'जय महाराष्ट्र’ व 'दिलखुलास' कार्यक्रमात उद्या मुख्य निवडणूक अधिकारी बलदेव सिंह यांची मुलाखत

कोणत्याही टिप्पण्‍या नाहीत




मुंबई, दि.१७ : माहिती व जनसंपर्क महासंचालनालयनिर्मित जय महाराष्ट्र'  'दिलखुलास' कार्यक्रमात  प्रधान सचिव  व मुख्य  निवडणूक अधिकारी बलदेव सिंह यांची 'विधानसभा निवडणूक तयारी' या विषयावर विशेष मुलाखत घेण्यात आली आहे.  ही विशेष मुलाखत दूरदर्शनच्या सह्याद्री वाहिनीवर उद्या शुक्रवार दिनांक १८ ऑक्टोबर २०१९ रोजी रात्री ९ वाजता प्रसारित होईल. तसेच ही मुलाखत राज्यातील आकाशवाणीच्या सर्व केंद्रांवरून शुक्रवार दि. १८ आणि सोमवार  दि. २१ ऑक्टोबर २०१९ रोजी सकाळी ७.२५ ते ७.४० या वेळेत प्रसारित होईल.   'दिलखुलास' हा कार्यक्रम  प्रसारभारतीच्या 'न्यूज ऑन एअर' या ॲपवरही  शुक्रवार दि. १८ आणि सोमवार  दि. २१ ऑक्टोबर  २०१९  रोजी सकाळी ७.२५ ते ७.४०या वेळेत  ऐकता येईल.  निवेदक हेमंत बर्वे यांनी ही मुलाखत घेतली आहे.
    
महाराष्ट्रात विधानसभा निवडणकाकरिता मतदारसंघातील तयारी, विधानसभा मतदारसंघात मतदार जनजागृतीवर देण्यात येणारा भर, मतदानात युवक व महिलांची टक्केवारी वाढण्यासाठी सुरु असलेले प्रयत्न, भारत निवडणूक आयोगाच्या 'स्वीप' या उपक्रमाचे यश, राज्यात मतदार जनजागृतीसाठी सदिच्छादूतांचा सहभाग, राज्यातील एकूण मतदार संख्या, मतदार केंद्रे, प्रत्यक्ष मतदानादिवशी मतदारांना पुरविण्यात येणाऱ्या  सोयीसुविधा,  दिव्यांग आणि ज्येष्ठ नागरिक मतदारांच्या सुविधेसाठी मतदान केंद्राची रचना, ईव्हीएम-व्हीव्हीपॅट बद्दलचा संभ्रम दूर करण्याकरिता होत असलेले प्रयत्न, राज्यातील  सर्व्हिस वोटरची संख्या,  या विषयांची माहिती श्री.बलदेव सिंह यांनी 'जय महाराष्ट्र' आणि  'दिलखुलास' कार्यक्रमातून दिली आहे.

दिव्यांगांकडून होणार १०६ मतदार केंद्रांचे संचालन; मतदान केंद्राध्यक्षासह सर्वच कामांसाठी दिव्यांगांची नियुक्ती

कोणत्याही टिप्पण्‍या नाहीत



मुंबई, दि. 17 : यंदाच्या विधानसभा निवडणुकीत राज्यातील 106 मतदान केंद्रे ही दिव्यांगांद्वारे संनियंत्रित केली जाणार आहेत. यामध्ये सर्वाधिक 8 मतदान केंद्रे ही लातूर शहर मतदारसंघातील असून त्या खालोखाल उदगीर मतदारसंघात 6 मतदान केंद्रे ही दिव्यांग संचालित असतील.

निवडणूक आयोगाने दिव्यांग व्यक्तींना निवडणूकविषयक कामे देऊ नये, असे निर्देश दिले असले तरी दिव्यांग व्यक्ती सक्षमपणे सर्व कामे करू शकतात ही बाब सिद्ध करण्यासाठी निवडणूकविषयक कामात त्यांना सहभागी करून घेतले जात आहे.

विद्यार्थ्यांचे सहाय्य

मतदान केंद्रांवर वयोवृद्ध व दिव्यांग मतदारांना त्यांच्या शारीरिक मर्यादा/विकलांगतेमुळे मतदान केंद्रापर्यंत पोहोचून मतदान करण्यात अडथळे येऊ नये, त्यांना सुलभपणे मतदान करता यावे, यासाठी प्रत्येक केंद्रावर स्वयंसेवकांची नियुक्ती करण्याचे निर्देश मुख्य निवडणूक अधिकारी कार्यालयाने दिले आहेत.

