लातूर, दि. 17 (जिमाका) : मराठवाडा मुक्तिसंग्रामाचे अमृत महोत्सवी वर्ष साजरे होत आहे. मराठवाड्याच्या विकासासाठी राज्य शासनाकडून विशेष प्रयत्न करण्यात येत आहेत. शनिवारी छत्रपती संभाजीनगर येथे झालेल्या मंत्रिमंडळ बैठकीत मराठवाड्याच्या विकासाच्या विविध प्रलंबित प्रश्नांची सोडवणूक झाली असल्याचे क्रीडा व युवक कल्याण मंत्री संजय बनसोडे यांनी सांगितले. मराठवाडा मुक्तिसंग्राम दिनानिमित्त हुतात्मा स्मारक येथे आयोजित मुख्य शासकीय ध्वजवंदन कार्यक्रमात उपस्थितांना शुभेच्छा देताना ते बोलत होते.

स्वातंत्र्य सैनिक व त्यांचे कुटुंबिय, खासदार सुधाकर शृंगारे, जिल्हाधिकारी वर्षा ठाकूर-घुगे, जिल्हा पोलीस अधीक्षक सोमय मुंडे, जिल्हा परिषदेचे मुख्य कार्यकारी अधिकारी अनमोल सागर, लातूर शहर महानगरपालिका आयुक्त बाबासाहेब मनोहरे यांच्यासह अधिकारी, कर्मचारी, नागरिक व पत्रकार यावेळी उपस्थित होते.

मंत्रिमंडळ बैठकीत मराठवाड्यासाठी सुमारे 59 हजार कोटी रुपयांचे विशेष पॅकेज जाहीर करण्यात आले. लातूर-टेंभूर्णी मार्ग, लातूर जिल्ह्यातील एमआयडीसी यासह विविध कामांच्या प्रस्तावांना मान्यता मिळाली असल्याचे ना. बनसोडे यावेळी म्हणाले.

मराठवाडा मुक्तिसंग्रामात लातूरकरांचे योगदान खूप महत्वाचे आहे. या लढ्यात अनेकांनी बलिदान दिले. महाराष्ट्र परिषदेची महत्वाची दोन अधिवेशने लातूरमध्ये झाली. या भागात आर्य समाजाचा अधिक प्रभाव होता. औराद, निलंगा, होडोळी, बोटकुल, हत्तीबेट, रामघाट, अंबुलगा, तोंडचीर आणि घोणसी अशा अनेक ठिकाणी झालेल्या लढाईचा इतिहास सुवर्ण अक्षराने लिहून ठेवण्यासारखा आहे. मुक्तिसंग्रामात स्वातंत्र्य सैनिकांच्या निजाम व रझाकार यांच्याशी झालेल्या लढायांचे स्मरण व्हावे, यासाठी अशा लढाईच्या ठिकाणी स्मारक उभे करण्यात येत आहेत. तसेच रामघाटच्या प्रसिद्ध लढाईचे चीरस्मरण म्हणून त्याठिकाणी भव्य प्रवेशद्वार उभे केले जाणार आहे. यासाठी नुकतेच शासनाने सुमारे 98 लक्ष रुपयांच्या खर्चास प्रशासकीय मान्यता दिली असल्याचे ना. बनसोडे यांनी सांगितले.

मराठवाडा मुक्तिसंग्राम अमृत महोत्सवी वर्षानिमित्त जिल्ह्यात आयोजित ‘शौर्यगाथा मराठवाडा मुक्तिसंग्रामाची’ व्याख्यानमाला, माजी कुलगुरू तथा ज्येष्ठ साहित्यिक डॉ. जनार्दन वाघमारे आणि प्राचार्य प्रा. सोमनाथ रोडे यांची मराठवाडा मुक्तिलढ्यावर प्रकट मुलाखत, ग्रंथ व दुर्मिळ छायाचित्रांचे प्रदर्शन आदी उपक्रमांतून मुक्तिसंग्रामाचा इतिहास जनतेपर्यंत पोहोचविण्यासाठी प्रयत्न करण्यात आल्याचे त्यांनी सांगितले.

प्रारंभी क्रीडा व युवक कल्याण मंत्री ना. बनसोडे यांच्या हस्ते स्मृतीस्तंभाला पुष्पचक्र अर्पण करण्यात आले. त्यानंतर पोलीस पथकाने हवेत बंदुकीच्या तीन फैरी झाडून शस्त्र सलामी दिली. ना. बनसोडे यांच्या हस्ते ध्वजवंदन करण्यात आले. तसेच उपस्थितांना मराठवाडा भूमीला समृद्ध करण्यासाठी वचनबद्ध राहण्याची शपथ देण्यात आली. यावेळी उपस्थित स्वातंत्र्य सैनिक व त्यांच्या कुटुंबियांची भेट घेवून ना. बनसोडे यांनी त्यांचा सत्कार केला. तसेच आजी-माजी लोकप्रतिनिधी, नागरिक, पत्रकार यांना मराठवाडा मुक्तिसंग्राम दिनाच्या शुभेच्छा दिल्या. कार्यक्रमाचे संचालन उद्धव फड यांनी केले.

