छत्रपती संभाजीनगर, दि.१६ (जिमाका):  साहित्यरत्न लोकशाहीर अण्णा भाऊ साठे यांचे उत्तम स्मारक पुतळ्याच्या रुपाने उभे रहावे. तसेच सर्वोपयोगी अद्यावत सभागृह उभारले जावे. आम्ही सर्व लोकप्रतिनिधी एकविचाराने अशा लोकोपयोगी कमांसाठी आवश्यक निधी उपलब्ध करुन देऊ,असे आश्वासन राज्याचे सामाजिक न्याय तथा जिल्ह्याचे पालकमंत्री संजय शिरसाट यांनी आज येथे दिले.

साहित्यरत्न लोकशाहीर अण्णा भाऊ साठे यांचा पूर्णाकृती पुतळा आणि परिसर सुशिभिकरण या कामाचे भुमिपूजन पालकमंत्री संजय शिरसाट यांच्या हस्ते झाले. यावेळी इतर मागासवर्ग कल्याण व दुग्धविकास मंत्री अतुल सावे, मनपा आयुक्त तथा प्रशासक जी. श्रीकांत, संजय ठोकळ, राजेंद्र जंजाळ तसेच अनेक कार्यकर्ते उपस्थित होते.

पालकमंत्री शिरसाट म्हणाले की, पुतळ्याचे सुशोभिकरण व परिसराचा विकास ही मागणी गेल्या अनेक वर्षांपासून प्रलंबित आहे. कदाचित हे चांगले काम माझ्या हातून व्हावे, असे होणार असावे. आता सर्व लोकप्रतिनिधी हे एक विचारांचे आहेत. अशा चांगल्या कामासाठी आम्ही निधी आणून हे काम पूर्ण करु. समाजहिताच्या या कामाच्या गुणवत्तेत तडजोड करणार नाही. उत्तम दर्जाचे काम करु. पुतळा, परिसर विकास व सभागृह अशा कामांसाठी निधी उपलब्ध करुन देऊ,असे आश्वास पालकमंत्री शिरसाट यांनी दिले.

इमाव कल्याण मंत्री अतुल सावे म्हणाले की, अण्णा भाऊ साठे यांचे साहित्य हे समाजाला बोध देणारे आहे. हे साहित्य सर्वांपर्यंत पोहोचविले पाहिजे. प्रत्येकाने ते वाचायला हवे. अण्णा भाऊ साठे यांचे यथोचित स्मारक आणि परिसराच्या विकासासाठी आवश्यक निधी उपलब्ध करुन देण्यासाठी आपण वचनबद्ध आहोत,असे त्यांनी सांगितले.

प्रास्ताविक संजय ठोकळ यांनी केले. पंचशिला भालेराव व त्यांच्या कलापथकातील कलावंतांनी अण्णा भाऊ साठे यांची गाणी सादर केली.  विनोद साबळे यांनी आभार मानले.

०००

धुळे, दि. १६ (जिमाका): सध्याच्या आधुनिक डिजिटल युगामध्ये नवनवीन तंत्रज्ञानामुळे वाचन संस्कृती लोप पावत आहे. विद्यार्थ्यामध्ये वाचन संस्कृती रुजवून चांगले कवी, लेखक, विचारवंत, साहित्यिक, विचारवंत निर्माण करावे, असे प्रतिपादन राज्याचे पणन व राजशिष्टाचार तथा धुळे जिल्ह्याचे पालकमंत्री जयकुमार रावल यांनी केले.