शाळा, महाविद्यालयातील राष्ट्रीय सेवा योजना, राष्ट्रीय छात्रसेना (एनसीसी), नेहरू युवा केंद्र, स्काऊट गाईडचे विद्यार्थी यांची स्वयंसेवक म्हणून नियुक्ती करण्यात येणार आहे. त्याबरोबरच नागरी संरक्षण विभाग, आपत्त्कालीन परिस्थितीत काम करणारे स्वयंसेवक व गृहरक्षक दल यांची मदतनीस/स्वयंसेवक म्हणून निवड करण्याचे निर्देश देण्यात आले आहेत.

मतदान केंद्रावर दिव्यांग आल्यानंतर त्यांच्या वाहनापासून मतदान प्रक्रिया पूर्ण झाल्यानंतर परत त्या वाहनापर्यंत पोहोचविण्याची जबाबदारी हे स्वयंसेवक पार पाडतील. मतदान केंद्रावर व्हिलचेअर उपलब्ध करून देणे, पाणी, गरज भासल्यास प्रसाधनगृह व प्रथमोपचार यांची उपलब्धता करून देण्याचे काम हे स्वयंसेवक करतील. या अनुषंगाने या स्वयंसेवकांना प्रशिक्षण देण्याच्या सूचना सर्व जिल्हा निवडणूक अधिकाऱ्यांना देण्यात आल्या आहेत. 
००००
नंदकुमार वाघमारे/विसंअ/17.10.2019

विधानसभा निवडणुकीसाठी प्रशासन सज्ज

कोणत्याही टिप्पण्‍या नाहीत



मुंबई, दि. 17 - महाराष्ट्र विधानसभेसाठी 21 ऑक्टोबर रोजी मतदान होणार आहे. त्यासाठी प्रशासकीय यंत्रणा सज्ज झाली आहे. अधिकाधिक मतदान व्हावे, यासाठी मतदार जनजागृतीसाठी विविध उपक्रम राबविले जात आहेत. लोकशाहीच्या या महाउत्सवाच्या तयारीवर एक दृष्टीक्षेप...

एकूण मतदार
·      महाराष्ट्रात पुरुष, महिला, तृतीयपंथी, दिव्यांग असे एकूण 8 कोटी 98 लाख 39 हजार 600 मतदार.
·      महाराष्ट्रात एकूण 8 कोटी 98 लाख 39 हजार 600 मतदार आहेत.
·      यामध्ये पुरुष मतदार - 4 कोटी  68 लाख 75 हजार, 750
·      महिला मतदार- 4 कोटी 28 लाख 43 हजार 635,
·      तृतीयपंथी मतदार-  2 हजार 634 आहेत.
·      दिव्यांग मतदार - 3 लाख 96 हजार आहेत
·      सर्व्हिस मतदार- 1 लाख 17 हजार 581 आहेत

 मतदार जनजागृती
·      आतापर्यंत 20.8 लाख नागरिकांनी या कार्यक्रमात सहभाग घेतला. त्यापैकी 14.40 लाख मतदारांनी या यंत्रावर प्रत्यक्ष मतदानाची तालीम घेतली.

 जनजागृतीसाठी सदिच्छादूत
·      मतदार जागृतीच्या मोहिमेत सदिच्छादूतम्हणून अणुशास्त्रज्ञ डॉ. अनिल काकोडकर, ज्येष्ठ साहित्यिक मधु मंगेश कर्णिक, अभिनेत्री माधुरी दीक्षित, अभिनेते प्रशांत दामले, अभिनेत्री मृणाल कुलकर्णी, डॉ.निशिगंधा वाड, अभिनेत्री उषा जाधव, महिला क्रिकेटपटू स्मृती मानधना, महिला धावपटू ललिता बाबर, अर्जुन पुरस्कार सन्मानित जलतरणपटू वीरधवल खाडे, नेमबाज राही सरनोबत, तृतीयपंथी कार्यकर्त्या गौरी सावंत, दिव्यांग कार्यकर्ता नीलेश सिंगीत यांचा समावेश आहे.



मतदान केंद्रे 
·      विधानसभा निवडणूक 2019 मध्ये 96 हजार 661 मतदान केंद्रे आहेत.

मुख्य मतदान केंद्र 95, 473
सहायक मतदान केंद्र 1,188

·      खास महिलांसाठी, महिलांकडून संनियंत्रण करणारी आणि व्यवस्थापनावर भर देणारी 352सखी मतदान केंद्रेस्थापन केली जातील.