ग्रंथ व दुर्मिळ छायाचित्रे प्रदर्शन, चित्ररथाला भेट

मराठवाडा मुक्तिसंग्रामाच्या अमृत महोत्सवी वर्षानिमित्त जिल्हा प्रशासनामार्फत ग्रंथ व दुर्मिळ छायाचित्रांचे प्रदर्शन हुतात्मा स्मारक येथे आयोजित करण्यात आले आहे. तसेच मराठवाडा मुक्तिसंग्रामाचा इतिहास जागर माहितीपटाच्या माध्यमातून करण्यासाठी ‘क्रांतिशाली लातूर’ हा चित्ररथ तयार करण्यात आला आहे. या प्रदर्शनाला आणि चित्ररथाला क्रीडा व युवक कल्याण मंत्री संजय बनसोडे यांनी भेट दिली. तसेच या प्रदर्शनातील ग्रंथ, दुर्मिळ छायाचित्रांची पाहणी केली. मराठवाडा मुक्तिसंग्रामाचा इतिहास जाणून घेण्यासाठी या प्रदर्शनातील दुर्मिळ छायाचित्रे मौल्यवान ग्रंथांमुळे मदत होईल, असे मत ना. बनसोडे यांनी यावेळी व्यक्त केले.

विविध स्पर्धेतील विजेत्या विद्यार्थ्यांचा गौरव

मराठवाडा मुक्तिसंग्राम अमृत महोत्सवी वर्षानिमित्त आयोजित जिल्हा परिषदेच्या माध्यमिक शिक्षण विभागामार्फत निबंध स्पर्धा, रांगोळी स्पर्धा, वक्तृत्व स्पर्धा, चर्चासत्र आदी स्पर्धांचे आयोजन करण्यात आले होते. या स्पर्धांमध्ये विजेत्या ठरलेल्या प्रथम तीन स्पर्धकांचा क्रीडा व युवक कल्याण मंत्री संजय बनसोडे यांच्या हस्ते बक्षीस वितरण करण्यात आले.

‘एक जन्म, एक वृक्ष’ मोहिमेस सुरुवात; ‘टीबी’मुक्तीसाठी सहाय्य करणाऱ्यांचा सन्मान

लातूर शहर महानगरपालिकेमार्फत वृक्ष लागवडीला प्रोत्साहन देण्यासाठी ‘एक जन्म, एक वृक्ष’ मोहीम उपक्रम राबविण्यात येणार आहे. या उपक्रमाला आज क्रीडा व युवक कल्याण मंत्री संजय बनसोडे यांच्या हस्ते सुरुवात झाली. शहरातील गरोदर मतांची प्रसूती झाल्यानंतर या मोहिमेंतर्गत लातूर शहर महानगरपालिकेमार्फत त्यांना वृक्ष भेट देण्यात येणार आहे. प्रातिनिधिक स्वरुपात पाच मातांना वृक्ष भेट देवून या उपक्रमाला सुरुवात करण्यात आली.

प्रधानमंत्री टीबी मुक्त भारत अभियानामध्ये सहभागी होत लातूर शहर टी बी युनिट अंतर्गत 200 क्षयरुग्ण दत्तक घेवून त्यांना 6 महिन्यांसाठी आवश्यक 1200 फूडबास्केटचा पुरवठा करणाऱ्या लातूर एमआयडीसी येथील एडीएम ऍग्रो अँड विझाग प्रा. लि. यांचा ना. बनसोडे यांच्या सन्मान करण्यात आला. तसेच लातूर शहर महानगरपालिकेच्या ताफ्यात नव्याने सामील झालेल्या अग्निशमन वाहन, फिरते शौचालये आदीचे लोकार्पण यावेळी करण्यात आले.

मुंबई दिनांक १७ सप्टेंबर : केशव सिताराम ठाकरे उर्फ प्रबोधनकार ठाकरे यांची जयंती मंत्रालयात साजरी करण्यात आली. याप्रसंगी सामान्य प्रशासन विभागाचे अधिकारी व कर्मचारी यांनी प्रबोधनकार ठाकरे यांच्या प्रतिमेस पुष्पहार व गुलाबपुष्प अर्पण करून अभिवादन केले.

000

मुंबई, दि.१७: महिलांना संघटीत करणे, प्रशिक्षित करणे, स्वावलंबी करणे, महिलासंदर्भातील शासकीय योजना लोकाभिमुख करुन त्यांची अंमलबजावणी करणे, सर्व शासकीय यंत्रणांचे प्रतिनिधी एकत्र येऊन योजनांचे लाभ लाभार्थ्यांना देणे या उद्देशाने सर्व जिल्ह्यांमध्ये दि. २ ऑक्टोबर, २०२३ ते दि. १ ऑक्टोबर, २०२४  या कालावधीत राज्यामध्ये मुख्यमंत्री महिला सशक्तीकरण अभियान मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार यांच्या मार्गदर्शनाखाली हे अभियान प्रभावीपणे राबविण्यात येणार आहे,अशी माहिती महिला व बालविकास मंत्री आदिती तटकरे यांनी दिली.

या अभियानाची प्रभावी अंमलबजावणी होण्यासाठी महिला व बालविकास मंत्री आदिती तटकरे, विभागाचे सचिव, यांच्या माध्यमातून संनियंत्रण होणार आहे. मुख्यमंत्री सचिवालयाच्या जनकल्याण कक्षामार्फत समन्वय साधण्यात येणार आहे. जिल्हास्तरावरती जिल्हाधिकारी तर शहरी भागाकरिता जिल्हा सहआयुक्त (नगर प्रशासन) या सर्व योजनेचे संनियंत्रण करतील.

या अभियानाचे संनियंत्रण व मासिक आढावा घेवून त्याबाबतचा अहवाल मुख्यमंत्री आणि उपमुख्यमंत्री यांना सादर करण्यात येईल, विभागाचे सचिव हे राज्याचे समन्वय नोडल अधिकारी म्हणून काम पाहतील. तसेच त्यांना सहाय्य करण्यासाठी राज्य स्तरावर एका विशेष अधिकाऱ्याची नियुक्ती करण्यात येईल.