राज्याच्या उच्च व तंत्र शिक्षण विभाग, ग्रंथालय संचालनालय, महाराष्ट्र राज्य, मुंबई, जिल्हा ग्रंथालय अधिकारी कार्यालय, धुळे, ज्येष्ठांचे टोणगांवकर ग्रंथालय, दोंडाईचा यांच्या संयुक्त विद्यमाने आयोजित दोन दिवसीय धुळे ग्रंथोत्सवाचा समारोप झाला. यावेळी पालकमंत्री रावल बोलत होते. या कार्यक्रमास जिल्हा ग्रंथालय अधिकारी जगदिश पाटील, ज्येष्ठ साहित्यिक डॉ. संजीव गिरासे, साहित्य समिक्षक डॉ.फुला बागुल, प्राध्यापक डॉ.रमेश माने, अहिराणी कथाकार प्रविण माळी, साहित्यिक सुरेश मोरे, प्रभाकर शेळके, महाराष्ट्र राज्य ग्रंथालय संघाचे अध्यक्ष गजानन कोटेवार, नाशिक विभागीय ग्रंथालय संघाचे अध्यक्ष डॉ. दत्ता परदेशी, महाराष्ट्र राज्य ग्रंथालय संघाचे प्रमुख कार्यवाहक अनिल सोनवणे आदी उपस्थित होते.

पालकमंत्री रावल म्हणाले की, आज जग वेगाने बदलत आहे आणि इतक्या वेगाने बदलते की एक गोष्ट आपल्याला समजण्याच्या अगोदर दुसरे काही नवनवीन तंत्रज्ञान येत आहे. आज सोशल मीडिया, व्हॉट्सअप संपत नाही तोवर ए.आय हे नवीन तंत्रज्ञान आले आहे. या तंत्रज्ञानाचा मोठा परिणाम वाचन संस्कृतीवर होत आहे. आजच्या युवा पिढीचे वाचन कमी झाले आहे. इंग्रजांनी 200 वर्षापूर्वी देशात इंग्रजी भाषा आणली आणि या इंग्रजी भाषेत आपण सर्व जण गुरफुटून गेलो आहे. यामुळे आज आपण अहिराणी, मराठी भाषा बोलणे विसरून चाललो आहे. या भाषेला टिकविण्यासाठी आपण सर्वांनी जाणीवपूर्वक प्रयत्न आणि कष्ट आपल्याला करावे लागणार आहे. मुलांना अहिराणी थोडीफार यायला पाहिजे ते शिकविण्याचा प्रयत्न झाला पाहिजे. अहिराणी असो, मराठी असो ही आपली स्वत:ची भाषा प्रत्येकाला येणे आवश्यक आहे.  सांस्कृतिक वारसा असणारे भारत वर्ष आपल्याला निर्माण करण्यासाठी आपल्या सगळ्यांना प्रयत्न करावे लागणार आहे. येत्या काळात जिल्हा वार्षिक योजनेच्या माध्यमातून तसेच राज्य शासनाच्या माध्यमातूनही वाचनालयासाठी अधिक निधी उपलब्ध करुन देण्यात येईल. आज साहित्यिकांची संख्या हळूहळू कमी होत आहे.  आपण नामशेष होण्याच्या मार्गावर आहे. त्यामुळे वाचन संस्कृती रुजवून चांगले कवी, लेखक, विचारवंत, साहित्यिक, विचारवंत निर्माण करण्याची गरज असल्याचे पालकमंत्री रावल यांनी सांगितले. यानंतर पालकमंत्री जयकुमार रावल यांनी पुस्तक प्रदर्शनाला भेट दिली.

या दोन दिवशीय ग्रंथोत्सवात काल परिसंवाद कार्यक्रमांत ‘ग्रंथानी मला घडविले’ या विषयावर विद्यार्थ्यांना निवासी उपजिल्हाधिकारी नितीन गावंडे यांनी मार्गदर्शन केले. आज झालेल्या परिसंवाद कार्यक्रमात ज्येष्ठ साहित्यिक डॉ. संजीव गिरासे, साहित्य समिक्षक डॉ.फुला बागुल, प्राध्यापक डॉ.रमेश माने यांनी ‘खान्देशातील अहिराणी साहित्याची वाटचाल’ या विषयावर उपस्थित श्रोत्यांना सखोल मार्गदर्शन केले. कथाकथन कार्यक्रमात साहित्यिक सुरेश मोरे यांनी शेतकरी आत्महत्या या विषयांवर ‘यसा दादानी फाशी लीदी’ यावर कथाकथन केले. तर अहिराणी कथाकार प्रविण माळी यांनी ‘आयतं पोयतं सख्यांन’ हे एकपात्री नाटक सादर करुन प्रेक्षकांना हसवुन मंत्रमुग्ध केले.