मतदारांसाठी सोयी-सुविधा

·      किमान अत्यावश्यक सुविधांमध्ये पिण्याचे पाणी, विद्युत पुरवठा, प्रकाश योजना, ब्रेल भाषेतील मतपत्रिका, शौचालय, दिव्यांग मित्र आदी सर्व किमान सुविधा पुरविण्यात येतील.
·      दिव्यांग मतदारांना मतदार नोंदणी करणे, मतदान केंद्राचा शोध घेणे, व्हिलचेअरची मागणी नोंदविणे यासाठी PwD ॲपची सुविधा देण्यात आली आहे.
·      सर्व मतदान केंद्रांवर दिव्यांग तसेच वयोवृद्ध मतदारांकरिता व्हील चेअर व रॅम्पची व्यवस्था
·      दिव्यांग तसेच जेष्ठ नागरिक मतदारांकरिता वेगळ्या रांगेची व्यवस्था.
·      अंध मतदारांच्या सोयीकरिता मतदान केंद्रांवरील सूचनाफलक आणि मतदार यादी, ब्रेल लिपीमध्ये तयार करण्यात आली आहे. मतदान यंत्रावर ब्रेल लिपी मुद्रित केली असल्याने त्यांना कोणाच्याही मदतीखेरीज मतदान करता येणे शक्य.
·      लहान मुलासह मतदानास येणाऱ्या महिला मतदारांच्या मुलांकरिता पाळणाघराची व्यवस्था करण्यात आली आहे.



 दिव्यांग, ज्येष्ठ नागरिक मतदारांच्या सुविधेसाठी मतदान केंद्राची रचना
·      ज्येष्ठ नागरिक आणि दिव्यांग मतदारांना सोयीचे व्हावे, म्हणून पहिल्या अथवा दुसऱ्या मजल्यावरील सुमारे 5400 मतदान केंद्रे तळमजल्यावर स्थलांतरीत.
·      पहिल्या वा दुसऱ्या मजल्यावर असलेल्या मतदान केंद्रासाठी आहे, तिथे लिफ्टची व्यवस्था. 

यंत्रणा सज्ज

·      विधानसभा निवडणुकीसाठी  1 लाख 79 हजार 895 मतदान यंत्र (बॅलेट युनिट)  आणि 1 लाख 26 हजार 505 नियंत्रण युनिट (कंट्रोल युनिट) तर सुमारे एक लाख 35 हजार 21 व्हीव्हीपॅट  (व्होटर व्हेरिफायबल पेपर ऑडिट्रेल) यंत्रे पुरवण्यात आली. त्यात राखीव यंत्रांचा देखील समावेश आहे.
·      विधानसभा निवडणुकीसाठी सुमारे 6.50 लाख कर्मचाऱ्यांची नियुक्ती करण्यात आली आहे. त्यांना विशेष प्रशिक्षण देण्यात आले आहे. निवडणूक काळात कायदा व सुव्यवस्था राखण्यासाठी व शांततेत, निर्भयपणे व पारदर्शीपणे निवडणुका पार पाडण्यासाठी पोलीस दल सज्ज आहे.

 मतदान केंद्राची माहिती अशी मिळवा

·      मतदारांना एका क्लिकवर मतदान केंद्र व मतदार यादीतील त्यांची माहिती मिळविण्याची सुविधा भारत निवडणूक आयोगाच्या https://electoralsearch.in या संकेतस्थळावर उपलब्ध करून देण्यात आली आहे.
·      या संकेतस्थळावर स्वतःची संपूर्ण माहिती नमूद केल्यास माहितीचा शोध घेता येतो. माहिती भरताना नाव, वडील/पतीचे नाव, वय अथवा जन्मतारीख, लिंग, राज्य, जिल्हा, विधानसभा मतदारसंघ या बाबींचा समावेश करावा. मतदार ओळख क्रमांक व राज्याचे नाव टाकल्यानंतर मतदारांची माहिती मिळविण्याची दुसरी सुविधाही या संकेतस्थळावर आहे.

मतदारांच्या सुविधेसाठी

·      आचारसंहितेसंबंधात तक्रारी करण्यासाठी सी-व्हिजील ॲपची सुविधा उपलब्ध.
·      ईव्हीएम व्हीव्हीपॅट वाहतुक करणाऱ्या वाहनांच्या नियंत्रणाकरिता GPS Tracking App,
·      मतदारांच्या मदतीसाठी व्होटर हेल्पलाईन-1950. या क्रमांकावर एसएमएस करून मतदारांना माहिती मिळवता येईल.
·      मतदारांसाठी व्होटर हेल्पलाईन ॲपही सुरु.
·      दिव्यांग मतदारांना मतदार नोंदणी करणे, मतदान केंद्राचा शोध घेणे, व्हिलचेअरची मागणी नोंदविणे यासाठी PwD ॲपची सुविधा.