या अभियानात राज्यातील सर्व जिल्ह्यातील शक्ती गटांना आणि महिला बचत गटांना शासनाच्या विविध विभागांच्या योजनांची माहिती देणे, विविध योजनांचा लाभ घेण्यासाठी त्यांची पात्रता तपासून प्रस्तावित लाभार्थी महिलांची यादी तयार करणे, योजनांचे लाभ घेण्यासाठी संबंधितांकडून अर्ज भरून घेणे, ही प्रक्रिया करुन प्रत्येक  जिल्ह्यामध्ये किमान अडीच लाख महिलांना या योजनेच्या माध्यमातून जोडण्यात येणार तालुकास्तरावर तीस हजार व प्रत्येक गावात २०० महिला अभियानात जोडल्या जातील असे उद्दिष्ट ठेवण्यात आले आहे. तर शहरी भागातील याच प्रकारे काम करण्यात येणार आहे. या अभियानांतर्गत विविध शासकीय योजनांचा लाभ, महिलांना तांत्रिक व व्यावसायिक प्रशिक्षण, महिलांसाठी आरोग्य शिबिर, रोजगार मेळावा, विविध सरकारी विभाग व महामंडळाच्या योजनांचे स्टॉल, बचत गटांची नोंदणी, सखी किटचे वाटप, शक्ती गटांची महिला बचत गटांची जोडणी, सामाजिक उत्तरदायित्व योजनेतून महिलांना वैयक्तिक लाभ देणे, उद्योग उभारणीस अर्थसहाय्य करणे, महिला उद्योजकांना बाजारपेठ उपलब्ध करून देणे, सांस्कृतिक कार्यक्रमांचे आयोजन करणे, प्रोत्साहन पर पारितोषिक वाटप करण्यात येणार आहे. या योजनेचे उद्दिष्ट साध्य होण्यासाठी आणि माहिती प्रत्येक घटकापर्यंत पोहोचवण्यासाठी त्यासाठी जनजागृती मोठ्या प्रमाणात करण्यात येणार आहे.

या योजनेमध्ये मुख्य कार्यकारी अधिकारी, महाराष्ट्र ग्रामीण जीवनोन्नती अभियान (उमेद) यांचे प्रशासकीय मान्यतेचे अधिकार यापूर्वी रु. ५० लाखापर्यंत होते ते २ कोटी रुपयांनी  वाढविण्यात आले आहेत.या धोरणामुळे आमदार स्थानिक विकास कार्यक्रमांतर्गत  मा.आमदार यांच्या स्वेच्छाधिकारात २० लाख रुपयांचा निधी महिला विकासाच्या योजनांसाठी उपलब्ध करुन  देण्यात येईल. जिल्हा वार्षिक योजना (सर्वसाधारण) २०२३-२४ अंतर्गत मुख्यमंत्री महिला सशक्तीकरणासाठी जिल्ह्याच्या नियतव्ययात १ टक्का निधी उपलब्ध करुन दिला जाईल. तसेच शासनाच्या सध्या कार्यरत असलेल्या योजना देखील प्रभावीपणे राबविण्यात येणार आहेत.

देशाच्या सर्वांगीण विकासामध्ये महिलांचे योगदान खूप महत्त्वाचे आहे.महिला सक्षमीकरणासाठी केंद्र राज्य शासनामार्फत विविध योजना राबविण्यात येत आहेत. या योजना अधिक लोकाभिमुख करून महिलांना संघटित करून, प्रशिक्षण देऊन, आर्थिक सक्षमीकरण करणे,   महिलांसाठी राबविण्यात येणाऱ्या विविध शासकीय योजना एकत्रितपणे एकाच छत्राखाली राबविण्यात यावेत यासाठी ही योजना अत्यंत महत्त्वपूर्ण भूमिका बजावणार आहे. अशी माहिती  मंत्री आदिती तटकरे यांनी दिली.

०००

जालना, दि. 17 (जिमाका)- मराठवाड्याच्या मुक्ती लढ्यात जालना जिल्ह्याचे योगदान अत्यंत महत्त्वाचे होते. जिल्ह्यातील हजारो थोर  व्यक्ती प्रत्यक्ष-अप्रत्यक्ष या लढ्यात सहभागी झाले होते, त्यांच्यामुळेच आज आपण स्वातंत्र्य उपभोगत आहोत. या आपल्या मराठवाड्याच्या विकासासाठी काल पार पडलेले मंत्रिमंडळ बैठकीत विविध लोककल्याणकारी निर्णय जाहीर करण्यात आले आहेत. यामध्ये जालना जिल्हयासाठीही अनेक चांगले निर्णय घेण्यात आले आहेत, जिल्हयाच्या सर्वांगिण विकासासाठी शासन कटीबध्द आहे, असे प्रतिपादन राज्याचे पणन, अल्पसंख्याक विकास व औकाफ मंत्री अब्दुल सत्तार यांनी केले.

