महात्मा बसवेश्वर सामाजिक समता-शिवा पुरस्कारासाठी अर्ज करण्याचे आवाहन

कोणत्याही टिप्पण्‍या नाहीत





मुंबई, दि. 7 : वीरशैव लिंगायत समाजासाठी विविध क्षेत्रात उल्लेखनीय कार्य करणाऱ्या व्यक्ती व संस्थांना राज्य शासनाच्या वतीने महात्मा बसवेश्वर सामाजिक समता-शिवा पुरस्कार देण्यात येणार आहे. या पुरस्कारासाठी 15 जुलै 2019 पर्यंत अर्ज करण्याचे आवाहन विमुक्त जाती, भटक्या जमाती, इतर मागास वर्ग व विशेष मागास प्रवर्ग विभागाने केले आहे.


वीरशैव-लिंगायत समाजासाठी सामाजिक, कलात्मक, समाज संघटनात्मक, आध्यात्मिक प्रबोधन व साहित्यिक क्षेत्रात काम करीत असलेल्या व्यक्तीच्या व संस्थांच्या कामाची दाद/दखल घ्यावी व इतरांना त्यापासून प्रेरणा मिळावी यासाठी तसेच या समाजातील समाजसेवक, कलावंत, समाज संघटनात्मक कार्येकर्ते, आध्यात्मिक प्रबोधनकार व साहित्यिक सरसावून पुढे यावेत यासाठी महात्मा बसवेश्वर सामाजिक समता-शिवा पुरस्कार देण्यात येणार आहे. व्यक्तीसाठी एक व सामाजिक संस्थांसाठी एक असे एकूण दोन पुरस्कार देण्यात येणार आहेत. या पुरस्कारासाठी राज्यभरातून इच्छुक व्यक्ती व संस्था यांनी संबंधित जिल्ह्याच्या ठिकाणी सहायक आयुक्त, समाजकल्याण यांच्याकडे सीलबंद लिफाफ्यात रितसर अर्ज करावेत.


दि. 8 मार्च 2019 रोजीच्या शासन निर्णयाद्वारे या पुरस्कारासाठी पात्रतेची नियमावली तयार करण्यात आली असून महाराष्ट्र शासनाच्या वेबसाईटवर संबंधित शासन निर्णय आहे. तरी इच्छुक संस्था व व्यक्ती यांनी या पुरस्कारासाठी संबंधित जिल्ह्याच्या सहायक आयुक्त समाज कल्याण यांच्याकडे 15 जुलैपर्यंत रितसर अर्ज करावे. अर्जासोबत आवश्यक व योग्य ती माहिती जोडावी, असे आवाहन विभागाच्या वतीने करण्यात आले आहे. 
००००
नंदकुमार वाघमारे/विसंअ/7.6.2019

कोणत्याही टिप्पण्‍या नाहीत

टिप्पणी पोस्ट करा