मतदानासाठी आवश्यक ओळखपत्र
·      मतदानासाठी मतदार यादीत नाव आवश्यक.
·      भारत निवडणूक आयोगाचे ओळखपत्र नसेल अशावेळी पुढील अकरा प्रकारे आयोगाने ग्राह्य केलेल्या ओळखपत्रांच्या माध्यमातून मतदारास आपला हक्क बजावता येईल.
1.  पासपोर्ट (पारपत्र)
2. वाहन चालक परवाना
3 छायाचित्र असलेले कर्मचारी ओळखपत्र (राज्य/केंद्र शासन, सार्वजनिक उपक्रम,
  सार्वजनिक मर्यादित कंपन्यांचे ओळखपत्र)
4.                       छायाचित्र असलेले बँकांचे/टपाल कार्यालयाचे पासबूक
5.                        पॅनकार्ड 
6. राष्ट्रीय लोकसंख्या नोंदणी (नॅशनल पॉप्युलेशन रजिस्ट्रेशन) अंतर्गत महसूल निर्मिती
निर्देशांक (रेव्हेन्यू जनरेशन इंडेक्स) द्वारे दिलेले स्मार्टकार्ड
7.                       मनरेगा जॉबकार्ड
8.कामगार मंत्रालयाने दिलेले आरोग्य विमा स्मार्टकार्ड
9. छायाचित्र असलेले निवृत्तीवेतन दस्तावेज
10.                   खासदार/आमदार/विधानपरिषद सदस्य यांना दिलेले ओळखपत्र
11.                    आधारकार्ड
००००

जिल्हास्तरीय युवा महोत्सवासाठी प्रवेशिका पाठविण्याचे आवाहन

कोणत्याही टिप्पण्‍या नाहीत



मुंबई, दि. 17 : मुंबई उपनगर जिल्ह्यातील कलाकारांना व्यासपीठ मिळावे व त्यांच्या कलागुणांना वाव मिळावाए यासाठी मुंबई उपनगर जिल्हा क्रीडा अधिकारी कार्यालयाच्या वतीने नोव्हेंबर  महिन्यात  जिल्हास्तरीय युवा महोत्सवाचे आयोजन करण्यात आले आहे.

मुंबई उपनगर जिल्ह्यातील सर्व शाळा- कॉलेजमधील इच्छुक कलावंत स्पर्धकांनी जास्तीत जास्त संख्येने या युवा महोत्सवाच्या स्पर्धेत सहभागी व्हावे असे आवाहन जिल्हा क्रीडा अधिकारी कार्यालयाच्या वतीने करण्यात आले आहे. ही स्पर्धा १५ ते २९ वयोगटातील कलाकारांसाठी आहे.

लोकनृत्य, लोकगीत,एकांकिका, शास्त्रीय गायन, शास्त्रीय संगीत, सितार, गिटार, बासरी, तबला, वीणा, मृदुंग, हार्मोनियम, शास्त्रीय नृत्य, मणीपूरी, ओडिसी, भरतनाट्यम, कथ्थक, कुचीपुडी, वक्तृत्व यात सहभागी होणाऱ्या कलावंतांनी 15नोव्हेंबर 2019 पर्यंत आपल्या प्रवेशिका dsomumbaisub@gmail.com या ईमेलवर पाठवाव्यात असे आवाहन करण्यात आले आहे.

नेदरलँड्सच्या शाही दांपत्याचे राजभवन येथे स्वागत

कोणत्याही टिप्पण्‍या नाहीत



मुंबई, दि. 17 : नेदरलँड्सचे राजे विलेम-अलेक्झांडर आणि राणी मॅक्सिमा  यांनी आज राज्यपाल भगत सिंह कोश्यारी यांची राजभवन येथे सदिच्छा भेट घेतली.  यावेळी शासनाच्या वतीने राज्यपालांनी शाही दांपत्याचे स्वागत केले.

नेदरलँडमध्ये अनेक भारतीय वंशाचे लोक राहत असून तेथील उद्योग, माहिती तंत्रज्ञान क्षेत्रात योगदान देत असल्याचे राजे विलेम-अलेक्झांडर यांनी सांगितले. भारतीय योग नेदरलँडमध्ये अतिशय लोकप्रिय असल्याचे त्यांनी सांगितले. यावेळी कृषी व फलोत्पादन  पायाभूत सुविधा, जागतिक पर्यावरणातील बदल, सांस्कृतिक संबंध या विषयांवर चर्चा झाली.

महाराष्ट्र औद्योगिक क्षेत्रातील गुंतवणुकीसाठी देशातील सर्वांत पसंतीचे राज्य असल्याचे राज्यपाल श्री. कोश्यारी यांनी यावेळी सांगितले.

बैठकीनंतर राज्यपालांनी  शाही दांपत्याला राजभवन परिसराची सैर करविली.
०००००

King Willem – Alexander and Queen Maxima of Netherlands meet Maharashtra Governor