मराठवाडा मुक्तिसंग्राम वर्धापन दिनानिमित्त जालना शहरातील टाऊन हॉल येथे मुख्य शासकीय ध्वजारोहण श्री. सत्तार यांच्या हस्ते झाले. याप्रसंगी जनतेला उद्देशून शुभेच्छा संदेश देताना ते बोलत होते. यावेळी आमदार राजेश टोपे, आमदार नारायण कुचे, माजी मंत्री अर्जुन खोतकर,  जिल्हाधिकारी डॉ. श्रीकृष्ण पांचाळ, जिल्हा परिषदेच्या मुख्य कार्यकारी अधिकारी वर्षा मीना, पोलिस अधिक्षक शैलेश बलकवडे, महापालिका आयुक्त संतोष खांडेकर यांच्यासह स्वातंत्र्यसैनिक, पदाधिकारी, अधिकारी, कर्मचारी, विद्यार्थी, नागरिक यांची उपस्थिती होती.

प्रारंभी टाऊन हॉल परिसरात असणाऱ्या मान्यवरांनी  लोकमान्य टिळकांच्या पुतळ्यास पुष्पहार अर्पण करुन अभिवादन केले.  यानंतर हुतात्मा स्मारक स्मृती स्तंभास पुष्पचक्र वाहून हुतात्म्यांना आदरांजली अर्पण करण्यात आली. तर पोलिस जवानांनी हवेत बंदुकीच्या तीन फैरी झाडून व पोलिस बँड पथकाने शोकधून वाजवून हुतात्म्यांना मानवंदना दिली. या कार्यक्रमानंतर मराठवाडा मुक्तिसंग्राम अमृत महोत्सवी वर्षानिमित्त सर्वांनी प्रतिज्ञा घेतली.

मराठवाडा मुक्तिसंग्राम दिनानिमित्त उपस्थित सर्वांना शुभेच्छा देताना श्री. सत्तार म्हणाले की, 15 ऑगस्ट 1947 रोजी भारताला स्वातंत्र्य मिळाले, परंतु हैद्राबाद संस्थानातील या मराठवाडयात त्यावेळी पारतंत्र्य होते. त्या काळात मराठवाड्याच्या मुक्तीसाठी थोरामोठयांनी फार मोठी कामगिरी बजावली. मराठवाडयाने शौर्याची परंपरा कायम राखली. तळहातावर जीव घेऊन स्वातंत्र्यासाठी लढा देणारी मंडळी आपले घरदार, संपत्ती यांचा तिळमात्र विचार न करता स्वातंत्र्याच्या ध्येयाने प्रेरीत होऊन सहभागी झाली होती. सर्व स्तरावर निजामाशी मुकाबला करुन पारतंत्र्याचे जोखड झुगारुन मराठवाडयाला स्वातंत्र्य  मिळवून देण्यात त्यावेळच्या स्वातंत्र्यसैनिकांनी खंबीरपणे जबाबदारी पार पाडली, म्हणून आज तुम्ही-आम्ही ही स्वातंत्र्याची फळं चाखत आहोत. देशाला स्वातंत्र्य मिळाल्यानंतर तब्बल एक वर्ष एक महिना आणि दोन दिवसांनी  हैद्राबाद संस्थान 17 सप्टेंबर 1948 रोजी निजामाच्या जुलमी राजवटीतून मुक्त होऊन भारतीय गणराज्यात विलीन झाले.  मराठवाडा मुक्तिसंग्राम लढ्यात जालना जिल्ह्याचे योगदानही अत्यंत महत्त्वाचे आहे. जिल्ह्यातील हजारो थोर  व्यक्ती प्रत्यक्ष-अप्रत्यक्ष या लढ्यात सहभागी झाले होते. त्यांनी अत्यंत जिद्दीने निजामाच्या पाशवी सत्तेशी  झुंज दिली. प्रसंगी अनेकांनी मृत्युलाही कवटाळले. जात, धर्म विरहित अनेक समूहांनी आपल्या प्राणांची त्यासाठी बाजी लावली.  अनेकांनी आपले प्राण अर्पण केले. या  शूरवीरांना विनम्र अभिवादन.

श्री. सत्तार पुढे म्हणाले की, मराठवाड्यासह संपूर्ण जालना जिल्ह्याचा विकास करण्याच्या दृष्टीने काल  छत्रपती संभाजीनगर येथे झालेल्या मंत्रीमंडळाच्या बैठकीत  अनेक लोककल्याणकारी निर्णय घेण्यात आले. मराठवाड्याचा कायापालट घडविणारा तब्बल 46  हजार 579 कोटी 34 लाख रुपयांचा संकल्प मुख्यमंत्री एकनाथ शिंदे यांनी जाहीर केला. जालना जिल्हयाच्या प्रगतीसाठीही अनेक चांगले निर्णय घेण्यात आले. मराठवाडा मुक्तीसंग्रामच्या अमृत महोत्सवी वर्षानिमित्ताने मराठवाडयाची राणी लक्ष्मीबाई म्हणून ओळखल्या जाणाऱ्या  जालना जिल्हयातील स्वातंत्र्यसैनिक दगडाबाई शेळके यांचे धोपटेश्वरे येथे स्मारक उभारण्यासाठी रुपये पाच कोटी इतका निधी मंजूर करण्यात आला आहे. जिल्हा नियोजन समितीमधून हुतात्मा स्मारकाचे नूतनीकरण व सौंदर्यीकरण या वर्षी करण्यात येणार आहे.  याशिवाय जालना आयटीआयमध्ये महत्त्वाचे इन्क्युबेशन सेंटर सुरु करण्याचा निर्णय झाला असून यासाठी 10 कोटींचा निधी मंजूर करण्यात आला आहे. या सेंटरमुळे शेतकरी, विद्यार्थी, महिलांच्या नवसंकल्पनांना मूर्त रुप येण्यास मदत होणार आहे. अंबड येथील मत्स्योदरीदेवी संस्थानाच्या विकासासाठी 40 कोटी रुपयांचा निधी देण्यात येणार आहे.  जालना शहर पाणीपुरवठा योजनेसाठी 35 एमएलडी क्षमतेचे अंबड येथे जलशुध्दीकरण केंद्र आणि 15 एमएलडी क्षमतेचे जालना येथे जलशुध्दीकरण केंद्रासाठी रुपये 56 कोटीचा निधी मंजूर करण्यात येणार आहे.  तर जाफराबाद शहरासाठी नवीन पाणीपुरवठा योजनेकरीता 47 कोटी 98 लाख निधीची तरतुद करण्यात येणार आहे. अंबड शहरातील भुयारी गटार प्रकल्पासाठी  16 कोटी 56 लाख रुपयांचा निधी उपलब्ध करून देण्यात येणार आहे. परतूर येथे शेतकरी एमआयडीसीसाठी 25 कोटी देण्यात येणार आहे. तर  जलसंपदासाठी भरीव तरतूद करण्यात आली आहे, त्यामुळे  जिल्हयाला  सिंचनाकरीता मोठा फायदा होणार आहे. अंगणवाडी, शाळा दुरुस्तीसाठीही भरीव तरतूद करण्यात येणार आहे.  जालना जिल्हयाच्या सर्वांगिण विकासासाठी शासन कटीबध्द आहे, अशी ग्वाही त्यांनी दिली.

