याचा प्रकल्प

जागतिक बँकेच्या अर्थसहाय्याने स्मार्ट प्रकल्प राबविण्यात येत आहे. लहान आणि सीमांत शेतकरी तसेच कृषि नव उद्योजकांना केंद्रस्थानी ठेवून शेतमालाच्या सर्वसमावेशक आणि स्पर्धात्मक मुल्यसाखळ्यांच्या विकासासाठी मदत करणे हे प्रकल्पाचे उद्दिष्ट आहे. जागतिक बँक, राज्य शासन आणि खासगी उद्योग क्षेत्र (दायित्व निधीतून) हे निधीचे स्त्रोत असून प्रकल्प अंमलबजावणीचा कालावधी 7 वर्षाचा आहे.

महाराष्ट्र स्पर्धाक्षम विकास प्रकल्प आणि कृषि विभागाचे अन्य उपक्रमाअंतर्गत शेतकरी उत्पादक कंपनी आणि आत्मा नोंदणीकृत शेतकरी गट, महाराष्ट्र राज्य ग्रामीण जीवन्नोती अभियानाअंतर्गत महिला बचत गटांचे प्रभाग संघ, महिला आर्थिक विकास महामंडळाअंतर्गत लोक संचालित साधन केंद्र, सहकार विभागाचे उपक्रमाअंतर्गत प्राथमिक कृषि पतसंस्था (सोसायटीच्या स्तरावर गोदाम सेवा घटकासाठी) आणि इतर उपक्रम व योजनेअंतर्गत उत्पादक संघ यांना ‘स्मार्ट’ अंतर्गत अनुदान देय आहे.

पात्रतेचे निकष

स्मार्ट प्रकल्पांतर्गत लाभासाठी संस्था नोंदणीकृत असणे आणि थकबाकीदार नसणे आवश्यक आहे. उत्पादक भागीदार उप प्रकल्पासाठी किमान २५० भागधारक शेतकरी असावेत. संस्थेची किमान वार्षिक उलाढाल ५ लाख असावी. खरेदीदारासोबत करार झालेला असावा. तर बाजार संपर्क वाढ उप प्रकल्पासाठी आणि  फळे, भाजीपाल्याच्या उप प्रकल्पासाठी किमान ७५० भागधारक शेतकरी असावेत. धान्य आधारीत उप प्रकल्पासाठी किमान २ हजार भागधारक शेतकरी असावेत. किमान वार्षिक उलाढाल २५ लाख असावी.

गोदाम आधारीत उप प्रकल्प मुख्यतः विविध कार्यकारी प्राथमिक कृषि पतसंस्था मार्फत राबविले जातील. समुदाय आधारीत नोंदणकृत संस्था, प्राथमिक कृषि सहकारी संस्था, प्रभाग संघ, व लोकसंचलित साधन केंद्र इत्यादी संस्था या प्रकल्पासाठी पात्र राहतील.  वरील तीन प्रकारच्या उप प्रकल्पामध्ये एखादी तंत्रज्ञानाची बाब राबविण्याची असल्यास त्यासाठी स्वतंत्र उप प्रकल्प राबविता येईल.

अनुदानाचे स्वरूप

प्रति समुदाय आधारित संस्था मंजूर उपप्रकल्प मूल्याच्या जास्तीत जास्त ६० टक्के रक्कम व्यवहार्यता अंतर निधी नुसार अनुदान स्वरूपात देय राहील. मात्र फलोत्पादन आधारित प्रकल्पासाठी ३ कोटी रुपयांच्या मर्यादेत, अन्य पिकावर आधारित प्रकल्पासाठी २ कोटी रुपयांच्या मर्यादेत व पूरक नावीन्यपूर्ण तंत्रज्ञान आधारित प्रकल्पासाठी ५० लाखाच्या मर्यादेत अनुदान देय राहील.

प्रकल्पाची अंमलबजावणी

कृषी, पशुसंवर्धन, पणन, सहकार, महिला व बाल कल्याण, ग्राम विकास व नगर विकास या सात प्रशासकीय विभागांच्या अकरा यंत्रणा मिळून हा प्रकल्प राबविण्यात येतो. अधिक माहितीसाठी मा. बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्प, शेती महामंडळ भवन, २७०, भांबुर्डा, सेनापती बापट मार्ग, पुणे दूरध्वनी- ०२०-२५६५६५७७ / २५६५६५७८ ई-मेल ऍड्रेस pcmusmart@gmail.com वर संपर्क साधावा.