Mumbai dated 17 : King Willem-Alexander and Queen Maxima of the Netherlands met the Governor of Maharashtra Bhagat Singh Koshyari at the Governor’s sea-side residence Raj Bhavan in Mumbai on Thursday (17th Oct).
King Willem – Alexander told the Governor India and Netherlands have shared a long history of trade and cooperation. He said many Indian companies, especially those from the Information Technology sector are  operating from the Netherlands.
The King said Netherland has a large population of Indian expats who are making handsome contribution to the economy of his country.
Issues of mutual cooperation in the areas of agriculture, horticulture, water and sanitation and climate change were discussed during the meeting. The King and Queen of the Netherlands were accompanied by a high level delegation.
The Governor told the royal dignitaries that Maharashtra is the most investment – friendly destination in the country offering avenues of cooperation in several areas.
The Royal visitors are currently on a State visit to India on the invitation of President of India Ram Nath Kovind. They were accompanied by the Dutch Minister of Foreign Affairs Stef Blok and a high level official delegation.
Information provided by the Consulate of the Netherlands in Mumbai
His Majesty King Willem-Alexander and Her Majesty Queen Máxima are in the Republic of India for a State Visit at the invitation of President Ram Nath Kovind. The visit is taking place from 14 to 18 October, and includes the cities of New Delhi, Mumbai and the state of Kerala. The State Visit is set to reaffirm the excellent relations between India and the Netherlands. It will focus on key sectors like water technology, maritime development, healthcare, sustainable agriculture, social initiatives & cultural heritage. The King and Queen will be accompanied on their visit by Stef Blok, Minister of Foreign Affairs & the Minister for Foreign Trade and Development Cooperation, Sigrid Kaag depending on the programs. The State Visit will have a broad parallel trade mission to India which is set to explore potential for further economic partnerships between both countries. Also visiting with the trade mission are the Minister for Healthcare, Bruno Bruins, and the State Secretary for Economic Affairs and Climate Policy, Mona Keijzer.

००००

नेदरलँडमध्ये गुंतवणूक करणाऱ्या भारतीय उद्योजकांचा नेदरलँडचे राजे विलेम-अलेक्झांडर यांच्याशी संवाद

कोणत्याही टिप्पण्‍या नाहीत



मुंबई, दि. 17 : नेदरलँडचे राजे विलेम-अलेक्झांडर व राणी मेक्सिमा यांनी नेदरलँडमध्ये गुंतवणूक करणाऱ्या भारतीय उद्योजकांशी हॉटेल ट्रायडेंटमध्ये भेट घेऊन संवाद साधला. द नेदरलँड्स फॉरेन इन्व्हेस्टमेंट एजन्सी (एनएफआयए) ही अर्थ व पर्यावरण धोरण विभागाची कार्यकारी घटक आहे. त्याचे भारतातील कार्यालय गेल्या बारा वर्षापासून कार्यरत आहे. कार्यकारी संचालक श्री. अर्नोउद बेसेलिंग त्याचे प्रमुख आहेत.

मुंबई, बंगलोर व दिल्ली येथील दूतावासात त्यांच्या कार्यशील टीम आहेत. भारतीय निर्यातीच्या एकूण वीस टक्के निर्यात ही नेदरलँडमार्गे युरोपमध्ये केली जाते व नेदरलँडला भारतासाठी युरोपचे प्रवेशद्वार समजले जाते. यावेळी मोठ्या प्रमाणात भारतीय उद्योजक उपस्थित होते.

नेदरलँड्सचे राजे विलेम-अलेक्झांडर, राणी मेक्सिमा यांच्या उपस्थितीत तिसऱ्या भारत-डच पोर्ट फोरमचे उद्घाटन

कोणत्याही टिप्पण्‍या नाहीत




मुंबई, दि. 17 : नेदरलँड‌्सचे राजे विलेम-अलेक्झांडर व राणी मेक्सिमा यांच्या उपस्थितीत तिसऱ्या भारत-डच पोर्ट फोरमचे उद्घाटन हॉटेल ट्रायडेंट येथे करण्यात आले. या वेळी झालेल्या चर्चेत जलद व टिकाऊ बंदर विकास, पर्यावरणाचे संरक्षण, समुद्री शिक्षण व धोरण इ. मुद्द्यांवर भर देण्यात आला. शाही दांपत्याने समुद्री शिक्षण या मुद्द्यावर भर असलेल्या चर्चेत सहभाग घेतला. त्याचबरोबर त्यांच्या उपस्थितीत समुद्री शिक्षणासंबंधी लेटर ऑफ इंटेंट (एलआयओ) व महाराष्ट्र मेरीटाइम बोर्ड व रॉटर पोर्ट यांच्यातील सामंजस्य करारावर सह्या करण्यात आल्या.

व्हिएनओ-एनसीडब्लूचे उपसंचालक इनेक दिझेन्त्ज हॅमिंग व मुंबई बंदर व भारतीय बंदर प्राधिकरणाचे चेअरमन श्री. संजय भाटिया यावेळी उपस्थित होते.