कार्यक्रमाच्या शेवटी मराठवाडा मुक्तीसंग्रामातील स्वातंत्र्यसैनिक यांच्यासह त्यांच्या वारसांची श्री. सत्तार यांनी भेट घेऊन त्यांची आस्थेवाईकपणे चौकशी केली व त्यांचा यथोचित सत्कार केला. यानंतर टाऊन हॉल परिसरात महानगरपालिकेच्यावतीने ‘मेरी माटी, मेरा देश’ अंतर्गत भव्य अमृत कलश यात्रा चित्ररथाचे श्री. सत्तार यांच्या  हस्ते उदघाटन करण्यात आले.

जिल्हाधिकारी कार्यालयातील ध्वजारोहण

प्रशासकीय भवन येथील ध्वजारोहण

• मराठवाडा मुक्ती संग्राम दिनानिमित्त झालेल्या परेड संचलनाच्या परेड कमांडर पोलीस उपाधीक्षक श्वेता खाडे या होत्या. तर सेकंड इन परेड कमांडर राखीव पोलीस निरीक्षक पी.पी दलाई हे होते.

• येथील स्थानिक शाळेतील विद्यार्थ्यांनी लेझीम च्या माध्यमातून मराठवाडा गौरव गीत सादर केले.

• मुख्य शासकीय कार्यक्रमात काही स्वातंत्र्यसैनिकांचा सन्मान करण्यात आला यामध्ये  कचारवाडी येथील जानू वनवे  पाटोदा तालुक्यातील रामभाऊ बडगे, बीड तालुक्यातील मिठू गायके यांचा सन्मान कृषिमंत्री श्री मुंडे यांनी स्वातंत्र्यसैनिक जिथे बसलेले होते त्यांच्या जवळ स्वतः जाऊन केला.

• यावेळी शेतकऱ्यासाठी उपयोगी असणाऱ्या आरोग्य वाहीकेला कृषिमंत्र्यांनी हिरवा झेंडा दाखविला.

000

मराठवाडा मुक्ती संग्राम गौरव गाथा चित्ररथ बीड जिल्ह्याच्या शंभर गावात फिरणार

मराठवाडा मुक्ती संग्रामाची गौरव गाथा सांगणारे 2 चित्ररथांना राज्याचे कृषिमंत्री धनंजय मुंडे यांनी हिरवा झेंडा दाखवून चित्ररथ रवाना केले. हे चित्ररथ बीड जिल्ह्यातील शंभर गावात फिरून मराठवाडा मुक्ती संग्राम गौरव गाथेची माहिती देतील.

पोलीस मुख्यालयातील मुख्य शासकीय कार्यक्रमात जिल्हा माहिती कार्यालयाच्यावतीने मराठवाडा मुक्ती संग्राम अमृत महोत्सवी वर्षानिमित्त दोन चित्ररथ तयार करण्यात आले आहेत. या चित्ररथांच्या माध्यमातून मराठवाडा मुक्ती संग्रामाची गौरवगाथा सांगण्यात आली आहे.
या चित्ररथांना मराठवाडा मुक्ती संग्राम दिनी कृषिमंत्री श्री मुंडे यांनी हिरवा झेंडा दाखवून याचा शुभारंभ केला.

याप्रसंगी जिल्हा माहिती अधिकारी प्रशांत दैठणकर यांनी कृषिमंत्री श्री मुंडे यांना पुष्पगुच्छ देऊन त्यांचे स्वागत केले तसेच माहिती अधिकारी अंजु निमसरकर यांनी जिल्हाधिकारी दीपा मुधोळ मुंडे यांनाही पुष्पगुच्छ देऊन त्यांचे स्वागत केले.

•  हिंगोली येथे १०० विद्यार्थी प्रवेश क्षमतेचे नवीन शासकीय वैद्यकीय महाविद्यालय सुरु करण्यास छत्रपती संभाजीनगर येथील मंत्रीमंडळ बैठकीत मान्यता.

• श्रीक्षेत्र औंढा नागनाथ तीर्थक्षेत्र विकासासाठी ६० कोटी ३५ लाख रुपयाच्या आराखड्यास मान्यता.