नितीन तावरे, अध्यक्ष, नाथसन शेतकरी उत्पादन कंपनी: ‘शासन आपल्या दारी’ या अभियानांतर्गत कृषि विभागाच्या ‘स्मार्ट प्रकल्पाच्या’ माध्यमातून कंपनीला उप प्रकल्पासाठी १ कोटी रुपयांचे अनुदानाचा प्रत्यक्ष लाभ मंजूर झाला आहे. अनुदानामुळे सहा महिन्याच्या काळात प्रोसेसिंग युनिटचे काम पूर्णत्वास नेण्यास मदत होईल. या माध्यमातून शेतकऱ्यांच्या शेत मालावर प्रक्रिया करून मूल्यवर्धन करण्याचे कार्य करण्यात येईल.

        सांगली दि. 2 (जि.मा.का.) : मिरज शहरातील छत्रपती शिवाजी महाराज रस्त्याचे काम ऑक्टोबर अख्रेर पर्यंत पूर्ण करा. या रस्त्यावरील ड्रेनेजचे काम 30 जूनच्या आत पूर्ण करा. त्यासाठी संबंधित सर्व यंत्रणांनी समन्वय ठेवावा. काम करताना हलगर्जीपणा होत असल्यास बीले देण्याचे यंत्रणांनी घाई करू नये, असे निर्देश पालकमंत्री डॉ. सुरेश खाडे यांनी ‍दिले.

            मिरज शहरातील छत्रपती शिवाजी महाराज रस्त्याच्या कामकाजाचा पालकमंत्री डॉ. खाडे यांनी आज जिल्हाधिकारी कार्यालयात एका बैठकीत आढावा घेतला. बैठकीस निवासी उपजिल्हाधिकारी विजयसिंह पाटील, मिरज उपविभागीय अधिकारी श्री. दिघे, महापालिकेच्या उपायुक्त स्मृती पाटील, राष्ट्रीय महामार्ग कोल्हापूरचे प्रोजेक्ट डायरेक्टर वसंत पंढरकर, राष्ट्रीय महामार्गचे सी. बी. भरडे,  सार्वजनिक बांधकाम  विभागाचे कार्यकारी अभियंता श्री. मिरजकर यांच्यासह राष्ट्रीय महामार्गाचे अधिकारी, एमएसईबी व एसटी महामंडळाचे अधिकारी उपस्थित होते.

            मिरज शहरातून जाणारा छत्रपती शिवाजी महाराज रस्ता महत्वाचा आहे. या रस्त्याचे काम जलदगतीने होवून तो पूर्ण होणे गरजेचे आहे. ज्या ठिकाणी रस्त्याचे काम पूर्ण झाले आहे त्यातील काही ठिकाणी महापालिकेने खोल खुदाई केल्याचे राष्ट्रीय महामार्ग यंत्रणेने बैठकीत निदर्शनात आणून दिले असता  रस्ता खुदाई बाबत पालकमंत्री डॉ. खाडे यांनी तीव्र नाराजी व्यक्त केली. महापालकेने रस्ता खुदाई का केली याचे स्पष्टीकरण द्यावे व खुदाई केलेल्या रस्त्याचे काम राष्ट्रीय महामार्गाच्या दर्जानुसार पूर्ण करून द्यावे, अशा सूचना पालकमंत्री डॉ. खाडे यांनी महापालिकेच्या अधिकाऱ्यांना दिल्या.

            या रस्त्यामध्ये येणारे विजेचे खांब राष्ट्रीय महामार्ग यंत्रणेने त्वरित काढावेत.  या रस्त्याच्या कामात १९३ पोलचे स्थलांतर करण्यात येणार आहे. विद्युत वितरण कंपनी यासाठी वेळोवेळी सहकार्य करीत आहे. त्यामुळे राष्ट्रीय महामार्ग यंत्रणेने या कामास प्राधान्य द्यावे. या रस्त्याच्या कामामध्ये एस. टी. महामंडळाकडील रस्त्यालगतीची भिंत तसेच छत्रपती शिवाजी महाराज क्रीडांगणाची भिंत अडथळा ठरत असून 12 जून पर्यंत हा अडथळा यंत्रणेने दूर करावा. महानगरपालिकेने रस्त्याच्या कामात अतिक्रमण ठरत असलेल्या अन्य इमारतींचेही अतिक्रमण काढण्यासाठी आवश्यक कार्यवाही करावी. रस्त्याच्या दोन्ही बाजूच्या गटारीचे काम पावसाळ्यापूर्वी पूर्ण होणे आवश्यक आहे. गटारीच्या पाण्यामुळे या भागातील नागरिकांना कोणतीही अडचण येणार नाही याची दक्षता घ्यावी अशा सूचना पालकमंत्री डॉ. सुरेश खाडे यांनी दिल्या.

