डॉ. प्रमोद येवले यांची डॉ. बाबासाहेब आंबेडकर मराठवाडा विद्यापीठाच्या कुलगुरुपदी नियुक्ती

1 टिप्पणी

      

मुंबई, दि. 15 - राष्ट्रसंत तुकडोजी महाराज नागपूर विद्यापीठाचे प्र-कुलगुरु डॉ. प्रमोद गोविंदराव येवले यांची औरंगाबाद येथील डॉ. बाबासाहेब आंबेडकर मराठवाडा विद्यापीठाच्या कुलगुरूपदी नियुक्ती करण्यात आली आहे.

राज्यपाल तथा कुलपती चे. विद्यासागर राव यांनी आज डॉ. प्रमोद येवले यांच्या नियुक्तीची घोषणा केली.

डॉ. प्रमोद येवले यांची नियुक्ती पाच वर्षाच्या कार्यकाळासाठी अथवा ते वयाची 65 वर्षे पूर्ण करतील, यापैकी जे अगोदर असेल, त्या दिवसापर्यंत करण्यात आली आहे.

विद्यापीठाचे कुलगुरु डॉ बी. ए. चोपडे  यांचा कार्यकाळ 3 जून 2019 रोजी संपल्यामुळे हे पद रिक्त झाले होते.  कोल्हापूर येथील शिवाजी विद्यापीठाचे कुलगुरु डॉ. देवानंद शिंदे यांच्याकडे डॉ. बाबासाहेब आंबेडकर मराठवाडा विद्यापीठाच्या  कुलगुरु पदाचा अतिरिक्त कार्यभार सोपविण्यात आला होता.

डॉ. येवले यांनी औषधनिर्माणशात्र विषयात पीएचडी प्राप्त केली असून त्यांना अध्यापन, संशोधन व प्रशासनाचा व्यापक अनुभव आहे. जून 2015 साली त्यांची राष्ट्रसंत तुकडोजी महाराज नागपूर विद्यापीठाच्या प्रकुलगुरुपदी नियुक्ती करण्यात आली.

विद्यापीठाच्या कुलगुरूंच्या नियुक्तीसाठी राज्यपालांनी सर्वोच्च न्यायालयातील सेवानिवृत्त  न्यायमूर्ती अनिल दवे यांच्या अध्यक्षतेखाली निवड समिती गठित केली होती. नॅशनल इन्स्टिट्यूट ऑफ टेक्नॉलॉजी, दिल्ली या संस्थेचे संचालक प्रवीण कुमार तसेच शासनाचे प्रधान सचिव भूषण गगराणी हे या निवड समितीचे सदस्य होते.

1 टिप्पणी

  1. नेट सेट विद्यार्थीचा रिक्त पदांची भरती कधी करणार हे जरा जाहीर करावे साहेब

    उत्तर द्याहटवा