नेदरलँड्सचे राजे विलेम-अलेक्झांडर, राणी मेक्सिमा यांची मुंबईच्या गेट वे ऑफ इंडियाला भेट

कोणत्याही टिप्पण्‍या नाहीत



मुंबई, दि. 17 : नेदरलँड्चे राजे विलेम-अलेक्झांडर व राणी मेक्सिमा यांनी मुंबईत गेट वे ऑफ इंडियाला भेट दिली. त्यांच्या पाच दिवसीय भारत भेटीतील हा एक भाग होता. भारत व नेदरलँड यांच्यातील भूतकालीन, वर्तमान व भविष्यकालीन मैत्रीचे प्रतीक म्हणून गेट वे ऑफ इंडियाला डच राष्ट्रीय रंग असलेल्या भगव्या दिव्यांनी प्रज्वलित करण्यात आले. त्याचबरोबर डच राष्ट्रीय फूल- ट्युलिपने या परिसरात सजावट करण्यात आली. स्थानिक इतिहासकार सिमीन पटेल यांनी शाही दांपत्याला स्मारकाची माहिती दिली.

‘इंडिया अँड द नेदरलँड्स इन द एज ऑफ रीम्ब्रांत’ प्रदर्शनाचे उद्घाटन

कोणत्याही टिप्पण्‍या नाहीत




मुंबई, दिनांक. १७ : नेदरलँड्सचे राजे विलेम-अलेक्झांडर व राणी मेक्सिमा यांच्या उपस्थितीत, भारतभेटीतील एक भाग म्हणून, ‘इंडिया अँड द नेदरलँड् इन द एज ऑफ रीम्ब्रांतया प्रदर्शनाचे छत्रपती शिवाजी महाराज वस्तू संग्रहालय, मुंबई इथे उद्घाटन करण्यात आले.

शिवाजी महाराज वस्तू संग्रहालय, मुंबई व रिज्क्स म्युझियम, ॲमस्टरडॅम यांच्यातील हा एक संयुक्त उपक्रम आहे. शिवाजी महाराज वस्तू संग्रहालय, प्रदर्शन दालनात दि. १७ ऑक्टोबर २०१९ ते १६ डिसेंबर २०१९ या कालावधीत हे प्रदर्शन नागरिकांसाठी खुले असणार आहे.

शिवाजी महाराज वस्तू संग्रहालयाचे महासंचालक श्री. सब्यासाची मुखर्जी, माध्यम व विकास रिज्क्स म्युझियमचे संचालक, हेन्द्रीज क्रीबोल्दर व नेदरलँड्चे भारतीय राजदूत गिडो टीलमन यावेळी उपस्थित होते.

भारतीय अध्यात्मविचार म्हणजे सुखी जीवनाचा मूलमंत्र - राज्यपाल भगत सिंह कोश्यारी

कोणत्याही टिप्पण्‍या नाहीत


राज्यपालांच्या हस्ते कमिंग होम टू युवरसेल्फपुस्तकाचे प्रकाशन


मुंबई, दि. 16 : तणावविरहित, लोकोपयोगी चांगले जीवन कसे जगावे याचे दिशादर्शन करणाऱ्या भारतीय अध्यात्मशास्त्राकडे आज जग आकर्षित झाले आहे. अध्यात्मशास्त्र सुखी जीवन जगण्याचा मूलमंत्र देणारे असल्यामुळे ते जगापर्यंत पोहोचविण्याच्या दृष्टीने प्रयत्न झाले पाहिजे, असे प्रतिपादन राज्यपाल भगत सिंह कोश्यारी यांनी आज येथे केले.

मूळच्या अमेरिकन असलेल्या व सध्या ऋषिकेशच्या डिव्हाईन शक्ति फाउंडेशनच्या अध्यक्ष असलेल्या साध्वी भगवती सरस्वती यांनी लिहिलेल्या कमिंग होम टू युवरसेल्फया पुस्तकाचे प्रकाशन राज्यपाल कोश्यारी यांच्या हस्ते आज राजभवन येथे झाले, त्यावेळी ते बोलत होते.

कार्यक्रमाला परमार्थ निकेतनचे अध्यक्ष स्वामी चिदानंद सरस्वती, साध्वी भगवती सरस्वती, ज्येष्ठ अभिनेते अनिल कपूर, विवेक ओबेरॉय, अभिनेत्री दिया मिर्झा, पार्श्वगायक कैलाश खेर, तालवादक शिवमणी, उद्योगपती अशोक हिंदुजा व इतर मान्यवर उपस्थित होते.

राज्यपाल कोश्यारी म्हणाले, कमिंग होम टू युवरसेल्फहे पुस्तक म्हणजे स्वतःचा शोध आहे. हे केवळ पुस्तक नाही, तर जीवनाचे तत्व आणि मर्म आहे. साध्वी भगवती सरस्वती इंग्रजी भाषिक असल्या व त्यांचे पुस्तक इंग्रजी भाषेत असले, तरीही त्यातील तत्वज्ञान विशुद्ध भारतीय असल्याचेही राज्यपाल कोश्यारी यांनी यावेळी सांगितले.

कमिंग होम टू युवरसेल्फया संवादात्मक शैली असलेल्या पुस्तकामध्ये हॉलिवूड ते होली वूड’, ‘जीवनाचे इतिकर्तव्य’, ‘यश आणि अध्यात्मिक विकास’, ‘अध्यात्मिक मार्ग’, ‘नकारात्मक विचारांपासून मुक्ती’, ‘भीती आणि चिंतेतून मुक्ती’, या विषयांवर चिंतन केले असल्याचे साध्वी भगवती सरस्वती यांनी सांगितले.