यवतमाळ, दि.२ जून (जिमाका):- सोयाबीनचे नवीन वाण फुले संगम, फुले किमया, एमएयूएस-६१२, एमएयूएस-१६२, येलो गोल्ड इत्यादी वाणाचे उच्चतम गुणवत्तेचे प्रमाणित बियाणे रास्त दरात उपलब्ध होईल, अशी ग्वाही महाबीजचे व्यवस्थापकीय संचालक सचिन कलंत्रे यांनी दिली.

             कोरोनामुळे मागील दोन वर्षापासून महाबीज विक्रेते व व्यवस्थापन यांच्या मध्ये प्रत्यक्ष संवाद न झाल्यामुळे प्रत्यक्ष चर्चा व विक्रेत्यांचे समस्यांचे निवारण करण्याकरिता जिल्ह्यामध्ये संमेलनाचे आयोजन हॉटेल

व्हेनेशियन सेलेब्रेशन यवतमाळ येथे करण्यात आले होते. यात व्यवस्थापकीय संचालक सचिन कलंत्रे यांनी विक्रेत्याशी प्रत्यक्ष चर्चा करून तसेच हिरवळीचे खत पिकाचे विक्री करून जमिनीचे आरोग्य सुधारण्याकरिता शेतकऱ्याना मार्गदर्शन करण्यास सांगितले. उत्पादकता वाढवण्याकरीता सर्व शेतकऱ्यांना महाबीज चे जैविक खताचे बिज प्रक्रिया करावी असेही त्यांनी सांगितले.

महाव्यवस्थापक विपणन प्रकाश टाटर यांनी येणाऱ्या खरीप हंगामामध्ये यवतमाळ जिल्ह्यातील शेतकऱ्यांना सोयाबीन व तूर पिकाचे दहा पेक्षा जास्त नवनवीन वाणाचे प्रमाणित बियाणे आवंटीत केल्यामुळे वाण बदल होऊन उत्पादकता वाढण्यास मदत होईल असे सांगितले.

महाव्यवस्थापक उत्पादन विवेक ठाकरे यांनी उच्च गुणवत्तेच्या बियाण्याचे बिजोत्पादन साखळी बाबत मार्गदर्शन केले. विभागीय व्यवस्थापक जगदीश खोकड यांनी विभागातील एकूण बियाणे, जैविक खते, जैविक बुरशीनाशक तसेच केळी व पपई रोपांचे विक्री बाबतचा आढावा घेतला. जिल्हा व्यवस्थापक अशोक ठाकरे यांनी येणाऱ्या खरीप मधील यवतमाळ जिल्ह्यातील उपलब्ध पिक वाणा बाबतचे नियोजनाचे सादरीकरण केले.

याप्रसंगी महाबीज विक्रेते भैयासाहेब मानकर यांच्या उपस्थितीत सुदर्शन कृषी केंद्र,आर्णी चे कोषटवार,जैन ॲग्री  कल्चर एजन्सी यवतमाळ,दर्डा मकावनी कृषी केंद्र नेर चे शाहरूख, तसेच सहकार क्षेत्रातील उत्कृष्ट कामगिरीबद्दल (व्ही.सी.एम.एस),चे राजगुरू व झरीजामनी तालुका खरेदी विक्री संघ मुकुटबन चे गोंगलवार यांचा सत्कार करण्यात आला. कार्यक्रमाचे संचालन कृषी क्षेत्र अधिकारी प्रशांत देशमुख यांनी केले व कार्यक्रमाचे आभार कृषी क्षेत्र अधिकारी विजय भागवत यांनी मानले. कार्यक्रम यशस्वी करणेकरीता कृषी क्षेत्र अधिकारी, जीवन चव्हाण, केंद्र अभियंता स्वप्निल बुळे व इतर कर्मचाऱ्यांनी मोठ्या प्रमाणात सहभाग घेतला होता.

पुणे, दि. २: बंदरे व खनिकर्म मंत्री दादाजी भुसे यांनी आज नऱ्हे, आंबेगाव येथे शिवसृष्टीला भेट देऊन पाहणी केली.

महाराजा शिवछत्रपती प्रतिष्ठानचे विश्वस्त विनीत कुबेर, सुनील मुतालिक, शिवसृष्टी प्रकल्पाचे प्रशासकीय अधिकारी अनिल पवार, तहसीलदार किरण सुरवसे आदी यावेळी उपस्थित होते.

