न्याय सहायक वैज्ञानिक प्रयोगशाळेत २ फेब्रुवारीपर्यंत जागृती सप्ताह

कोणत्याही टिप्पण्‍या नाहीत

मुंबई, दि. ३१ : न्याय सहायक वैज्ञानिक प्रयोगशाळांच्या कार्याची माहिती व्हावी, यासाठी राज्यातील सर्व प्रादेशिक न्यायसहायक वैज्ञानिक प्रयोगशाळांमध्ये ३० जानेवारी ते २ फेब्रुवारी या कालावधीत  न्यायसहायक जागृती सप्ताहाचे आयोजन करण्यात आले आहे. या सप्ताहामध्ये वैद्यकीय, अभियांत्रिकी, न्यायसहायक विज्ञान व विज्ञान शाखेतील विद्यार्थ्यांनी सहभागी व्हावे, असे आवाहन न्याय सहायक वैज्ञानिक प्रयोगशाळा संचालनालयाद्वारे करण्यात आले आहे.

विविध गुन्ह्यांमध्ये जप्त करण्यात आलेल्या गुन्हे विषयक नमुन्यांचे शास्त्रीय पद्धतीने विश्लेषण करण्याचे काम या प्रयोगशाळांमध्ये करण्यात येते. त्यामुळे गुन्ह्यांच्या तपासात मोठी मदत होते. राज्यात मुंबईसह नागपूर, पुणे, औरंगाबाद, नाशिक, अमरावती, नांदेड व कोल्हापूर येथे प्रादेशिक वैज्ञानिक प्रयोगशाळा कार्यरत आहेत. या प्रयोगशाळांतील कामांची माहिती विद्यार्थ्यांना  व्हावी, यासाठी या सप्ताहामध्ये या प्रयोगशाळांना विद्यार्थ्यांनी भेट द्यावी, असे आवाहन संचालनालयाने केले आहे. 2 फेब्रुवारीपर्यंत सकाळी 11 ते सायंकाळी 5 या कालावधीत विद्यार्थ्यांना मुंबई मुख्यालयातील संचालक, न्यायसहायक वैज्ञानिक प्रयोगशाळा संचालनालय, महाराष्ट्र शासन, कलिना, विद्यानगरी, सांताक्रूझ (पू) येथील प्रयोगशाळेस भेट देता येणार आहे. याद्वारे प्रयोगशाळेतील कार्याची माहिती घेता येणार असून, जास्तीत जास्त विद्यार्थ्यांनी उपस्थित रहावे, असे आवाहनही संचालनालयाने केले आहे.
००००

नंदकुमार वाघमारे/प्रिया मोहिते/31.1.2018

कोणत्याही टिप्पण्‍या नाहीत

टिप्पणी पोस्ट करा