बहुभाषिक कवी संमेलनात प्रभाकर शेळके, रावसाहेब कुवर, अरुणकुमार जव्हेरी, लतिका चौधरी, के.बी.लोहार, बाळु श्रीराम, प्रविण पवार, चंद्रशेखर कासार, प्रा.एन.डी.पाटील, माया साळुंखे, दत्तात्रय कल्याणकर, कमलेश शिंदे, गुलाब मोरे, अरविंद भामरे, शामल पाटील, सुनिल पाटील, गोकुळ बागुल, यशवंत निकवाडे, ईश्वर परदेशी, दत्तात्रय वाघ, जयराम मोरे, अहमद शेख, संजय धनगड, पौर्णिमा पाठक या कवीनी सहभाग घेतला. कवी संमेलनांनी उपस्थित श्रोत्यांना मंत्रमुग्ध केले.  कार्यक्रमाचे सुत्रसंचलन ज्ञानेश्वर भामरे यांनी तर आभार जिल्हा ग्रंथालय अधिकारी जगदिश पाटील यांनी मानले.

०००

सांगली, दि. १६, (जिमाका) : शासकीय महाविद्यालयामध्ये विद्यार्थ्यांना उच्च दर्जाचे शिक्षण मिळण्यासाठी प्रयत्न करू. शासकीय रूग्णालयात येणाऱ्या रूग्णांची चांगल्या प्रकारे सेवा करावी. त्यांना चांगली सुविधा द्यावी, असे प्रतिपादन वैद्यकीय शिक्षण मंत्री हसन मुश्रीफ यांनी केले.

शासकीय वैद्यकीय महाविद्यालय व रुग्णालय मिरज येथे मॉड्युलर आय.सी.यू. आणि मॉड्युलर ऑपरेशन थेएटर चे लोकार्पण वैद्यकीय शिक्षण मंत्री हसन मुश्रीफ यांच्या हस्ते झाले. त्या प्रसंगी आयोजित कार्यक्रमात ते बोलत होते. यावेळी खासदार विशाल पाटील, आमदार इद्रिस नायकवडी, आमदार डॉ. सुरेश खाडे, शासकीय वैद्यकीय महाविद्यालय मिरज चे अधिष्ठाता डॉ. प्रकाश गुरव, वैद्यकीय अधिक्षक डॉ. प्रियांका राठी, उपवैद्यकीय अधिक्षक डॉ. रुपेश शिंदे, जिल्हा नियोजन अधिकारी अशोक पाटील यांच्यासह महापालिकेचे माजी पदाधिकारी, शासकीय वैद्यकीय महाविद्यालयाचे अधिकारी, विद्यार्थी उपस्थित होते.

शासकीय वैद्यकीय महाविद्यालय व रुग्णालय मिरज येथे मॉड्युलर आय.सी.यू. आणि मॉड्युलर ऑपरेशन थेएटर चे लोकार्पण झाल्याचे जाहीर करून मंत्री मुश्रीफ म्हणाले, या नविन सुविधेचा गोरगरीब व सामान्य जनतेला लाभ व्हावा. वैद्यकिय अधिकाऱ्यांनी याचा लाभ सामान्य जनतेला होण्यासाठी व्यवस्था करावी. शासकीय रूग्णालय व महाविद्यालयामध्ये सोयी सुविधा पुरविण्यासाठी प्रामाणिक प्रयत्न करीत आहोत. शासकीय वैद्यकीय महाविद्यालयामध्ये मेरीटवर विद्यार्थ्यांना प्रवेश दिला जातो. अशा विद्यार्थ्यांचे शिक्षण चांगले होणे, त्यांना चांगली सुविधा देणे व तशा प्रकारचे काम करण्याची शासनाची व आम्हा सर्वांची जबाबदारी आहे. विद्यार्थ्यांना उच्च दर्जाचे शिक्षण देऊन त्यांना गोरगरीब जनतेची सेवा करण्यासाठी तयार करणे हे काम हातामध्ये घेऊ. या रूग्णालयामध्ये विद्यार्थी, विद्यार्थीनींच्या वसतिगृह दुरूस्तीसाठी 17 कोटी रूपयांचा निधी उपलब्ध करून देण्यात आल्याचे सांगून याचे काम पावसाळ्यापूर्वी पूर्ण होईल, असे ते म्हणाले. या रूग्णालयामध्ये हृदयरोग विभाग, मिरजेला कॅन्सर केअर हॉस्पीटल लवकरात लवकर सुरू करण्यासाठी, नर्सिंग कॉलेजला इमारत मंजूर होण्यासाठी, सुपरस्पेशालिटी रूग्णालय मंजूर होण्यासाठी प्रयत्न करू असे ते म्हणाले.