यावेळी मंत्री श्री. भुसे यांनी महाराजा शिवछत्रपती प्रतिष्ठानच्यावतीने उभारण्यात येत असलेल्या शिवसृष्टी प्रकल्पातील सुरू असलेल्या पहिला टप्प्यातील सरकार वाडा अंतर्गत महत्वाचे गडकिल्ल्यांची माहिती असलेले दुर्गवैभव, रणांगण : युद्धक्षेत्र, श्रीमंत योगी आज्ञापत्र, आग्र्याहून सुटका, शस्त्रांची गॅलरी, सिंहासनाधीश्वर, राज्याभिषेकाचे दालन येथे भेटी देऊन उत्सुकतेने माहिती घेतली. त्यांनी श्रीमंत योगी आणि आग्र्याहून सुटका या प्रसंगाचे दृकश्राव्य सादरीकरण प्रत्यक्ष पाहिले.

३५० व्या शिवराज्याभिषेक वर्ष सोहळ्याला रायगड येथे उपस्थित राहिल्यानंतर लगेच येथे शिवसृष्टीला भेट देता आली याचा आनंद व्यक्त करून मंत्री श्री. भुसे म्हणाले, स्व. बाबासाहेब पुरंदरे यांनी आपले संपूर्ण जीवन छत्रपती शिवाजी महाराजांच्या जीवनकार्याची आणि पराक्रमाची माहिती जनसामान्यांपर्यंत पोहोचविण्यासाठी व्यतीत केले. त्यांचा संकल्प शिवसृष्टीच्या कामाला गती देऊन महाराजा शिवछत्रपती प्रतिष्ठान पुढे नेत आहे. हा अवर्णनीय असा प्रकल्प आहे. राज्य शासनाकडून या प्रकल्पाला ५० कोटी रुपये देण्यात आले असून भविष्यातही सहकार्य केले जाईल. कंपन्यांचे सामाजिक उत्तरदायित्व निधीतून अधिकाधिक तरतूद उपलब्ध होण्यासाठी सहकार्य करण्यात येईल असेही ते म्हणाले.

यावेळी विश्वस्त श्री. कुबेर यांनी प्रकल्पाविषयी माहिती दिली. हा एकूण ४३८ कोटी रुपये खर्चाचा एकूण ४ टप्प्याचा प्रकल्प असून ६० कोटी रुपये खर्चून पूर्ण झालेला पहिल्या टप्पा कार्यान्वित आहे. दुसऱ्या टप्प्याचे काम गतीने सुरू असून पुढील वर्षी शिवराज्याभिषेक दिनापूर्वी पूर्ण करण्याचे नियोजन आहे. २०२६ पर्यंत संपूर्ण प्रकल्प पूर्ण करण्याचे प्रयत्न आहेत, अशीही माहिती यावेळी देण्यात आली.

मुंबई, दि. 2 : राज्य शासनाच्यावतीने छत्रपती शिवाजी महाराजांचा 350 वा शिवराज्याभिषेक वर्ष सोहळा राज्यभरात उत्साहात साजरा करण्यात येत आहे. यानिमित्त शुक्रवार दि. 2 जून 2023 रोजी किल्ले रायगडावर झालेल्या कार्यक्रमात प्रधानमंत्री नरेंद्र मोदी यांनी जनतेला शुभेच्छा दिल्या आहेत. तसेच मुख्यमंत्री एकनाथ शिंदे, उपमुख्यमंत्री देवेंद्र फडणवीस आणि सांस्कृतिक कार्य मंत्री सुधीर मुनगंटीवार यांनीही आपल्या भाषणातून राज्यातील जनतेला शुभेच्छा दिल्या आहेत. त्यांचे हे विचार आपणास ‘दिलखुलास’ कार्यक्रमातून ऐकावयास मिळणार आहेत.

छत्रपती शिवाजी महाराजांच्या शिवराज्याभिषेक दिनानिमित्त महाराजांचे विचार, कार्यपद्धती आणि योगदान भावी पिढीपर्यंत पोहोचावे यासाठी सांस्कृतिक कार्य विभागामार्फत राज्यात विविध कार्यक्रमांचे आयोजन करण्यात आले आहे. माहिती व जनसंपर्क महासंचालनालय निर्मित ‘दिलखुलास’ कार्यक्रमातून किल्ले रायगडावरील झालेल्या कार्यक्रमात प्रधानमंत्री श्री. मोदी यांनी दिलेला संदेश, मुख्यमंत्री श्री. शिंदे, उपमुख्यमंत्री श्री. फडणवीस आणि सांस्कृतिक कार्य मंत्री श्री. मुनगंटीवार यांनी व्यक्त केलेले मनोगत शनिवार दि. 3, सोमवार दि. 5 आणि मंगळवार दि.6 जून 2023 रोजी सकाळी 7.25 ते 7.40 या वेळेत आकाशवाणीच्या सर्व केंद्रांवरून व ‘न्यूज ऑन एआयआर’ या मोबाईल ॲपवर प्रसारित होणार आहे.

0000