• हिंगोली  जिल्ह्यातील  पोटा, जोडपरळी, पिंपळगाव कुटे उच्च पातळी बंधारा या तीन प्रकल्पाच्या ३ हजार ८४ कोटी ८३ लाख रुपयांच्या खर्चास प्रशासकीय मान्यता.

• मराठवाडा मुक्ती संग्रामात हिंगोली जिल्ह्याचे योगदान काफी टेब्ल बुकचे रोजगार हमी योजना मंत्री संदिपान भुमरे यांच्या हस्ते विमोचन.

हिंगोली (जिमाका), दि. 17 : स्वातंत्र्यानंतरही देशात तीन संस्थाने विलीन झाली नव्हती. काश्मीर, जुनागढ आणि हैद्राबाद या संस्थानांनमुळे भारतीय संघराज्य पुर्णत्वास गेले नव्हते. स्वामी रामानंद तिर्थ यांच्या नेतृत्वाखाली संपूर्ण हैद्राबाद संस्थानात मराठवाडा मुक्ती संग्रामाचा लढा सुरु झाला होता. मराठवाड्याच्या गावा-गावातून मराठवाडा मुक्ती संग्रामाचा लढा अनेक स्वातंत्र्य सैनिकांनी शौर्याने लढला. हा केवळ संस्थांनाच्या विलिनीकरणाचा लढा नव्हता तर भारताच्या प्रादेशिक अखंडतेचा लढा होता. मराठवाडा मुक्ती संग्रामाचे हे आंदोलन सतत 13 महिने सुरु होते. या आंदोलनात अनेक स्वातंत्र्य सैनिकांनी आपल्या प्राणांची आहुती दिली. अखेर 17 सप्टेंबर, 1948 रोजी निजामाच्या जोखडातून मराठवाडा मुक्त होऊन भारतीय संघराज्यात विलीन झाला. या मराठवाडा मुक्ती संग्रामासाठी अनेक हुतात्म्यांनी आणि स्वातंत्र्य सैनिकांनी दिलेल्या लढ्याचे मोल अमूल्य आहे, असे प्रतिपादन राज्याचे रोजगार हमी योजना व फलोत्पादन मंत्री संदिपान भुमरे यांनी केले.

मराठवाडा मुक्ती संग्राम दिनाच्या 75 व्या वर्धापन दिनानिमित्त येथील कै. अण्णासाहेब टाकळगव्हाणकर उद्यानातील हुतात्मा स्मारक स्मृतिस्तंभ येथे आयोजित करण्यात आलेल्या मुख्य शासकीय ध्वजारोहण समारंभ प्रसंगी  श्री. भुमरे बोलत होते.  यावेळी ज्येष्ठ स्वातंत्र सैनिक माणिकराव टाकळगव्हाणकर,  आमदार तान्हाजी मुटकुळे, आमदार संतोष बांगर, जिल्हाधिकारी जितेंद्र पापळकर, जिल्हा पोलीस अधिक्षक जी. श्रीधर, जिल्हा परिषदेचे मुख्य कार्यकारी अधिकारी संजय दैने, निवासी उपजिल्हाधिकारी दिलीप कच्छवे, सामान्य प्रशासन विभागाचे उपजिल्हाधिकारी स्वप्नील मोरे यांची प्रमुख उपस्थिती होती.

यावेळी रोजगार हमी योजना मंत्री संदिपान भुमरे म्हणाले, मराठवाडा मुक्तीसंग्राम दिनाचा 75 वा वर्धापन दिन आज मराठवाड्यात सर्वत्र उत्साहाने साजरा होत आहे. संपूर्ण मराठवाड्यात हे वर्ष मराठवाडा मुक्ती संग्रामाचे अमृत महोत्सवी वर्ष म्हणून साजरे होत आहे. मराठवाडा मुक्ती संग्रामाच्या अमृत महोत्सवी वर्षाच्या निमित्ताने हिंगोली जिल्ह्यात तालुका स्तरापर्यंत मुक्ती संग्राम लढ्याची गाथा कळावी म्हणून सांस्कृतिक कार्यक्रम, देशभक्तीपर गीते, चित्ररथ, वस्तू, पुस्तके यांचे प्रदर्शन भरविणे, रांगोळी स्पर्धा, निबंध स्पर्धा, रक्तदान शिबीर, आरोग्य शिबीर, दिव्यांगासाठी कार्यशाळा, मराठवाडा मुक्ती संग्रामातील सर्व वारसा स्थळांना, हुतात्मा स्मारकांना विद्यार्थ्यांच्या भेटी, तिथे श्रमदान करणे, जिल्ह्यातील सर्व हुतात्मा स्मारक ते हुतात्मा राहत होते त्या ठिकाणापर्यंत गौरव रॅली यासह अनेक कार्यक्रमांनी मराठवाडा मुक्ती संग्रामाचा अमृत महोत्सव साजरा करण्यात येत आहे. तसेच मराठवाडा मुक्ती संग्रामातील स्वातंत्र्य सैनिकाच्या स्मरणार्थ कळमनुरी तालुक्यातील दाती व वसमत तालुक्यातील वापटी येथे असे एकूण दोन स्मृतीस्तंभ उभारण्यात येत असलयाचे शुभेच्छा संदेशात सांगितले.

