मुंबई विमानतळावर डॉक्टर्स, आरोग्य कर्मचाऱ्यांच्या संख्येत वाढ - आरोग्यमंत्री राजेश टोपे यांची माहिती

कोणत्याही टिप्पण्‍या नाहीत


करोना व्हायरसची लागण झालेला राज्यात एकही रुग्ण नाही


मुंबई, दि. 3 : करोना व्हायरसच्या पार्श्वभूमीवर चीन येथून आलेल्या एकाला मिरज येथील वैद्यकीय महाविद्यालयात दाखल करण्यात आले. दरम्यान सध्या मुंबई, पुणे आणि सांगली येथे सहा जण रुग्णालयात दाखल आहेत. सुमारे 83 प्रवाशांची दूरध्वनीद्वारे विचारपूस सुरु असून त्यापैकी 26 जणांचा आरोग्यविषयक पाठपुराव्यास 14 दिवस पूर्ण झाल्याने तो आज थांबविण्यात आला आहे. मुंबई विमानतळावर आतापर्यंत 8 हजार 878 प्रवाशांची तपासणी करण्यात आली, अशी माहिती आरोग्यमंत्री राजेश टोपे यांनी दिली.

आंतरराष्ट्रीय प्रवासी तपासणीचे काम वाढल्याने मुंबई विमानतळावर आरोग्य अधिकाऱ्यांच्या मदतीला राज्य सार्वजनिक आरोग्य विभागामार्फत १० वैद्यकीय अधिकारी आणि १५ आरोग्य कर्मचाऱ्यांची नेमणूक करण्यात आलेली आहे. आजपर्यंत राज्यात बाधित भागातून १०४ प्रवासी आले. १८ जानेवारी पासून त्यापैकी २१ जणांना ताप, सर्दी, खोकला अशी लक्षणे आढळल्याने राज्यातील वेगवेगळ्या विलगीकरण कक्षात भरती करण्यात आले होते. त्यापैकी १८ जणांचे प्रयोगशाळा नमुने निगेटिव्ह आले असून उर्वरित तिघांचे प्रयोगशाळा निकाल उद्यापर्यंत प्राप्त होतील. भरती झालेल्या २१ प्रवाशांपैकी १५ जणांना रुग्णालयातून घरी सोडण्यात आले आहे. सध्या कस्तुरबा रुग्णालयात १, नायडू रुग्णालयात ४ तर शासकीय वैद्यकीय महाविद्यालय, मिरज येथे १ जण  भरती आहे. 

करोना संदर्भात बदलत्या परिस्थितीनुसार मार्गदर्शक सूचनांमध्येही काही महत्त्वाचे बदल करण्यात आले असून  वुहान शहरातून येणाऱ्या प्रवाशाला किंवा मागील २ आठवड्यात वुहान प्रवासाचा इतिहास असणाऱ्या प्रवाशाला लक्षणे असोत किंवा नसोत विलगीकरण कक्षात भरती करुन त्यांचा प्रयोगशाळा नमुना घेण्यात येईल. बाधित भागातून १५ जानेवारी २०२० रोजी किंवा त्या नंतर येणाऱ्या प्रवाशांचा पाठपुरावा १४ दिवसांसाठी करण्यात येणार आहे. पूर्वी या पाठपुरावा २८ दिवसांसाठी करण्याच्या सूचना होत्या. या काळात त्यांना काही लक्षणे आढळली तर त्यांना विलगीकरण कक्षात भरती करुन त्यांचा प्रयोगशाळा नमुना घेण्यात येणार आहे.
००००
अजय जाधव/विसंअ/3.2.2020

कोणत्याही टिप्पण्‍या नाहीत

टिप्पणी पोस्ट करा

Blogger द्वारा समर्थित.