अग्निशमन दलातील अधिकारी, जवानांना राज्यपालांच्या हस्ते राष्ट्रपतींचे शौर्य, गुणवत्तापदक प्रदान

कोणत्याही टिप्पण्‍या नाहीत

मुख्यमंत्री देवेंद्र फडणवीस यांच्याकडे महाराष्ट्र अग्निशमन सेवा ध्वज सुपूर्द



मुंबई, दि. ५ :-  महाराष्ट्र अग्निशमन सेवेतील अधिकारी, जवानांना शौर्य व गुणवत्तापूर्ण सेवेसाठी राष्ट्रपतींचे पदक राज्यपाल चे. विद्यासागर राव यांच्या हस्ते आज येथे प्रदान करण्यात आले. यावेळी मुख्यमंत्री देवेंद्र फडणवीस यांची प्रमुख उपस्थिती होती.

समारंभास नगरविकास राज्यमंत्री डॉ. रणजीत पाटील, मुंबई महापालिकेचे आयुक्त अजोय मेहता, नगर विकास विभागाचे प्रधान सचिव डॉ. नितीन करीर आदी मान्यवर उपस्थित होते.

राजभवनातील दरबार हॅाल येथे झालेल्या समारंभात अग्निशमन सेवा संचालनालय व सेवा अकादमीसाठी व राज्यस्तरावर राबविण्यात येणाऱ्या जनजागृती मोहिमांच्या अनुषंगाने महाराष्ट्र अग्निशमन सेवा यासाठी निश्चित करण्यात आलेला ध्वज राज्यपाल श्री. विद्यासागर राव यांच्या हस्ते मुख्यमंत्री श्री. फडणवीस यांच्याकडे सुपूर्द करण्यात आला. यामुळे आता राज्यभर संचालनालयाचा एकाच स्वरुपाचा ध्वज दिसणार आहे.


अग्निशमन सेवेतील अधिकारी व कर्मचारी यांना त्यांच्या शौर्य व गुणवत्तापूर्ण सेवेसाठी राष्ट्रपतींच्या वतीने दरवर्षी अग्निशमन सेवा शौर्यपदक व गुणवत्तापूर्ण अग्निशमन सेवा पदक जाहीर केली जातात. त्यानुसार महाराष्ट्रातील अग्निशमन सेवा दलातील सात जणांना राष्ट्रपतींचे अग्निशमन सेवा शौर्य पदक जाहीर झाले होते. यातील पाचजणांना हे पदक मरणोत्तर जाहीर झाले होते.



काळबादेवी परिसरातील गोकुळ निवास इमारतीच्या आगीत बचाव कार्य करताना मुंबई अग्निशमन दलाचे प्रमुख अधिकारी सुनिल नेसरीकर, उपप्रमुख सुधीर अमीन, सहाय्यक विभागीय अग्निशमन अधिकारी संजय राणे, अग्निशमन केंद्र अधिकारी महेंद्र देसाई हे शहीद झाले होते. तर अंधेरीतील लोटस बिझनेस पार्क इमारतीच्या आगीत बचाव कार्यात नितीन येवलेकर शहीद झाले होते. या पाच जणांना राष्ट्रपतींचे अग्निशमनन सेवा शौर्य पदक मरणोत्तर जाहीर झाले होते. शहीदांच्या वीर पत्नींनी पदक स्वीकारले. राज्य शासनानेही या वीरांना शहीद असा दर्जा दिलेला आहे.


समारंभात मुंबई अग्निशमन दलाचे सर्जेराव बंडगर यांच्यासह अमित पडवल, मनोजकुमार एरंडे, सूर्यकांत पाटील, माणिक ओगले, विश्वनाथ लोट, आर. फर्नांडिस,  अमोल मुळीक, भूषण निंबाळकर तर नाशिक अग्निशमन दलाचे दीपक गायकवाड, देविदास इंगळे, हेमंत बेळगावकर, शिवाजी खुलगे, शिवाजी फूगट, अविनाश सोनवणे, बाळासाहेब लहानगे यांनाही शौर्यपदक प्रदान करण्यात आले. तर गुणवत्तापूर्ण सेवेसाठी मुंबई अग्निशमन दलाचे प्रभात रहांगदळे, राजेंद्र चौधरी यांच्यासह सेवानिवृत्त अधिकारी अनिल सावंत, आत्माराम यादव, वसंत पवार, रामपूजन सिंह यांनाही सन्मानित करण्यात आले.


महाराष्ट्र अग्निशमन सेवा संचालनालयाचे प्रमुख अग्निशमन अधिकारी डॉ. प्रभात रहांगदळे यांनी अहवालाचे वाचन केले.

कोणत्याही टिप्पण्‍या नाहीत

टिप्पणी पोस्ट करा