स्वातंत्र्याच्या अमृत महोत्सव या उपक्रमाचा सांगता सोहळ्याच्या निमित्त आणि आपल्या देशाच्या मातृभूमीविषयी आणि  वीरांनी  दिलेल्या योगदानाचे स्मरण व्हावे म्हणून, देशात ‘मिट्टी को नमन, वीरों का वंदन’ या घोषवाक्यासह देशभर ‘मेरी माटी – मेरा देश’ अर्थात ‘माझी माती – माझा देश’ हे अभियान जिल्ह्यात उत्साहात राबविण्यात येत असल्याचे त्यांनी सांगितले.

श्री. भुमरे पुढे म्हणाले की, मराठवाडा मुक्ती संग्रामाच्या अमृत महोत्सवी वर्षाच्या पार्श्वभूमीवर कालच छत्रपती  संभाजीनगर येथे पार पडलेल्या मंत्रीमंडळाच्या बैठकीत मुख्यमंत्री एकनाथ शिंदे यांनी  मराठवाड्याचा कायापालट घडविणारा तब्बल 46 हजार 579 कोटी 34 लाख रुपयांची  विकास  कामे करण्याचा संकल्प  जाहीर केला आहे. या बैठकीत हिंगोली जिल्ह्यासाठी महत्वाचे निर्णय घेण्यात आले आहेत. यामध्ये हिंगोली येथे 100 विद्यार्थी प्रवेश क्षमतेचे नवीन शासकीय वैद्यकीय महाविद्यालय सुरु करण्यास मंत्रीमंडळ बैठकीत मान्यता देण्यात आली आहे. या महाविद्यालयास 430 खाटांचे रुग्णालय संलग्नित असेल. यासाठी अंदाजे 485 कोटी रुपये खर्च अपेक्षित आहे. तसेच श्रीक्षेत्र औंढा नागनाथ तीर्थक्षेत्र विकासासाठी 60 कोटी 35 लाख रुपयाच्या आराखड्यास मंत्रीमंडळ बैठकीत मान्यता देण्यात आली असल्याचे सांगितले.

मराठवाड्यातील दहा सिंचन प्रकल्पामध्ये हिंगोली  जिल्ह्यातील  पोटा उच्च पातळी बंधारा, जोडपरळी उच्च पातळी बंधारा, पिंपळगाव कुटे उच्च पातळी बंधारा यांचा समावेश आहे. या तीन प्रकल्पाच्या 3 हजार 84 कोटी 83 लाख रुपयांच्या खर्चास प्रशासकीय मान्यता देण्यात आली आहे. याचा  हिंगोली जिल्ह्यातील 4 हजार 219 हेक्टर क्षेत्रास सिंचनाचा लाभ मिळणार आहे, असेही श्री. भुमरे यांनी सांगितले.

वसमत येथे मॉडर्न मार्केटच्या उभारणीसाठी जागा, वसमत एमआयडीसी स्थापन करण्यासाठी मान्यता देण्यात आली असून वसमत तालुक्यातील कुरुंदा येथे पूर प्रतिबंधात्मक उपाययोजना राबविण्यासाठी 33 कोटी 3 लाख रुपये, हिंगोली  शहरासाठी  104 कोटी 28 लाख किंमतीचा रस्ते विकास प्रकल्प, औंढा नागनाथ तीर्थक्षेत्राच्या पाणीपुरवठा  प्रकल्पासाठी 36 कोटी 44 लाख रुपये, औंढा नागनाथ शहराच्या विकास आराखड्यासाठी  50 कोटी  रुपयाचा निधी उपलब्ध करुन देण्यात येणार आहे. तसेच हिंगोली जिल्ह्यामध्ये बाळासाहेब ठाकरे हळद संशोधन व प्रशिक्षण केंद्र कंपनी कायद्यानुसार ना-नफा तत्वावर एक स्वायत्त संस्था म्हणून स्थापन करण्यास मान्यता देण्यात आली आहे. या केंद्रामध्ये प्रामुख्याने हळद पिकाची उत्पादकता वाढविण्यासाठी संशोधन करण्यात येणार आहे. या हळद संशोधन केंद्रासाठी  100 कोटी रुपयाच्या निधीस मान्यता दिली असून हळद संशोधनास आता वेग येणार असल्याची माहिती श्री. भुमरे यांनी यावेळी दिली.

राज्यातील विविध जिल्ह्यामध्ये गोवंश वर्गीय जनावरांना लम्पी या विषाणूजन्य आजाराची लागण झाली आहे. हिंगोली जिल्ह्यात आजपर्यंत  2 हजार 674 जनावरे बाधित आढळून आलेली आहेत. सद्यस्थितीत 846 सक्रीय पशु रुग्णांवर उपचार सुरु आहेत. सर्व पशुपालकांनी जनावरांची वेळीच काळजी घेऊन तात्काळ नजीकच्या पशुवैद्यकीय दवाखान्यांशी संपर्क करावा व आपल्या जनावराला लम्पी आजारापासून वाचवावे, असे आवाहन श्री. भुमरे यांनी यावेळी केले.

राज्य शासनाने सर्वसामान्य माणूस केंद्रबिंदू ठेवून सर्व शासकीय आरोग्य संस्थामधून देण्यात येणाऱ्या सर्व प्रकारच्या आरोग्य सुविधा निशुल्क करुन मोफत उपचाराची सोय केली आहे. याचा लाभ जिल्ह्यातील  सर्वसामान्य जनतेला होत आहे. तसेच देशवासियांच्या निरोगी आयुष्यासाठी माननीय पंतप्रधान नरेंद्र मोदी यांच्या सकंल्पनेतून साकारलेल्या आयुष्यमान भव: मोहिमेची सुरुवात राज्यभर दि. 13 सप्टेंबर, 2023 रोजी करण्यात आली आहे. आयुष्मान कार्डच्या माध्यमातून सामान्यांना वेळेवर वैद्यकीय उपचार घेणे शक्य व्हावे यासाठी आयुष्यमान भव: ही महत्वकांक्षी मोहिम 17 सप्टेंबर ते 31 डिसेंबर, 2023 पर्यंत राबविली जाणार असल्याचे मंत्री श्री. भुमरे यांनी यावेळी सांगितले.