खासदार विशाल पाटील म्हणाले, सांगली व मिरज ची पूर्वीपासून वैद्यकिय पंढरी म्हणून ओळख आहे. शासकीय वैद्यकीय महाविद्यालय व रुग्णालयास अनेक सुविधा उपलब्ध करून दिल्या आहेत. महाराष्ट्रात सांगली जिल्हा वैद्यकीय पायाभूत सुविधामध्ये अग्रेसर आहे. शासकीय वैद्यकीय महाविद्यालयामध्ये शिक्षण घेत असलेल्या विद्यार्थ्यांनी नवनविन तंत्रज्ञानाचे प्रशिक्षण घेतले पाहिजे. त्यासाठी चांगल्या सुविधा देऊ. आवश्यक साधनसामग्री उपलब्ध करून देण्यासाठी, मिरज येथे नर्सिंग कॉलेज व सुपर स्पेशलिटी हॉस्पिटल होण्यासाठी आवश्यक निधीसाठी आम्ही सर्वजण प्रयत्न करू असे ते म्हणाले.

आमदार इद्रिस नायकवडी म्हणाले, मिरज वैद्यकीय महाविद्यालय व रूग्णालयास भरीव निधी उपलब्ध करून देण्यात आला आहे. हे रूग्णालय मल्टिस्पेशालिटी हॉस्पीटल होण्यासाठी प्रयत्न करावेत. त्याचबरोबर विविध शासकीय योजनांच्या माध्यमातून देण्यात येणाऱ्या मदतीच्या दरामध्ये वाढ होण्याची आवश्यकता असल्याचे ते म्हणाले.

आमदार डॉ. सुरेश खाडे म्हणाले, शासकीय वैद्यकिय महाविद्यालय व रूग्णालय हे गोरगरीब रूग्णांचा आधारस्तंभ म्हणून उभे आहे. हे हॉस्पीटल चांगले व्हावे गोरगरीब रूग्णांना चांगली सेवा मिळावी यासाठी आम्ही सर्वजण प्रयत्नशील आहोत. सांगली व मिरज शासकीय रूग्णालयामध्ये आवश्यक सोयी सुविधांसाठी भरीव निधी उपलब्ध करून देण्यात आला आहे. या रूग्णालय व महाविद्यालयामध्ये विद्यार्थ्यांना चांगले शिक्षण व रूग्णांना चांगली सेवा मिळावी हे ध्येय ठेवून काम करीत आहोत. डॉक्टरांनी रूग्णांना चांगली सेवा द्यावी, रूग्णांनी या सेवेचा लाभ घ्यावा, असे ते म्हणाले.

प्रारंभी मंत्री मुश्रीफ यांच्या हस्ते मॉड्युलर आय.सी.यू. आणि मॉड्युलर ऑपरेशन थेएटरचे फित कापून लोकार्पण करण्यात आले.

प्रास्ताविकात शासकीय वैद्यकीय महाविद्यालय व रुग्णालयाचे अधिष्ठाता डॉ प्रकाश गुरव यांनी रूग्णालयात पुरविण्यात आलेल्या विविध सोयी सुविधांबद्दल सविस्तर माहिती दिली. सूत्रसंचालन उपवैद्यकीय अधीक्षक रुपेश शिंदे यांनी केले.

०००