शांती आपल्या स्वतःजवळच आहे. जगात कोठेही असलात तरी स्वतःच्या स्वरूपाशी जोडलेले राहा, असा संदेश चिदानंद सरस्वती यांनी दिला. यावेळी त्यांनी उपस्थितांना देश प्लास्टिकमुक्त करण्याची शपथ दिली.   

कै. बी. जी. देशमुख निबंध स्पर्धेसाठी प्रवेशिका पाठविण्याचे आवाहन

कोणत्याही टिप्पण्‍या नाहीत





मुंबई, दि. 16 : भारतीय लोक प्रशासन संस्थेच्या महाराष्ट्र विभागीय शाखेमार्फत कै. श्री. बी. जी. देशमुख वार्षिक निबंध स्पर्धेचे आयोजन करण्यात आले असून निबंधाची प्रवेशिका दि. 31 डिसेंबर 2019 पर्यंत पाठवावी, असे आवाहन संस्थेकडून करण्यात आले आहे.
          
भारतीय लोक प्रशासन संस्था, महाराष्ट्र विभागीय शाखेकडून दरवर्षी कै. श्री. बी. जी. देशमुख वार्षिक निबंध स्पर्धा आयोजित करण्यात येते. त्यानुसार सन 2019- 2020 या वर्षाच्या निबंधस्पर्धेसाठी जल व्यवस्थापन’ (वॉटर मॅनेजमेंट) आणि महाराष्ट्रातील प्रादेशिक असमानता लक्षात घेऊन राज्यातील पोषण स्थिती’ (द स्टेटस ऑफ न्युट्रिशन इन महाराष्ट्र कन्सिडरिंग रिजनल डिस्पॅरिटीज इन द स्टेट)  हे दोन विषय निवडण्यात आले आहेत. या स्पर्धेसाठी पहिले पारितो‍षिक 7 हजार 500 रुपये,  दुसरे पारितोषिक 6 हजार रुपये, तिसरे 3 हजार 500 तर उत्तेजनार्थ 2 हजार रुपयांचे पारितोषिक ठेवण्यात आले आहे.

निबंध हा ठरवून दिलेल्या कोणत्याही एका विषयावर इंग्रजी किंवा मराठीतून आणि 3 हजार ते 5 हजार शब्दमर्यादेत असावा. निबंध हा विषयानुसार विश्लेषणात्मक, संशोधनपर व पदव्युत्तर दर्जाचा असणे अपेक्षित आहे. कागदाच्या एकाच पृष्ठभागावर टंकलिखित करुन त्यावर टोपणनाव लिहून चार प्रतीत सादर करावा. स्पर्धकाने निबंधावर आपले नाव किंवा कोणत्याही प्रकारची ओळख नमूद करु नये.

निबंधाचे मूल्यमापन हे संस्थेच्या परीक्षक मंडळाकडून करण्यात येईल. पारितोषिक देण्याबाबत संस्थेचा निर्णय अंतिम राहील. संस्थेच्या वतीने यापूर्वी घेतलेल्या स्पर्धेत पारितोषिक विजेता ठरलेला किंवा उत्तेजनार्थ पारितोषक प्राप्त स्पर्धक हा लगतची तीन वर्षे या स्पर्धेत भाग घेण्यास पात्र असणार नाही.

निबंधावर टोपणनाव लिहून निबंधाच्या चार प्रती असलेला लिफाफा, टोपणनाव व त्याबाबतचे स्पर्धकाचे संपूर्ण नाव व पत्ता असलेला वेगळा लिफाफा एका मोठ्या लिफाफ्यामध्ये बंद करुन त्यावर कै. श्री. बी.जी. देशमुख वार्षिक निबंध स्पर्धा,  2019-2020 असे नमूद करावे व तो मानद सचिव, भारतीय लोक प्रशासन संस्था, महाराष्ट्र विभागीय शाखा, तळमजला, बँक ऑफ महाराष्ट्रच्या बाजूला, मंत्रालय, मादाम कामा मार्ग, हुतात्मा राजगुरु चौक, मुंबई 400032 या पत्त्यावर दिनांक 31 डिसेंबर 2019 पर्यंत पाठवावा. अधिक माहितीसाठी दूरध्वनी क्रमांक 22793430 किंवा 22024243/22854156 वर किंवा js.mrb-iipa@gov.in या ईमेलवर संपर्क साधावा, असेही आवाहन करण्यात आले आहे.
००००
सचिन गाढवे/वि.सं.अ./दि. 16.10.2019

निवडणूक काळात एक्झिट पोल जाहीर करण्यास मनाई

कोणत्याही टिप्पण्‍या नाहीत



मुंबई, दि. 16 : विधानसभा निवडणुकीच्या मतदान कालावधीमध्ये कोणत्याही प्रकारचे मतदानोत्तर चाचण्यांचे अंदाज (एक्झिट पोल) जाहीर करण्यास भारत निवडणूक आयोगाने मनाई केली आहे. याशिवाय मतदान संपण्याच्या वेळेपूर्वी अठ्ठेचाळीस तासाच्या कालावधीत कोणत्याही प्रकारचे जनमत चाचण्यांचे अंदाज (ओपिनियन पोल) जाहीर करण्यासही मनाई करण्यात आली आहे.