महात्मा गांधी राष्ट्रीय ग्रामीण रोजगार हमी योजनेत जिल्ह्यात सन 2022-23 मध्ये 18 लाख 34 हजार 770 मनुष्य दिन निर्मिती करत   118 टक्के उद्दिष्ट पूर्ण केले आहे. सन 2023-24 मध्ये मनुष्य दिन निर्मितीचे उद्दिष्ट 15 लाख       95 हजार असताना आतापर्यंत 14 लाख 34 हजार 786 मनुष्य दिन निर्मिती करुन 90 टक्के उद्दिष्ट पूर्ण केले आहे. महात्मा गांधी राष्ट्रीय ग्रामीण रोजगार हमी योजनेत मंजूर करण्यात आलेल्या 16 हजार 386 वैयक्तीक सिंचन विहिरीपैकी 5 हजार 765 विहिरीचे कामे सुरु करण्यात आली आहेत. तर 6 हजार 647 विहिरींची कामे पूर्ण करण्यात आलेली आहेत. हिंगोली जिल्ह्यात मातोश्री शेत पाणंद रस्त्याच्या 419 कामांना मंजुरी देण्यात आली असून 184 कामे सुरु झालेली आहेत व 13 कामे पूर्ण झालेली आहेत. तसेच 3 हजार 92 गाय गोठ्यांना मंजुरी देण्यात आली असून 2 हजार 147 कामे सुरु झालेली आहेत. तर 330 कामे पूर्ण झालेली आहेत, असे सांगून आपल्या जिल्ह्याची आणि महाराष्ट्र राज्याची चौफेर प्रगती व्हावी यासाठी जागरुक नागरिक म्हणून आपण सर्वांनी एकत्र येऊन प्रयत्न करु या, असे आवाहन रोजगार हमी योजना मंत्री संदिपान भुमरे यांनी केले.

प्रारंभी राज्याचे रोजगार हमी योजना व फलोत्पादन मंत्री संदिपान भुमरे यांच्या हस्ते हुतात्मा स्मारकास पुष्पचक्र अर्पण करुन हुतात्म्यांना अभिवादन करण्यात आले. यावेळी पोलीस पथकाने हुतात्म्यांना शोक धून वाजवून हवेत बंदुकीच्या तीन फैरी झाडून मानवंदना दिली. यावेळी श्री. भुमरे यांनी  ज्येष्ठ स्वातंत्र्य सैनिक माणिकराव टाकळगव्हाणकर, माधव हरण, गंगाबाई कावरखे, रुक्मिनीबाई देवकते, मालतीबाई पैठणकर, वच्छलाबाई नाईक यांचा शाल, श्रीफळ व स्मृतीचिन्ह देऊन सन्मान केला. तसेच श्री. भुमरे यांनी  लोकप्रतिनिधी,  अधिकारी,   पदाधिकारी,  नागरिक, पत्रकार यांची भेट घेवून मराठवाडा मुक्ती संग्राम दिनाच्या शुभेच्छा दिल्या. याप्रसंगी मराठवाडा मुक्ती दिनाची व अवयव दानाची शपथ घेण्यात आली. तसेच यावेळी कृषि विभागामार्फत खरीप हंगाम व रब्बी हंगामामधील जिल्हास्तरीय पिक स्पर्धेतील विजेत्यांना रोजगार हमी  योजना मंत्री संदिपान भुमरे यांच्या हस्ते प्रशस्तीपत्र देऊन गौरविण्यात आले.

या क्रार्यक्रमाचे शानदार सूत्रसंचालन पंडित अवचार यांनी केले. यावेळी   तहसीलदार नवनाथ वगवाड, नगर परिषदेचे मुख्याधिकारी अरविंद मुंढे, यांच्यासह  पत्रकार,  नागरिक, विद्यार्थी-विद्यार्थीनी, विविध विभागाचे अधिकारी-कर्मचारी यांची उपस्थिती होती.

मराठवाडा मुक्ती संग्रामात हिंगोली जिल्ह्याचे योगदान कॉफीटेबल बुकचे

रोजगार हमी योजना मंत्री संदिपान भुमरे यांच्या हस्ते विमोचन

यावेळी जिल्हा प्रशासनाने तयार केलेल्या मराठवाडा मुक्ती संग्रामात हिंगोली जिल्ह्याचे योगदान या काफी टेब्ल बुकचे विमोचन रोजगार हमी योजना मंत्री संदिपान भुमरे यांच्या हस्ते करण्यात आले. यावेळी आमदार तानाजी मुटकुळे, आमदार संतोष बांगर, जिल्हाधिकारी जितेंद्र पापळकर, मुख्य कार्यकारी अधिकारी संजय दैने, पोलीस अधीक्षक जी. श्रीधर, संजय टाकळगव्हाणकर, वामनराव टाकळगव्हाणकर, विठ्ठल सोळंके उपस्थित होते. तसेच यावेळी श्री. भुमरे यांच्या हस्ते शिक्षकाची यशोगाथा या पुस्तिकेचे विमोचनही करण्यात आले.