राज्यात दिनांक 21 ऑक्टोबर 2019 रोजी विधानसभेच्या सार्वत्रिक निवडणुकीचे तसेच सातारा लोकसभा मतदारसंघाच्या पोटनिवडणुकीचे मतदान होत आहे. या पार्श्वभूमीवर दिनांक 21 ऑक्टोबर रोजी सकाळी 7 वा. ते सायंकाळी 6.30 वाजेपर्यंत कोणत्याही प्रकारच्या मतदानोत्तर अंदाज चाचण्यांचे सर्वेक्षण आयोजित करण्यास; तसेच वृत्तपत्रे इलेक्ट्रॉनिक माध्यमे अथवा अन्य कोणत्याही प्रकारे त्यातील अंदाज (एक्झिट पोल) जाहीर करण्यास प्रतिबंध करण्यात आला आहे.

तसेच मतदानाच्या समाप्तीच्या वेळेआधी 48 तास कोणत्याही जनमत चाचणीचे अंदाज (ओपिनियन पोल) किंवा अन्य कोणत्याही निवडणूक सर्वेक्षणाचे अंदाज इलेक्ट्रॉनिक माध्यमातून प्रसिद्ध करता येणार नाहीत, असेही भारत निवडणूक आयोगामार्फत स्पष्ट करण्यात आले आहे.
००००
सचिन गाढवे/वि.सं.अ./दि.16 ऑक्टोबर 2019

मतदार जनजागृतीसाठी माध्यम संस्थांना निवडणूक आयोगाकडून पुरस्कार

कोणत्याही टिप्पण्‍या नाहीत



मुंबई, दि. 16 : लोकशाहीचा राष्ट्रीय उत्सव असणाऱ्या निवडणुकांत मतदारांनी सक्रिय सहभाग नोंदविण्यासाठी जाणीवजागृती करणाऱ्या प्रसारमाध्यम संस्थांना पहिल्यांदाच राष्ट्रीय पुरस्काराने भारत निवडणूक आयोगातर्फे गौरविले जाणार आहे. भारत निवडणूक आयोगामार्फत मुद्रित माध्यम, दूरचित्रवाहिनी, रेडिओ आणि ऑनलाईन (इंटरनेट)/सोशल मीडिया या चार गटात हे पुरस्कार देण्यात येतील.

लोकशाही बळकटीकरणासाठी 2019 मध्ये होणाऱ्या निवडणुकांत जास्तीत जास्त मतदान व्हावे, यासाठी निवडणुकीच्या संपूर्ण प्रक्रियेसंदर्भात जनजागृती, सर्वसामान्यांमध्ये मतदान जागृती व मतदार नोंदणीसाठी विशेष प्रयत्न करणाऱ्या प्रसारमाध्यम संस्थांना 25 जानेवारी 2020 रोजी होणाऱ्या राष्ट्रीय मतदार दिन कार्यक्रमात हे पुरस्कार देण्यात येतील. मतदार जागृती मोहीम, मोठ्या प्रमाणातील विशेष प्रसिद्धी, जनतेवर पडलेला प्रभाव या निकषांवर पुरस्कारांची निवड करण्यात येईल. त्यासाठी माध्यम संस्थांनी 31 ऑक्टोबर 2019 पर्यंत अर्ज करावे, असे आवाहन भारत निवडणूक आयोगाचे अवर सचिव (संवाद) श्री. पवन दिवाण यांनी केले आहे.

प्रसारमाध्यमांनी इंग्रजी आणि हिंदीमधून प्रवेशिका पाठवाव्यात. इतर कोणत्याही भाषेतून या स्पर्धेसाठी प्रवेशिका पाठवता येईल. मात्र त्यासोबत इंग्रजीतून भाषांतर केलेली प्रत सोबत जोडावी लागेल. संपर्क - श्री. पवन दिवाण, अवर सचिव (कम्युनिकेशन), भारत निवडणूक आयोग, निर्वाचन सदन, अशोका रोड, नवी दिल्ली 110001, ईमेल- media.election.eci@gmail.com, अथवा diwaneci@yahoo.co.in, दूरध्वनी क्र. 011-23052133.
००००
नंदकुमार वाघमारे/विसंअ/16.10.2019

Blogger द्वारा समर्थित.